ក្រុមមន្ត្រីបានឲ្យដឹងថា បុរសជនជាតិអង់គ្លេសអាយុ៦៣ឆ្នាំម្នាក់ត្រូវបានជនដៃដល់់កាន់កាំបិតចាក់កាលពីព្រឹកម្សិលមិញ នៅក្រៅគេហដ្ឋានរបស់គាត់ នៅក្នុងខណ្ឌមានជ័យ រាជធានីភ្នំពេញ។
លោក ជា សុខហៃ ចៅសង្កាត់ដែលបានសម្ភាសអ្នកឃើញហេតុការណ៍ បន្ទាប់ពីហេតុការណ៍នេះបានឲ្យដឹងថា ជនរងគ្រោះឈ្មោះ ប៉ាទ្រីក ហ្សឺន ប៉ាសុន (Patrick Gene Parsons) បានបើកទ្វារផ្ទះរបស់គាត់នៅក្នុងសង្កាត់ចាក់អង្រែក្រោម នៅម៉ោងប្រហែល១០ព្រឹកឲ្យបុរសវ័យក្មេងម្នាក់ ដែលនិយាយទៅកាន់បុរសជនជាតិអង់គ្លេសរូបនេះមួយស្របក់ មុនពេលចាក់ជនរងគ្រោះជាច្រើនកាំបិត ហើយបន្ទាប់មកបានជិះម៉ូតូមួយគ្រឿងដែលចតនៅទីនោះគេចខ្លួនបាត់។
លោកមានប្រសាសន៍ថា “លោក ប៉ាសុន ត្រូវបានចាក់ជាច្រើនកន្លែងត្រូវដៃ ទ្រូង និងប្រអប់ដៃរបស់គាត់ ហើយត្រូវបានបញ្ជូនទៅមន្ទីរពេទ្យបង្អែកខណ្ឌ ដើម្បីព្យាបាល ក៏ប៉ុន្តែ របួសរបស់គាត់មិនធ្ងន់ធ្ងរទេ”។
លោក សួង សំអៀត ប្រធានភូមិទូលរកា បានមានប្រសាសន៍ថា លោក ប៉ាសុន រស់នៅផ្ទះគ្រួសារមិត្តស្រីជនជាតិខ្មែរអាយុ២០ឆ្នាំរបស់គាត់។
លោកបានបន្ថែមថា លោកសង្ស័យថា អ្នកវាយប្រហារនេះប្រច័ណ្ឌនឹងស្ត្រីដែលលោក ប៉ាសុន កំពុងរស់នៅជាមួយ។ លោក លួ លីណូ នាយនគរបាលប៉ុស្តិ៍បានឲ្យដឹងថា នគរបាលកំពុងតែតាមរកជនសង្ស័យ ហើយមិនទាន់មានព័ត៌មានបន្ថែមទៀតទេ។ ស្ថានទូតអង់គ្លេសក្នុងរាជធានីភ្នំពេញមិនទាន់ឆ្លើយតបនឹងសំណើសុំព័ត៌មានបន្ថែមទៀតឡើយ៕ប៊ុននី