28 C
Phnom Penh

ជន​ចាប់ជំរិតបីនាក់ត្រូវបានចាប់ខ្លួន​បន្ទាប់ពីប៉ុនប៉ងជំរិតទារប្រាក់៥.០០០​ដុល្លារ

ដោយ ឌឹ ខេមបូឌា ដេលី

បទវិភាគ

មន្ត្រី​កង​រាជ​អាវុធ​ហត្ថ​ម្នាក់​បាន​និយាយ​កាល​ពី​ម្សិល​មិញ​ថា មនុស្ស​បី​នាក់​ត្រូវ​បាន​ចាប់​ខ្លួន​ក្នុង​ខេត្ត​ស្ទឹង​ត្រែង​កាល​ពី​ថ្ងៃ​ពុធ បន្ទាប់​ពី​ពួក​គេ​បាន​ចាប់​ជំរិត​ក្មេង​ប្រុស​អាយុ​៨​ឆ្នាំ​ម្នាក់ ប៉ុន​ប៉ង​គំរាម​ទារ​ប្រាក់​ពី​ឪពុក​ម្តាយ​ក្មេង​ប្រុស​នេះ​ចំនួន​៥.០០០​ដុល្លារ។

លោក អ៊ឹង វណ្ឌី មេ​បញ្ជា​ការ​កង​រាជ​អាវុធ​​ហត្ថ​ខេត្ត​ស្ទឹង​ត្រែងបាន​មាន​ប្រសាសន៍​ថា ឆាយ ឡេង អាយុ​៤០​ឆ្នាំ ត្រូវ​បាន​ចាប់​ខ្លួន​ជា​មួយ​​ឈ្មោះ ស សុវណ្ណ អាយុ​៣០​ឆ្នាំ និង​ឈ្មោះ ​អ៊ឹម ចរិយា អាយុ​២២​ឆ្នាំ ​ត្រូវ​ជា​មិត្ត​ស្រី​របស់​ខ្លួន​ដោយអាជ្ញា​ធរបន្លំខ្លួន​​​ស្លៀក​ពាក់​ជាស៊ីវិល​រង់​ចាំ​នៅវត្ត​មួយ​ក្នុង​មូល​ដ្ឋាន​ នៅ​ម៉ោង​ប្រហែល​៤​ល្ងាច។

លោកវរ​សេនីយ៍ឯក អ៊ឹង វណ្ឌី បាន​មាន​ប្រសាសន៍​ថា “យើង​បាន​ចំណាយ​ពេល​៤​ម៉ោង ដើម្បី​ស្វែង​រក​ជន​សង្ស័យ​ទាំង​នេះ បន្ទាប់​ពីឪពុក​ម្តាយ​ជន​រង​គ្រោះ​បាន​ប្តឹង​មក​មន្ត្រី​កង​រាជ​អាវុធ​ហត្ថ​ក្រុង​ស្ទឹង​ត្រែង”។ ជន​ចាប់​ជំរិត​បាន​​ចាប់​ក្មេង​ប្រុស​នេះ​ពី​សាលា​បឋម​សិក្សា​មួយក្នុង​ក្រុង​ស្ទឹង​ត្រែង​នៅ​ម៉ោង​ប្រហែល​១១​ និង​៣០​នាទី​ថ្ងៃ​ត្រង់ ហើយ​ពី​ដំបូង​ពួកគេ​បាន​ទាម​ទារ​ប្រាក់​ពី​​​ឪពុក​​ម្តាយ​ក្មេង​ប្រុស​នេះ​ចំនួន ៥០.០០០​ដុល្លារ។

លោក អ៊ឹង វណ្ឌី បាន​ពន្យល់​ថា បន្ទាប់ពី​​មាន​ការ​​​ផ្តល់​​​យោ​បល់ពី​កងរាជ​អាវុធហត្ថមក ឪពុក​ម្តាយ​​ក្មេង​ប្រុស​នេះ​និយាយ​ជាមួយ​​ជន​ចាប់​ជំរិត​សុំ​ឲ្យ​បញ្ចុះ​ប្រាក់​លោះ​មក​ត្រឹម​៥.៥០០​ដុល្លារ ហើយ​បន្ទាប់​មក​បាន​រៀប​ចំ​យក​លុយ​ទៅ​ទម្លាក់​ទុក​នៅ​ក្បែរ​វត្ត​មួយ​ក្នុង​សង្កាត់​ស្រះ​ឫស្សី។ មេ​បញ្ជា​ការ​កង​រាជ​អាវុធ​ហត្ថ​រូប​នេះ​បាន​មាន​ប្រសាសន៍​ថា មន្ត្រី​របស់​លោក​​ដែល​​​ស្លៀក​ពាក់​ជាស៊ីវិល​​បាន​រង់​ចាំ​នៅ​វត្ត​នោះ ហើយ​​បាន​ចាប់​​ខ្លួនអ្នក​ចាប់​ជំរិត​ពីរ​នាក់ អំឡុង​​ការ​ដោះ​ដូរ​ថ្នូ​រ​ជា​លុយ​នោះ​។

ក្រោយ​មក​ កង​រាជ​អាវុធ​ហត្ថ​បាន​រក​ឃើញ​​ក្មេង​ប្រុសដែល​​ត្រូវបាន​ចាប់​ជំរិត​នោះ​គឺឈ្មោះ ចរិយា បាន​យក​ទៅ​លាក់​ទុក​នៅ​​​​ក្នុង​ព្រៃ​ក្បែរ​នោះ ហើយ​បាន​ប្រគល់​ក្មេង​ប្រុស​នេះ​ទៅ​ឲ្យ​ឪពុក​ម្តាយរបស់វា​វិញ ដោយគ្មាន​រង​របួស​អ្វី​ឡើយ។ ជន​ចាប់​ជំរិត​ទាំង​នោះ​កំពុង​ត្រូវ​បាន​ឃុំ​ខ្លួន​ ហើយ​នឹង​ត្រូវ​ធ្វើ​ការ​ចោទ​ប្រកាន់​នៅ​សាលា​​​​​ដំបូង​ខេត្ត​ស្ទឹង​ត្រែង​នៅ​ថ្ងៃ​នេះ៕ ខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស