យោងតាមសេចក្តីព្រាងថវិកាសម្រាប់ឆ្នាំ២០១៤ ដែលគ្រោងនឹងបោះឆ្នោតអនុម័តនៅរដ្ឋសភាក្នុងថ្ងៃនេះ បានឲ្យដឹងថា រដ្ឋាភិបាលនឹងចំណាយថវិកាសរុប១៣,៦លានដុល្លារនៅបីឆ្នាំក្រោយ ដើម្បីសាងសង់អគារសាលាឧទ្ធរណ៍ថ្មីនៅខាងក្រៅរាជធានីភ្នំពេញ ដោយមានទាំងកន្លែងស្នាក់អាស្រ័យដោយឥតគិតថ្លៃសម្រាប់ចៅក្រម និងព្រះរាជអាជ្ញានៅទូទាំងប្រទេសផងដែរ។
យោងតាមសេចក្តីព្រាងថវិកានេះបានឲ្យដឹងថា ដោយប្រើកម្ចីបរទេសដែលនឹងមានចំនួនសរុប៣,៦១ពាន់លានដុល្លារ សម្រាប់ចំណាយក្នុងរយៈពេលបីឆ្នាំក្រោយ ប្រាក់ចំនួន៦,៨៦លានដុល្លារ នឹងត្រូវចំណាយទៅលើការសាងសង់សម្រាប់ការស្នាក់នៅរបស់មន្ត្រីតុលាការ រីឯប្រាក់ចំនួន៦,៨៤លានដុល្លារផ្សេងទៀត នឹងត្រូវចំណាយទៅលើអគារសាលាឧទ្ធរណ៍ថ្មី។
លោក សំ ប្រជាមានិត នាយខុទ្ទកាល័យរបស់លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌បានលើកឡើងថា គំនិតផ្តួចផ្តើមថ្មីនេះ មានសារៈសំខាន់ណាស់នៅក្នុងការធ្វើឲ្យសាធារណជនមានឱកាសចូលរួមក្នុងសវនាការនៅតុលាការជាន់ខ្ពស់របស់ប្រទេសកម្ពុជា។ លោក ប្រជាមានិត បានបន្ថែមថា “ការសាងសង់សាលាឧទ្ធរណ៍នៅតាមមូលដ្ឋានគឺដើម្បីបម្រើផលប្រយោជន៍ប្រជាពលរដ្ឋ ពីព្រោះគោលនយោបាយរបស់រដ្ឋាភិបាលគឺដើម្បីធ្វើឲ្យកិច្ចការរដ្ឋបាល និងសេវាកម្មសាធារណៈនៅជិតប្រជាពលរដ្ឋ”។
សាលាឧទ្ធរណ៍នៅក្នុងរាជធានីភ្នំពេញ គឺជាសាលាឧទ្ធរណ៍ដែលមានតែមួយគត់នៅក្នុងប្រទេសកម្ពុជាក្នុងពេលសព្វថ្ងៃ ដែលជាហេតុធ្វើឲ្យអង្គការសិទ្ធិមនុស្សបានរិះគន់ជាយូរមកហើយ ដោយសារការបង្កការលំបាកដល់ចុងចោទនៅក្នុងការចូលរួមការបើកសវនាការនៅសាលាឧទ្ធរណ៍ ឬក៏ចុងចោទត្រូវចំណាយថវិកាច្រើននៅពេលមកចូលរួមសវនាការរួចត្រឡប់ទៅផ្ទះវិញនោះ។
នៅក្នុងរបាយការណ៍កាលពីខែឧសភា ឆ្នាំ២០១៣ អង្គការសិទ្ធិមនុស្សលីកាដូ បានលើកឡើងថា រដ្ឋាភិបាលតែងតែព្យាយាមដឹកជញ្ជូនចុងចោទឲ្យមកចូលរួមសវនាការនៅក្នុងរាជធានីភ្នំពេញ ប៉ុន្តែចុងចោទភាគច្រើនបែរជាត្រូវបានបញ្ជូនទៅកាន់ពន្ធនាគារដែលលើសចំណុះរួចទៅហើយក្នុងរាជធានីភ្នំពេញវិញ ជាជាងបញ្ជូនពួកគេឲ្យត្រឡប់ទៅស្រុកកំណើតវិញ។
របាយការណ៍នេះបានបញ្ជាក់ថា អ្នកទោសភាគច្រើនតែងតែត្រូវបានឃុំឃាំងនៅក្នុងពន្ធនាគារ ដែលស្ថិតនៅឆ្ងាយពីក្រុមគ្រួសារ ដែលតែងតែផ្តល់អាហារ ថ្នាំពេទ្យ លុយកាក់ និងសម្ភារផ្សេងៗទៀតដល់ពួកគេ ហេតុដូច្នេះហើយ អ្នកទោសតែងតែបដិសេធមិនធ្វើដំណើរមកចូលរួមក្នុងការបើកសវនាការរបស់ខ្លួនក្នុងរាជធានីភ្នំពេញឡើយ។
លោកប្រជាមានិត បានលើកឡើងថា លោកមិនបានដឹងថា តើអគារសាលាឧទ្ធរណ៍ថ្មីចំនួនប៉ុន្មានដែលនឹងត្រូវសាងសង់ ឬក៏ស្ថិតនៅកន្លែងណានោះទេ ដោយលោកបានបង្វែរសំណួរនេះទៅឲ្យលោក ច័ន្ទ មនោ អគ្គនាយករដ្ឋបាល និងហិរញ្ញវត្ថុក្រសួងយុត្តិធម៌វិញ តែគេមិនអាចទាក់ទងសុំអត្ថាធិប្បាយបានឡើយ។
លោក តន់ សីហតេជៈ ប្រធានព្រះរាជអាជ្ញានៅសាលាដំបូងខេត្តពោធិ៍សាត់ បានឲ្យដឹងថា ការសាងសង់កន្លែងស្នាក់អាស្រ័យដោយឥតគិតថ្លៃសម្រាប់ចៅក្រម និងព្រះរាជអាជ្ញានៅតាមបណ្តាខេត្តនានា វាអាចជួយកាត់បន្ថយការចំណាយលើការធ្វើដំណើររបស់មន្ត្រីតុលាការ ដែលជាធម្មតាតែងតែចុះទៅតាមខេត្តដើម្បីបំពេញការងារ ហើយមិនដែលទទួលបានការចំណាយសម្រាប់ការស្នាក់នៅពីរដ្ឋាភិបាលឡើយ។
លោក សីហតេជៈ បានមានប្រសាសន៍ថា “ចៅក្រម និងព្រះរាជអាជ្ញាតែងតែចុះពីខេត្តមួយទៅខេត្តមួយដើម្បីបំពេញការងាររៀងរាល់បួនឆ្នាំម្តង ហើយយើងតែងតែយកចំណែកប្រាក់ខែរបស់យើងមកចំណាយលើការចំណាយទាំងនេះ”។ លោកបានបន្ថែមថា ប្រធានព្រះរាជអាជ្ញាទទួលបានប្រាក់ខែប្រហែល៥០០ដុល្លារក្នុងមួយខែ រីឯព្រះរាជអាជ្ញារងទទួលបានប្រាក់ខែប្រហែល៤៥០ដុល្លារក្នុងមួយខែ។ នៅពេលត្រូវបានសួរថា តើគំនិតផ្តួចផ្តើមថ្មីនេះ នឹងជួយទប់ស្កាត់អំពើពុករលួយនៅក្នុងប្រព័ន្ធតុលាការកម្ពុជាឬ លោក សីហតេជៈ បានបញ្ជាក់ថា គ្មានបញ្ហាបែបនេះកើតឡើងនោះទេនៅក្នុងតុលាការកម្ពុជា៕ ស៊ុយឈាង