ឡាវ​​​មិន​​​អាច​​​បញ្ចុះ​​​បញ្ចូល​​​​​​ប្រទេស​​​ជិតខាង​​​​​​រឿង​​​ទំនប់​​​ ដន​​​ សាហុង​​​

ខេត្ត​​​ចំបា៉សាក់​​​, ឡាវ-អស់រយៈ​​​ពេល​​​បីថ្ងៃ​​​ក្នុង​​​សប្ដាហ៍​​​នេះ រដ្ឋាភិបាល​​​ឡាវ​​​ និង​​​ក្រុម​​​ហ៊ុន​​​ម៉ាឡេស៊ី​​​មួយ​​​ដែល​​​​​​ស្ថិត​​​នៅ​​​​​​ក្រោយ​​​គម្រោង​​​ស្ថាបនា​​​ទំនប់​​​វារី​​​អគ្គិសនីដនសាហុង​​​​​​កម្លាំង​​​២៤០​​​មេហ្គាវ៉ាត់ ​​​បាន​​​ប្រឹង​​​ប្រែង​​​យ៉ាង​​​ខ្លាំង​​​ក្នុង​​​ការ​​​បញ្ចុះ​​​បញ្ចូល​​​មន្ត្រី​​​ពោរពេញ​​​ដោយ​​​មន្ទិល​​​សង្ស័យ​​​មួយ​​​ក្រុម​​​មក​​​ពី​​​ប្រទេស​​​កម្ពុជា​​​ និង​​​វៀតណាម​​​ ឲ្យ​​​ទទួល​​​យក​​​គម្រោង​​​នេះ​​​។

មន្ត្រី​​​ទាំង​​​នេះ​​​ត្រូវ​​​បាន​​​គេ​​​រៀប​​​ចំ​​​អាហារ​​​ទទួល​​​យ៉ាង​​​បរិបូរណ៍​​​នៅ​​​សណ្ឋាគារ​​​ផ្កាយ​​​ប្រាំ​​​មួយ​​​កន្លែង​​​ក្នុង​​​ក្រុង​​​ប៉ាក​​​សេ ក្នុង​​​នោះ​​​គឺ​​​មាន​​​ទាំង​​​ស៊ុប​​​ព្រុយ​​​ត្រី​​​ឆ្លាម​​​​​និង​​​ទាខ្វៃ​​​​​​ផង​​​​។ របៀប​​​វារៈ​​​សម្រាប់​​​​​​ជំនួប​​​នៅ​​​យប់​​​ថ្ងៃ​​​ច័ន្ទ​​​ គឺ​​​រួម​​​មាន​​​ អាហារ​​​ពេល​​​ល្ងាច​​អមជាមួយ​​​នឹង​​​ស្រា​​​បៀរ​​​​​​ និង​​​ស្រាវីស្គី​​​ សម្រាប់​​​ភ្ញៀវ​​​ ដែល​​​ត្រូវបាន​​​រាំ​​​​​​​​​​​កំដរ​​​​​​ដោយ​​​ស្ត្រី​​​របាំ​​​ប្រពៃណីឡាវ​​​មួយ​​​ក្រុម​​​។

អំឡុង​​​ពេល​​​ចុះ​​​ពិនិត្យ​​​រយៈ​​​ពេល​​​មួយ​​​ថ្ងៃ​​​ពេញ​​​នៅ​​​ឯ​​​ទន្លេ​​​មេគង្គ​​​​​​លើ​​​ក្បែរ​​​កន្លែង​​​សាង​​​​​​​​​សង់​​​ទំនប់​​​វារីអគ្គិសនី​​​នេះ​​​ ប្រជាជន​​​​​​មូល​​​ដ្ឋាន​​​ និង​​​​​​សិស្សសាលា​​​ក្នុង​​​ឯក​​​សណ្ឋាន​​​ថ្មី​​​បាន​​​ឈរ​​​តម្រង់​​​ជួរ​​​គ្នា​​​តាម​​​ផ្លូវ​​​លំ​​​មួយ​​​​​​ដើម្បី​​​ញញឹម​​​រាក់​​​ទាក់​​​​​​ និង​​​លើកដៃ​​​សំពះ​​​​​​គណៈ​​​ប្រតិភូ​​​ដែល​​​ធ្វើ​​​ដំណើរ​​​ឆ្លង​​​កាត់​​​។

វា​​​ជាការ​​​រៀប​​​ចំ​​​យ៉ាង​​​សម្រិត​​​សម្រាំង​​​មួយ​​​ក្នុង​​​​​​បំណង​​​​​​បញ្ចុះ​​​បញ្ចូល​​​គណៈប្រតិភូ​​​។ ក៏​​​ប៉ុន្តែ​​​ ទោះ​​​បី​​​ជាមាន​​​ការ​​​ទទួល​​​ស្វាគមន៍​​​​​​ដ៏​​​​​​គគ្រឹកគ្រេង​​​យ៉ាង​​​ណា​​​ក៏ដោយចុះ​​​​​​ ក៏គណៈ​​​ប្រតិភូ​​​​​​ចូល​​​រួម​​​​​​​​​​​​ក្នុង​​​“​​​ទស្សន​​​កិច្ច​​​សិក្សា​​​​​” ដែល​​​រួម​​​មាន​​​អ្នក​​​បរិស្ថាន​​​​​​និង​​​ប្រទេស​​​ម្ចាស់​​​ជំនួយ​​​​​​ ដូច​​​ជា អាមេរិក និង​​​ស្វីស ព្រម​​​ទាំង​​​មន្ត្រី​​​​​​​​​រដ្ឋា​​​ភិបាល​​​​​​កម្ពុជា​​​ និង​​​វៀតណាម និង​​​អ្នក​​​កាសែត​​​​​​មួយ​​​ចំនួន​​​ទៀត​​​មិន​​​បាន​​​ជឿ​​​ការ​​​បញ្ចុះ​​​​​​​​​បញ្ចូល​​​​​​របស់​​​ក្រុម​​​ហ៊ុននេះទេ​​​​​​។

លោក ឡេ ដឹក ទ្រុង (Le Duc Trung) អគ្គ​​​នាយក​​​​​​នៃ​​​គណៈកម្មាធិការ​​​ទន្លេ​​​មេគង្គ​​​ជាតិ​​​វៀត​​​ណាម បាន​​​មាន​​​ប្រសាសន៍​​​នៅ​​​ថ្ងៃបញ្ចប់​​​ទស្ស​​​ន​​​កិច្ច​​​សិក្សា​​​រយៈ​​​ពេល​​​បីថ្ងៃ​​​នេះ​​​ថា “ ខ្ញុំ​​​អាច​​​មើល​​​ឃើញ​​​ថា នៅ​​​មាន​​​ការ​​​កែសម្រួល​​​ ការ​​​ងារ​​​ចំា​​​បាច់​​​ និង​​​ព័ត៌មាន​​​ ព្រម​​​ទាំង​​​ការ​​​វាស់​​​​​​ស្ទង់​​​​​​ជា​​​ច្រើន​​​ទៀត​​​ដែល​​​​​​ត្រូវ​​​ធ្វើ​​​មុន​​​​​​ការ​​​​​​សាង​​​សង់​​​ទំនប់​​​នេះ​​​ចាប់ផ្តើម​​​”។

លោក ដឹក ទ្រុង បាន​​​បញ្ជាក​​​់​​​ថា ខ្លួន​​​នៅ​​​តែ​​​មាន​​​ការ​​​ “ ខក​​​ចិត្ត​​​” ចំពោះ​​​អំណះអំណាង​​​មួយ​​​ចំនួ​​​ន​​​ក្នុង​​​ចំណោម​​​អំណះអំណាង​​​របស់​​​រដ្ឋាភិបាល​​​ឡាវ និង​​​ក្រុម​​​ហ៊ុន​​​ម៉ាឡេស៊ី គឺក្រុម​​​ហ៊ុន Mega First Corporation ដែល​​​ថា ទំនប់​​​នេះ​​​នឹង​​​មិន​​​បង្ក​​​ផល​​​ប៉ះពាល់​​​ដល់​​​ទន្លេ​​​មេគង្គ​​​។

លាត​​​សន្ធឹង​​​​​​កាត់​​​ផ្លូវ​​​ទឹក​​​ហ៊ូ សាហុង លើ​​​​​​​​​ទន្លេ​​​​​​មេគង្គ គម្រោង​​​សាង​​​សង់​​​ទំនប់​​​វារី​​​អគ្គិ​​​សនី​​​ ដន សាហុង ​​​នេះ​​​បាន​​​រង​​​ការ​​​រិះ​​​គន់​​​យ៉ាង​​​ខ្លាំង​​​ចាប់​​​តាំង​​​ពី​​​​​​រដ្ឋាភិបាល​​​ឡាវ​​​បាន​​​ប្រកាស​​​អំពី​​​ការ​​​ចាប់​​​ផ្ដើម​​​គម្រោង​​​នេះ​​​នៅ​​​ដើម​​​ខែ​​​តុលា ​​​មក។
ក្រុម​​​អ្នកការ​​​ពារ​​​​​​បរិស្ថាន​​​បាន​​​លើក​​​ឡើង​​​ថា ទំនប់​​​នេះ​​​គឺ​​​នឹង​​​កាត់​​​ផ្ដាច់​​​ផ្លូវ​​​មួយ​​​​​​​នៅ​​​​ក្នុង​​​ចំណោម​​​ផ្លូវ​​​បម្លាស់​​​ទី​​​​​​​យា៉ង​​​សំខាន់​​​​​​បំផុត​​​របស់​​​មច្ឆជាតិ​​​​​​នៅឯ​​​​​​អាង​​​​​​​​​ទន្លេ​​​មេគង្គ​​​ក្រោម​​​ ដោយ​​​នឹង​​​​​​​​​ធ្វើ​​​ឲ្យ​​​ប៉ះ​​​ពាល់​​​ខ្លាំង​​​ដល់​​​សន្តិសុខ​​​ស្បៀង​​​អាហារ​​​សម្រាប់​​​ប្រជា​​​​​​ពល​​​រដ្ឋ​​​រាប់​​​លាន​​​នាក់​​​​​​ក្នុង​​​​​​តំបន់​​​នេះ​​​​​​ ​​​ភាគ​​​ច្រើន​​​រស់​​​នៅ​​​ក្នុង​​​ប្រទេស​​​កម្ពុជា​​​ និង​​​ប្រទេស​​​វៀតណាម នៅ​​​ឯ​​​ខ្សែ​​​ទឹក​​​ខាង​​​ក្រោម​​​។

ជា​​​អ្នក​​ចុះកិច្ច​​​សន្យា​​​សាង​​​សង់​​​ទំនប់​​​​​​​​​​​​នេះ​​​ឲ្យ​​​រដ្ឋាភិបាល​​​ឡាវ​​​ ​​​ តំណាង​​​​​​ក្រុម​​​ហ៊ុន ​​​​​​​​​Mega First បាន​​​លើក​​​ឡើង​​​ថា ខ្លួន​​​មិនជឿ​​​ក្រុមអ្នក​​​បរិស្ថាន​​​ទេ​​​។

អំឡុង​​​ការ​​​ធ្វើ​​​បទ​​​បង្ហាញ​​​មួយ​​​នៅ​​​សណ្ឋា​​​គារ​​​ ហ្គ្រែន​​​ ចំបា៉សាក់ (Champasak Grand Hotel) ក្នុង​​​ក្រុង​​​ប៉ាក​​​សេ ​​​កាលពី​​​ថ្ងៃ​​​អាទិត្យ​​​ ​​​តំណាង​​​ក្រុម​​​ហ៊ុន Mega First បាន​​​លើក​​​ឡើង​​​ថា ខ្លួន​​​នឹង​​​ “​​​ លុប​​​បំបាត់​​​ការ​​​ភាន់​​​ច្រឡំ” ​​​ ពី​​​ទំនប់​​​វារី​​​អគ្គិសនីនេះ​​​ក្នុង​​​ចំណោម​​​​​​អ្នក​​​បរិស្ថាន​​​។

ក៏​​​ប៉ុន្តែ​​​ ប្រសិន​​​បើ​​​អ្វី​​​ដែល​​​ធ្វើ​​​ឲ្យក្រុម​​​អ្នក​​​បរិស្ថាន​​​​​​មាន​​​ការ​​​ព្រួយ​​​បារម្ភ​​​​​​ ក្លាយ​​​ជា​​​ការ​​​ពិត​​​ហើយ​​​​​​ធន​​​ធាន​​​ជល​​​ផល​​​រង​​​ការ​​​ប៉ះពាល់​​​មែន​​​នោះ​​​ តើ​​​នរណា​​​ជាអ្នក​​​ទទួល​​​ខុស​​​ត្រូវ​​​?

​​​នេះ​​​ជា​​​សំណួរ​​​ដែល​​​​​​លោក តែ​​​ ណាវុធ អគ្គ​​​លេខាធិការ​​​គណៈកម្មា​​​ធិការ​​​ទន្លេ​​​មេគង្គ​​​ជាតិ​​​កម្ពុជា​​​ បាន​​​ចោទ​​​សួរលោក​​​ Peter Hawkins អ្នក​​​គ្រប់​​​គ្រង​​​ជាន់​​​ខ្ពស់​​​ផ្នែក​​​បរិស្ថាន​​​នៅ​​​​​​ក្រុម​​​ហ៊ុន​​​ Mega First ​​​។

លោក​​​ ​​​​​ណាវុធ ​​បាន​​​​ចោទ​​​សួរ​​​ថា “ ប្រសិន​​​​​​​​​បើ​​​វិធាន​​​ការ​​​ [ការ​​​ពារ​​​ធន​​​ធាន​​​ជល​​​ផល​​​] ​​​មិន​​​មាន​​​ប្រសិទ្ធ​​​ភាព​​​ទេ​​​នោះ តើ​​​នឹង​​​មាន​​​អ្វីកើត​​​ឡើង​​​? យើង​​​ពុំ​​​​​​អាច​​​ធានា​​​បាន​​​ថា វា​​​នឹង​​​មាន​​​​​​​​​ប្រសិទ្ធ​​​ភាព​​​ដូច​​​ការ​​​រំពឹង​​​ទេ​​​”។

លោក​​​ Peter Hawkins បាន​​​ឆ្លើយ​​​តប​​​ថា ​​​ខ្លួន​​​មាន​​​ទំនុក​​​ចិត្ត​​​ថា “ ការ​​​ភាន់​​​ច្រឡំ​​​” របស់​​​​​ក្រុម​​​អ្នក​​​បរិស្ថាន​​​​​​នឹង​​​មិន​​​ក្លាយ​​​ជាការ​​​ពិត​​​ឡើយ​​​។​​​ ប៉ុន្តែ​​​ លោក​​​បាន​​​បញ្ជាក់​​​ថា ប្រសិន​​​បើ​​​វា​​​ក្លាយ​​​​​​​​ជា​​​ការ​​​ពិត​​​មែន​​​នោះ វាគឺ​​​​​​ជា​បញ្ហា​​​ដែល​​​រដ្ឋា​​​ភិបាល​​​ឡាវ​​​ត្រូវ​​​ដោះ​​​ស្រាយ​​​។

លោក​​​​​​បាន​​​ប្រាប់​​​លោក​​​ ណាវុធ ថា “ ឥឡូវ​​​​​​​​​ យើង​​​មាន​​​ទំនុក​​​ចិត្ត​​​មុតមាំ​​​​​​ថា  យើង​​​អា​​​ច​​​ធ្វើ​​​  [ការ​​​បញ្ចៀស​​​ផល​​​ប៉ះពាល់​​​លើ​​​ធន​​​ធាន​​​ជល​​​ផល] បាន​​​ ក៏​​​ប៉ុន្តែ​​​…​​​ប្រសិន​​​​​​បើ​​​​​​ការ​​​ភាន់​​​ច្រឡំ​​​ក្លាយ​​​ជាការ​​​ពិត​​​មែន​​​នោះ​​​​​​ រដ្ឋាភិបាល​​​ឡាវ​​​ ​​​គឺ​​​ជា​​​អ្នក​​​ដែល​​​ត្រូវ​​​ធ្វើការ​​​សម្រេច​​​ចិត្ត​​​”។​​​

លោក​​​ ​​​ណាវុធ បាន​​​មាន​​​ប្រសាសន៍​​​​​​​​​ក្នុង​​​ថ្ងៃ​​​ដដែល​​​នោះ​​​ថា  ខណៈ​​​រដ្ឋាភិបាល​​​ឡាវ​​​​​​​​​​​​ ទទូច​​​​​​​​ថា​​​ទំនប់​​​វារី​​​អគ្គិសនី​​​​​​ដន សាហុង គ្រាន់​​​​​​​​​តែ​​​ជា​​​ “ ទំនប់​​​​​​លើ​​​ដៃ​​​ទន្លេ​​​” នោះ កម្ពុជា​​​ ជឿថា វា​​​ស្ថិត​​​​​​នៅ​​​ទន្លេ​​​មេគង្គ​​​ខ្សែ​​​ទឹក​​​ខាង​​​លើ​​​។​​​

យោង​​​លើ​​​នីតិវិធី​​​ដែល​​​មាន​​​ចែង​​​​​​នៅ​​​ក្នុង​​​កិច្ច​​​​​​​​​ព្រម​​​ព្រៀង​​​ទន្លេ​​​មេគង្គ​​​ឆ្នាំ​​​១៩៩៥​​​ រាល់​​​គម្រោង​​​សាង​​​សង់​​​ទំនប​​​់​​​វារី​​​អគ្គិស​​​នី​​​នៅ​​​​​​លើ​​​ខ្សែ​​​ទឹក​​​មេ​​​របស់​​​ទន្លមេគង្គ​​​ ដាច់​​​ខាត​​​​​​ត្រូវ​​​ឆ្លង​​​កាត់​​​ដំណើរ​​​ការ​​​ពិគ្រោះ​​​យោបល់​​​​​​​​​ក្នុង​​​ចំណោម​​​​​​​​​ប្រទេស​​​ជា​​​សមាជិក​​​​​​ជាមុន​​​សិន​​​។ គួរ​​​បញ្ជាក់​​​ថា កិច្ច​​​ព្រម​​​ព្រៀងមិន​​​ភ្ជាប់​​​កាតព្វកិច្ច​​​​​​នេះ​​​​​​គឺ​​​ត្រូវ​​​បាន​​​ចុះ​​​ហត្ថលេខា​​​ដោយ​​​​​​បណ្តា​​​ប្រទេស​​​ជា​​​សមា​​​​​​ជិក​​​គណៈ​​​កម្មាធិការ​​​ទន្លេ​​​មេគង្គ​​​​​​ ហៅ​​​កាត់​​​ថា MRC  ក្នុ​​​ង​​​នោះ​​​មានប្រទេស ​​​កម្ពុជា​​​ ឡាវ  វៀតណាម  និង​​​​​​​​​ថៃ។ កិច្ច​​​ព្រម​​​ព្រៀង​​​នេះ​​​គឺ​​​សំដៅ​​​គ្រប់​​​គ្រង​​​រាល់​​​ការ​​​អភិវឌ្ឍ​​​​​​ន៍​​​នៅ​​​លើ​​​ទន្លេ​​​មេគង្គ​​​។

កិច្ច​​​ព្រម​​​ព្រៀង​​​ដែល​​​គេ​​​ហៅ​​​ថា ដំណើរ​​​ការ​​​ពិគ្រោះ​​​យោបល់​​​ជា​​​មុន​​​នេះ​​​ តាម​​​ទ្រឹស្តី​​​គឺ​​​​​​ថា រដ្ឋាភិបាល​​​នៃ​​​ប្រទេស​​​ជា​​​សមា​​​ជិក​​​​​​​​​ទាំង​​​អស់​​​ដាច់​​​ខាត​​​ត្រូវមាន​​​ការ​​​​​​ព្រម​​​ព្រៀងគ្នា​​​​​​មុ​​​ន​​​ពេល​​​​​​​​​ប្រទេស​​​ណាមួយ​​​​​​ចាប​​​់​​​ផ្ដើម​​​ការ​​​សាង​​​សង់​​​លើ​​​ខ្សែ​​​ទឹក​​​មេ​​​របស់​​​ទន្លេ​​​​​​នេះ​​​។ ចំណែក​​​ឯ​​​ទំនប់​​​​​​វារីអគ្គិសនី​​​​​​​​​​​​នៅ​​​លើ​​​ដៃ​​​ទន្លេ​​​មេគង្គវិញ​​​​​​គឺ​​​គ្រាន់​​​តែ​​​ឆ្លង​​​កាត់នូវ​​​​​​​​​​​​ “ ដំណើរ​​​ការ​​​ជូនដំណឹង​​​” ទៅ​​​ប្រទេស​​​​​​ជា​​​សមាជិក​​​ប៉ុណ្ណោះ​​​ គឺ​​​មិន​​​សូវ​​​តឹង​​​តែ​​​ង​​​ដូច​​​ការ​​​សាង​​​សង់​​​លើ​​​ខ្សែ​​​ទឹក​​​មេទេ​​​។

លោក តែ ណាវុធ បាន​​​មាន​​​ប្រសាសន៍​​​ថា ​​​ “ រដ្ឋាភិបាល​​​ឡាវ គឺ​​​គ្រាន់​​​តែ​​​បាន​​​ជូន​​​ដំណឹង​​​អំពីគម្រោង​​​សាង​​​សង់​​​ទំនប់​​​វារីអគ្គិសនី​​​​​ ដន សាហុង នេះ​​​តែ​​​ប៉ុណ្ណោះ​​​ [ដោយ​​​សម្អាង​​​ថា វា​​​ស្ថិត​​​នៅ​​​លើ​​​ដៃ​​​ទន្លេ​​​មេគង្គ​​​] ខណៈ​​​តាមពិត​​​ទីតាំង​​​​​​នៃ​​​ទំនប់​​​នេះ​​​ស្ថិត​​​នៅ​​​លើ​​​ខ្សែទឹក​​​មេ​​​នៃ​​​ទន្លេមេគង្គ ទោះ​​​បីជា​​​វា​​​ [ គ្រាន់​​​តែ​​​ជា​​​] ផ្លូវ​​​ទឹក​​​មួយ​​​ក្នុង​​​ចំណោម​​​ផ្លូវ​​​ទឹក​​​ដ៏សំខាន់​​​ទាំង​​​​​​ប្រាំពីរ​​​ក៏ដោយ​​​ចុះ”។

លោក​​​មាន​​​ប្រសាសន៍​​​បន្ត​​​ថា “ វា​​​ស្ថិត​​​នៅ​​​លើ​​​​​​ខ្សែ​​​ទឹក​​​មេ​​​ មិន​​​មែន​​​ដៃ​​​ទន្លេ​​​ទេ​​​” ដោយ​​​​​​​​​បន្ថែម​​​ថា  គេ​​​មិន​​​អាច​​​​​​​​​​​និយាយ​​​អំពី​​​ការ​​​សាង​​​សង់​​​ទំនប់​​​វារីអគ្គិសនី​​​មុន​​​ពេល​​​​​​ប្រទេស​​​ជា​​​សមាជិក​​​ទាំង​​​អស់​​​ព្រម​​​ព្រៀង​​​គ្នា​​​ឡើយ​​​។

លោក​​​បាន​​​មាន​​​ប្រសាសន៍​​​ថា “ [ ការ​​​វាយ​​​តម្លៃ​​​ពី​​​ផល​​​ប៉ះពាល់​​​បរិស្ថាន​​​របស់​​​ពួកគេ​​​] ពុំ​​​មាន​​​ការ​​​បញ្ជាក់​​​អ្វី​​​សោះ​​​ពាក់​​​ព័ន្ធ​​​នឹង​​​ផល​​​ប៉ះ​​​ពាល់​​​របស់​​​វា​​​លើ​​​ប្រទេស​​​កម្ពុជា ​​​​​​ដែល​​​ស្ថិត​​​នៅ​​​យ៉ាង​​​កៀក​​​” នឹងទំនប់​​​នេះ​​​។

លោក​​​បាន​​​ពន្យល់​​​ថា  ទំនប់​​​វារីអគ្គិសនី​​​ដែល​​​បាន​​​ស្នើ​​​ឡើង​​​នេះ​​​ គឺ​​​ស្ថិត​​​នៅ​​​ចម្ងាយ​​​ត្រឹម​​​តែ​​​​​​១,៥​​​គីឡូម៉ែត្រ​​​ប៉ុណ្ណោះ​​​​​​ពី​​​​​ព្រំដែន​​​កម្ពុជា​​​ ក្នុង​​​ខេត្ត​​​ស្ទឹង​​​ត្រែង​​​។

លោក​​​បាន​​​ថ្លែង​​​ថា“ ដូច្នេះ​​​​​​​​ យើង​​​ចង់​​​ឲ្យ​​​របាយ​​​​​​ការណ៍​​​វាយ​​​តម្លៃ​​​​​​​​​នេះ​​​រាប់​​​បញ្ចូល​​​ទាំង​​​កម្ពុជា​​​ផង​​​ ដើម្បី​​​ឲ្យ​​​បាន​​​យល់​​​ពី​​​ផល​​​ប៉ះពាល់​​​ឆ្លង​​​​​​ព្រំដែន​​​”។

បើ​​​ទោះ​​​ជា​​​មាន​​​ការ​​​រៀបចំ​​​ពិធី​​​​​​ស្វាគមន៍​​​យ៉ាង​​​គគ្រឹក​​​គគ្រេង​​​​​​​​​ដោយ​​​មាន​​​ការ​​​ផ្ដល់ជូន​​​ស្រាបៀរ​​​​​​​​​ហូរហៀរ​​​​​​  និង​​​ការ​​​ព្យាយាម​​​បញ្ចុះ​​​បញ្ចូល​​​ថា​​​ ​​​មាន​​​ការ​​​ “ ភាន់​​​ច្រឡំ​​​”​​​ ពីសំណាក​​​​​​់​​​តំណាង​​​​​​​​​ក្រុម​​​ហ៊ុន Mega First នេះ​​​យ៉ាង​​​ណា​​​ក៏​​​​​​ដោយ​​​ ក៏​​​គណៈ​​​ប្រតិភូនៅ​​​តែ​​​មាន​​​ការ​​​លំបាក​​​ណាស់​​​ក្នុង​​​ការ​​​ទទួល​​​យក​​​ការ​​​អះអាង​​​ដែល​​​ថា ទំនប់​​​នេះ​​​នឹង​​​ធ្វើ​​​ឲ្យ​​​ធន​​​ធាន​​​ជល​​​ផល​​​នៅ​​​ក្នុង​​​តំបន់​​​នេះ​​​មាន​​​ភាព​​​​​​ប្រសើរ​​​ឡើង​​​នោះ។

ការ​​​លើក​​​អំណះអំណាង​​​ផ្ទុយ​​​ពី​​​​​​ការ​​​យល់​​​​ឃើញ​​​របស់​​​មជ្ឈដ្ឋាន​​​ទូទៅ​​​នេះ​​​ គឺ​​​ធ្វើ​​​ឡើង​​​ដោយ​​​លោក វីរ៉ាផន វីរ៉ា​​​វង្ស (Viraphonh V-​​​iravong) អនុ​​​​​​រដ្ឋ​​​មន្ត្រី​​​ក្រសួង​​​រ៉ែ​​​ និង​​​ថាមពល​​​​​​នៃ​​​ប្រទេស​​​ឡាវ​​​។

អំឡុង​​​ទស្សនកិច្ច​​​នៅ​​​ឯ​​​កោះ​​​តូច​​​មួយ​​​លើ​​​ទន្លេ​​​ ហ៊ូ សាដាំ (Hou Sadam River) ​​​លោក​​​វីរ៉ា​​​វង្ស បាន​​​ពន្យល់​​​ថា អ្នក​​​ភូមិ​​​​​​នៅ​​​ក្នុងមូល​​​ដ្ឋាន​​​តាមពិត​​​ទៅ​​​ បាន​​​​​​ត្អូញ​​​ត្អែ​​​រ​​​ពីការ​​​ធ្លាក់​​​ចុះ​​​ផល​​​នេសាទជា​​​​​​រៀង​​​រាល់​​​ឆ្នាំ​​​នៅ​​​លើ​​​ផ្នែក​​​នៃ​​​ទន្លេ​​​មេគង្គ​​​នេះ​​​ស្រាប់​​​ទៅហើយ​​​ ទោះបី​​​ជា​​​ពុំ​​​​​​មាន​​​ទំនប់​​​វារីអគ្គិសនី​​​​​​​​​សូម្បីតែមួយ​​​​​​ក៏ដោយចុះ​​​​​​។

លោក​​​​​​ថ្លែង​​​ថា  “ យើង​​​មិន​​​ទាន់​​​បាន​​​សាង​​​សង់​​​ទំនប់​​​ណាមួយ​​​នៅ​​​ទីនេះទេ​​​​​​។ យើង​​​មិន​​​ទាន់​​​បាន​​​រាំង​​​ខ្ទប់​​​ទន្លេ​​​ណាមួយ​​​ទេ ក៏​​​ប៉ុន្តែ​​​ធន​​​ធាន​​​ត្រី​​​នៅ​​​តែ​​​មាន​​​ការ​​​ធ្លាក់​​​ចុះ គឺ​​​វា​​​ធ្លាក់​​​ចុះ​​​​​​​​​រាល់​​​ឆ្នាំ​​​ស្រាប់​​​ទៅ​​​ហើយ​​​​​​”។

លោក​​​បាន​​​បន្ថែម​​​ថា ទំនប់​​​​​​​​​​​​ដន សាហុង គឺ​​​​​​នឹង​​​ជួយ​​​ធ្វើ​​​ឲ្យ​​​ស្ថាន​​​ភាពនេះ​​​​​​​​​ប្រសើរ​​​ឡើង​​​ព្រោះថា​​​ “ ​​​​​​ផ្លូវ​ត្រី​ជា​​​ជម្រើស​​​ផ្សេង​​​” ដែល​​​ក្រុម​​​ហ៊ុន​​​ Mega First បាន​​​ស្នើ​​​ឡើង​​​ ​​​នឹង​​​ផ្ដល់​​​ផ្លូវ​​​ផ្សេង​​​ៗ​​​ទៀត សម្រាប់​​​ការ​​​បម្លាស់ទី​​​របស់​​​មច្ឆជាតិ​​​​​​ក្នុង​​​ប្រទេស​​​ពាក់ព័ន្ធ​​​។

គណៈ​​​ប្រតិភូ​​​របស់​​​រដ្ឋាភិបាល​​​វៀត​​​ណាម ដែល​​​បានធ្វើការ​​​រិះគន់​​​ចំៗ​​​អំពី​​​ផល​​​ប៉ះពាល់​​​របស់​​​ទំនប​​​់​​​នេះ​​​លើ​​​មច្ឆជាតិ​​​នោះ បាន​​​ចោទ​​​សួរ​​​​​​ពី​​​ភាព​​​សម​​​ហេតុ​​​ផល​​​នៃ​​​អំណះ​​​អំណាង​​​របស់​​​លោក វីរ៉ាវង្ស។

លោក ង្វៀន វ៉ាន់ បាង (Nguyen Van Bang) អ្នក​​​ជំនាញ​​​ផ្នែក​​​ជល​​​ផល​​​នៃ​​​គណៈ​​​កម្មា​​​ធិ​​​ការ​​​​​​ទន្លេមេគង្គ​​​ជាតិ​​​វៀត​​​ណាម​​​​​​ បាន​​​ចោទ​​​សួរ​​​​​​​​​ថា “ ជាមួយ​​​នឹង​​​ការ​​​យល់​​​ដឹង​​​តិច​​​តួច​​​ពី​​​ឥរិយា​​​បថ​​​​​​របស់​​​ត្រី​​​ និង​​​​​​ស្ថានភាព​​​មិន​​​ច្បាស់​​​លាស់​​​ [ជុំវិញ​​​ផ្លូវ​​​ទឹក​​​របស់​​​ទន្លេ​​​] តើ​​​លោក​​​អាច​​​ធានា​​​បាន​​​ថា [ផល​​​ប៉ះពាល់​​​] លើ​ការ​​​បម្លាស់​​​ទី​​​របស់ត្រី​​​​​​​​​នឹង​​​អាច​​​បញ្ចៀស​​​បាន​​​ដោយ​​​របៀ​​ប​​​ណា?”។

ដោយ​​​មិន​​​ខ្ចីខ្វល់ លោក​​​ វីរ៉ាវង្ស បាន​​​ធ្វើ​​​ការ​​​ធានា​​​អះអាង​​​នៅ​​​ចំពោះ​​​មុខ​​​គណៈ​​​ប្រតិ​​​ភូ​​​ថា ​​​ ឡាវ​​​ គឺ​​​ជា​​​ប្រទេស​​​ទី១ ​​​ដែល​​​នឹង​​​​​​រង​​​ផល​​​ប៉ះពាល់អវិជ្ជមាន​​​ពី​​​ទំនប់​​​នេះ​​​។

លោក​​​បាន​​​លើកឡើង​​​​​​ថា “ ប្រសិន​​​បើ​​​វា​​​បង្ក​​​ផល​​​​​​​​​ប៉ះពាល់​​​លើ​​​ប្រជា​​​ពល​​​រដ្ឋ​​​កម្ពុជា​​​មែន​​​នោះ ប្រជា​​​ពល​​​រដ្ឋ​​​ឡាវ​​​នឹង​​​រង​​​ផល​​​ប៉ះពាល់​​​មុន​​​។ ដូច្នេះ​​​យើ​​​ង​​​នឹង​​​ធ្វើ​​​ឲ្យ​​​ប្រាកដ​​​ថា​​​ វា​​​មិន​​​​​​​​​បង្ក​​​ការ​​​លំបាក​​​ដល់​​​ប្រជា​​​ពល​​​រដ្ឋ​​​របស់​​​យើង​​​។ ប្រសិន​​​​​​​​​បើ​​​មាន​​​អ្វីមួយ​​​កើត​​​ឡើង​​​នោះ វា​​​​​​​​​ជា​​​រឿង​​​ងាយ​​​ស្រួល​​​ទេ​​​ គឺ​​​គ្រាន់​​​តែ​​​​​​កម្ទេច​​​ទំនប់​​​នេះ​​​​​​ចោល​​​ទៅ​​​ ​​​វាក្លាយ​​​ជា​​​ទឹក​​​ធ្លាក់​​​ធម្មជាតិ​​​មួយ​​​វិញ​​​បាត់​​​ទៅ​​​ហើយ​​​”។

គណៈប្រតិភូ​​​នេះឧស្សាហ៍​​​ឃើញ​​​ប្រកែក​​​គ្នា​​​ជាមួយ​​​ជំនាញ​​​ការ​​​របស់​​​ក្រុម​​​ហ៊ុន​​​ Mega First​​​ ណាស់​​​ពាក់​​​ព័ន្ធ​​​នឹង​​​វិធីសាស្ត្រ​​​មួយ​​​ចំនួន​​​ដែល​​​ពួកគេ​​​គ្រោង​​​នឹង​​​ប្រើ​​​​​​ ដើម្បី​​​បញ្ចៀស​​​ផល​​​ប៉ះពាល់​​​ ក្នុង​​​នោះគឺ​​​​​​មាន​​​ដូច​​​ជាការ​​​ប្រើ​​​តួប៊ីន​​​ “ ពុំ​​​​​​បង្ក​​​​​​ការ​​​​​​ប៉ះពាល់​​​ដល់​​​ត្រី​​​”  ក្នុង​​​ទំនប់​​​វារីអគ្គិសនី​​​នេះ​​​ និងការធ្វើ​​​ផ្លូវ​​​ទឹកភ្លោះ​​​​​​នៅ​​​ឯ​​​​​​​​​​​​ទន្លេ​​​ក្បែរ​​​នោះ​​​ដើម្បី​​​​​​ឲ្យ​​​វា​​​មាន​​​លក្ខណៈ​​​ដូច​​​គ្នា​​​នឹង​​​ទន្លេ​​​ ហ៊ូ សាហុង​​​​​​។​​​គួរ​​​បញ្ជាក់​​​ថា តួប៊ីន​​​នេះ​​​ មាន​​​ដំណើរ​​​ការ​​​យឺត​​​ជាង​​​តួប៊ីន​​​ធម្មតា​​​។

ខណៈ​​​គណៈកម្មការ​​​ទន្លេ​​​មេគង្គ MRC បាន​​​​​​​​​ប្រកាស​​​ពីដំបូង​​​ថា ការ​​​សាង​​​សង់​​​ទំនប​​់​​​ ដន សាហុង  នឹង​​​ចាប់​​​ផ្ដើម​​​នៅ​​​ក្នុង​​​​​​​​​ខែ​​​នេះ​​​​​​នោះ លោក វីរ៉ាវង្ស បាន​បញ្ជាក់​​​ថា ទំនប​​​់នេះ​​​គឺ​​​មិន​​​ទំនង​​​ថា នឹង​​​អាច​​​ចាប់​​​ផ្ដើម​​​ដូ​​​ច​​​ការ​​​គ្រោង​​​ទុក​​​ទេ គឺ​​​ត្រូវ​​​រង់​​​ចាំរហូត​​​ដល់​​​ចុង​​​ឆ្នាំ​​​២០១៤​​​។

លោក​​​​​​មាន​​​ប្រសាសន៍​​​ថា “ វា​​​​​​នឹង​​​ត្រូវ​​​​​​​​​ប្រើ​​​ពេល​​​ជាង​​​១ឆ្នាំ​​​ទម្រាំ​​​យើង​​​ចាប់​​​ផ្ដើម​​​ប៉ះ​​​ពាល់​​​ទន្លេ​​​មេគង្គ” ដោយ​​​លោក​​​បាន​​​សង្កត់​​​ធ្ងន់​​​ថា ​​​ឡាវ​​​ស្វាគមន៍​​​ការ​​​ផ្ដល់​​​យោ​​​បល់​​​ពី​​​ប្រទេស​​​ជិត​​​ខាង​​​របស់​​​ខ្លួន​​​។​​​ប៉ុន្តែ​​​គំនិត​​​នេះ​​​មើល​​​ទៅមិន​​​​​​ស្រប​​​នឹង​​​គំនិត​​​របស​​​់​​​ក្រុមហ៊ុន Mega First ដែល​​​បាន​​​វិនិយោគ​​​ទឹក​​​​​​ប្រាក់​​​ចំនួន​​​១០​​​លាន​​​ដុល្លារ​​​​​​​​​លើ​​​គម្រោង​​​​​​នេះ​​​រួច​​​ហើយ​​​នោះ​​​ទេ។

លោក Yeong Chee Neng នាយក​​​គ្រប់​​​គ្រង​​​ទំនប​​​់​​​វារីអគ្គិសនី​​​ ដន សាហុង របស​​​់​​​ក្រុម​​​​​ហ៊ុន​​​ Mega First បាន​​​មាន​​​ប្រសាសន៍​​​ថា “ ប្រសិន​​​បើ​​​​​​យើង​​​អាច​​​ចាប់​​​ផ្ដើម​​​សាង​​​សង់​​​ទំនប់​​​នេះ​​​បាន​​​តាំង​​​ពី​​​ម្សិលមិញ​​​​​​នោះ​​​ វា​​​​​​​​ពិត​​​ជា​​​ប្រសើ​​​រ​​​ខ្លាំង​​​ណាស់​​​”៕ សេរីវុធ​​​

© 2013, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.