សម្រាប់លោក ក្លូដ ពែរូ (Claude Periou) ប្រធាននាយកប្រតិបត្តិគ្រឹះស្ថានហិរញ្ញវត្ថុបារាំង ប្រ៉ូប៉ាកូ (Proparco) សេដ្ឋកិច្ចរបស់ ប្រទេសកម្ពុជា ស្ថិតក្នុងស្ថានភាពល្អ។ លោកបានមានប្រសាសន៍នៅក្នុងសន្និសីទសារព័ត៌ មានមួយរៀបចំកាលពីថ្ងៃសុក្រសប្តាហ៍មុន ក្នុងរាជធានីភ្នំពេញថា “ ប្រទេសកម្ពុជាកំពុងតែរីកចម្រើន”។
លោក ក្លូដ ពែរូ បានមានប្រសាសន៍បន្តទៀតថា “ នៅពេលដែលយើងពិនិត្យមើលអត្រាកំណើនសេដ្ឋកិច្ច៧,៤ភាគរយ ខណៈដែលប្រាក់ចំណូលបុគ្គលរបស់ប្រជាជនមានកំណើនយឺត ក៏ប៉ុន្តែ កើនឡើងជាលំដាប់ ហើយវិស័យនាំចេញក៏មានកំណើននៅក្នុងល្បឿនមធ្យម ប៉ុន្តែ មានភាពរីកចម្រើនគួរឲ្យកត់សម្គាល់ ក៏ដូចជាក្នុងពេលវិស័យទេសចរណ៍មានកំណើន…ខ្ញុំអាចនិយាយបានថា ប្រទេសកម្ពុជាកំពុងតែមានវឌ្ឍនភាពនៅលើដងវិថី ឆ្ពោះទៅកាន់កំណើនសេដ្ឋកិច្ច…ទោះបីជាគម្លាតរវាងខ្លួន និងប្រទេសជិតខាងមួយចំនួននៅតែមានទំហំធំក៏ដោយ”។
លោក ក្លូដ ពែរូ បានលើកឡើងបន្ថែមទៀតថា នេះគឺជាមូលហេតុដែលគ្រឹះស្ថានហិរញ្ញវត្ថុ ប្រ៉ូប៉ាកូ បើកប្រតិបត្តិការរបស់ខ្លួន ដើម្បីបង្កើនចំណងទាក់ទងជាមួយប្រទេសកម្ពុជា ប្រសិនបើគម្រោងសមស្របក្នុងវិស័យហេដ្ឋារចនាសម្ព័ន្ធ ឬក៏វិស័យផ្សេងៗទៀត មានសកម្មភាពស្របគ្នា។
គ្រឹះស្ថានហិរញ្ញវត្ថុ ប្រ៉ូប៉ាកូ គឺជាស្ថាប័នមូលនិធិសាធារណៈ-ឯកជនមួយ ដែលធ្វើប្រតិបត្តិការនៅ៦០ប្រទេសដោយផ្តល់ប្រាក់ កម្ចីសម្រាប់អនុវត្តគម្រោងរបស់ទីភ្នាក់ងារអភិវឌ្ឍន៍បារាំង ជាពិសេសក្នុងវិស័យពាណិជ្ជ កម្ម និងធនាគារ។
លោក ក្លូដ ពែរូ បានលើកឡើងក្រោយសន្និសីទសារព័ត៌មាន កាលពីថ្ងៃសុក្រនោះថា តាំងពីឆ្នាំ១៩៩៦មក គ្រឹះស្ថានហិរញ្ញវត្ថុ ប្រូ៉ប៉ាកូ បានផ្តល់ប្រាក់កម្ចី៨៧លានដុល្លារ នៅក្នុងប្រទេសនេះ ហើយ៥៤លានដុល្លារក្នុងចំណោមទឹកប្រាក់ទាំងនោះនៅតែត្រូវសងវិញ។ ប្រាក់កម្ចីទាំងនេះត្រូវបានផ្តល់ ឲ្យ ដោយមានលក្ខខណ្ឌត្រួតពិនិត្យប្រព័ន្ធ គណនេយ្យ និងរបាយការណ៍ ដែលអ្នកទទួល ប្រាក់កម្ចីត្រូវគោរពតាម។ គម្រោងនានារួមមានប្រាក់កម្ចីសម្រាប់ជួយដល់ដំណើរការអភិវឌ្ឍន៍គ្រឹះស្ថានមីក្រូហិរញ្ញវត្ថុផ្សេងៗ ដូចជា អេស៊ីលីដា (Acleda) ជាដើម ដែល ចាប់តាំងពីពេលនោះមកបានក្លាយទៅជាធនាគារ មួយ។
កាលពីពាក់កណ្តាលទសវត្សរ៍ឆ្នាំ២០០០ គ្រឹះស្ថានហិរញ្ញវត្ថុ ប្រ៉ូប៉ាកូ បានចូលរួមចំណែក ក្នុងការពង្រីកអាកាសយានដ្ឋានអន្តរជាតិក្នុងរាជធានីភ្នំពេញ និងខេត្តសៀមរាប ដោយសហប្រតិបត្តិការជាមួយក្រុមហ៊ុន អាកាសចរណ៍កម្ពុជា (Cambodia Airports)។ កាលពីដើមឆ្នាំនេះ គ្រឹះស្ថានហិរញ្ញវត្ថុនេះបានផ្តល់មូលនិធិ១០លានដុល្លារដល់ក្រុមហ៊ុន ហ្គោលដេនរ៉ាយស៍ (ខេមបូឌា) ខូអិលធីឌី [Golden Rice (Cambodia) Co., Ltd.] ដែលជាក្រុម ហ៊ុនឈានមុខគេផ្នែកនាំចេញអង្ករផ្កាម្លិះ នៅក្នុងប្រទេសកម្ពុជា និងជាផ្នែកមួយនៃកម្មវិធីស្វែងរកទីផ្សារអង្កររបស់ទីភ្នាក់ងារអភិវឌ្ឍន៍បារាំង។
លោក ព្យែរ៉េ អាឡាំង ប៉ាកូដ (Pierre-Alain Pacaud) អ្នកគ្រប់គ្រងនៅគ្រឹះស្ថានហិរញ្ញវត្ថុ ប្រ៉ូប៉ាកូ ប្រចាំតំបន់អាស៊ីឧត្តរ និងអាគ្នេយ៍ បានលើកឡើងនៅក្នុងអង្គសន្និសីទសារព័ត៌ មាននោះថា ទោះបីជាគ្រឹះស្ថានហិរញ្ញវត្ថុនេះគឺជាគ្រឹះស្ថានមូលនិធិវិនិយោគក៏ដោយ ក៏គោលដៅរបស់គ្រឹះស្ថាននេះមិនស្វែងរកប្រាក់ចំណេញខ្ពស់ទេ ក៏ប៉ុន្តែ “ ផលប៉ះពាល់ខ្ពស់”។ លោកបានមានប្រសាសន៍ថា“ យើងមានផលប៉ះពាល់ល្អណាស់ តាមរយៈប្រាក់កម្ចី ទ្រង់ទ្រាយតូចៗ។ ក្នុងគម្រោងមីក្រូហិរញ្ញវត្ថុ ទឹកប្រាក់ចំនួនពីបីទៅប្រាំមួយលានដុល្លារ អាចធ្វើឲ្យពិភពលោកមានការប្រែប្រួល…ទំហំឥណទានមិនមែនតែងតែឆ្លុះបញ្ចាំងឲ្យឃើញ ពីផលប៉ះពាល់នោះទេ។ ក្នុងរយៈពេលប៉ុន្មាន ឆ្នាំខាងមុខនេះ គោលបំណងរបស់យើងគឺនឹងផ្តល់ប្រាក់កម្ចីក្នុងចន្លោះពី១៥ ទៅ២០លានដុល្លារ “ ក្នុងប្រទេសកម្ពុជា។ លោកបាន ឲ្យដឹងបន្ថែមទៀតថា បច្ចុប្បន្ន គ្រឹះស្ថានហិរញ្ញវត្ថុ ប្រ៉ូប៉ាកូ កំពុងពិនិត្យគម្រោងនៅក្នុងវិស័យកាត់ដេរ។
យោងតាមលោក អង់ដ្រេ ពូអីឡេស ឌូផ្លេស (Andre Pouilles-Duplaix) នាយកទីភ្នាក់ងារអភិវឌ្ឍន៍បារាំង ប្រចាំប្រទេសកម្ពុជា និងប្រទេសឡាវ បានឲ្យដឹងថា ទីភ្នាក់ងារអភិវឌ្ឍន៍ បារាំង បានចូលប្រឡូកក្នុងវិស័យកាត់ដេរជាយូរមកហើយ។ ជាក់ស្តែង ទីភ្នាក់ងារនេះបានផ្តល់មូលនិធិដល់គម្រោងសាកល្បង ធានារ៉ាប់រងសុខភាព ដែលផ្តល់សេវាធានារ៉ាប់រង ដោយស្ម័គ្រចិត្តដល់កម្មករជាង៦.០០០នាក់។ លោក ពូអីឡេស ឌូផ្លេស បានមានប្រសាសន៍ថា បច្ចុប្បន្ន មជ្ឈមណ្ឌលមួយកំពុងត្រូវបានសាងសង់ ដើម្បីបណ្តុះបណ្តាល និយោជិតកម្ពុជាសម្រាប់ត្រៀមកាន់តំណែងគ្រប់គ្រង។ គម្រោងនេះត្រូវបានអនុវត្តដោយសមាគមរោងចក្រកាត់ដេរនៅក្នុងប្រទេស កម្ពុជាតាមរយៈប្រាក់កម្ចីរបស់ទីភ្នាក់ងារអភិវឌ្ឍន៍បារាំង។
លោក ពូអីឡេស ឌូផ្លេស បានឲ្យដឹងបន្ថែម ទៀតថា ឆ្នាំនេះ ទីភ្នាក់ងារអភិវឌ្ឍន៍បារាំង បានបោះទុនវិនិយោគ៦៧,៥លានដុល្លារ ក្នុងគម្រោងនានាក្នុងប្រទេសកម្ពុជា ហើយមានផែនការចំណាយថវិកានៅក្នុងចន្លោះពី៦៧លានដុល្លារ ទៅ១០៨លានដុល្លារក្នុងមួយឆ្នាំនៅក្នុងប្រទេសនេះ ក្នុងរយៈពេលពីរឆ្នាំខាងមុខ៕ សុធា