27 C
Phnom Penh

ប្តីប្រពន្ធ​​​ពី​​​រនាក់​​​ត្រូវ​​​បាន​​​ចាប់​​​ខ្លួន​​​ពីបទ​​​ទិញ​​​ទារិកា​​​អាយុ​​​៦ខែ​​​ ដើម្បី​​​ទុក​​​យក​​​ទៅ​​​សុំ​​​ទាន​​​នៅ​​​ម៉ាឡេ​​​ស៊ី

ដោយ ឌឹ ខេមបូឌា ដេលី

បទវិភាគ

នគរបាល​​​បាន​​​ឲ្យ​​​ដឹង​​​កាលពី​​​ម្សិលមិញ​​​ថា កាល​​​ពី​​​ថ្ងៃ​​​ពុធ​​​ នគរបាល​​​ប្រឆាំង​​​ការ​​​ជួញ​​​ដូរ​​​​​​មនុស្ស ​​​បាន​​​ចាប់​​​ខ្លួន​​​បុរស​​​ម្នាក់​​​ និង​​​ប្រពន្ធ​​​​​​​​​ពី​​​បទ​​​ប៉ុន​​​ប៉ង​​​ឆ្លង​​​កាត់​​​​​​ប៉ុស្ដិ៍​​​ត្រួត​​​ពិនិត្យ​​​ព្រំដែន​​​​​​ប៉ោយ​​​ប៉ែត​​ក្នុង​​​ខេត្ត​​​បន្ទាយ​​​មាន​​​ជ័យ ​​​ជាមួយ​​​ទារិកា​​​អាយុ​​​៦​​​ខែ​​​​​​ម្នាក់​​​ ដែល​​​​​​ពួក​​​គេ​​​​​​បាន​​​ទិញ​​​ក្នុង​​​រាជធានី​​​ភ្នំពេញ​​​ ដើម្បី​​​ទុក​​​យក​​​ទៅ​​​សុំ​​​ទាន​​​ជាមួយ​​​ខ្លួន​​​នៅ​​​ប្រទេស​​​ម៉ាឡេស៊ី​​​​​​​។

ឧត្តម​​​សេនីយ៍​​​ត្រី ព្រំ​​​ សន្ធរ​​​ នាយ​​​រង​​​​​ការិ​​​យា​​​ល័យ​​​នគរបាល​​​ប្រឆាំង​​​ការ​​​ជួញ​​​ដូរ​​​មនុស្ស​​​​​​បាន​​​ឲ្យ​​​ដឹង​​​ថា ជន​​​សង្ស័យ ​​​ហេង​​​ ឈុន​​​ អាយុ​​​៤៨​​​ឆ្នាំ​​​ និង​​​ប្រពន្ធ​​​របស់​​​ខ្លួន​​​ឈ្មោះ​​​ សំ ណា អាយុ​​​៣៨​​​ឆ្នាំ​​​ ត្រូវ​​​បាន​​​ចាប់​​​ខ្លួន​​​នៅ​​​ប៉ុស្ដិ៍​​​ត្រួត​​​ពិនិត្យ​​​ជាមួយ​​​ទារិកា​​​ និង​​​បុរស​​​ពិការ​​​ពីរ​​​នាក់​​​ផ្សេង​​​ទៀត​​​ ដែល​​​​​​ប្ដី​​​ប្រពន្ធ​​​ទាំង​​​ពីរ​​​​​​នាក់​​​នេះ​​​មាន​​​​​​បំណង​​​​​​យក​​​ទៅ​​​ប្រទេស​​​ម៉ាឡេស៊ី ដើម្បី​​​ឲ្យ​​​សុំទាន​​​តាម​​​ផ្លូវ​​​។

ឧត្តម​​​សេនីយ៍​​​ត្រី​​​ ព្រំ សន្ធរ ​​មាន​​​ប្រសា​​​សន៍​​​​អំឡុង​​​សន្និសីទ​​​កាសែត​​​​​​នៅ​​​​​​ការិ​​​យាល័យ​​​​​​នគរ​បាល​​​ប្រឆាំង​​​ការ​​​ជួញ​​​ដូរ​​​មនុស្ស​​​ និង​​​ការពារ​​​អនីតិជន​​​ក្នុង​​​ខណ្ឌ​​​ទួល​​​គោក ​​​រាជ​​​ធានីភ្នំពេញ​​​​​​ថា “យើង​​​បាន​​​ទទួល​​​ព័ត៌មាន​​​ពី​​​អង្គ​​​ភាព​​​នគរ​បាល​​​​​​សម្ងាត់​​​របស់​​​យើង​​​ថា ទារិកា​​​ម្នាក់​​​កំពុង​​​ត្រូវ​​​បាន​​​គេ​​​ជួញ​​​ដូរ​​​ទៅ​​​ប្រទេស​​​ម៉ា​​​ឡេសីុ ដោយ​​​ឆ្លង​​​កាត់​​​ប្រទេស​​​ថៃ”។

លោក​​​​​​បានមាន​​​ប្រសាសន៍​​​បន្ថែម​​​ថា “[ជន​​​​សង្ស័យ​​​ឈ្មោះ​​​ ឈុន និង​​​ប្រពន្ធ​​​ឈ្មោះ​​​ ណា] បាន​​​ទិញ​​​ទារិកា​​​នេះ​​​ក្នុង​​​តម្លៃ​​​៤០០​​​ដុល្លារ​​​ក្នុង​​​រាជធានីភ្នំពេញ”​។
នគរបាល​​​បាន​​​បដិសេធ​​​​​​មិន​​​ផ្ដល់​​​ព័ត៌មាន​​​លម្អិត​​​​​​​​​ថា តើ​​​ទារិកា​​​នេះ​​​ត្រូវ​​​បាន​​​ទិញ​​​ពី​​​នរណា ឬ​​​នៅ​​​ពេល​​​ណា​​​ឡើយ​​​។ ប្ដីប្រពន្ធ​​​ទាំង​​​ពីរ​​​នាក់​​​នេះ​​​ កូនស្រី​​​អាយុ​​​២០​​​ឆ្នាំ​​​របស់​​​ពួក​​​គេ​​​​​​ បុរស​​​ពិការ​​​ចំនួន​​​ពីរ​​​នាក់ និង​​​ទារិកា​​​នេះ សុទ្ធ​​​តែ​​​មាន​​​វត្ត​​​មាន​​​​​​​​​នៅ​​​សន្និ​​​សីទ​​​កាសែត​​​។

វរសេនីយ៍​​​ទោ កែវ​​​ ធា នាយ​​​ការិយា​​​ល័យ​​​នគរបាល​​​ប្រឆាំង​​​ការ​​​​​​ជួញ​​​ដូរ​​​មនុស្ស​​​​​​​​​បាន​​​ឲ្យ​​​ដឹង​​​ថា ជន​​​សង្ស័យ​​​​​​ទាំង​​​នេះ​​​​​​នឹង​​​ត្រូវ​​​បញ្ជូន​​​ទៅ​​​សាលា​​​ដំបូង​​​រាជធានីភ្នំពេញ​​​នៅ​​​ថ្ងៃស្អែក​​​ ហើយ​​​ត្រូវ​​​បាន​​​ចោទ​​​ប្រកាន់​​​ពី​​​បទ​​​ “ទិញ​​​មនុស្ស​​​ ដើម្បី​​​បញ្ជូន​​​ឆ្លង​​​កាត់​​​ព្រំដែន​​​” ដែល​​​នឹង​​​ត្រូវ​​​ផ្ដន្ទាទោស​​​​​​ឲ្យ​​​ជាប់​​​ពន្ធនាគារ​​​រហូត​​​ដល់​​​ទៅ​​​១៥​​​ឆ្នាំ​​​។ វរសេនីយ៍​​​ទោ​​​​​​ កែវ ធា បាន​​​មាន​​​ប្រសា​​​សន៍​​​ថា “តើ​​​អ្វី​​​ទៅ​​​​​​នឹង​​​​​​កើត​​​ឡើង​​​ចំពោះ​​​ទារិកា​​​នេះ​​​? ប្រហែល​​​ជា​​​ពួក​​​គេ​​​នឹង​​​ដាក់​​​ថ្នាំសណ្ដំ រួច​​​កាត់​​​ដៃ​​​ជើង​​​ ដើម្បី​​​ធ្វើ​​​ឲ្យ​​​​​​គេ​​​អាណិត”។ តែ​​​ទោះ​​​ជា​​​យ៉ាងណា​​​ជន​​​សង្ស័យ​​​ឈ្មោះ​​​ ឈុន​​​ នេះ​​​​​​បាន​​​​​​តវ៉ា​​​ថា ខ្លួន​​​គ្មាន​​​ទោស​​​កំហុស​​​ឡើយ​​​។

ជន​​​សង្ស័យ​​​រូប​​​នេះ​​​និយាយ​​​ថា “ខ្ញុំ​​​ក្រ​​​ណាស់​​​ ខ្ញុំ​​​គឺ​​​ជា​​​អ្នក​​​សុំទាន​​​ ហើយ​​​ខ្ញុំ​​​មិន​​​ដឹង​​​ថា អ្វី​​​ដែល​​​​​​ខ្ញុំ​​​ធ្វើ​​​នេះ​​​ខុស​​​ច្បាប់​​​ឡើយ”​។ ជន​​​សង្ស័យ​​​រូប​​​នេះ​​​បន្ត​​​ថា ខ្លួន​​​បាន​​​ទៅ​​​សុំទាន​​​​​​នៅ​​​ប្រទេស​​​ម៉ាឡេសីុ​​​តាំង​​​​​​ពី​​​ខែ​​​កក្កដា​​​ មក​​​ម៉េ្លះ ហើយ​​​ខ្លួន​​​សុំ​​​ទាន​​​បាន​​​ប្រហែល​​​ពី​​​១០​​​ដុល្លារ​​​ ទៅ​​​១២​​​,៥០​​​​​ដុល្លារ​​​ក្នុង​​​មួយ​​​ថ្ងៃ​​​។

លោក​​​ យី ម៉ូ​​​ដែន អនុប្រធាន​​​​​​ក្រុម​​​ការងារ​​​ចុះ​​​អនុវត្តន៍​​​ផ្ទាល់​​​​​​នៅ​​​អង្គការ​​​សកម្មភាព​​​ ដើម្បី​​​កុមារ​​​ ជា​​​អង្គការ​​​​​​ក្រៅ​​​រដ្ឋាភិបាល​​​​​​ប្រឆាំង​​​​​​ជន​​​រួម​​​ភេទជាមួយ​​​កុមារ​​​ ដែល​​​បាន​​​ជួយ​​​​​​នគរ​​​បាល​​​​​ក្នុង​​​ការ​​​ស៊ើប​​​អង្កេត ​​​បាន​​​​​​លើក​​​ឡើង​​​ថា បុរស​​​ពិការ​​​ជើង​​​ចំនួន​​​​​​ពីរ​​​នាក់​ដែល​​​​​​​​បាន​​​​​​យល់​​​ព្រម​​​​​​ទៅ​​​ប្រទេស​​​ម៉ាឡេស៊ីដើម្បី​​​សុំទាន​​​នោះ​​​ គឺ​​​​​​ដោយ​​​សារ​​​ជឿ​​​តាម​​​ការ​​​បញ្ចុះ​​​បញ្ចូល​​​របស់​​​ប្ដី​​​ប្រពន្ធ​​​​​​ទាំង​​​ពីរ​​​នាក់​​​នេះ​​​។

លោក​​​ យី ម៉ូដែន​​​ បាន​​​មាន​​​ប្រសាសន៍​​​ថា “ ពួក​​​​គេ​​​​​​ [បុរស​​​ពិការ​​​ជើង​​​ទាំង​​​ពីរ​​​នាក់​​​] ក្រ​​​​​​ខ្លាំង​​​ណាស់​​​។ ​​​ពួក​​​គេ​​​​​​គ្មាន​​​ការ​​​​​​អប់​​​រំ​​​ឡើយ​​​ ហើយ​​​ពួក​​​គេ​​​​​​ជឿ​​​តាម​​​​​​ការ​​​បញ្ចុះ​បញ្ចូល”​។ លោក​​​បាន​​​មាន​ប្រសាសន៍​បន្ថែម​​​ថា​​​ ប្ដី​​​ប្រពន្ធ​​​ទាំង​​​ពីរ​​​នាក់​​​នេះ​​​បាន​​​សន្យា​​​ផ្ដល់អាហារ​​​ និង​​​កន្លែង​​​ស្នាក់​​​នៅ​​​​​​ដល់​​​បុរស​​​ពិការ​​​​​​ទាំង​​​ពីរ​​​នាក់​​​នេះ​​​​​​​​​សម្រាប់​​​ខែ​​​ដំបូង​​​នៅ​​​ប្រទេស​​​ម៉ាឡេស៊ី។​​ ប៉ុន្តែ​​​​​​​​​បុរស​​​ពិការ​​​ទាំង​​​ពីរ​​​នាក់​​​នេះ​​​ ត្រូវតែ​​​បង់​​​ប្រាក់​​​មក​​​ឲ្យប្ដី​​​ប្រពន្ធ​​​ទាំង​​​ពីរ​​​នាក់​​​ចំនួន​ប្រហែល​​​​​​​​១.៥០០​​​ដុល្លារ​​​ បន្ទាប់​​​ពី​​​ទទួល​​​​​​បាន​​​ប្រាក់​​​ពី​​​ការ​​​សុំ​​​ទាន៕ ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស