29 C
Phnom Penh

នាយនគរបាលអូស្ត្រាលី​ដែល​ត្រូវ​បាន​ផ្តន្ទាទោស​វិល​ត្រឡប់​មក​ធ្វើ​ការជាមួយ​អង្គការ​ក្រៅ​រដ្ឋាភិបាល

ដោយ ឌឹ ខេមបូឌា ដេលី

បទវិភាគ

យោង​តាម​​នាយក​ប្រតិបត្តិ​​អង្គការក្រៅ​រដ្ឋាភិបាល​ក្នុងស្រុក​មួយ បានឲ្យ​ដឹង​ថា អតីត​មន្ត្រី​នគរបាល​អូស្ត្រាលី​​មួយរូប ដែល​ត្រូវ​បាន​ធ្វើ​បត្យាប័ន​ពី​ប្រទេសកម្ពុជា​​កាលពី​ឆ្នាំ​២០០៧​ ដើម្បី​ឲ្យប្រឈម​នឹង​ការ​ចោទ​ប្រកាន់​ពីបទ​អំពើពុក​រលួយ​នៅ​ក្នុង​ប្រទេស​អូស្ត្រាលី​នោះ ​បាន​វិល​ត្រឡប់​​មក​ដល់​រាជ ធានីភ្នំពេញ​វិញ​ហើយ​​ និង​កំពុង​តែធ្វើ​ការ​ក្នុង​ផ្នែកការ​ពារ​កុមារ (Child Protection Unit) ហៅកាត់ CPU​ របស់អង្គការ​ក្រៅ​រដ្ឋាភិបាល​ក្នុង​ស្រុក​មួយនេះ។

លោក ស្កុត នីសុន (Scott Neeson) នាយក​ប្រតិបត្តិ​អង្គការមូល​និធិ​កុមារ​កម្ពុជា​ (Cam​bodian Childern’s Fund)  ​​បាន​លើក​ឡើង​កាល​ពីម្សិលមិញ អំឡុង​ពេល​កិច្ច​សម្ភាសមួយ​នៅ​ឯ​ការិយាល័យ​អង្គការ​របស់​លោក​ក្នុង​ខណ្ឌ​មាន​ជ័យ ​រាជធានីភ្នំពេញថា  លោក ជេម ម៉ាក់​​ ខេប (James McCabe) ដែល​បា​ន​បម្រើ​ការ​ក្នុង​កង​កម្លាំ​ងនគរបាល​អស់​រយៈពេល​១៥​ឆ្នាំ​ និង​ធ្លាប់ជា​មន្ត្រី​ម្នាក់​នៅ​ក្នុង​ប្រទេស​កម្ពុជា​ធ្វើ​ការ​នៅគណៈកម្មាធិ​ការ​ប្រឆាំង​បទ​ឧក្រិដ្ឋ​អូស្ត្រាលី​ កំពុង​តែ​ដឹក​នាំ​អង្គភាព​ការ​ពារ​​កុមារ​ដែល​​​​​​​​​​ទើប​តែ​បង្កើត​ថ្មី​របស់​អង្គការមូល​និធិ​កុមារ​កម្ពុជា​ ដែល​ធ្វើការ​ងារ​ផ្នែកស៊ើប​អង្កេត​ ​សកម្ម​​​ភាព​​រំលោភ​សិទ្ធិកុមារ​។

លោក​ នីសុន មានប្រសាសន៍ថា “លោក​​ [ម៉ាក់ខេប]  បាន​ជួយ​បង្កើត​អង្គភាព​ការពារ​កុមារ​នេះ​ ក៏​ប៉ុន្តែ លោក​មិន​មែន​ជា​និយោ​​​ជិត​របស់​​អង្គការមូល​និធិ​កុមារ​កម្ពុជា​ទេ​ លោក​​​​គឺជា​អ្នក​ពិគ្រោះ​យោបល់​​”។ លោក​បាន​ឲ្យ​ដឹង​បន្ថែម​ទៀត​ថា “មាន​បុគ្គលិកប្រហែល​១២​នាក់​នៅក្នុង​អង្គភាព​នេះ​ ធ្វើការក្រោម​ឱវាទរបស់លោក ជេម និង​លោក អាឡាន[ ឡេម៉ុន] (Alan Lemon)  ជាអតីត​នគរ​បាល​អូស្ត្រាលី​។ យើង​នៅ​តែ​ដំណើរការ​អង្គភាព​នេះ​ដោយសម្ងាត់​ខ្លាំង​ណាស់​ រហូត​ទាល់តែយើង​​ទទួល​បាន​​លទ្ធផល​​ ល្អ​​ខ្លះៗ”។

សារព័ត៌​មាន​​ Sydney Morning Herald បាន​រាយការណ៍​កាលពីខែ​មិថុនា​ឆ្នាំ​២០០៨​ថា នៅពេល​នោះ​ លោក ម៉ាក់ខេប បាន​ឡើ​ង​តុលា​​​​ការ​ក្រុង​សីុដនី​ តាម​ការ​ចោទ​ប្រកាន់​ពី​បទ​ប្លន់​ប្រដាប់​អាវុធ​ និង​រឿងគ្រឿង​ញៀន​ទាក់​ទង​នឹង​កិច្ច​ព្រមព្រៀង​គ្រឿង​ញៀន​កាលពី​ឆ្នាំ​​២០០២ ដែល​លោក និង​ដៃគូ​នគរ​បាល​របស់​លោក​បាន​បង្កើតឡើង​ ហើយ​​ក្រោយ​មកក៏បែក​ផ្លូ​វ​​​គា្ន ​​ដោយមាន​ថ្នាំ​ហ្វេ​តំ​ហ្វេ​តាមីន ដែល​គេរាយការណ៍ថា មាន​តម្លៃ​១២០.០០០ដុល្លារ​។

ក្រោយមក លោក​ ម៉ាក់ខេប បា​ន​សារ​ភាព​​​កំ​ហុស​ថា​​​ លោកពិត​ជា​​​បា​ន​លួចថ្នាំ​​ញៀន​មេ​តំ​ហ្វេតា​មីន​​ពី​​​ជនជួ​ញ​​ដូរ​គ្រឿង​ញៀន​ម្នាក់​ ​អំ​ឡុ​ង​ប្រតិបត្តិ​កា​រ​​​នគរ​​​បា​ល​ក្លែ​ង​ក្លាយ​ ហើយ​បានជាប់ពន្ធនាគារ​​ពីរឆ្នាំ​​ក្នុង​​ប្រទេ​ស​​​អូ​ស្ត្រា​លី​។

លោក​ នីសុន ដែល​មានអង្គការ​ក្រៅ​រដ្ឋាភិ​បាល​មួយថែទាំ​សិស្ស​ជាង​១.៨០០នាក់​​នៅ​ក្នុង​ប្រទេស​កម្ពុជា​ លើកឡើងថា លោក​មិន​បាន​ត្រៀម​ជួល​​អតីត​មន្ត្រី​នគរបាល​ដែល​ជាប់​ទោស​នោះ​ទេ​។ លោក​ នីសុន​ បាន​មានប្រសាសន៍​ ទាក់ទង​នឹង​ការ​ធ្វើ​បត្យាប័ន​លោក ម៉ាក់ខេប ទៅ​​​ប្រទេស​​​​​​​​​​​​​​អូស្ត្រាលី​ បន្ទាប់​ពីលោក​ត្រូវ​បាន​នគរបាល​កម្ពុជា​ចាប់​ខ្លួន​នៅ​ក្នុង​រាជ​​​ធានី​​​ភ្នំពេញ​កាល​ពី​ថ្ងៃ​ទី ២២​ ខែមិថុនា ឆ្នាំ​២០០៧​ ​​​តាម​សំណើ​របស់​ស្ថាន​ទូត​អូស្ត្រាលី​ថា “ ខ្ញុំ​ស្គាល់​​ គាត់​មុន​ការ​ចោទ​ប្រកាន់​កើត​ឡើង​…។​​​​ខ្ញុំ​មិន​ដឹង​អំពីរឿង​រ៉ាវ​របស់​គាត់​ទេ​ ក៏​ប៉ុន្តែ គាត់​​​​មាន​តម្លាភាព​ណាស់​ជាមួយ​ខ្ញុំ ហើយ​គាត់​​បាន​ត្រឡប់​​ទៅ​ប្រទេស​អូស្ត្រាលីវិញ​ ដើម្បី​ទទួល​ទោស”។

​លោក​ នីសុន បាន​មានប្រសាសន៍​បន្ត​ថា “ មិនមាន​​មនុស្ស​ច្រើនទេ​ ដែល​អ្នក​សប្បាយ​ចិត្ត​ជួយនៅទីនេះ និង​ធ្វើ​ឲ្យអ្នក​មាន​​​អារម្មណ៍​​​​ថា មាន​សុវត្តិភាព​នោះ ក៏​ប៉ុន្តែ [លោក ម៉ាក់​​​ខេប] គឺជា​មនុស្ស​ម្នាក់​ក្នុង​ចំណោម​ពួក​គេ​​។​ ខ្ញុំជឿ​ជាក់​លើ​គាត់​”។​ លោក​ នីសុនក៏​បាន​លើកឡើង​ដែរ​ថា ម្ចាស់​​ជំនួយ​ អ្នក​ឧបត្ថម្ភ និង​សមាជិក​​គណៈ​​​កម្មាធិ​ការ​នាយក​ទាំង​អស់​របស់​អង្គការ​នេះ​បាន​ដឹង​អំពី​តួនាទីរបស់​លោក ម៉ាក់ខេប និង​ប្រវត្តិ​របស់​លោក​។ គួររំឭក​ថា  មុន​ពេល​បង្កើត​​មូល​និធិ​កុមារ​កម្ពុជា​ក្នុង​ឆ្នាំ​២០០៣ លោកនីសុន ធ្លាប់ជា​ប្រធាន​​ផលិត​កម្ម​ 20th Century Fox International  នៅ​ហូលីវូដ។

លោកបានបន្ត​ថា “ពិតណាស់ អ្នក​រាល់គ្នា​[ដឹងអំពីតួនាទីរបស់​លោក ម៉ាកខេប នៅ​អង្គភាពការពារកុមារ និង​អតីតកាលរបស់​គាត់​]”។ ​លោក​បានបន្ថែមថា លោក ម៉ាក​​​ខេប បានវិល​ត្រឡប់​មក​ប្រទេស​កម្ពុជាវិញ នៅដើមឆ្នាំ​២០០៣។ លោក​បាន​ថ្លែង​បន្ថែមថា “ យើង​មាន​សមាជិកនៅ​ក្នុង​គណៈកម្មាធិការ​គ្រប់គ្រង​របស់​យើង​ រាប់​ទាំង លោក ចន ប៉ាស្កូ (John Pascoe) ប្រធាន​សហ​​​ព័ន្ធ​ឧត្តម​ក្រុមប្រឹក្សា​ក្នុង​ប្រទេស​អូស្ត្រាលី និង​លោក ចន ហ្គេដិន (John Geden) ធ្វើការ​ក្នុង​អង្គភាព​ប្រឆាំង​នឹង​ការ​កេង​ប្រវ័ញ្ចកុមារអង់​គ្លេស ដែល​ជា​មនុស្ស​មានស្មារតីប្រុង​ប្រយ័ត្នខ្ពស់…ពួកគេ​សុទ្ធតែស្គាល់​លោក​ ជីម [ម៉ាក់ខេប] ។ ពួក​គេ​ទាំង​អស់​គ្នាបាន​ជួប​គ្នា​…។ គ្មាន​ការ​សម្ងាត់​នោះ​ទេ​”។

ក្នុងឆ្នាំ​២០០២​ ពេលកំពុង​ធ្វើការ​ឲ្យ​​គណៈ​​​​​​​​​កម្មាធិការ​ប្រឆាំង​បទល្មើស​អូស្ត្រាលី​ លោក ម៉ាក់ខេប ត្រូវ​បាន​​បញ្ជូន​មក​កម្ពុជា​ដើម្បីធ្វើការ​ក្នុង ប្រតិបត្តិការ​ប្រឆាំង​​ការ​ជួញ​ដូរ​គ្រឿង​ញៀន។​ នៅពេល​នោះគាត់​ទទួល​បាន​ទំនាក់​ទំនង​ដែល​លោក នីសុន លើក​ឡើង​ថា ធ្វើ​ឲ្យ​គាត់​ជាមនុស្ស​សំខាន់​ក្នុង​ការ​បង្កើត​អង្គភាពការ​ពារ​កុមារនេះ​។

លោក​ នីសុន បាន​មានប្រសាសន៍​ទាក់ទង​នឹងឧក្រិដ្ឋ​កម្ម​​ប្រឆាំង​កុមារ​ថា “យើង​ចង់​ទទួល​មនុស្ស​​ល្អបំផុត​ ដែល​អាច​មាន​​​ការ​​​យល់​​​​​​ដឹង​អំពីអ្វីដែលជាទិដ្ឋ​ភាព​ឧក្រិដ្ឋ​កម្ម​ដ៏អាក្រក់នៅ​ទីនះ។ លោក ម៉ាក់ខេប គឺជា​​​មនុស្ស​ល្អ​បំផុត ដែល​​ធ្វើ​ការ​ជាមួយ​នគរបាល​ជាតិ​កម្ពុជា​ដើម្បីទទួល​នូវកិច្ច​​សហប្រតិបត្តិ​ការ និង​ផ្តល់​ការងារ​​ត្រឹម​ត្រូវ​នៅ​តាម​ទី​​​កន្លែង​​​​​​ធ្វើការ​​”។ ​លោក​​បន្ថែម​ថា អង្គភាព​ការ​ពារ​​​កុមារ​បច្ចុ​ប្បន្ន​នេះកំពុង​តែ​សហការ​ “យ៉ាង​​​​​​​ជិត​ស្និទ្ធ​ជាមួយ​ក្រសួង​មហាផ្ទៃ​”។

ទោះជាយ៉ាង​ណា​ លោក​​ឧត្តម​សេនីយ៍​ឯក​ ខៀវ​ សុភ័គ អ្នក​នាំពាក្យ​ក្រសួង​មហា​ផ្ទៃ​បាន​លើក​ឡើង​កាល​ពីម្សិ​លមិញថា លោក​មិន​បានដឹងអំពី​លោក​ ម៉ាក់ខេប ឬ​អង្គភាព​ការ​ពារ​របស់​អង្គការមូល​និធិ​កុមារ​កម្ពុជា​ទេ​។ លោក កែវ​ ធា នាយ​នគរបាល​ប្រឆាំ​ង​​ការ​​​​​​​ជួញ​ដូរ​មនុស្ស​រាជធានីភ្នំពេញ​ក៏​បាន​លើក​ឡើង​ដែរថា មន្ទីររបស់​លោក​មិន​បាន​ធ្វើ​ការ​ជាមួយ​លោក​ ម៉ាក់ខេបទេ​។​លោក​បាន​បន្តថា “ ខ្ញុំឮឈ្មោះលោក ម៉ាក់ខេប ក៏​ប៉ុន្តែ​ មិន​បាន​ធ្វើការ​ជាមួយ​គាត់​ទេ​” ។

នៅពេលលើកទូរស័ព្ទកាល​ពីម្សិលមិញ​ លោក​ ម៉ាក់ខេប បាន​បដិសេធ​មិន​ធ្វើ​​​អត្ថា​​​ធិប្បាយ​​អំពី​តួនាទីរបស់​លោក​នៅក្នុង​អង្គ​​​ការមូល​និធិ​ការពារ​កុមារ​ទេ​ ហើយ​បាន​បង្វែរ​​​​សំណួរ​ទៅ​ឲ្យ​ថ្នាក់​លើ​របស់លោក​ក៏ប៉ុន្តែ ​លោក​មិន​ប្រាប់ឈ្មោះ​ថ្នាក់លើ​ទាំង​នោះទេ។ លោក​ ម៉ាក់​ខេប បាននិ​យាយ​ថា​ “ធ្វើ​​​​​​​អ្វី​ ដែ​ល​អ្នក​ត្រូវ​ធ្វើ​ គ្រាន់តែ​​ធ្វើ​ក្នុង​រង្វង់​​​ច្បាប់​ទៅ​”៕ ប៊ុននី

(រាយាការណ៍​បន្ថែម​ដោយ​ ឃី សុ​វុឌ្ឍី​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស