29 C
Phnom Penh

អតីត​ឧត្តម​សេនីយ៍ទោ​កង​យោធពល​ខេមរភូមិន្ទ​​ម្នាក់​សារភាព​ប្រាប់​តុលាការ​​ថា បាន​ជួញដូរ​គ្រឿង​ញៀន​

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ ​សាលា​ដំបូង​រាជធានី​ភ្នំពេញ​បានបើក​សវនាការ​រឿង​ក្តី​របស់​អតី​ត​ឧត្តម​សេនីយ៍​ទោ​កង​យោធពល​ខេមរភូមិន្ទ​ម្នាក់​ និង​អ្នក​សម​គំនិតម្នាក់ ​ដែល​បាន​ជាប់​ចោទ​ពី​បទ​ជួញ​ដូរ​គ្រឿង​ញៀន​ខុសច្បាប់​។

លោក ចាន់ រិទ្ធីឌី​  ត្រូវ​បាន​ចាប់​ខ្លួន​កាល​ពី​ខែ​សីហា​ ឆ្នាំ​២០១២​ បន្ទាប់ពី​នគរ​បាល​ដក​ហូត​បាន​​​គ្រាប់​ថ្នាំ​មេតំហ្វេតាមីនចំនួន​ប្រាំ​គីឡូ​ក្រាម​ និងមេតំហ្វេតា​មីន​ទឹក​កក​ចំនួន​មួ​យ​ គីឡូ​ក្រាម​ពី​ផ្ទះ​វីឡា​​​របស់​​គាត់​នៅខណ្ឌមាន​ជ័យ​។​ អ្នក ​សម​គំនិត​​រូប​នេះ​ឈ្មោះ ឌៀប ស៊ុន​ឡាយ​ ត្រូវ​បាន​ចាប់​ខ្លួន​នៅ​ពេល​ក្រោយ​មក​​។

លោក គឹម​ ដានី​ ចៅក្រម​ជំនុំ​ជម្រះ​បាន​​មាន​ប្រសាសន៍ថា “លោក រិទ្ធីឌី និង​លោក ស៊ុនឡាយ​ ត្រូវ​បាន​ចោទ​ប្រកាន់​ពីបទ​ជួញ​ដូរ​គ្រឿង​ញៀន​ខុស​ច្បាប់​។ យើងមាន​ភ័ស្តុ តាង​ពីព្រោះ​នគរ​បាល​បាន​រក​ឃើញ​​គ្រឿង​ញៀន​នៅ​ក្នុង​ផ្ទះ​លោក រិទ្ធីឌី”។ នៅពេល​ចាប់ខ្លួនលោក រិទ្ធីឌី​ នោះ​ នគរ​បាល​បាន​និយាយ​ថា គាត់​បាន​ជាប់​ពាក់​ព័ន្ធ​​នឹង​​ការ​នាំ​គ្រឿង​ញៀន​ជាច្រើន​ពី​ប្រទេស​ឡាវ​ ភូមា និង​ប្រទេស​ថៃ ​ចូល​មក​​ប្រទេស​កម្ពុជា តាម​តំបន់​ត្រី​កោណ​មាស​។

នគរបាល​សម្ងាត់​បាន​​បន្លំ​ខ្លួន​ធ្វើ​ជាអ្នក​ទិញ​​គ្រឿង​ញៀន​​ និង​បាន​ទិញ​មេតំហ្វេ​តាមីន​​ចំនួន​២០០ក្រាម​ក្នុង​តម្លៃ ១០.០០០​ដុល្លារ​ពី​លោក  រិទ្ធី​ឌី  ដែល​បាន​នាំ​ឲ្យ​មាន​​ការ​ចាប់ខ្លួន​គាត់​ និង​ការ​ដក​ហូត​ថ្នាំ​ញៀន​ទាំង​នោះ​​តែ​ម្តង​។ យោង​តាមលោក ណាច ទ្រី​ មេធាវី​របស់​ជន​ជាប់​ចោទ​​បាន​ឲ្យ​ដឹង​ថា ចាប់​តាំង​ពី​ពេល​នោះ​មក ​នគរបាល​បាន​ហាម​ឃាត់​គ្រួសារ​របស់​លោក រិទ្ធីឌី មិន​ឲ្យ​រស់​នៅ​ក្នុង​ផ្ទះ​វីឡា​កម្ពស់​បីជាន់​នេះ​ទេ​។

លោក ណាច​ ទ្រី បាន​មាន​ប្រសាសន៍​ថា “នគរបាល​បាន​បិទ​ទ្វារ​ផ្ទះ​នោះ និង​បាន​​ប្រមូល​យក​​គ្រឿង​សង្ហារិម​ និង​ទ្រព្យ​សម្បត្តិ​ទាំង​អស់​ ពីព្រោះ​ពួក​គេ​និយាយ​ថា ទ្រព្យ​​សម្បត្តិទាំង​អស់​​នោះ​​បាន​មក​ពីការ​ជួញ​ដូរ​គ្រឿង​ញៀន​”។ ទោះ​បីជា​លោក​ រិទ្ធីឌី បាន​សារភាព​ថា ​បាន​រក្សា​ទុក​​គ្រឿង​ញៀន​ខុស​ច្បាប់​ក៏​ដោយ​ ក៏​គាត់​បាន​និយាយ​កាល​ពីម្សិលមិញថា នេះគឺ​​ជា​លើក​ទី​១​ ហើយ​ ដែល​គាត់​បាន​ទិញ​គ្រឿង​​ញៀន​ពីលោក ស៊ុនឡាយ​ អាយុ​៥១​ឆ្នាំ​។

លោក ណាច​ ទ្រី​ បាន​មាន​ប្រសាសន៍​ថា “ខ្ញុំ​ទទួល​យក​ការ​ចោទ​ប្រកាន់​នេះ ប៉ុន្តែ ​សូម​ស្នើ​ឲ្យ​តុលាការ​ប្រគល់​ទ្រព្យ​សម្បត្តិ​ទាំង​នោះ​ឲ្យ​ទៅ​គ្រួ​សារ​កូន​ក្តីខ្ញុំ​វិញ​”។ ទោះ​ជា​យ៉ាង​ណា ចម្លើយ​សារ​ភាព​របស់​លោក​ ស៊ុន​ឡាយ​ ខុស​គ្នា​ពី​ចម្លើយ​សារភាព​របស់​លោក រិទ្ធី​ឌី ។ គាត់​បា​នប្រាប់​តុលាការ​ថា “ខ្ញុំ​បាន​ជួប​លោក រិទ្ធីឌី កាល​ពីខែ​មិថុនា​ ឆ្នាំ​២០០៧​។ គាត់​បាន​សុំ​ឲ្យ​ខ្ញុំ​រក​ស៊ីជួញ​ដូរ​គ្រឿង​ញៀន​ជាមួយ​គាត់​” ហើយគាត់​​ឲ្យ​ខ្ញុំ​​ទៅ​ជួប​ឈ្មួញ​កណ្តាល​លក់​គ្រឿង​ញៀន​​​ម្នាក់​នៅ​​ប្រទេស​ឡាវ​។ តុលាការ​នឹង​ប្រកាស​សាលក្រម​រឿង​ក្តី នេះ​នៅ​ថ្ងៃទី​២៦ ខែវិច្ឆិកា៕ គឹម​ហឿន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស