31 C
Phnom Penh

ធនាគារ​ពិ​​​ភព​លោក​​៖​ ប្រជា​ជន​ខ្មែរ​តិច​តួច​ជ្រើស​រើស​​ការ​ប្រើ​ប្រា​ស់​គណ​នី​ធនាគារ​

ដោយ ឌឹ ខេមបូឌា ដេលី

បទវិភាគ

យោង​តាម​របាយ​ការណ៍​ដែល​ធនា​គា​រ​ពិភព​លោក (World Bank) ហៅ​កាត់​ថា​ WB ​បាន​​​ចេញផ្សាយ​ក្នុង​ថ្ងៃ​នេះ​ បាន​បង្ហា​ញ​ថា ​ក្នុង​​ចំណោម​ប្រជាជន​១៤​លាននា​ក់​នៅ​ក្នុង​ប្រទេស​កម្ពុជា​ មានតែ​៣,៧​ភាគរយ​ប៉ុ​ណ្ណោះ​ដែល​ប្រើ​ប្រាស់​គណនី​ធនាគារ​ នៅ​គ្រឹះ​ស្ថាន​ហិរញ្ញវត្ថុ​ ហើយ​ក្នុងចំណោម​ម្ចា​ស់​គណនី​ទាំងនេះ អ្នកដែល​ប្រើ​ប្រាស់​គណនី​ធនាគារ​រប​ស់​ខ្លួ​ន​សម្រាប់សន្សំប្រា​ក់​ មាន​មិនដល់​១ភាគរយ​ទេ។

​ទោះបីជា​របាយ​ការណ៍​អភិវឌ្ឍន៍​វិស័​យ​ហិរញ្ញវត្ថុ​របស់​ធនាគារ​ពិភព​លោក​ ស​ម្រាប់​ឆ្នាំ​២០១៤​ បង្ហាញ​ថា តើ​ប្រទេស​ក​ម្ពុជា​ស្ថិត​នៅ​លើ​ផ្លូវ​វែង​ឆ្ងាយ​ប៉ុណ្ណា​ក្នុង​កា​រ​ផ្តល់​សេវា​កម្មហិរញ្ញវត្ថុ​ដល់​ប្រជា​ជន​​មា​នចំនួន​កាន់​តែ​ច្រើនរបស់​ខ្លួន​ក៏ដោ​យ​ ក៏​ធ​នាគារិក​ កាលពី​ម្សិល​​មិញ មិន​ឯក​ភាព​នឹង​តួលេខ​នេះទេ​ ហើយ​បាន​លើកឡើង​ថា ​ប្រជាជន​កាន់តែ​ច្រើនឡើង​ៗក្នុង​ប្រ​ទេស​នេះ​​ បាន​ប្រើ​ប្រាស់​ សេវាកម្មធនា​គារ​ បើគិតពីឆ្នាំ​២០១១​មក​។

យោងតាមរបាយ​​ការណ៍​នេះ​បាន​បង្ហាញ​ទៀត​ថា ​ភាគ​រយ​នៃ​ចំនួន​ប្រ​ជា​ជន​ខ្មែរ​សរុប​ ដែល​មាន​គណនី​ធនាគារ​គឺស្មើ​នឹ​ង​ភាគ​រយ​នៃ​ចំនួន​ប្រជា​ជន​សរុប ​ដែលមា​នគណនី​ធនាគារ​​នៅ​ប្រទេស​យេម៉េន ហ្គី​ណេ និង​សា​ ធារ​ណ​រដ្ឋ​ប្រជាធិបតេយ្យកុង​ហ្គោ។ របាយ​ការណ៍​របស់​ធនាគារ​ពិភព​​លោក​មានខ្លឹម​សារ​ថា “[៤៣​ភាគរយ] នៃ​ចំ​នួន​ម្ចាស់​គណនី​នៅ​ទូទាំង​ពិភព​លោក​ ស​ន្សំប្រាក់​នៅ​គ្រឹះ​ស្ថាន​ហិរញ្ញវត្ថុ​ផ្លូវ​ការ​ក្នុង​ឆ្នាំ​២០១១។ ​ភាគ​រយ​នៃ​ចំនួន​ម្ចាស់​គណ​នី​ទាំង​នេះ​មាន​តាំងពី​តិច​ជាង​១ភាគរយ​ក្នុ​ងប្រទេស​អាមេនី​ កម្ពុជា ​អេហ្ស៊ីប ​កៀ​ហ្សីស៊ីស្ថាន តួកម៉េនីស្ថាន និង​ប្រទេស​ អ៊ូ​បេគីស្ថាន ​រហូត​ដល់​ជាង​៦០​ភាគ​រ​យ​ក្នុង​ប្រទេស​អូស្ត្រាលី​  នូវែល​សេឡង់​ និង​ប្រ​ទេ​ស​ស៊ុយអែត”។

​នៅ​ក្នុង​តំបន់ ភាគរយ​នៃ​ចំនួនប្រជា​ជ​ន​ក្នុងប្រទេស​កម្ពុជា​ ដែល​មាន​គណនី​ធនាគារ​ មានតិច​តួចណាស់​ បើប្រៀប​ធៀប​ជា​មួយ​​ប្រទេស​ ​​​សិង្ហបុរី  (៩៨,២) ​ ថៃ (៧​២,៧)​  ម៉ាឡេ​ស៊ី (៦៦) ឡាវ (២៦,៨) វៀត​ណាម (២១,៤)​ និងប្រទេស​ឥណ្ឌូ​ណេ​ស៊ី (១៩,៦)។​​ ទោះ​បី​ជា​ការដែល​ប្រ​ជាជន​ខ្មែរ​ទូទៅ​មិនសូវ​ទុក​ចិត្ត​លើ ​ឬក៏​មិន​សូវ​មានការ​យល់ដឹង​អំពី​ធនា​គារ​ គឺជារឿ​ង​ពិត​ក៏ដោយ ​ក៏វិស័យហិរញ្ញវត្ថុ​នៅ​ក្នុង​ប្រទេ​សនេះ​បាននិងកំពុង​រីកចម្រើន​យ៉ាង​លឿ​ន​។ ​ទាំង​បរិមាណ​ប្រាក់​បញ្ញើ ​ទាំង​បរិមា​ណ​​​ឥណ​ទាន​ដែលត្រូវបាន​បញ្ចេញ​ក្នុង​វិស័​យ​​ធនាគារ​ បាន​កើនឡើង​យ៉ាង​គំហុក​ក្នុ​ង​រយៈ​ពេល​ប៉ុន្មាន​ឆ្នាំចុង​ក្រោយ​នេះ ដោ​យ​សារតែ​ធនាគារ​នានា​នៅ​ទូទាំងពិភព​លោ​ក បាន​ចូល​ប្រឡូក​នៅលើទីផ្សារ​នេះ​។

​លោក ហ្គ្រាន ​ណាក់ឃី ​(Grant Kn​uckey) ប្រធាន​នាយក​ប្រតិបត្តិ​ធនាគារ​អេ​អិន​ហ្សិត រ៉ូយ៉ាល់ (ANZ ​Royal)​ បាន​លើ​ក​ឡើង​កាល​ពី ម្សិល​មិញ​ថា ​លោក​មិន​យ​ល់​ស្រប​នឹង​តួលេខ​ របស់​ធនាគារ​ពិភព​លោ​កទាក់ទង​នឹង​ចំនួន​ម្ចាស់​គណនី​នៅ​ក្នុ​ង​ប្រទេស​កម្ពុជា​ទេ។ ​លោក​​បានមាន​ប្រ​សាសន៍ថា “ តួលេខ​បច្ចុប្បន្ន​ ទាក់​ទងនឹង​ភា​គ​រយ​នៃចំនួន​ប្រជាជន​ ដែល​មាន​គណនី​នៅ​គ្រឹះស្ថាន​ហិញ្ញវត្ថុ​ផ្លូវការ​ ឥឡូវ​នេះមា​ន​លើស​ពី​១០ភាគរយ​”។

​លោក ណាក់ឃី ​ក៏​បាន​លើកឡើង​បន្ត​ទៀត​ថា ចំនួនអតិថិជន​របស់​ធនាគារ​អេ​អិ​ន​ហ្សិត ​រ៉ូយ៉ាល់ ​ដែល​មាន​គណនី​បញ្ញើ-ស​ន្សំ លើស​ពី​​ចំនួយ១ភាគរយ​ដែលត្រូវ​បាន​បង្ហា​ញ​នៅ​ក្នុង​របាយ​ការណ៍​នេះ។​ ​លោក ណាក់ឃី ​ ​បន្ថែម ទៀត​ថា “ធនាគារ​ អេអិនហ្សិត ​រ៉ូ​យ៉ា​ល់ ផ្ទាល់ ​មាន​​ចំនួន​ច្រើន​ជាង​ចំនួន​ក្នុង​រ​បាយការណ៍​នោះ”។ ក៏ប៉ុន្តែ ​លោក​បាន​ប​ដិ​សេធ​មិន​ប្រាប់​ តួលេខ​ពិត​។

លោក អ៊ិន ចាននី ប្រធាន​នាយកប្រ​តិ​បត្តិ​ធនាគារ​ អេស៊ីលី​ដា ភីអិលស៊ី ​(Acle​d​a Bank​ Plc​) ក៏​បាន​លើក​ឡើង​ផង​ដែរ​ថា​ ធនាគារ​របស់​លោក ​មាន​គណនីជាង​១​លាន​គណនី ​ហើយ​​ចំនួន​ប្រាក់សន្សំ​សរុប​រ​បស់​ម្ចាស់​គណ​នី​​ធនាគារទាំងនេះ​ បច្ចុប្បន្ន ​មា​ន​ប្រហែល​១,៥​ពាន់​ លានដុល្លារ​។ លោក​បាន​មានប្រសាសន៍ថា “ ​ធនាគា​រ​ពិភព​លោក​ ត្រូវ​សម្លឹង​មើល​ទៅ​អនាគត​​​ និង​មើល​ចំនួន​ធនាគារ​ដែល​បាន​ចូល​ខ្លួន​ម​ក​ប្រកប​អាជីវកម្ម​ក្នុងប្រទេស​នេះ​។ [​ភាគ​រយ​]​នៃចំនួនប្រជាជនខ្មែរ​ ដែល​បច្ចុ​ប្ប​ន្ន មាន​ គណនី​ ធនាគារ​ មាន​ជាង​​១០ភា​គ​រយ​”៕ សុធា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស