ដោយចង់បានការឆ្លើយតបមួយពីមន្ត្រីអាមេរិកាំងអ្នកតវ៉ាចំពោះការបណ្តេញចេញជាង១០០នាក់ក្នុងរាជធានីភ្នំពេញ នៅតែបន្តប្រមូលផ្តុំគ្នានៅខាងមុខស្ថានទូតអាមេរិកកាលពីម្សិលមិញ និងបានផ្ញើញត្តិមួយទៀត ស្នើឲ្យលោកប្រធានាធិបតី បារ៉ាក់ អូបាម៉ា (Barack Obama) ជួយដោះស្រាយបញ្ហារំលោភសិទ្ធិដីធ្លីរបស់ខ្លួន ពេលលោកមកបំពេញទស្សនកិច្ចក្នុងប្រទេសនេះនៅសប្តាហ៍ក្រោយនេះ។
ចាប់តាំងពីមានការបញ្ជាក់អំពីដំណើរទស្សនកិច្ចរបស់លោកអូបាម៉ា មកកាន់ប្រទេសកម្ពុជាដើម្បីចូលរួមកិច្ចប្រជុំកំពូលអាស៊ីបូពា៌និងអាស៊ានរួចមកក្រុមអ្នកតវ៉ាមកពីសហគមន៍បឹងកក់និងបុរីកីឡាព្រមទាំងអ្នកមកពីសហគមន៍ថ្មគោល ដែលត្រូវបានបណ្តេញចេញ ឬកំពុងប្រឈមនឹងការបណ្តេញចេញបានផ្ញើញត្តិសរុបទាំងអស់បី ហើយកំពុងតែរង់ចាំការឆ្លើយតបថាទុក្ខសោករបស់ពួកគាត់ត្រូវបានបញ្ជូនទៅដល់ដៃឯកអគ្គរដ្ឋទូត វីលលៀមថត់ (William Todd)។
កាលពីថ្ងៃច័ន្ទ ការតវ៉ាដំបូងនៅមុខស្ថានទូតនេះ ក្រុមអ្នកតវ៉ាបានផ្ញើញត្តិមួយរួចហើយ។ ក្រោយមកអំឡុងការតវ៉ាលើកទី២ កាលពីថ្ងៃពុធ នគរបាលប្រឆំាងកុបកម្មត្រូវបានដាក់ពង្រាយនៅពេលយប់ ហើយបានបញ្ជាឲ្យអ្នកតវ៉ាដោយសន្តិវិធីចាកចេញ។ កាលពីថ្ងៃព្រហស្បតិ៍ក្រុមអ្នកតវ៉ាបានវិលត្រឡប់មកវិញម្តងទៀត ហើយបានផ្ញើញត្តិមួយទៀត។
នៅមុខស្ថានទូតកាលពីព្រឹកម្សិលមិញក្រុមអ្នកតវ៉ាឈរកាន់រូបថតលោកប្រធានាធិបតី អូបាម៉ានិងលោកស្រីរដ្ឋមន្ត្រីក្រសួងការបរទេសអាមេរិក ហ៊ីលឡារី គ្លីនតុន (Hillary Clinton)។
អ្នកស្រីទេពវន្នីតំណាងអ្នកសហគមន៍បឹងកក់ ដែលដីរបស់អ្នកស្រីនៅកណ្តាលរាជធានីភ្នំពេញពេលនេះត្រូវលោកឡៅម៉េងឃិន សមាជិកព្រឹទ្ធសភាគណបក្សប្រជាជនកម្ពុជា កំពុងកាន់កាប់ និយាយថា“ រដ្ឋាភិបាលកម្ពុជាបច្ចុប្បន្នមិនគោរពសិទ្ធិមនុស្ស និងលទ្ធិប្រជាធិបតេយ្យទេព្រោះពេលយើងតវ៉ាយើងត្រូវប្រឈមនឹងអំពើហិង្សា។ ខ្ញុំសង្ឃឹមថា ការមកដល់របស់លោកអូបាម៉ានឹងនាំលទ្ធិប្រជាធិបតេយ្យមកឲ្យកម្ពុជា”។
ដោយខិតខំបញ្ចេញសំឡេងរបស់ខ្លួនអំឡុងកិច្ចប្រជុំកំពូលនៅសប្តាហ៍ក្រោយនេះក្រុមអ្នកតវ៉ាបានស្រែកថា “ យើងទាំងអស់គ្នាស្រឡាញ់ប្រទេសរបស់លោក និងលទ្ធិប្រជាធិបតេយ្យ” ខណៈដែលបុគ្គលិករបស់ស្ថានទូតបានបើករថយន្តទៅកាន់សណ្ឋាគារ ឡឺរ៉ូយ៉ាល់ ដែលបុគ្គលិកសន្តិសុខអាមេរិកប្រដាប់ដោយអាវុធនិងក្បួនរថយន្តទំនើបៗពណ៌ខ្មៅ ត្រូវបានគេត្រៀមសម្រាប់ការមកបំពេញទស្សនកិច្ចរបស់លោក អូបាម៉ា។
លោកច្រាយនីមអាយុ៣៤ឆ្នាំតំណាងឲ្យប្រជាពលរដ្ឋចំនួន១៨២គ្រួសារ ដែលប្រឈមនឹងការបណ្តេញចេញនៅក្នុងភូមិថ្មគោល ក្បែរអាកាសយានដ្ឋានអន្តរជាតិភ្នំពេញបានមានប្រសាសន៍ថា “យើងចង់ឲ្យលោកប្រធានាធិបតីអូបាម៉ា ជួយធ្វើអន្តរាគមន៍
ទៅលោកនាយករដ្ឋមន្ត្រីហ៊ុនសែន ដើម្បីជួយដោះស្រាយបញ្ហារបស់យើង ពីព្រោះយើងត្រូវបានគេជូនដំណឹងឲ្យចេញពីផ្ទះរបស់យើងដោយគ្មានសំណង។ យើងនៅតែផ្ញើញត្តិ ពីព្រោះយើងបារម្ភថា ស្ថានទូតនឹងមិនផ្ញើញត្តិនេះទៅលោក អូបាម៉ា ទេ”។
លោកសៀនម៉ាកគិនតុស (Sean Mclntosh) អ្នកនាំពាក្យប្រចាំស្ថានទូតអាមេរិក បានបញ្ជាក់អំពីញត្តិមួយដែលក្រុមអ្នកតវ៉ាបានធ្វើឡើងកាលពីថ្ងៃច័ន្ទសប្តាហ៍មុន ប៉ុន្តែលោកបានមានប្រសាសន៍ថា ញត្តិដែលត្រូវបានផ្ញើកាលពីថ្ងៃព្រហស្បតិ៍ និងកាលពីម្សិលមិញ នៅមិនទាន់ដឹងនៅឡើយ ពីព្រោះស្ថានទូតបិទទ្វារ។
លោកបានលើកឡើងក្នុងអុីម៉េលមួយថា “ ស្ថានទូតបិទទ្វារនៅថ្ងៃនេះ ដូច្នេះខ្ញុំមិនអាចបញ្ជាក់អំពីញត្តិនេះបានទេរហូតដល់ថ្ងៃស្អែក”។ លោកបានបន្ថែមថា “ យើងនឹងបន្តលើកឡើងពីសិទ្ធិមនុស្សជាមួយរដ្ឋាភិបាល។ យើងមានការព្រួយបារម្ភអំពីបញ្ហាសិទ្ធិមនុស្សនៅក្នុងប្រទេសកម្ពុជា ហើយរដ្ឋាភិបាលក៏បានដឹងដែរ”។
ពេលសួរឲ្យបានច្បាស់លាស់អំពីការពង្រឹងសន្តិសុខដ៏រឹងមាំរបស់អាេមរិកនៅសណ្ឋាគារឡឺរ៉ូយ៉ាល់អ្នកស្រីហ្គារែតវ៉លធ័រ (Gareth Walters) នាយកផ្នែកលក់និងទីផ្សាររបស់សណ្ឋាគារនេះ បានបដិសេធមិនធ្វើអត្ថាធិប្បាយឡើយ៕
ប្រែសម្រួលដោយ ចេវប៊ុននី