មេដឹកនាំគណបក្សសង្គ្រោះជាតិបាននិយាយកាលពីម្សិលមិញថា គណបក្សនេះនឹងធ្វើបាតុកម្មនៅទូទាំងប្រទេសនៅថ្ងៃទី១០ ខែធ្នូ ដើម្បីទាមទារឲ្យសើុបអង្កេតលើការប្រើប្រាស់គ្រាប់កំាភ្លើងពិតពីសំណាក់នគរបាលអំឡុងការតវ៉ារបស់កម្មកររោងចក្រកាត់ដេរអេសអិល នៅក្នុងរាជធានីភ្នំពេញកាលពីសប្ដាហ៍មុន។
លោក សម រង្ស៊ី ប្រធានគណបក្សសង្គ្រោះជាតិបានមានប្រសាសន៍ថា បាតុកម្មនេះនឹងស្វែងរកយុត្តិធម៌ជូនជនរងគ្រោះ ដោយសារការប្រើអំពើហិង្សាពីសំណាក់នគរបាលទៅលើការតវ៉ារបស់កម្មកររោងចក្រកាត់ដេរអេសអិល កាលពីថ្ងៃអង្គារ រួមទាំងអ្នកស្រី អេង សុខុំ អាយុ៤៩ឆ្នាំ ជាអ្នកលក់់ម្ហូបអាហារនៅក្បែរនោះ ដែលបានត្រូវគ្រាប់កំាភ្លើងស្លាប់នោះផងដែរ។
លោក សម រង្ស៊ី បានមានប្រសាសន៍ថា “នឹងមានការទាមទារឲ្យសើុបអង្កេតលើអំពើហិង្សានេះ ហើយក៏មានការទាមទារឲ្យស៊ើុបអង្កេតស្វែងរកជនដៃដល់ផងដែរ”។
ប្រធានគណបក្សសង្គ្រោះជាតិរូបនេះបានបន្ថែមទៀតថា ថ្នាក់ដឹកនាំគណបក្សនឹងជួបប្រជុំគ្នានៅថ្ងៃនេះ ដើម្បីពិភាក្សាអំពីផែនការលម្អិតនៃការធ្វើបាតុកម្មនោះ ហើយនឹងអាចមានបាតុកម្មនៅតាមក្រុងមួយចំនួនទូទាំងប្រទេសផងដែរ។
ប៉ុន្តែ លោកបានបញ្ជាក់ថា បាតុកម្មនេះនឹងមិនធ្វើតែក្នុងរាជធានីភ្នំពេញនោះទេ។ លោកបានមានប្រសាសន៍ថា “ មានការទាមទារពីសំណាក់ប្រជាពលរដ្ឋនៅទូទាំងប្រទេសឲ្យធ្វើបាតុកម្មនៅតាមបណ្ដាខេត្តផង ដូច្នេះបាតុកម្មនេះ នឹងធ្វើឡើងយ៉ាងហោចណាស់ក៏តាមកន្លែងមួយចំនួនដែរ”។
គណបក្សសង្គ្រោះជាតិបានធ្វើមហាបាតុកម្មរយៈពេលបីថ្ងៃពីរលើករួចមកហើយនៅរាជធានីភ្នំពេញចាប់តាំងពីការបោះឆ្នោតជាតិកាលពីថ្ងៃទី២៨ ខែកក្កដា ដ៏ចម្រូងចម្រាស ដោយប្រជាពលរដ្ឋប្រមាណ២៥.០០០នាក់ បានហែក្បួនក្នុងរាជធានីនៅពេលធ្វើមហាបាតុកម្មលើកទី២ កាលពីខែមុន។
លោកស្រី មូរ សុខហួរ ប្រធានកិច្ចការសាធារណៈនិងជាអ្នករៀបចំការហែក្បួនកាលពីខែមុនរបស់គណបក្សសង្គ្រោះជាតិបានមានប្រសាសន៍ថា គណបក្សបានជ្រើសរើសយកថ្ងៃទី១០ ខែធ្នូ គឺដំណាលគ្នានឹងទិវាសិទ្ធិមនុស្សអន្តរជាតិ។
លោកស្រីបានបញ្ជាក់ថា ព័ត៌មានលម្អិតអំពីការធ្វើបាតុកម្មដែលបានគ្រោងទុកនេះ ក្រៅពីកាលបរិច្ឆេទ មិនទាន់កំណត់នៅឡើយទេ។
លោកស្រី មូរ សុខហួរ បានមានប្រសាសន៍ ថា “ គម្រោងរបស់យើងគឺនឹងធ្វើនៅទូទាំងប្រទេស ប៉ុន្តែយើងមិនទាន់បង្កើតផែនការផ្លូវការនៅឡើយទេ”៕សារុន