27 C
Phnom Penh

បម្រាម​មិន​ឲ្យ​រថយន្ត​ធុនធ្ង​ន់​បើក​ចូល​​ក្រុង​បណ្តាលឲ្យប៉ះពាល់​ដល់​ការ​នាំចេញ

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​កាល​ពីម្សិល​មិញ​ថា កំពង់​ផែ​ស្វយ័ត​ភ្នំពេញ​បាន​ស្នើឲ្យ​សាលា​រា​ជ​ធានី​កាត់​បន្ថយ​ចម្ងាយ​នៃ​បម្រាម​ប្រចាំ​ថ្ងៃរបស់ខ្លួន​ដែល​ហាម​រថ​យន្ត​​កុង​តឺន័រមិន​ឲ្យ​បើក​បរ​នៅ​តាម​ផ្លូវ​នានា​ក្នុង​រាជ​ធានី​ភ្នំពេញ​ចាប់​ពី​ម៉ោង​៥ព្រឹក​ដល់​ម៉ោង​៩យប់ ពីព្រោះ​ទំនិញ​មិន​អាចទៅ​ដល់​កំពង់​ផែឡើយ បណ្តាល​​ឲ្យ​ការ​នាំ​ចេញ​មាន​ការ​ធ្លាក់​ចុះ។

បម្រាមនេះ​ត្រូវ​បាន​អនុវត្ត​កាលពី​ថ្ងៃទី​១ ខែ​វិច្ឆិកាតាម​សេចក្តី​សម្រេច​របស់​លោក ប៉ា សុជាតិវង្ស អភិបាល​រាជ​ធានី​ភ្នំពេញ ដែល​បាន​អនុម័ត​​យល់​ព្រម​លើ​សេចក្តី​សម្រេច​នេះដើម្បី​កាត់​បន្ថយ​ការ​កក​ស្ទះ​ចរាចរណ៍​នៅកណ្តាល​ក្រុង។

លោក អ៊ាង វេងស៊ុន អនុប្រធាន​កំពង់​​ផែ​ស្វយ័ត​ភ្នំពេញ​មាន​ប្រសា​សន៍​ថា “ខ្ញុំ​យល់​​ថា បម្រាម​នេះ​គឺ​មិន​អនុញ្ញាត​ឲ្យ​រថ​យន្ត​ធុន​ធ្ងន់​បើក​ចូល​ក្រុង​ ដើម្បី​កា​ត់​បន្ថយ​គ្រោះ​ថ្នាក់​ចរា​​​​​​ចរណ៍ និង​ការ​កក​ស្ទះ​ចរាចរណ៍ ប៉ុន្តែ​វា​​​ប៉ះ​​​ពាល់​ដល់​ការ​នាំ​ចេញ​របស់​យើង​ ពី​ព្រោះ​ យើង​កំណត់​ពេល​នាំ​ចេញ​ទំនិញ​បួន​លើក             ​ក្នុ​ង​​​មួយ​ខែ​អំឡុង​​ពេលម៉ោង​ទាំង​នោះ​។ ឥឡូវ​​​នេះ​យើង​ត្រូវ​ដឹក​ទំនិញ​តាម​យន្ត​ហោះ”។

លោក វេងស៊ុន បាន​មាន​ប្រសា​សន៍ថា កំពង់​ផែ​ចង់​ឲ្យ​សាលា​រាជ​ធានី​ភ្នំពេញ​​ផ្លាស់​ប្តូរ​ម៉ោង​បញ្ចប់​ក្នុង​បម្រាម​នោះ​ពី​ម៉ោង​៩យប់ មក​​ម៉ោង​​៦និង​៣០​នាទី​យប់​វិញ។​លោក​​បាន​បន្ថែម​ថា ប្រធាន​រដ្ឋ​បាល​របស់​លោក​​បាន​ជួប​ប្រជុំ​ជាមួយសាលារាជ​ធានី​រួច​ហើយ​ដើម្បី​ពិភាក្សា​អំពី​បញ្ហានេះ។ លោក​បានមាន​​ប្រសាសន៍ថា “ កាលពី​ថ្ងៃពុធ យើង​បាន​ស្នើឲ្យ​មន្ត្រី​រដ្ឋបាល​សាលា​រាជ​ធានី សុំឲ្យ​លោក​អភិបាល​រាជ​ធានី​​ផ្តល់​ពេល​វេលាបន្ថែម​ទៀត​សម្រាប់​រថយន្ត​ធុន​ធ្ងន់​បើក​ចូលក្រុង​ និង​បើក​ទៅកាន់​កំពង់​ផែ ពីព្រោះ​បម្រាម​នេះ​ប៉ះ​ពាល់​ដល់​ការ​នាំ​ចេញ​​​​នៅ​កំពង់​ផែ​នេះ”។

នៅពេល​ទាក់​ទង​កាលពី​ម្សិលមិញ លោក​  ប៉ា សុជាតិវង្ស​ បាន​មាន​ប្រសា​សន៍ថា សាលា​រាជ​ធានី​នឹង​ពិនិត្យ​មើល​ដើម្បី​ស្វែង​រក​ដំណោះ​ស្រាយ។
លោក​បាន​មាន​ប្រសាសន៍ថា “យើង​នឹង​ស្វែង​រក​ការ​សម្រប​សម្រួល​ដើម្បី​ផ្ត​ល់​អាទិ​ភាព​ដល់​កំពង់​ផែ​ ដើម្បី​ឲ្យ​កំពង់​ផែនេះមាន​ពេល​វេលា​ច្រើន​ជា​ងមុន​សម្រាប់​រថយន្ត​​កុង​តឺន័រ ពីព្រោះក្នុង​ករណី​នេះ​ យើង​យល់​ថា ការ​ពង្រឹង​ច្បាប់​ចរា​ចរណ៍​ប៉ះពាល់​ដល់​ការ​នាំចេញ ហើយ​ក៏បាត់​បង់​ប្រាក់​ចំណូល​របស់​រដ្ឋផង​ដែរ”។

លោក​បាន​​មាន​ប្រសាសន៍ថា ដំណោះ​ស្រាយ​មួយ​សម្រាប់​សាលា​រាជ​ធានី​គឺ​ត្រូវ​អនុញ្ញាត​ឲ្យ​រថយន្ត​កុង​​តឺន័រ​បើក​បរ​តាម​ផ្លូវ​មួយ​ចំនួន​​ក្នុង​រាជ​ធានី​ចាប់ពី​ម៉ោង​​៨យប់​ ដល់​ម៉ោង​៥ព្រឹក និង​ចាប់ពី​ម៉ោង​៩ព្រឹក ដល់​ម៉ោង៣រសៀល។ លោក​បាន​មាន​ប្រសាសន៍ថា “យើង​នឹង​រៀប​ចំ​កិច្ច​ប្រជុំ​មួយ​នៅ​ថ្ងៃ​ស្អែក​ជាមួយ​មន្ត្រី​កំពង់​ផែ​ស្វយ័តភ្នំពេញ​ដើម្បី​ពិភាក្សា​អំពី​បញ្ហានេះ”។

លោក សូ ងួន ប្រធាន​ក្រុម​ហ៊ុនដឹក​ជញ្ជូន​ សូ ងួន​ គ្រុប​ បាន​មាន​ប្រសាសន៍ថា រថយន្ត​កុងតឺន័រ​របស់​ក្រុម​ហ៊ុន​លោក​​ប្រឈម​នឹង​បញ្ហា​មួ​យ​ចំនួន​ក្នុង​ការ​ដឹក​ជញ្ជូន​ទំនិញ​ទៅ​កាន់​កំពង់​ផែ ប៉ុន្តែ បាន​​ផ្លាស់ប្តូរ​ម៉ោង​ធ្វើការ​ពីពេល​ថ្ងៃ​ទៅ​ពេល​យប់វិញដើម្បី​អនុវត្ត​តាម​​បម្រាម​នេះ។ការ​ស្ទះ​ចរាចរណ៍នៅតាម​ផ្លូវ​ក្នុង​រាជ​ធានី​ភ្នំពេញ​គឺ​ជាបញ្ហា​រាប់​ឆ្នាំ​មក​ហើយ  ហើយ​បន្ត​ ជា​បញ្ហា​តទៅទៀត​​ ពីព្រោះ​​ប្រជា​ពល​រដ្ឋ​ខ្មែរ​​កាន់តែ​ច្រើន​ឡើង​ៗ​ទិញ​រថយន្ត​​ប្រើ​ប្រាស់​៕ សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស