សន្និសីទសារព័ត៌មានមួយដែលត្រូវបានរៀបចំកាលពីម្សិលមិញ ដោយជនសង្ស័យឈ្មោះ សេរហ្គេ ប៉ូឡុនស្គី (Sergei Polonsky) នៅពន្ធនាគារ ប៉េហ្ស៊ី ក្នុងរាជធានីភ្នំពេញ មិនបានដំណើរតាមផែនការទេ។
គួរបញ្ជាក់ ថា អតីតមហាសេដ្ឋីជនជាតិរុស្ស៊ី រូបនេះកំពុងជាប់ឃុំ នៅពន្ធនាគារនេះ ដើម្បីរង់ចាំការធ្វើបត្យាប័នទៅទីក្រុងមូស្គូ ដើម្បីប្រឈមនឹងការផ្តន្ទាទោសពីបទលួចលេបយកប្រាក់។
ប៉ូឡុនស្គី បានសរសេរជាភាសារុស្ស៊ី តាមទំព័រហ្វេសប៊ុក កាលពីថ្ងៃពុធថា “នៅថ្ងៃទី១៤ខែវិច្ឆិកាឆ្នាំ២០១៣ នៅម៉ោង១៥:០០នាទីម៉ោងក្នុងស្រុក សន្និសីទសារព័ត៌មានមួយនឹងត្រូវបានរៀបចំនៅពន្ធនាគារក្រុង ក្នុងរាជធានីភ្នំពេញ”។ ប៉ូឡុនស្គី ដែលធ្លាប់ស្ថិតក្នុងចំណោមបុរសអ្នកមានទ្រព្យសម្បត្តិច្រើនបំផុតនៅប្រទេសរុស្ស៊ីនោះ បាននិងកំពុងរស់នៅលើកោះឯកជនមួយក្នុងខេត្តព្រះសីហនុ មុនពេលត្រូវបានចាប់ខ្លួនកាលពីថ្ងៃច័ន្ទ តាមសំណើរបស់អាជ្ញាធរក្រុងមូស្គូ ដែលបានចោទប្រកាន់អតីតមហាសេដ្ឋីរូបនេះកំបាំងមុខ កាលពីខែកក្កដា ពីបទបន្លំលួចយកប្រាក់១៧៦លានដុល្លារពីវិនិយោគិនប្រហែល៨០នាក់ ក្នុងគម្រោងអភិវឌ្ឍន៍និវេសនដ្ឋានមិនទាន់រួចរាល់មួយ។
នៅវេលាម៉ោងប្រហែល២:៣០នាទី ថ្ងៃម្សិលមិញអ្នកសារព័ត៌មានជាតិ និងរុស្ស៊ីមួយក្រុម រួមទាំងក្រុមការងារមានសមាជិកបួននាក់ មកពីស្ថានីយ៍ទូរទស្សន៍រដ្ឋ រុស្ស៊ី វ័ន (Russia 1) ផងបានទៅដល់ពន្ធនាគារ ប៉េហ្ស៊ី ដែលមានសន្តិសុខតិចបំផុត ក្នុងខណ្ឌសែនសុខ និងត្រូវបាននគរបាលណែនាំឲ្យរង់ចាំនៅតុអង្គុយលេងមួយក្បែរពន្ធនាគារនោះ។
ក្រោយម៉ោង៣រសៀល ជនជាតិរុស្ស៊ី មិត្តភក្ដិ និងបុគ្គលិកសរុបប្រាំនាក់របស់ជនសង្ស័យឈ្មោះ ប៉ូឡុនស្គី បានបង្ហាញខ្លួនដោយមានអាហារជាច្រើនកាបូបសម្រាប់អតីតមហាសេដ្ឋីជនជាតិរុស្ស៊ីជាប់ពន្ធនាគាររូបនេះ និងត្រូវបានអនុញ្ញាតឲ្យចូលទៅខាងក្នុងពន្ធនាគារ អមដោយមេធាវីរបស់ជនសង្ស័យរូបនេះគឺលោក រស់ ស៊ីថា។
ក៏ប៉ុន្តែ នគរបាលមិនបានអនុញ្ញាតឲ្យអ្នកសារព័ត៌មានចូលទៅខាងក្នុងទេ ហើយអ្នកដែលនៅទីនោះ បានបង្ខំចិត្តឡើងលើរបងមានខ្សែលួសរុំពីលើ ហើយយូរៗម្ដងបានឃើញសក់ទង់ដែងកាត់ខ្លីប៉ូឡុនស្គី មួយភ្លេត ពេលរូបគេដើរចុះដើរឡើង នៅក្នុងពន្ធនាគារ ដោយបាននិយាយឮៗ ជាមួយមិត្តភក្ដិរបស់ខ្លួន និងលោក ស៊ីថា។
នៅពេលទទួលអ្នកសារព័ត៌មានទាក់ទងបានតាមទូរស័ព្ទ លោក ស៊ីថា បានឲ្យដឹងថា ប៉ូឡុនស្គី បានខឹងលោក។ លោកបានមានប្រសាសន៍អំពីការផ្ទុះកំហឹងរបស់កូនក្តីលោកថា “គាត់សួរខ្ញុំថា តើខ្ញុំមានព័ត៌មានថ្មីសម្រាប់គាត់ដែរឬទេ។ ខ្ញុំថា គ្មានទេ។ គាត់និយាយថា ខ្ញុំគ្មានសមត្ថភាពគ្រប់គ្រាន់ សម្រាប់ធ្វើការឲ្យគាត់ទេ។ លោកបានបន្ថែមថា “ សន្និសីទនេះគ្មានប្រយោជន៍ទេ”។
អ្នកសារព័ត៌មានភាគច្រើនបានបោះបង់ក្តីសង្ឃឹមថា បានចូលរួមសន្និសីទសារព័ត៌មានពិតប្រាកដ ហើយបានចាកចេញពីពន្ធនាគារនោះនៅវេលាម៉ោង៤រសៀល។ ក៏ប៉ុន្តែ ក្រោយមក នៅពេលគូកនទាំងប្រាំនាក់របស់ជនសង្ស័យឈ្មោះ ប៉ូឡុនស្គី ក៏ដូចជា អ្នកសារព័ត៌មានសេរីផ្នែកថតវីដេអូ ប៉ុនប៉ងចាកចេញពីទីនោះ ពួកគេត្រូវបានឃាត់ខ្លួននិងសាកសួរអស់រយៈពេលប្រហែលប្រាំម៉ោងនៅក្នុងស្នងការដ្ឋាននគរបាលរាជធានីក្បែរនោះ។
ជនជាតិអ៊ុយក្រែនម្នាក់ឈ្មោះ អាតធ័រ យ៉ាវ៉កស៊ីវ (Arthur Yavorksiy) ដែលជាបុគ្គលិករបស់ជនសង្ស័យឈ្មោះ ប៉ូឡុនស្គី បាននិយាយនៅវេលាម៉ោងប្រហែល៩:៣០នាទីយប់ថា “ ប្រហែល១០ទៅ១៥នាទីមុននេះ យើងត្រូវបានដោះលែង” ។ ជនជាតិអ៊ុយក្រែនរូបនេះបានឲ្យដឹងទៀតថា មន្ត្រីកុងស៊ុលរស្ស៊ី បានជួយសម្រួលឲ្យមានការដោះលែងពួកគេ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីរបស់រដ្ឋាភិបាល បានទៅកាន់ពន្ធនាគារនេះក្នុងនាមបុគ្គល ដើម្បីធានាឲ្យមានការដោះលែងអ្នកសារព័ត៌មានសេរីផ្នែកថតវីដេអូរូបនោះ។
លោក ហ៊ូ ពុទ្ធវិសាល ប្រធានពន្ធនាគារ ប៉េហ្ស៊ី បានលើកឡើងកាលពីម្សិលមិញថា ការប៉ុនប៉ងរបស់ជនសង្ស័យឈ្មោះ ប៉ូឡុនស្គី ក្នុងការរៀបចំសន្និសីទសារព័ត៌មាននៅពន្ធនាគារនេះ គឺជារឿងមិនត្រឹមត្រូវទេ។ លោកបានមានប្រសាសន៍ថា “គាត់គឺជាជនសង្ស័យនៅក្នុងពន្ធនាគារ…។គាត់មិនអាចធ្វើបែបនេះបានទេ”៕ សុធា