28 C
Phnom Penh

អភិបាល​ខេត្ត​កំពង់​ចាម​ចេញ​បទ​បញ្ជា​ឲ្យ​អាជ្ញាធរ​ទប់​ស្ទាត់​ការ​រត់​ពន្ធ​ជ័រ​កៅស៊ូ​ទៅ​វៀតណាម​

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​អង្គារ លោក លន់ លឹមថៃ អភិ​បាល​ខេត្ត​កំពង់​ចាម​​​ បាន​ចេញ​បទ​បញ្ជា​ឲ្យ​អាជ្ញាធរ​ខិ​ត​ខំ​កាត់​បន្ថយ​ការ​រត់​ពន្ធជ័រកៅស៊ូ​មិន​ទាន់​កែច្នៃពី​ខេត្ត​កំពង់ចាម​ចូល​ទៅក្នុង​ប្រទេស​វៀតណាម​។

លោកបាន​លើក​ឡើង​នៅក្នុង​កិច្ច​ប្រជុំ​មួយ​នៅ​សាលា​ខេត្ត​ថា អ្នក​ដែល​រត់​ពន្ធជ័​រ​កៅស៊ូ​ឆ្លងកាត់​ព្រំដែន​យក​​ទៅ​លក់​ឲ្យ​រោង​ចក្រ​​កែច្នៃ​ គួរ​តែ​ត្រូវ​បាន​តាម​ចាប់​យ៉ាង​សកម្ម​​ ហើយ​​​​ត្រូវ​បង្ខំ​ឲ្យពួកគេ​​លក់​ជ័រ​កៅស៊ូ​នេះ​ទៅ​ឲ្យ​​រោង​ចក្រ​​កែច្នៃ​ជ័រកៅស៊ូ​ក្នុងស្រុក​វិញ​ ​ព្រោះ​ការ​រត់​ពន្ធឆ្លង​កាត់​ព្រំដែន​នេះធ្វើ​ឲ្យ​បាត់​បង់​មុខ​របរ​ក្នុង​ស្រុក​។

លោកបាន​មាន​ប្រសាសន៍ថា “ វិធានការ​របស់​យើង​គឺ​ដើម្បី​ធ្វើ​ឲ្យ​​អ្នក​រត់​ពន្ធ​​ងាក​មក​លក់​ជ័រ​កៅស៊ូ​របស់​ខ្លួន​តាម​រយៈប៉ុស្តិ៍​ត្រួត​ពិនិត្យ​ផ្លូវ​ការ​វិញ​”។ លោក​បាន​ពន្យល់​ថា រោង​ចក្រ​​កែច្នៃ​នៅ​ក្នុង​ប្រទេស​កម្ពុជា​កំពុង​តែ​ខ្វះ​ខាត​ជ័រកៅស៊ូ​ដោយ​សារ​តែ​អ្នក​រត់​ពន្ធ​ឆ្លង​កាត់​ព្រំដែន។ លោកបាន​មាន​ប្រសាសន៍​ថា “ប្រសិន​បើ​ពួកគេ​បន្ត​រត់​ពន្ធជ័រ​កៅស៊ូ​ រោង​ចក្រ​កែច្នៃ​ជ័រ​កៅស៊ូ​ស្រប​ច្បាប់​ និង​រោង​ចក្រ​កែច្នៃ​តូចៗ និង​គ្មាន​ជ័រ​កៅស៊ូ​សម្រាប់​កែច្នៃ​ឡើយ​ ហើយ​ធ្វើ​ឲ្យ​ប្រជាពលរដ្ឋ​អត់​ការងារ​ធ្វើ”។

លោក លឹម ថៃ បាន​បន្ថែម​ថា លោក​នឹង​ចាត់​វិធានការ​​​ដាក់​វិន័យ​​ចំពោះ​អាជ្ញា​ធរ​ខេត្ត​ណា​​ដែល​បន្ត​សម្រួល​ ឬក៏​បិទ​ភ្នែក​ចំពោះ​ការ​រត់​ពន្ធនេះ​។ លោក​បាន​មាន​ប្រសាសន៍​ថា “ ពួកគេ​នឹង​ត្រូវ​ដក​ចេញ​ពីតំណែង​របស់​ខ្លួន​ ប្រសិន​បើ​មិន​បាន​អនុវត្ត​តាម​វិន័យ​នេះ​”។ លោក សៀង ប៉េងស៊្រាង ប្រធាន​មន្ទីរ​ពាណិជ្ជ​កម្ម​ខេត្ត​កំពង់​ចាម ដែល​បាន​ទៅ​ចូល​រួម​ក្នុង​កិច្ច​ប្រជុំ​នេះ​បាន​លើក​ឡើង​ថា លោក គិត​ថា ការ​រត់​ពន្ធ​ជ័រ​កៅស៊ូនេះ​មិន​មែន​ជា​បញ្ហាធំ​ដុំ​នោះ​ទេ  ប៉ុន្តែ​ទោះ​ជា​យ៉ាង​ណា​លោក​មិន​គាំទ្រ​ទង្វើ​នេះ​ឡើយ​​។ លោក​បាន​មាន​ប្រសាសន៍​ថា “ការ​រត់​ពន្ធ​នេះ​មិន​កើត​ឡើង​ច្រើន​នោះ​ទេ ប៉ុន្តែ​រដ្ឋា​ភិបាល​បាន​ចេញ​បទ​បញ្ជា​ឲ្យ​យើង​ទប់​ស្កាត់​​ពីព្រោះ​វា​ប៉ះពាល់​ដល់​ជីវភាព​រស់​នៅ​របស់​ប្រជា​ពល​រដ្ឋ​ ​ការ​ងារ​ និង​ចំណូល​ពន្ធ​”។

លោក ម៉ក់ គឹមហុង ប្រធាន​សមាគម​​សម្រាប់​ការ​អភិ​វឌ្ឍន៍​​ជ័រកៅស៊ូកម្ពុជា បាន​លើក​ឡើង​ថា វិធានការ​​នេះ​នឹង​ជួយ​ដល់​ឧស្សាហកម្ម​ក្នុង​​​ស្រុក​នៅ​ពេល​ខ្វះ​ជ័រ​កៅស៊ូ​។ លោក​​មាន​ប្រសាសន៍​ថា “មិន​មាន​តម្រូវ​ការ​ខ្ពស់​ឡើយ​នៅ​លើ​ទីផ្សារ​អន្តរជាតិ​ ដោយ​​​សារ​វិបត្តិ​សេដ្ឋកិច្ច​នៅ​​តំបន់​អឺរ៉ុប និង​សហ​រដ្ឋ​អាមេរិក” ។ លោក​បាន​ពន្យល់​ថា តម្លៃ​ជ័រ​កៅ​ស៊ូ​លើ​ពិភព​លោក​បាន​ធ្លាក់​ចុះ​យ៉ាង​ខ្លាំង​ពី​៥.០០០​ដុល្លារ​មក​ត្រឹម​២.២០០​ដុល្លារ​ក្នុង​មួយ​តោន​ ចាប់​តាំងពី​ឆ្នាំ​២០១១​មក​។

លោក ហ្វីលីព ម៉ុននីន (Philippe Monnin) អ្នក​ផ្ដល់​​ប្រឹក្សា​គម្រោង​ និង​ជា​អ្នក​ជំនាញ​ខាង​ជ័រ​កៅស៊ូ​​នៅ​ក្រុម​ហ៊ុន​ Groupe Agriculturel Francais de Developpement បាន​លើក​ឡើង​ថា លោក​មាន​កា​រ​សង្ស័យ​ថា កិច្ច​ខិត​ខំ​ប្រឹង​ប្រែង​ចុង​ក្រោយ​ដើម្បី​ទប់​ស្កាត់​ការ​រត់​ពន្ធ​នេះ​​នឹង​មិន​​មាន​អ្វី​ខុស​ប្លែក​ពី​លើក​មុន​ៗ​ឡើយ​។ លោក​បាន​ឲ្យ​ដឹង​ថា បញ្ហា​នេះ​បាន​បង្ក​ឲ្យ​មាន​​​បញ្ហា​ជា​ច្រើន​ដល់​រោង​ចក្រ​​កែ​​ច្នៃ​ជ័រ​កៅ​ស៊ូ​នៅ​ក្នុង​ខេត្ត​កំពង់​ចាម អស់​រយៈ​ពេល​ជា​ច្រើន​​​ឆ្នាំ​មក​ហើយ។

​ លោក​បាន​មាន​ប្រសាសន៍​​ថា ​ “បញ្ហា​នេះ​​​មិន​មែន​ជា​រឿង​ថ្មីនោះ​ទេ​។ មនុស្ស​គ្រប់​​​គ្នា​​បាន​ដឹង​ពី​បញ្ហា​នេះ​ជា​យូ​រឆ្នាំ​​មក​ហើយ​”។ ​​លោក​បាន​បញ្ជា​ក់​ថា ការ​រត់​ពន្ធ​នេះ​បាន​បង្ក​ឲ្យ​មាន​បញ្ហា​ដល់​​រោង​ចក្រ​កែ​ច្នៃ​ជ័រ​កៅស៊ូ​ ដែល​កំពុង​ជួប​ការ​ខ្វះ​ខាត់​ជ័រ​កៅ​ស៊ូមិន​ទាន់​កែ​ច្នៃ​ស្រាប់​នោះ​។លោក​​​បាន​បន្ថែម​ថា“​ នៅ​​​​ក្នុង​ខេត្ត​កំពង់​ចាម​​មាន​រោង​ចក្រ​កែ​ច្នៃ​ជ័រ​កៅស៊ូ​ជាង​៣០​ ហេតុ​ដូច្នេះ​មាន​តែ​​រោង​ចក្រ​​ច្រើន​ប៉ុន្តែ​ខ្វះ​ជ័រ​កៅស៊ូ​សម្រាប់​កែច្នៃ​”។

​ចំពោះ​ចំណុច​នេះ​ លោក លឹម ថៃ បាន​លើក​ឡើង​ថា ដោយ​សារ​តែ​​មាន​ទីផ្សារ​ងងឹត​​សម្រាប់​​រត់​ពន្ធ​ជ័រ​កៅស៊ូនេះ ហេតុដូច្នេះ​លោក​មិន​​អាច​ដឹង​ច្បាស់​ថា តើ​ជ័រ​កៅស៊ូ​ចំនួន​ប៉ុន្មាន​​នឹង​បាន​មក​លើ​រោង​​ចក្រ​កែច្នៃ​ជ័រ​កៅ​ស៊ូ​​ក្នុង​ស្រុក​ឡើយ​​ ប្រសិន​បើ​ការ​រត់​ពន្ធ​ត្រូវ​បាន​បញ្ឈប់​ ឬ​ក៏​ថាតើ​លុយ​ចំនួន​ប៉ុន្មាន​នឹង​ត្រូវ​បាត់​បង់​នោះ​ទេ​។

លោក​បាន​មាន​​ប្រសាសន៍​ថា“ យើង​ត្រូវ​តែ​ដឹង​ថា មាន​បញ្ហា​ជា​ច្រើន​​បាន​កើត​ឡើង​នៅ​តាម​ព្រំដែន ​ជា​ទី​ដែល​ទំនិញ​គ្រប់​ប្រភេទ​​​​ត្រូវ​បាន​រត់​ពន្ធ​។ ច្រក​របៀង​ទាំង​នេះ​ហាក់​​បី​ដូច​ជា​ស្រមោល​អ៊ីចឹង​”៕ ស៊ុយឈាង

(ប្រែសម្រួល​ដោយ Alex Willemyns)

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស