28 C
Phnom Penh

អ្នក​តវ៉ា​​ម្នាក់​​ប្តឹង​​ស្នង​ការ​នគរ​បាល និងមេ​បញ្ជាការ​កង​រាជ​អាវុធ​ហត្ថ​​រាជធានី​ភ្នំពេញ

ដោយ ឌឹ ខេមបូឌា ដេលី

បទវិភាគ

យោង​តាម​សាក្សី​បាន​ឲ្យ​ដឹង​ថា  កាល​ពី​ម្សិល​មិញ​ អ្នក​តវ៉ា​ម្នាក់​ដែលបាន​ជាប់ពាក់​ព័ន្ធ​ក្នុង​ការ​ប៉ះ​ទង្គិច​គ្នា​កាល​ពី​ថ្ងៃ​អង្គារ​ រវាង​កម្មករ​រោង​ចក្រ​ អេស​អិល និង​កង​កម្លាំង​ប្រដាប់​អាវុធ ​បាន​​ប្តឹង​ស្នង​ការ​នគរ​បាល​ និង​មេបញ្ជា​ការ​កង​រាជ​អាវុធ​ហត្ថ​រាជ​ធានី​ ដោយ​ចោទប្រកាន់​ពួក​គេ​ថា ជា​អ្នក​ទទួល​ខុស​ត្រូវ​ចំពោះ​ការ​ស្លាប់​អ្នក​លក់​អាហារ​អាយុ​៤៩​ឆ្នាំ​ម្នាក់ ​ដោយ​​សារ​គ្រាប់​កាំភ្លើង​របស់​នគរ​បាល​។

ក្មេង​ប្រុស​វ័យជំទង់​ពីរ​នាក់​អាយុ​១៤ឆ្នាំ ម្នាក់ និង​១៧​ឆ្នាំ​ម្នាក់ ក៏​ត្រូវ​បាន​សាលា​ដំបូង​រាជ​ធានី​ភ្នំ​ពេញ​ចោទ​ប្រកាន់​កាល​ពី​ម្សិល​មិញ​ពី​បទ​​ជាប់​ពាក់​ព័ន្ធ​នៅ​ក្នុង​ការ​ប្រើ​អំពើ​ហិង្សា​នេះដែរ​ ហើយ​ត្រូវ​បាន​ឃុំ​ខ្លួន​នៅ​មណ្ឌល​កែ​ប្រែ​២ ក្នុង​ពន្ធនាគារ​ព្រៃ​ស។ ក្នុង​ចំណោម​ជន​ឝស៊ីវិល​៣១​នាក់  និង​ព្រះ​សង្ឃ​​៧អង្គ​ដែល​ត្រូវ​បាន​ឃាត់​ខ្លួន​ពី​ដំបូង​យក​មក​សាក​សួរ​នោះ មាន​តែក្មេង​ជំទង់​ទាំង​ពីរ​នេះប៉ុណ្ណោះ​ ត្រូវ​បាន​ចោទ​ប្រកាន់ រីឯ​អ្នក​ផ្សេង​ទៀត​ត្រូវ​បាន​ដោះ​លែង​វិញ​ហើយ​។

និស្សិត​ច្បាប់​​រៀន​​ឆ្នាំទី២​ អាយុ​២៥​ឆ្នាំ​ម្នាក់​ឈ្មោះ​ នាង សុគន្ធ ដែល​បាន​អះ​អាង​ថា គាត់​ត្រូវ​បាន​នគរ​បាល​វាយ​អំឡុង​ពេល​ប៉ះ​ទង្គិច​គ្នា​នេះ​ បាន​និយាយ​ថា គាត់​បាន​ធ្វើ​ពាក្យ​​​​​ប្តឹង​ទៅ​តុលាការ​ “ តាង​នាម​ឲ្យ​ប្រជា​ពលរដ្ឋ​ខ្មែរ” ដើម្បី​ប្តឹង​លោក ជួន សុវណ្ណ ស្នង​ការ​នគរ​បាល​រាជ​ធានី​ និង​ឧត្តម​សេនីយ៍ឯក រ័ត្ន ស៊្រាង មេ​បញ្ជា​​ការ​កង​រាជ​អាវុធ​ហត្ថ​រាជ​ធានី​ពីបទ​មនុស្ស​ឃាត​ តាម​មាត្រា​២០៤​នៃ​ក្រម​ព្រហ្ម​ទណ្ឌ​។

មាត្រា​២០៤ ចែង​ថា “ឃាត​កម្ម​ត្រូវ​ផ្តន្ទា​ទោស​​ដាក់​ពន្ធនាគារ​ពី​១៥ឆ្នាំ​ទៅ​៣០​ឆ្នាំ កាល​បើ​អំពើ​នេះ​ត្រូវ​បាន​ប្រព្រឹត្ត​ដោយ  ​អ្នក​រាជ​ការ​សាធារណៈ​​នៅ​ក្នុង​ក្រប​ខណ្ឌ​នៃ​មុខ​ងារ ឬ​នៅក្នុង​ឱកាស​នៃ​ការ​បំពេញ​មុខ​ងារ​របស់​ខ្លួន”។​

លោក សុគន្ធ បាន​និយាយ​ថា “ខ្ញុំ​បាន​ធ្វើ​ពាក្យ​បណ្តឹង​ប្តឹង​ពួក​គេ ពី​ព្រោះ​ខ្ញុំ​ឃើញ​ទង្វើ​របស់​ពួក​គេ​​ពេល​បង្ក្រាប​ជន​ស្លូត​ត្រង់​ ដូច​ជា កម្មករ និង​អ្នក​លក់​ដូរ​នៅ​ក្បែរ​នោះ​។ ខ្ញុំ​បាន​​ស្ថិត​​នៅក្នុង​ហេតុការណ៍​​ដែលពួក​គេ​បាន​ប្រព្រឹត្ត​​នេះ ហើយ​ខ្ញុំបាន​រួច​ផុត​ពី​ការ​ស្លាប់”។ គាត់​បាន​និយាយ​ថា “ពេល​ហេតុការណ៍​នេះកើត​ឡើង​ ខ្ញុំបាន​ឃើញ​ការ​បង្ក្រាប​ដ៏​ឃោរ​ឃៅ​របស់​ពួក​គេ ដែល​បាន​ធ្វើ​ឲ្យ​ប្រជា​​​ជន​​ស្លាប់ និង​រង​របួស​ ហើយ​​ចាប់​ខ្លួន​មនុស្ស​ជា​ច្រើនទៀត​”។

លោក ប្រាក់ សាវុធ ប្រធាន​ក្រឡា​បញ្ជី​នៅ​សាលា​ដំបូង​រាជ​ធានី​ភ្នំពេញ​​បាន​បញ្ជាក់​ថា បាន​ទទួល​ពាក្យ​បណ្តឹង​នោះ​ហើយ ហើយ​ថា លោក សុគន្ធ​ បាន​ចោទ​លោក ជួន សុវណ្ណ​ និង​ឧត្តម​សេនីយ៍ឯក​​​ រ័ត្ន ស៊្រាង ពី​បទ​បញ្ជា​ឲ្យ​កង​​​​កម្លាំង​​​​ប្រដាប់​អាវុធ​របស់​ខ្លួន​បាញ់​កម្មករ និង​ជន​ស្លូត​ត្រង់​ ដែល​បណ្តាល​ឲ្យ​អ្នក​ស្រី អេង សុខុម ​អ្នក​លក់​ម្ហូប​អាហារ​នៅ​ក្បែរ​នោះត្រូវ​គ្រាប់​កាំភ្លើង​ស្លាប់​។ លោក សាវុធ បាន​និយាយ​ថា “ យើង​បាន​ទទួល​ពាក្យ​បណ្តឹង​នេះហើយ ហើយ​យើង​នឹង​​អនុវត្ត​ទៅ​តាម​នីតិ​វិធី​ច្បាប់​”។

ការ​ប៉ះ​ទង្គិច​គ្នា​នេះ​បាន​ផ្ទុះ​ឡើង​កាលពី​ថ្ងៃ​អង្គារ បន្ទាប់​ពី​កម្មករ​រោង​ចក្រ​ អេស​អិល​ ប៉ុន​ប៉ង​ហែក្បួន​ទៅ​កាន់​ផ្ទះ​របស់​នាយក​រដ្ឋ​មន្ត្រី ហ៊ុន សែន ដើម្បី​​ផ្សព្វ​ផ្សាយ​ពី​បញ្ហា​របស់​ខ្លួន​ ប៉ុន្តែត្រូវ​បាន​នគរ​បាលរារាំង​នៅ​ស្ពាន​ស្ទឹង​មាន​ជ័យ​។ នៅក្នុង​អំពើ​ហិង្សា​នេះ រថយន្ត និង​​ម៉ូតូ​នគរ​បាល​ពីរ​គ្រឿង​​ត្រូវ​បាន​ដុត​បំផ្លាញ ហើយ​ក្រុម​មនុស្ស ដែល​ភាគ​ច្រើន​ជា​​យុវជន​​​​​បាន​គប់​ដុំ​ថ្ម​ដាក់​នគរ​បាល ដែល​បាន​បាញ់​ឧស្ម័ន​បង្ហូរ​ទឹក​ភ្នែក បាញ់​កាំភ្លើង​គ្រាប់​ជ័រ និង​គ្រាប់​ពិត។

ឧត្តម​សេនីយ៍ត្រី ខេង ទីតូ អ្នក​នាំពាក្យ​កង​រាជ​អាវុធ​ហត្ថ​បាន​មាន​ប្រសាសន៍​តាម​ទូរស័ព្ទ​ថា លោក​ដឹង​អំពី​ពាក្យ​បណ្តឹង​ដែល​គេ​បាន​ប្តឹង​លោក រ័ត្ន ស៊្រាង។
លោក​បាន​មាន​ប្រសាសន៍​ថា “ ខ្ញុំ​បាន​ឮ​អំពី​រឿង​នេះ​ ប៉ុន្តែវា​ជា​សិទ្ធិ​របស់​ប្រជា​ជន​ក្នុង​ការ​ប្តឹង​នរណា​ម្នាក់។ វា​អាស្រ័យ​លើ​តុលាការ​”។ លោក​បាន​មាន​ប្រសាសន៍​ថា កង​រាជ​អាវុធ​ហត្ថ​មាន​ភារកិច្ច​រក្សា​សណ្តាប់​ធ្នាប់ “ នៅ​ពេល​មាន​អំពើ​ហិង្សា​ និង​សកម្ម​ភាព​ខុស​​ច្បាប់​ យើង​ត្រូវ​តែ​បង្ក្រាប​​”។ លោក​បាន​ឲ្យ​ដឹង​​ថា “បាតុករ​ទាំង​នោះ​​​​​​​បាន​​ប្រើ​អំពើ​ហិង្សា​មក​លើ​យើង​ ដូច​ជា​ដុត​រថយន្ត និង​ម៉ូតូដែល​ជា​ទ្រព្យ​សម្បត្តិ​របស់​រដ្ឋ​”។

គេ​មិន​អាច​ទាក់​ទង​លោក ជួន សុវណ្ណ​ ស្នង​ការ​នគរ​បាល​រាជ​ធានី​ដើម្បី​សុំ​ការ​អត្ថា​ធិប្បាយ​បាន​ទេ​ ហើយ​លោក គៀត ច័ន្ទថារិទ្ធ អ្នក​នាំពាក្យ​នគរ​បាល​ជាតិ​បាន​បដិសេធ​មិន​ធ្វើ​អត្ថា​ធិប្បាយ។ កាលពី​ម្សិល​មិញ​នេះ​ដែរ មាស ណុន អាយុ​១៤​ឆ្នាំ និង​ វ៉ាន់នី វ៉ាន់ណន អាយុ​១៧​ឆ្នាំ​ត្រូវ​​បាន​សាលា​ដំបូង​រាជ​ធានី​ភ្នំពេញ​ចោទ​ប្រកាន់​​ពី​បទ​​បង្ក​របួស​ស្នាម​ដោយ​ចេតនា បំផ្លាញ​ទ្រព្យ​សម្បត្តិ​សាធារណៈ ប្រមាថ​មន្ត្រី​សាធា​រណៈ​ និង​រារាំង​មន្ត្រី​សាធារណៈ​មិន​ឲ្យ​បំពេញ​តួនាទី​​របស់​ខ្លួន​នៅក្នុង​ការ​ប៉ះ​ទង្គិច​គ្នា​នេះ។

នៅ​ខាង​ក្រៅ​តុលាការ​កាលពី​ម្សិលមិញ មាស ណុន បាន​ប្រាប់​ថា ខ្លួន​គ្មាន​ទោស​ទេ​ ហើយ​បាន​និយាយ​ថា រូប​គេ​ត្រូវ​បាន​គេ​ភ្ជាប់​ដោយ​មិន​ត្រឹម​ត្រូវ​ទៅ​នឹង​ការ​ដុត​រថ​យន្ត​មួយ​គ្រឿង​របស់​នគរ​បាល។ ក្មេង​ប្រុស​រូប​នេះ​បាន​និយាយ​ថា “គេ​ចោទ​ខ្ញុំ​ថា​ បាន​ដុត​រថយន្ត​នគរ​បាល​ ប៉ុន្តែ ខ្ញុំ​មិន​បាន​​ដុតទេ។ ខ្ញុំ​បាន​វាយ​បំបែក​បង្អួច​រថយន្ត​នោះ​មែន ពីព្រោះ​រថយន្ត​នោះ​ប៉ះ​ខ្ញុំ​ ដូច្នេះ​ខ្ញុំ​ក៏​បាន​វាយ​បំបែក​បង្អួច​នោះ​ទៅ”។

ក្មេង​ប្រុស​រូប​នេះ​បាន​និយាយ​ទៀត​ថា ​គេ​បាន​ចាក់​វី​ដេអូ​ឲ្យ​​រូប​គេ​មើល​ ដែល​នៅ​ក្នុង​វីដេអូនោះ ​រូបគេ​កំពុង​ព្យា​យាម​ទាញ​ម៉ូតូ​មួយ​​គ្រឿង​ដែល​កំពុង​ឆេះ​ចេញពី​ភ្លើង ប៉ុន្តែ​បាន​អះ​អាង​ថា ខ្លួន​គេ​មិន​មែន​ជា​អ្នក​ដុត​រថយន្ត​នោះទេ គឺ​គ្រាន់​តែ​ចង់​បាន​​​​បំណែក​ម៉ូតូ​ដែល​គេ​ដុត​នោះប៉ុណ្ណោះ។

វ៉ាន់នី វ៉ាន់ណន ជា​ក្មេង​ជំទង់​ដែលត្រូវ​​បាន​​​​ចោទ​ប្រកាន់​ម្នាក់​ទៀត ​​បាន​និយាយ​ថា រូប​គេ​មិន​បាន​ចូល​រួម​នៅ​ក្នុង​ការ​តវ៉ា​នេះ​ទេ ហើយ​គ្រាន់​តែ​បាន​ឈប់​នៅកន្លែង​កើត​ហេតុ​ដើម្បី​​មើល​ហេតុ​ការណ៍​​ដែល​កំពុង​កើត​ឡើង​ប៉ុណ្ណោះ។ វ៉ាន់ណន បាន​និយាយ​ថា “ខ្ញុំ​គ្រាន់​តែ​ដើរ​​​​ទៅ​ឈប់​មើល​ហេតុការណ៍​នេះ ពីព្រោះ​មាន​មនុស្ស​ច្រើន​។ នៅពេល​ខ្ញុំ​ដើរ​ទៅ​ដល់​ទីនោះ​រថយន្ត​មួយ​គ្រឿង​​ត្រូវ​បាន​គេ​ដុត​ ឆេះ​រួច​ទៅ​ហើយ​ ហើយ​នគរ​បាល​បាន​ចាប់​​​​ខ្លួន​ខ្ញុំ​តែ​ម្តង។ គេ​ចោទ​ខ្ញុំ​ថា បាន​ដុត​រថយន្ត​នោះ និង​គប់​ដុំថ្ម​ ប៉ុន្តែ​ខ្ញុំ​មិន​បាន​ដឹង​រឿង​អី​ទាំង​អស់”។

នៅ​ឯ​ពិធី​បុណ្យ​សព​ អ្នកស្រី អេង សុខុម កាល​ពីម្សិល​មិញ ប្តី​របស់​អ្នក​ស្រីឈ្មោះ ង៉ែត វង្ស អាយុ​៥១​ឆ្នាំ​បាន​និយាយ​ថា គាត់​ចង់​បាន​យុត្តិ​ធម៌​។ គាត់​បាន​និយាយ​ថា “យើង​ចង់​ឲ្យ​រដ្ឋា​ភិ​បាល​រក​យុត្តិ​ធម៌​ឲ្យ​ប្រពន្ធ​ខ្ញុំ ពីព្រោះ​គាត់​​មិន​បាន​ធ្វើ​អ្វី​ខុស​ទេ​។ វា​មិន​យុត្តិ​ធម៌​នោះទេ ពីព្រោះ​យើង​មិន​បាន​ធ្វើ​អ្វី​ខុស​ឡើយ”។ គាត់​​បាន​បន្ថែម​ថា គាត់​ក៏​កំពុង​រៀប​ចំ​គម្រោង​​ប្តឹង​កង​កម្លាំង​ប្រដាប់​អាវុធ​ដែល​ទទួល​ខុស​ត្រូវ​ចំពោះ​ការ​បាញ់​ប្រពន្ធ​របស់​ខ្ញុំ​ដែរ។

ឧត្តម​សេនីយ៍ឯក គៀត ច័ន្ទថារិទ្ធ​ អ្នក​នាំ​ពាក្យ​នគរ​បាល​ជាតិបាន​បដិសេធ​កាលពី​ថ្ងៃ​ពុធ​ថា នគរ​បាល​មិនទទួល​ខុស​ត្រូវ​ចំពោះ​ការ​ស្លាប់​របស់​អ្នក​ស្រី អេង សុខុម​ នោះទេ ប៉ុន្តែ​​នគរ​បាល​​នឹង​ធ្វើ​ការ​ស៊ើប​អង្កេត​ដោយ​ផ្ទាល់​។

ឧត្តមសេនីយ៍ត្រី ខេង ទីតូ បាន​មាន​ប្រសា​សន៍​កាល​ពី​ម្សិល​មិញ​ថា ត្រូវ​មាន​ការ​ស៊ើប​អង្កេត​ដើម្បី​ចង់​ដឹង​ថា នរណា​ជាអ្នក​បាញ់​ និង​ប្រើ​ប្រាស់​គ្រាប់​កាំភ្លើង​ប្រភេទ​ណាមួយ។ លោក​​​បាន​មាន​ប្រសាសន៍​ថា “នៅពេល​យើង​គ្រាន់​តែ​ឃើញ​សាក​សព​ យើង​មិន​អាច​​​​​​​​​និយាយ​ថា ថា នគរ​បាល​ជា​អ្នក​បាញ់​គាត់​ទេ។ តើ​នរណា​ឃើញ​នគរ​បាល​បាញ់​គាត់? នគរ​បាល​មួយ​ណា?”៕ គឹមហឿន

(រាយការណ៍​បន្ថែម​ដោយ Lauren Crothers និង អូន ភាព)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស