28 C
Phnom Penh

សហភាពអឺរ៉ុប​ផ្តល់​ជំនួយផ្នែកបច្ចេកវិទ្យាដល់​កម្ពុជា​ដើម្បីប្រឆំាង​នឹងអាវុធ​មហាប្រល័យ

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ សហភាពអឺរ៉ុប​បាន​ចុះ​ហត្ថលេខា​លើកិច្ច​ព្រម​ព្រៀង​មួយ​ជាមួយ​រដ្ឋាភិបាល​ ដើម្បី​ផ្តល់​ឲ្យ​ប្រទេស​កម្ពុជា​នូវ​ឧប​ករណ៍​រាវ​រកការសាយ​ភាយ​វិទ្យុសកម្មនិង​បច្ចេកវិទ្យា​ប្រឆាំង​ភេរ​វកម្ម​ដើម្បីស្វែងរក​ការ​ជួញ​ដូរ​ឬការ​ប្រើប្រាស់​សម្ភារ​នុយ​ក្លេអ៊ែ​រ​និ​ងវិទ្យុ​សកម្ម​ដោយខុស​ច្បាប់​ នៅ​តាម​ប៉ុស្តិ៍​ត្រួត​ពិនិត្យ​ព្រំដែន​របស់​ប្រទេស​នេះ។

ឯកអគ្គ​រដ្ឋទូតស​ហភាពអឺរ៉ុប​ប្រចាំកម្ពុជា លោក ហ្សង់ ហ្វ្រង់​ស័រ កូតាំង (Jean Francois Cautain) និង​លោក ឱម យ៉ិនទៀង អនុ​ប្រធាន​​នៃលេខាធិការ​ដ្ឋាន​នៃគណៈកម្មាធិ​ការ​ជាតិ​ប្រឆាំង​ភេរវកម្ម​បាន​ចុះ​ហត្ថលេខា​លើកិច្ច​ព្រម​ព្រៀង​នេះ ដែល​នឹងផ្តល់​ឧប​ករណ៍​រាវ​រកវិទ្យុសកម្ម​ និង​ប្រព័ន្ធ​ទំនាក់​ទំនង​គ្រា​អាសន្ន​ដំឡើង​នៅ​ឯ​​ផែទន្លេ​ថ្មី​ក្នុង​រាជធានី​ភ្នំ​ពេញ ព្រមទាំង​​អាកាសយាន​ដ្ឋាន​អន្តរ​ជាតិ​ភ្នំពេញ​ និង​អាកាសយានដ្ឋាន​អន្តរជាតិ​សៀម​​រាប​ផងដែរ។

លោក ហ្សង់ ហ្វ្រង់​ស័រ កូតាំង ​បាន​មាន​ប្រសាសន៍ថា “លោក​រីករាយ​ណាស់​ដែល​ប្រទេស​កម្ពុជាប្តេជ្ញា​ការ​ពារ​ព្រំដែន​របស់​ខ្លួន​​ ពីកត្តា​គំរាម​កំហែង​ពីអាវុធប្រល័យ​លោក​​(WMDs) ដែល​សហភាព​អឺរ៉ុប​ប្តេជ្ញា​ផ្តល់នូវ​សុវត្ថិភាព និ​ងសន្តិសុខ​ដល់ពិភពលោក​ ហើយ​វត្ត​មាន​របស់អាវុធ​មហាប្រល័យនេះ គឺ​ជា កត្តា​គំរាម​កំហែង​​ដ៏ធំបំផុត​ចំពោះ​សន្តិសុខ​របស់​សហភាពអឺរ៉ុប​។

លោកបាន​មានប្រសាសន៍ថា “វាជាកត្តា​គំរាម​កំហែង​ពិភពលោក​ ដែលមានផល​វិបាក​​រយៈ​ពេល​វែង​សម្រាប់​វិស័យ​ពាណិ​ជ្ជកម្ម​​ សុខភាព​សាធារ​ណៈ​ និង​សន្តិសុខ​ពិភពលោក ហើយដោយសារតែ​ចារឹត​នៃកត្តា​គំរាម​កំហែងអន្តរ​ប្រទេសទាំង​នេះ​ហើយ ទើប​យើង​​ត្រូវ​តែ​មាន​កិច្ច​សហការ​​ឆ្លង​ដែន​ផងដែរ”។

លោក កូតាំង បាន​ពោល​សង្កត់ន័យ​ថា​តាម​លោកដឹង​ ប្រទេស​កម្ពុជា​មិន​ធ្លាប់​ឆ្លង​កាត់​ការ​ប៉ុន​ប៉ង​ណាមួយ​ក្នុងការ​ដឹកជញ្ជូន​​សម្ភារ​វិទ្យុ​សកម្ម​កាត់​តាម​ព្រំដែន​របស់​ខ្លួនទេ​ ក៏ប៉ុន្តែ លោក​បាន​សង្កត់ធ្ងន់​ថា កំណើត​នៃ​សហ​គមន៍​អាស៊ាន​ក្នុង​ឆ្នាំ​២០១៥​បញ្ជាក់​អំពី​សារៈសំខាន់​នៃកិច្ច​សហ​ប្រតិបត្តិការ​តាម​តំបន់​ ​ក្នុងការទប់​ស្កាត់កត្តាគំរាម​​កំហែង​បែប​នេះ។

លោក ឱម​ យ៉ិនទៀង បាន​លើក​ឡើង​កាល​​ពីម្សិល​មិញថា ក្នុងឆ្នាំ​២០១១ សហរដ្ឋ​អាមេរិក​បាន​ដំឡើង​ម៉ាស៊ីន​ស៊្កែនវិទ្យុ​សកម្ម​មាន​តម្លៃ​៦​លាន​ដុល្លារ​នៅ​ឯ​កំពង់​ផែ​ស្វយ័ត​ក្រុងព្រះ​សីហនុ​​ និង​បាន​ផ្តល់​មូល​និធិ​សម្រាប់​​បណ្តុះ​បណ្តាល​បុគ្គលិក​ និង​ការ​ប្រើ​របស់​ខ្លួន​រហូតដល់​ឆ្នាំ​២០១៥​ ជា​​ពេលវេលាដែល​កំពង់​ផែនេះ​​អាចនឹង​គ្រប់​គ្រង​ប្រតិបត្តិការ​ពេញ​លេញ​បាន​។

លោក​បាន​មានប្រសាសន៍ថា “តាម​ពិត​ទៅ ភេរវ​កម្ម​មិន​មែន​ជាបញ្ហា​មួយ​សម្រាប់​កម្ពុជា​នោះ​ទេ​ ហើយ​ខ្ញុំ​ធានា​ថា​ ប្រទេស​នេះ​មិន​មែន​​ជា​គោល​ដៅ​សម្រាប់​ភេរវករ​ឡើយ​​ ក៏ប៉ុន្តែ មាន​ផល​ប្រយោជន៍​ច្រើន​​ក្នុង​រឿង​នេះ​ ​សម្រាប់​ស្ថានទូត​នានា​ ហើយ​ភ្ញៀវ​ទេសចរ​​បស្ចិម​ប្រទេស​ដែល​ជាភ្ញៀវ​ ក៏​ដូច​ជា​ម្ចាស់​លំនៅ​ដ្ឋាន​ផង​ដែរ​ ដូច្នេះ រដ្ឋាភិបាល​ត្រូវ​តែការពារ​ពួក​គេ​ពី​ភេរវករ​”។

លោក ឱម យ៉ិនទៀង បាន​មានប្រសា​សន៍​​​បន្ត​ទៀត​​ថា “សំខាន់​ណាស់​ដែល​យើង​ត្រូវ​ទប់​ស្កាត់​ភេរវ​ករ​មិន​ឲ្យ​គិត​ថា កម្ពុជា​ជា​ឋាន​សួរ​មួយ​ដែល​ពួក​គេ​អាច​ជួប​ប្រជុំសម្ងាត់​ និង​រៀបចំ​ផែន​ការ​វាយ​ប្រហារទៅលើ​ប្រទេស​ផ្សេងៗ​ទៀត​”។ លោក​បាន​លើក​ឡើង​បន្ថែម​ថា រដ្ឋាភិបាល​ចាំ​បាច់​ត្រូវ​តែ​បង្ក្រាប​ផ្ទះសំណាក់​ណា​ ដែល​អនុ​ញ្ញាត​ឲ្យ​ភ្ញៀវ​ស្នាក់​នៅ ដោយ​មិន​បង្ហាញ​ឯកសារអត្ត​សញ្ញាណ​ ពីព្រោះទាំង​នេះគឺជា​ទីកន្លែង​ដែល​ពួក​ភេរ​វជន​​ស្នាក់​នៅ​៕ ប៊ុន​នី​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស