មន្ត្រីក្រសួងអប់រំ យុវជន និងកីឡាមួយរូប បានឲ្យដឹងកាលពីម្សិលមិញថា សាលាបឋមសិក្សានៅទូទាំងប្រទេស បានចាប់ផ្តើមអនុ វត្តកម្មវិធីបង្រៀនភាសាអង់គ្លេស ដែលជាផ្នែកមួយនៃកម្មវិធីរបស់ក្រសួងនេះក្នុងគោលបំណងពង្រឹងសមត្ថភាពភាសាអង់គ្លេសរបស់កុមារខ្មែរដែលមានអាយុក្មេងខ្ចី។
លោក សំ សេរីរ័ត្ន អគ្គនាយកអគ្គនាយកដ្ឋានអប់រំបានឲ្យដឹងថា ការសិក្សាភាសាបរទេស ដូចជា ភាសាបារាំង ឬក៏ភាសាអង់គ្លេស កាលពីមុនមានតែនៅក្នុងកម្មវិធីសាលារៀនកម្រិតអនុវិទ្យាល័យឡើង ពោលគឺចាប់ពីថ្នាក់ទី៧ឡើងទៅ ក៏ប៉ុន្តែ ឥឡូវនេះភាសាអង់គ្លេសត្រូវបានបង្រៀន ចាប់ពីថ្នាក់ទី៤ឡើងទៅ ជាពេលដែលកុមារមានអាយុប្រហែលប្រាំបួនឆ្នាំ។
លោក សេរីរ័ត្ន មានប្រសាសន៍ថា “ការដាក់បញ្ចូលនូវកម្មវិធីភាអង់គ្លេសចូលក្នុងកម្មវិធីសិក្សាកម្រិតបឋមសិក្សា គឺជារឿងសំខាន់”។ មានសាលាបឋមសិក្សាជាង៦.៩០០កន្លែង នៅទូទាំងប្រទេសកម្ពុជា។ ក្នុងចំណោមសាលាបឋមសិក្សាទាំងនេះ កម្មវិធីថ្មីបង្រៀនភាសាអង់គ្លេសនេះត្រូវបានចាប់ផ្តើមអនុវត្ត ចាប់ពីខែតុលាតទៅហើយ។ គួរបញ្ជាក់ថា ខែតុលាគឺជារដូវបើកបវេនកាល។ នៅសាលារៀនផ្សេងៗទៀត កម្មវិធីនេះនឹងត្រូវបានណែនាំឲ្យមានការអនុវត្ត បន្ទាប់ពីគ្រូបង្រៀនទទួលបានការបណ្តុះបណ្តាល។
លោក ចាន់ តារា នាយករងសាលាបឋមសិក្សាកូលាប នៅក្នុងរាជធានីភ្នំពេញបានឲ្យដឹងថា មេរៀនភាអង់គ្លេសក្នុងកម្មវិធីសិក្សានៅ សាលាបឋម សិក្សានេះ នឹងផ្តល់ផលប្រយោជន៍ច្រើន ដល់កុមារដែលរស់នៅក្នុងគ្រួសារក្រីក្រ និងមិនមានឱកាសសិក្សាភាសាបរទេស។ លោក តារា បានមានប្រសាសន៍ថា “ខ្ញុំគិតថា កម្មវិធីបង្រៀនភាសាអង់គ្លេសនៅកម្រិតចាប់ពីថ្នាក់ទី៤ នឹងជួយកុមារដែលមកពីគ្រួសារក្រីក្រ ឲ្យមានជំនាញកាន់តែខ្លាំងក្នុងផ្នែកភាសាបរទេស”៕ សុធា