31 C
Phnom Penh

ឥណ្ឌា​​​​​​ នឹងសាងសង់អង្គរវត្ត​​​ចម្លង​​​ពី​​​កម្ពុជាដែលធំជាង​​​អង្គរវត្ត​​​កម្ពុជា​​​ពីរ​​​ដង​​​

ដោយ ឌឹ ខេមបូឌា ដេលី

បទវិភាគ

ចាប់​​​តាំង​​​ពី​​​​​​កសាង​​​​​​ក្នុង​​​សតវត្សរ៍​​​ទី​​​១២​​​មក​​​ អង្គរវត្ត​​​បាន​​​​​​ក្លាយ​​​ជា​​​ប្រាសាទ​​​​​​សាសនា​ហិណ្ឌូ​​​​​​​​​​​ធំ​​​ជាងគេ​​​​​​បំផុត​​​​​​ក្នុង​​​ពិភពលោក​​​។ ប៉ុន្តែ​​​កាល​​​ពីម្សិលមិញ​​​ ប្រទេស​​​ឥណ្ឌា​​​បាន​​​បង្ហាញ​​​គំរូ​​​ប្រាសាទ​​​ថ្មី​​​មួយ​​​យក​​​លំនាំ​​​តាម​​​អង្គរវត្ត​​​ ដែល​​​​​​នឹងដណ្ដើម​​​​​​ឯតទគ្គកម្ម​​​​​​នោះ​​​បាន​​​យ៉ាង​​​ងាយ​​​ ដោយ​​​​​​​​​មាន​​​កម្ពស់​​​ខ្ពស់​​​ជាង​​​ប្រាសាទ​​​អង្គរ​​​វត្ត​​​​​​ជិត​​​ពីរ​​​ដង​​​​​​នៅ​​​ពេល​​​សាង​​​សង់​​​ចប់​​​រួច​​​រាល់​​​ នេះ​​​បើ​​​តាម​​​​​​សេចក្ដី​​​រាយការណ៍​​​របស់​​​ប្រព័ន្ធ​​​ផ្សព្វ​​​ផ្សាយ​​​​​​ឥណ្ឌា​​​។

ប្រាសាទ​​​ឥណ្ឌា​​​ថ្មី​​​ ដែល​​​នឹង​​​សាង​​​សង់​​​​​​នៅ​​​ក្នុង​​​ខេត្ត​​​ប៊ីហា ហើយ​​​នឹង​​​​​​គ្រប​​​ដណ្ដប់​​​លើ​​​ផ្ទៃ​​​ដី​​​ជាង​​​៨០​​​ហិកតា​​​​​​នេះ  ដំបូង​​​ឡើយ​​​​​​គ្រោង​​​​​​សាង​​​​​​សង់ជា​​​​​​​​​អង្គរ​​​វត្ត​​​ចម្លង​​​​​​ដូច​​​គ្នា​​​បេះបិទ​​​ ប៉ុន្តែ​​​​​​ដោយ​​​សារ​​​តែ​​​រដ្ឋាភិបាល​​​កម្ពុជា​​​បាន​​​​​​ជំទាស់​​​​​​ទាំង​​​កំហឹង​​​ចំពោះការ​​​ប្រើប្រាស់​​​និមិត្ត​​​រូប​​​​​​ជាតិ​​​របស់​​​ខ្លួននោះ​​​ បាន​​​ធ្វើ​​​ឲ្យ​​​ប្រទេស​​​​​​ឥណ្ឌា​​​ផ្អាក​​​គម្រោងសាងសង់​​​នេះកាល​​​ពី​​​ខែ​​​មីនា ឆ្នាំ​​​២០១២។

ទោះ​​​ជា​​​យ៉ាង​​​ណា​​​ បច្ចុប្បន្ន​​​​​​គម្រោង​​​មួយ​​​នេះ​​​កំពុង​​​តែ​​​​​​​​​ដំណើរ​​​ការ​​​ឆ្ពោះ​​​ទៅ​​​មុខ​​​ ដោយ​​​ប្រើ​​​ឈ្មោះ​​​ថ្មី​​​ និង​​​រចនាបទ​​​​​​ថ្មី​​​ នេះ​​​បើ​​​យោង​​​តាម​​​​​​ការ​​​ធ្វើ​​​សេចក្ដី​​​រាយការណ៍​​​របស់​​​ កាសែត​​​Hindustan Times ។ យោង​​​តាម​​​កាសែត​​​ដដែល​​​នេះ​​​​​​បាន​​​ឲ្យ​​​ដឹង​​​ថា ​​​សំណង់​អង្គរ​​​ចម្លង​​​ ដែល​​​កំពុង​​​ត្រូវ​​​បាន​​​សាង​​​សង់​​​ដោយ​​​​​មូលនិធិ​​​​​​ Board of Religious Trusts របស់​​​រដ្ឋ​​​ប៊ីហា​​​ និង​​​មាន​​​​​​កម្ពស់​​​ជាង​​​១២០​​​ម៉ែត្រ​​​ ហើយ​​​នឹង​​​ផ្ទុក​​​មនុស្ស​​​បាន​​​ចំនួន​​​២០.០០០​​​នាក់​​​នៅ​​​ក្នុង​​​បរិវេណ​​​​​​របស់​​​វា។

លោក​​​ ឌីណេស ប៉ាត​​​ណាអ៊ីក (Dinesh Patnaik) ​ឯកអគ្គ​​​រដ្ឋ​​​ទូត​​​ឥណ្ឌា​​​ប្រចាំ​​​កម្ពុជា​​​​​​ បាន​​​មាន​​​ប្រសាសន៍​​​ ដោយ​​​គោរព​​​​​​តាម​​​ការ​​​ជំទាស់​​​របស់​​​កម្ពុជា​​​ចំពោះ​​​គម្រោង​​​នេះ  រដ្ឋាភិបាល​​​ឥណ្ឌា​​​បាន​​​ស្នើ​​​សុំ​​​ឲ្យ​​អ្នក​​​រចនា​​​ប្លង់​​​​​​​​​កុំ​​​​​​ចម្លង​​​តាម​​​​​រចនាបទ​​​​​​អង្គរ ហើយ​​​សុំ​​​ឲ្យ​​​ពួក​​​គេ​​​ដូរ​​​ឈ្មោះ​​​ ប្រាសាទ​​​​​​នេះ​​​ពី​​​ប្រាសាទ​​​វីរ៉ាត​​​ អង្គរវត្ត​​​រ៉ា​ម​​​ម៉ាន​​​ឌា (Viraat Angkor Wat Ram Mandir) ទៅ​​​​​​ជា​​​ប្រាសាទ​​​​​​ វីរ៉ាត​​​ រ៉ាមាយ៉ាន​​​ ម៉ានឌា (Viraat Ramayan Mandir) វិញ​​​។ អ្នក​​​រចនាបទ​​​ទាំង​​​នោះ​​​ក៏​​បាន​​​សម្រេច​​​ចិត្ត​​​ធ្វើឲ្យ​​​វា​​​​​​ធំ​​​ជាង​​​​​​​​​ខ្លាំង​​​ផង​​​ដែរ​​​​​​​​​បើ​​​ប្រៀប​​​ធៀប​​​ទៅ​​​នឹង​​​ប្រាសាទ ដើម​​​​​​នៅ​​​ក្នុង​​​ខេត្ត​​​សៀម​​​រាប​​​។

លោក ប៉ាត​​​ណាអ៊ីក បាន​​​មាន​​​ប្រសាសន៍​​​ថា “គម្រោង​​​ប្លង់​​​​​​ត្រូវ​​​បាន​​​កែប្រែ​​​ ដោយ​​​សារ​​​តែ​​​ការ​​​គោរព​​​របស់​​​យើង​​​ ហើយ​​​ឈ្មោះ​​​​​​ប្រាសាទ​​​ក៏​​​បាន​​​ផ្លាស់​​​ប្ដូរ​​​ដែរ​​​។ ប្រាសាទ​​​នេះ​​​​​​នឹង​​​មាន​​​ទំហំ​​​ធំជាង​​​ប្រាសាទ​​​អង្គរវត្ត​​​​​​ឆ្ងាយ​​​ណាស់​​​ ហើយ​​​វា​​​នឹង​​​មាន​​​កំពូល​​​ច្រើន​​​ជាង​​​”។ លោក​​​បាន​​​មាន​​​ប្រសាសន៍​​​ថា នៅ​​​ក្នុង​​​ប្រទេស​​​ឥណ្ឌា​​​នា​​​ពេល​​​នេះ​​​គឺ​​​ជា​​​ពេល​​​បោះ​​​ឆ្នោត​​​​​​ ហើយ​​​ថា រដ្ឋាភិបាល​​​​​​​​​ចង់​​​កសាង​​​ប្រាសាទ​​​ធំ​​​មួយ​​​។​​​ តែ​​​ទោះ​​​ជា​​​យ៉ាង​​​ណា​​​ លោក​​​បាន​​​មាន​​​ប្រសាសន៍​​​ថា ទោះ​​​ជា​​​​​​ប្រាសាទ​​​នេះ​​​ស្រដៀង​​​គ្នា​​​​​​​​​ទៅ​​​នឹង​​​ប្រាសាទ​​​អង្គរ​​​វត្ត​​​ក៏​​​ដោយ​​​ ក៏​​​​​​ប្រាសាទ​​​ហិណ្ឌូ​​​ទាំងអស់​​​របស់​​​ឥណ្ឌា​​​​​​មាន​​​លក្ខណៈ​​​ស្រដៀង​​​គ្នា​​​ជា​​​ខ្លាំង​​​។

ប្រាសាទ​​​អង្គរវត្ត​​​ដែល​​​ជា​​​​​​ទីតាំង​​​​​​បុរាណ​​​វិទ្យា​​​មួយ​​​​​​ក្នុង​​​ចំណោម​​​ទី​​​តាំង​​​​​​បុរាណ​​​វិទ្យា​​​សំខាន់​​​ៗ​​​បំផុត​​​ក្នុង​​​ពិភព​​​លោក​​​ គឺ​​​ជា​​​ចំណុច​​​ស្នូល​​​​​​នៃ​​​ឧស្សាហ​​​កម្ម​​​​​​ទេស​​​ចរណ៍​​​ក្នុង​​​ប្រទេស​​​កម្ពុជា​​​ ដែល​​​ទាក់​​​ទាញ​​​​​​ភ្ញៀវ​​​ទេសចរ​​​​​​ចំនួន​​​១,៥៧​​​លាន​​​នាក់​​​ក្នុង​​​រយៈ​​​ពេល​​​ប្រាំ​​​បួន​​​ខែ​​​ដំបូង​​​នៅឆ្នាំ​​​នេះដែល​​​ស្មើ​​​នឹង​​​ចំនួន​​​ពាក់​​​កណ្ដាល​​​នៃ​​​ភ្ញៀវ​​​ទេសចរ​​​អន្តរជាតិ​​​សរុប​​​ដែល​​​ចូល​​​មក​​​ទស្សនា​​​ប្រទេស​​​កម្ពុជា។

លោក​​​ ប៉ាត​​​ណាអ៊ីក បាន​​​មានប្រសាសន៍​​​ថា ទំហំ​​​ប្រាសាទ​​​ថ្មី​​​នេះ​​​ នឹង​​​មិន​​​​​​ធ្វើ​​​ឲ្យ​​​​​​សម្រស់​​​ទាក់ទាញ​​​របស់​​​​​​អង្គរវត្ត​​​​​​ធ្លាក់ចុះ​​​ ឬ​​​ធ្វើឲ្យ​​​ប៉ះ​​​ពាល់​​​ដល់​​​វិស័យ​​​ទេស​​​ចរ​​​​​​ទៅ​​​កាន់​​​​​​ប្រាសាទ​​​ដើម​​​នេះ​​​​​​ឡើយ។ លោក​​​មាន​​​ប្រសាសន៍បន្ថែម​​​ទៀត​​​​​​ថា “ភ្ញៀវ​​​មិន​​​មែន​​​ទៅ​​​អង្គរវត្ត​​​ដោយ​​​សារ​​​តែ​​​ទំហំរបស់​​​វា​​​នោះ​​​ទេ​​​ ពួកគេ​​​ទៅ​​​ដោយ​​​សារ​​​តែ​​​វា​​​ជា​​​​​​ចំណែក​​​​​​ប្រវត្ត​​​ិសាស្ត្រ​​​ដ៏​​​មាន​​​​​​តម្លៃ​​​មិន​​​អាច​​​​​​កាត់ថ្លៃ​​​បាន។ នៅ​​​ពេល​​​ លោក​​​ ដូណាល់​​​ ត្រាំ (Donald Trump) សាង​​​សង់​​​អគារ​​​ចម្លង​​​​​​តាម​​​រចនាបទ​​​ប្រាសាទ​​​តាច ម៉ាហាល (Taj Mahal) នៅ​​​ក្នុង​​​ទីក្រុង​​​ឡាសវេហ្គាស វា​​​មិន​​​ធ្វើ​​​ឲ្យ​​​ប្រាសាទ​​​តាច ម៉ាហាល នៅ​​​ក្នុង​​​ប្រទេស​​​ឥណ្ឌា​​​​​​​​​បាត់​​​បង់​​​នោះទេ​​​”។

លោក​​​ អ៊ឹម សុខរិទ្ធី ប្រធាន​​​នាយក​​​ដ្ឋាន​​​ផ្សព្វផ្សាយ​​​នៃ​​​​​​អាជ្ញាធរ​​​អប្សរា​​​ ដែល​​​គ្រប់គ្រង​​​​​​ប្រាសាទ​​​អង្គរវត្ត​​​បាន​​​មាន​​​ប្រសាសន៍​​​កាលពី​​​ម្សិលមិញ​​​ថា តាម​​​លោក​​​​​​ដឹង​​​គឺ​​​ថា ប្រទេស​​​ឥណ្ឌា​​​បាន​​​លុប​​​​​​ចោល​​​​​​គម្រោង​​​​​​សាង​​​សង់​​​ប្រាសាទ​​​នេះ​​​ហើយ​​​។ ប៉ុន្តែ​​​លោក​​​បាន​​​យល់​​​ស្រប​​​ថា នឹង​​​គ្មាន​​​ប្រាសាទ​​​ថ្មី​​​​​​ណា​​​អាច​​​​​​ធ្វើ​​​​​​ឲ្យ​​​ប៉ះពាល់​​​ដល់​​​សម្រស់​​​​​​ទាក់ទាញ​​​នៃ​​​និមិត្ត​​​រូប​​​ជាតិ​​​របស់​​​ប្រទេស​​​កម្ពុ​​​ជា​​​ឡើយ​​​។

លោក​​​​​​បាន​​​មានប្រសាសន៍ទៀត​​​ថា “នៅ​​​ពេល​​​ប្រកាស​​​ពី​​​បំណង​​​សាង​​​សង់​​​ប្រាសាទ​​​ចម្លង​​​​​​នេះ​​​ មាន​​​ការ​​​​​​ជជែក​​​ដេញ​​​ដោល​​​យ៉ាង​​​ខ្លាំង​​​ ឧទាហរណ៍​​​​​​ដូច​​​ជា​​​យើង​នឹង​​​​​​បាត់​​​បង់​​​ភ្ញៀវ​​​ទេសចរ​​​ជា​​​​​​ដើម​​​។ ប៉ុន្តែ​​​អង្គរវត្ត​​​​​​មាន​​​អាយុ​​​កាល​​​ជា​​​ច្រើន​​​ទសវត្សរ៍ ដែល​​​មាន​​​តម្លៃ​​​ជា​​​ប្រវត្តិសាស្ត្រ​​​។ វា​ជា​កន្លែង​អាថ៌កំបាំង​​​ជា​​​ទី​​​តាំង​​​ដែល​​​មាន​​​ជីវិត​​​រស់​​​រវើក​​​ ហើយ​​​​​​នេះ​​​គឺ​​​ជា​​​ចំណុច​​​ទាក់ទាញ​​​របស់​​​វា”។

លោក​​​ ផៃ ស៊ីផាន អ្នក​​​នាំពាក្យ​​​ទីស្ដីការ​​​គណៈ​​​រដ្ឋ​​​មន្ត្រី​​​ ដែល​​​ធ្លាប់​​​បាន​​​ពណ៌នា​​​ពី​​​គម្រោង​​​​​​ដើម​​​​​​ក្នុង​​​ការ​​​សាង​​​សង់​​​​​​ប្រាសាទ​​​អង្គរ​​​វត្ត​​​ចម្លង​​​ថា “គួរ​​​ឲ្យ​​​អាម៉ាស់” និង​​​មាន​​​ប្រសា​​​សន៍​​​នៅ​​​ពេល​​​នោះ​​​ថា លោក​​​គិត​ថា វា​​​នឹង​​​ធ្វើ​​​ឲ្យ​​​ភ្ញៀវ​​​ទេសចរ​​​ភាន់​ច្រឡំ​​​នោះ​​​​​បាន​​​មាន​​​ប្រសាសន៍​​​កាលពីម្សិលមិញ​​​ថា លោក​​​ជឿ​​​ជាក់​​​ថា វា​​​នឹង​​​មិន​​​​​​ល្អ​​​ជាង​​​ប្រាសាទ​​​ដើម​​​​​​នោះ​​​​​​ឡើយ​​​។

លោ​​​ក​​​បាន​​​មាន​​​ប្រសាសន៍​​​ទៀត​​​ថា “អង្គរ​​​វត្ត​​​គឺ​​​ជា​​​សម្បត្តិ​​​បេតិកភណ្ឌ​​​ពិភព​​​លោក​​​។ វា​​​មាន​​​អាយុ​​​កាល​​​ជា​​​ច្រើន​​​សតវត្សរ៍​​​ ហើយ​​​សំណង់​​​ថ្មី​​​មិន​​​ថា វា​​​មាន​​​ទំហំ​​​ធំ​​​ប៉ុណ្ណា​​​នោះ​​​ទេ​​​ គឺ​​​មិន​​​អាច​​​ប្រៀប​​​ធៀប​​​​​​នឹង​​​ទី​​​តាំង​​​ប្រវត្ត​​​ិ​​​សាស្ត្រ​​​មួយ​​​គ្មាន​​​ពីរ​​​របស់​​​យើង​​​​​​បាន​​​ឡើយ​​​ ព្រោះ​​​វា​​​មិន​​​ត្រឹម​​​តែ​​​ជា​​​សំណង់​​​មួយ​​​​​​នោះ​​​ទេ​​​ វា​​​ថែមទាំង​​​ជាតំណាង​​​ឲ្យ​​​អារិយធម៌​​​ទៀត​​​ផង​​​ ​​​និង​​​ជា​​​សមិទ្ធ​​​ផល​​​ដ៏​​​ថ្លៃ​​ថ្លា​​​របស់​​​មនុស្ស​​​ជាតិ​​។ ដូច្នេះ​​​សំណង់​​​ចម្លង​​​នឹង​​​មិន​​​​​​ធ្វើ​​​ឲ្យ​​​ប៉ះពាល់​​​​​​ដល់​​​វា​​​សោះ​​​ឡើយ​​​”៕ សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស