កាលពីម្សិលមិញ រដ្ឋសភាដែលមានសមាជិកសុទ្ធតែមកពីគណបក្សប្រជាជនកម្ពុជាបានអនុម័តច្បាប់បំបែកក្រសួងឧស្សាហកម្ម រ៉ែ និងថាមពលជាពីរ ប៉ុន្តែ មិនទាន់សម្រេច ថា នរណានឹងដឹកនាំក្រសួងថ្មីទាំងពីរនេះនៅឡើយទេ។
លោក ជាម យៀប សមាជិកសភាគណបក្សប្រជាជនកម្ពុជា និងជាអ្នកនាំពាក្យគណបក្សនេះបានមានប្រសាសន៍ថា សមាជិកសភា៦៨រូបមកពីគណបក្សប្រជាជនកម្ពុជាបានអនុម័តជាឯកច្ឆន្ទលើការបង្កើតក្រសួងថ្មីពីរគឺក្រសួងរ៉ែ និងថាមពល និងក្រសួងឧស្សាហកម្ម និងសិប្បកម្ម។ លោក ជាម យៀប បានមានប្រសាសន៍ថា ថវិកាចំនួន៦,៣លានដុល្លារសម្រាប់ក្រសួងដើម ដែលត្រូវបានលៃទុកនៅក្នុងថវិកាជាតិឆ្នាំ២០១៤ និងត្រូវបានអនុម័តកាលពីដើមសប្តាហ៍នេះ ត្រូវបែងចែកជាពីរសម្រាប់ចាយវាយនៅក្នុងក្រសួងទាំងពីរនេះ។
លោក ជាម យៀប បានមានប្រសាសន៍ថា “ការចាយវាយថវិកាសម្រាប់ឆ្នាំ២០១៤ ដែលរដ្ឋសភាបានអនុម័តសម្រាប់ក្រសួងឧស្សាហកម្ម រ៉ែ និងថាមពល នឹងត្រូវបែងចែកជាពីរ”។ ទោះបីជា ការលើកឡើងពីមុនរបស់លោក ជាម យៀប ថា ការបំបែកក្រសួងនេះជាពីរជាការចាំបាច់ ពីព្រោះមានការងារច្រើនពេក ដែលក្រសួងមួយមិនអាចធ្វើតែឯងបានក៏ដោយ ក៏កាលពីម្សិលមិញលោកបានមានប្រសាសន៍ថា មិនទាន់មានការជ្រើសរើសបុគ្គលិកថ្មីឲ្យចូលបម្រើការងារក្នុងក្រសួងថ្មីទាំងពីរដែលទើបតែបង្កើតឡើងនៅឡើយទេ។
លោកមានប្រសាសន៍ថា “មានបុគ្គលិកច្រើនបម្រើការនៅក្រសួងឧស្សាហកម្ម រ៉ែ និងថាមពល ដូច្នេះមន្ត្រីមួយចំនួននឹងត្រូវបែងចែកជាពីរឲ្យបម្រើការងារនៅក្រសួងថ្មី ទាំងពីរផ្អែកតាមជំនាញ និងវិជ្ជាជីវៈរបស់ខ្លួន”។ ទោះបីលោក ជាម យៀប បានបដិសេធមិនបញ្ជាក់អំពីសេចក្តីរាយការណ៍របស់ប្រព័ន្ធផ្សព្វផ្សាយក្នុងស្រុកដែលថា លោក ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល ដែលត្រូវបានដកចេញកាលពីពេលថ្មីៗនេះ នឹងត្រូវយកមកដឹកនាំក្រសួងរ៉ែ និងថាមពល វិញក៏ដោយ ក៏លោកបានមានប្រសាសន៍ថា លោកគិតថា លោក ស៊ុយ សែម ស័ក្តិសមនឹងកាន់ការងារចាស់របស់លោកណាស់។ លោកបានបន្ថែមថា “ប្រសិនបើលោកត្រឡប់មកកាន់តួនាទីជារដ្ឋមន្ត្រីក្រសួងរ៉ែ និងថាមពលវិញនោះ វាគ្មានបញ្ហាឡើយពីព្រោះលោកមានបទពិសោធច្រើន”។
លោក ជាម យៀប បានមានប្រសាសន៍ថា រដ្ឋាភិបាលមិនទាន់សម្រេចអំពីជោគវាសនារបស់លោក ចម ប្រសិទ្ធ នៅឡើយទេ ដែលបន្ទាប់ពីការបោះឆ្នោតកាលពីខែកក្កដា លោកត្រូវបានផ្លាស់ប្តូរពីរដ្ឋមន្ត្រីក្រសួងពាណិជ្ជកម្ម ឲ្យទៅធ្វើជារដ្ឋមន្ត្រីក្រសួងឧស្សាហកម្ម រ៉ែ និងថាមពលនោះ។ ឥឡូវនេះ ដោយមានការបំបែកក្រសួងនេះជាពីរនោះ គេមិនទាន់ដឹងថា តើលោកនឹងដឹកនាំក្រសួងមួយណានោះឡើយ។ លោក ជាម យៀប បានពន្យល់ថា ប្រភេទសិប្បកម្មទាំងអស់ដែលសំដៅដល់ក្រសួងថ្មីនេះរួមមានផលិតផលធ្វើដោយដៃដូចជាសូត្រ ដែលតាំងពីបុរាណត្រូវគេត្បាញធ្វើជាសម្លៀកបំពាក់ ក្រមា មួក ចម្លាក់បុរាណ រូបអប្សរា និងវត្ថុអនុស្សាវរីយ៍ផ្សេងៗទៀតជាដើម។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានមានប្រសាសន៍ថា សេចក្តីសម្រេចបំបែកក្រសួងនេះជាពីរធ្វើឡើងតាមអនុសាសន៍របស់លោកនាយករដ្ឋមន្ត្រី ហ៊ុន សែនដើម្បីបែងចែកភារកិច្ច និងការទទួលខុសត្រូវក្នុងការអនុវត្តរបស់ខ្លួនឲ្យបានត្រឹមត្រូវ។លោកបានមានប្រសាសន៍ថា “ជាពិសេស គោលនយោបាយក្នុងការជំរុញវិស័យសិប្បកម្មឲ្យក្លាយជាសហគ្រាសខ្នាតតូច និងធ្វើឲ្យក្រសួងនេះកាន់តែប្រសើរឡើង ដូច្នេះសិប្បកម្មទាំងនេះអាចក្លាយជាសហគ្រាសខ្នាតមធ្យម”៕ សារុន