27 C
Phnom Penh

ក្រសួង​​​ធនធាន​​​ទឹក​​​អំពាវ​​​នាវ​​​ឲ្យ​​​មាន​​​ការ​​​ស៊ើប​​​អង្កេត​​​លើ​​​ការ​​​នាំ​​​ចេញ​​​ខ្សាច់​​​ទៅកាន់​​​ប្រទេស​​​ឥណ្ឌា

ដោយ ឌឹ ខេមបូឌា ដេលី

បទវិភាគ

លោក លឹម គានហោ រដ្ឋមន្ត្រី​​​ក្រសួង​​​ធនធាន​​​ទឹក​​​និង​​​ឧតុនិយម​​​បាន​​​ឲ្យ​​​ដឹង​​​កាល​​​ពី​​​ម្សិល​​​មិញ​​​ថា លោក​​​នឹង​​​អំពាវ​នាវ​ឲ្យមាន​​​ការ​​​​​​ស៊ើប​​​អង្កេត​​​លើ​​​ខ្សាច់​​​ទន្លេ ​​​បើ​​​គិត​​​ជា​​​ទឹក​​​ប្រាក់​​​ប្រមាណ​​​១,៥លាន​​​ដុល្លារ​​​ ដែល​​​ត្រូ​​​វបាន​​​នាំ​​​ចេញ​​​ទៅកាន់​​​ប្រទេស​​​ឥណ្ឌា កាលពី​​​ខែ​​​មេសា។  ការ​​​នាំ​​​ចេញ​​​ខ្សាច់នេះ នៅ​​​តែកើត​​​មាន​​​ ទោះ​​​បី​​​ជា​​​មាន​​​បម្រាម​​មិន​​​ឲ្យ​​​នាំ​​​ចេញ​​​ខ្សាច់​​​ដែល​​​លោក​​​នាយករដ្ឋមន្ត្រី​​​ ហ៊ុន សែន បាន​​​ចុះ​​​ហត្ថលេខា​​​កាលពី​​​ឆ្នាំ​​​២០០៩ក៏​​​ដោយ។

កាសែត​​​ Deccan Chronicle របស់​​​ប្រទេស​​​ឥណ្ឌា​​​បាន​​​រាយការណ៍​​​ កាលពី​​​សប្តាហ៍​​​មុន​​​ថា មាន​​​ខ្សាច់​​​ទន្លេរបស់​​​ប្រទេស​​​កម្ពុជា​​​ ប្រហែល​​​៣០.០០០តោន កំពុង​​​ជាប់​​​គាំង​​​​​​នៅ​​​​​កំពង់ផែ ​​​Cochin ​​​ភាគ​​​ខាង​​​ត្បូង​​​ប្រទេស​​​ឥណ្ឌា ជាង​​​ប្រាំ​​​មួយ​​​ខែ​​​មក​​​ហើយ​​​ ដោយ​​​ត្រូវ​​​បាន​​​បដិសេធ​​​​​​ជា​​​ច្រើន​​​ដង​​​ដោយ​​​សារ​​​គ្មាន​​​ការ​​​អនុញ្ញាត​​​ពី​​​គយ​​​​​​។

ឯកសារ​​​ទាក់ទិន​​​នឹង​​​ករណី​​​នេះ​​​របស់​​​តុលាការ​​​ជាន់​​​ខ្ពស់​​​រដ្ឋ​​​ Lerala របស់​​​ឥណ្ឌា បាន​​​បង្ហាញ​​​ថា ខ្សាច់​​​ទន្លេនេះ​​​ត្រូវ​​​បាន​​​ដឹក​​​ចេញ​​​ពី​​​ខេត្ត​​​កោះ​​​កុង​​​។ លោក លឹម គានហោ បាន​​​លើក​​​ឡើង​​​ថា លោក​​​ចង់​​​ឃើញការ​​​​​​នាំ​​​ចេញ​​​ខ្សាច់ទាំង​​​នេះ​​​ត្រូវ​​​បាន​​​ស៊ើប​​​អង្កេត​​​ ប៉ុន្តែ លោក​​​បាន​​​ពន្យល់ថា គណៈ​​​កម្មាធិការ​​​គ្រប់គ្រង​​​ខ្សាច់​​​នៅក្នុង​​​ក្រសួង​​​របស់​​​លោកគ្មាន​​​អំណាចឡើយ គឺបាន​​​​​​ត្រឹម​​​តែ​​​ស្នើ​​​ឲ្យការ​​​ស៊ើប​​​អង្កេត​​​​​​​​​ប៉ុណ្ណោះ ​​។

លោក​​​បាន​​​​​​ថ្លែង​​​ដោយ​​​សំដៅ​​​ទៅ​​​លើ​​​លោក ហ៊ុន សែន​​​​​​ ថា “គណៈ​​​កម្មាធិ​​​ការ​​​របស់​​​យើង​​​មិន​​​មាន​​​សមត្ថកិច្ច​​​ធ្វើការ​​​ស៊ើប​​​អង្កេត​​​លើ​​​រឿងនេះ​​​ទេ ប៉ុន្តែ ខ្ញុំ​​​នឹង​​​ដាក់​​​ជូន​​​សំណើ​​​នេះ​​​ទៅកាន់​​​សម្តេច​​​នាយក​​​រដ្ឋ​​​មន្ត្រី”។ លោក​​​បានបន្ត​​​ថា “ខ្ញុំ​​​នឹង​​​ចាប់​​​ផ្តើម​​​រឿង​​​នេះ​​​ក្នុងពេល​​​ឆាប់ៗ ប៉ុន្តែ ខ្ញុំ​​​ត្រូវ​​​រង់​​​ចាំ​​​ភ័ស្តុតាង​​​​​​ច្បាស់​​​លាស់​​​ជាមុន​​​សិន ពាក់​ព័ន្ធ​នឹង​ការ​នាំ​ចេញ​​​នេះ”។

លោក​​​​​​មាន​​​ប្រសាសន៍​​​បន្ថែម​​​ទៀត​​​ដោយ​​​បដិសេធ​​​មិន​​​និយាយ​​​ថា តើ​​​ពេល​​​ណា​​​លោក​​​នឹង​​​​​​បញ្ជូន​​​សំណើសុំ​​​ឲ្យ​​​មាន​​​​​​ការ​​​ស៊ើប​​​អង្កេត​​​នេះពិត​​​ប្រាកដ​​​​​​ទៅកាន់​​​លោក ហ៊ុន សែន ថា  “យើង​​​មាន​​​វិធានការ​​​​​​ស្រាវ​​​ជ្រាវ​​​​ ហើយ​​​បន្ទាប់​​​មក​​​នឹង​​​ស្នើ​​​ឲ្យ​​​មាន​​​ការ​​​ស៊ើប​​​អង្កេត​​​”។ លោក លឹម គានហោ បាន​​​បញ្ជូន​​​សំណួរ​​​​​​​​​អំពី​​​​​​ការ​​​នាំ​​​ចេញ​​​ខ្សាច់​​​ទន្លេនេះ​​​បន្តទៅកាន់​​​អគ្គនាយក​​​ដ្ឋាន​​​ពន្ធដារ នៅក្រសួង​​​សេដ្ឋកិច្ច​​​ហិរញ្ញវត្ថុ​​​ ដោយលោក​​​បាន​​​លើក​​​ឡើង​​​ថា ក្រសួង​​​របស់​​​លោក​​​មិន​​​ពាក់​​​ព័ន្ធ​​​នៅ​​​ក្នុង​​​ការ​​​ចេញ​​​អាជ្ញាប័ណ្ណ​​​ ឬក៏​​​ត្រួត​​​ពិនិត្យ​​​លើ​​​ការ​​​នាំ​​​ចេញ​​​នេះ​​​ឡើយ។

មន្ត្រី​​​មួយ​​​ចំនួន​​​នៅ​​​អគ្គនាយកដ្ឋាន​​​ពន្ធដារ​​​ក៏ដូចជា លោក ង៉ែត បូរី នាយរង​​​ខុទ្ទកា​​​ល័យ​​​របស់​​​លោកនាយក​​​រដ្ឋ​​​មន្ត្រី ហ៊ុន សែន មិន​​​អាច​​​ទាក់​​​ទង​​​សុំ​​​សេចក្តី​​​អត្ថាធិប្បាយ​​​បាន​​​ឡើយ​​​។ លោក នឿ រ៉ា មន្ត្រី​​​នៅ​​​ខុទ្ទកាល័យ​​​របស់​​​លោក ហ៊ុន សែន បាន​​​លើក​​​ឡើង​​​ថា លោក​​​មិន​​​បាន​​​ដឹង​​អំពី​​​ការ​​​នាំ​​​ចេញ​​​ខ្សាច់​​​នេះ​​​ទេ ហើយ​​​បាន​​​បដិសេធ​​​មិន​​​រៀប​​​រាប់​​បន្ថែម​​​ពាក់​​​ព័ន្ធនឹង​​​ភាព​​​ដែល​​​អាច​​​មាន​​​ការ​​​ស៊ើប​​​អង្កេត​​​នេះ​​​ឡើយ​​​។

ខ្សែ​​​អាត់​​​វីដេអូ​​​ជាច្រើន​​​ដែល​​​បង្ហោះ​​​នៅ​​​ក្នុង​​​គេហទំព័រ​យូធូប កាលពី​​​ខែមីនា និង​​​ខែមេសា ឆ្នាំ​​​នេះ បាន​​​បង្ហាញ​​​ពី​​​ខ្សាច់​​​ទន្លេ​​​នៅ​​​ក្នុង​​​ខេត្ត​​​កោះ​​​កុង​​​ ដែល​​​គេ​​​កំពុង​​​បូម​​​បញ្ចូល​​​​​​ក្នុង​​​នាវា​​​មួយ​​​ ដែលត្រូវ​​​បាន​​​បញ្ជាក់​​​នៅ​​​ក្នុង​​​​​​ឯកសារ​​​តុលាការ​​​របស់​​​ឥណ្ឌាថា ជា​​​នាវា​​​ដែល​​​បាន​​​ទៅ​​​ដល់​​​កំពង់ផែ Cochin ។ បុគ្គល​​​ដែល​​​បង្ហោះ​​​ខ្សែ​​​វីដេអូនេះ​​​កាលពី​​​សប្តាហ៍​​​មុន បាន​​​បង្វែរ​​​សំណួរ​​​ទៅ​​​ក្រុម​​​ហ៊ុន​​​ LYP Group ដែល​​​ទទួល​​​បាន​​​អាជ្ញាប័ណ្ណ​​​បូម​​​ខ្សាច់​​​ដ៏​​​ចម្រូង​​​ចម្រាសនៅ​​​ក្នុង​​​ខេត្ត​​​កោះ​​​កុង​​​ និង​​​ដែល​​​ត្រូវ​​​បាន​​​គ្រប់​​​គ្រង​​​ដោយ​​​លោក លី យ៉ុង​​​ផាត់ អ្នក​​​ជំនួញ​​​​​​ដ៏​​​ល្បី​​​ឈ្មោះ​​​ និង​​​ជា​​​សមាជិក​​​ព្រឹទ្ធសភា​​​មក​​​ពី​​​គណ​​​បក្ស​​​ប្រជាជន​​​កម្ពុជា​​​។

ក្រសួង​​​ធនធាន​​​ទឹក និង​​​ឧតុនិយម​​​ ដំបូង​​​ឡើយ​​​បាន​​​អំពាវ​​​នាវ​​​ឲ្យបានការ​​​ស៊ើប​​​អង្កេត​​​លើ​​​សកម្មភាព​​​បូម​​​ខ្សាច់​​​នៅ​​​ក្នុង​​​ខេត្ត​​​កោះ​​​កុង​​​របស់​​​ក្រុម​​​ហ៊ុន LYP Group កាលពី​​​ខែ​​​កក្កដា ឆ្នាំ​​​២០១១ ដោយ​​​បាន​​​ចេញ​​​បទ​​​បញ្ជា​​​ឲ្យ​​​ផ្អាក​​​ការ​​​បូម​​​ខ្សាច់​​​មួយរយៈ​​​។ ការ​​​ប៉ុនប៉ង​​​ម្តង​​​ហើយ​​​ម្តង​​​ទៀត​​​ ដើម្បី​​​ទាក់​​​​​​ទង​​​ លោក លី យ៉ុងផាត់ និង​​​តំណាង​​​របស់​​​ក្រុម​​​​​​ហ៊ុន​​​លោកដើម្បី​​​សុំ​​​ការ​​​ធ្វើ​​​អត្ថាធិប្បាយ​​​ គឺ​​​មិន​​​បាន​​​ទទួល​​​បាន​​​ជោគ​​​ជ័យ​​​ឡើយ​​​៕​​​ស៊ុយឈាង​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស