31 C
Phnom Penh

ដោយភ័យខ្លាច​បាត់​បង់​សំឡេង​ឆ្នោត សាលារាជធានីភ្នំពេញ​មាន​គម្រោង​បង្កើត​ខណ្ឌថ្មី​ប្រាំទៀត​

ដោយ ឌឹ ខេមបូឌា ដេលី

បទវិភាគ

សមាជិកគណបក្ស​ប្រឆាំង​ជាន់​ខ្ពស់​មួយ​រូប​បាន​និយាយ​កាល​ពីម្សិល​មិញ​ថា ផែន​ការ​របស់​សាលា​រាជធានីភ្នំពេញ​ដើម្បី​​កំណត់​​ឡើង​វិញ​នូវ​ព្រំប្រទល់​រដ្ឋបាល​​​ដ៏ធំ​​របស់​រាជ​ធានី​នេះ ​នៅ​ក្នុង​រយៈពេល​ប៉ុន្មាន​ទសវត្សរ៍​​នេះ ដោយ​ការ​​​បង្កើត​ខណ្ឌ​ថ្មី​ចំនួន​ប្រាំ​ទៀត​នៅ​មុនការ​បោះ​ឆ្នោត​ជ្រើស​រើស​ក្រុម​ប្រឹក្សា​​​​រាជធានី ខេត្ត​ ក្រុង​ ស្រុក​ ខណ្ឌ នៅ​ខែ​ឧសភា​នោះ ​ទំនង​ជា​ការ​ប្រឹង​ប្រែង​ដើម្បី​បំបែក​មណ្ឌល​បោះ​ឆ្នោត​។

លោក​ ឡុង​ ឌីម៉ង់ អ្នក​នាំពាក្យ​សាលា​រាជ​ធានី​បាន​មាន​ប្រសាសន៍កាល​ពី​ថ្ងៃ​អាទិត្យ​​ថា សាលា​រាជធានី​នឹង​បង្កើត​ខណ្ឌ​ថ្មី​ប្រាំ​ទៀត​នៅ​មុនការ​បោះ​ឆ្នោត​ជ្រើស​រើស​ក្រុម​ប្រឹក្សា​​​​រាជធានី ខេត្ត​ ក្រុង​ ស្រុក​ ខណ្ឌ ដោ​យ​ការ​បំបែក​ ឬ​ការ​កំណត់ឡើង​វិញ​នូវ​​ព្រំ​ប្រទល់​ខណ្ឌ​ទាំង​ប្រាំបួន​ដែល​មាន​ស្រាប់​នៅ​ក្នុង​រាជធានី​។

លោក សុន ឆ័យ សមាជិ​កសភា​ជាន់​ខ្ពស់​គណបក្ស​សង្គ្រោះ​ជាតិ​បានមាន​ប្រសាសន៍​ថា ការកំណត់​ព្រំប្រទល់​ខណ្ឌនៅក្នុង​រាជធា​នី​​​​ឡើង​វិញ​នៅមុនការ​បោះឆ្នោតនេះ​​អាច​ធ្វើ​ឲ្យ​មាន​ព្រំប្រទល់​ខណ្ឌ​ថ្មី​​នៅ​ទូ​ទាំង​​សង្កាត់​​​ទាំង​​៩៦​នៅ​ក្នុង​រាជធានីភ្នំពេញ​ ដើម្បី​​​ឲ្យ​ គណ​បក្ស​ប្រជាជន​កម្ពុជា​ទទួល​បាន​តួ​នាទី​ក្រុម​ប្រឹក្សា​ច្រើន​ជាង​​តួ​នាទី​ដែល​ខ្លួន​មាន​​ក្នុង​ពេល​បច្ចុប្ប​ន្ននេះ។

លោក សុន ឆ័យ បាន​មាន​ប្រសាសន៍​ថា “ពួក​គេ​ដឹង​ថា សមាជិក​សម្រាប់​ការ​បោះ​ឆ្នោត​​ជ្រើសរើស​ក្រុមប្រឹក្សារាជធានី ខេត្ត​ ក្រុង​ ស្រុក​ ខណ្ឌ ​​នៅ​ពេល​ខាង​មុខ​នេះ​អាស្រ័យ​​​​លើ​សមាជិក​ក្រុម​ប្រឹក្សា​ឃុំ​ សង្កាត់ ដូច្នេះ​បញ្ហា​នេះ​មិនមែន​ជា​រឿង​រដ្ឋបាល​ទេ​​ គេ​ធ្វើ​ដូច្នេះ​​ដើម្បី​ផល​ប្រយោជន៍​នយោ​បាយ​តែ​ប៉ុណ្ណោះ គឺ​ដើម្បី​ទទួល​បាន​សមាជិ​ក​បន្ថែម​​​ទៀតនៅ​ក្រុមប្រឹក្សា​ខណ្ឌ​​”។

សមាជិក​ក្រុមប្រឹក្សា​ឃុំ​សង្កាត់​ចំនួន៨១០​រូប​ ក្នុង​រាជធានីភ្នំពេញ​ នឹង​ទៅ​បោះឆ្នោត​នៅ​​ថ្ងៃ​ទី​១៨​ ខែ​ឧសភា ដើម្បី​ជ្រើ​សរើស​សមា​​​ជិក​ក្រុមប្រឹក្សា​ខណ្ឌ​ ​នៅ​តាម​ខណ្ឌ​នីមួយៗ​របស់​ខ្លួន​ ព្រម​ទាំងការបោះឆ្នោត​ជ្រើស​រើស​ក្រុមប្រឹក្សា​រាជធានី​ភ្នំពេញ​ផងដែរ​។ គណបក្ស​ប្រជាជន​កម្ពុជា​​ទំនង​ជា​បាន​ជ័យ​ជម្នះ​ទាំង​ស្រុង​នៅ ក្នុង​ការ​បោះឆ្នោត​ជ្រើស​រើស​ក្រុម​ប្រឹក្សា​​នេះ ដោយ​​គណបក្ស​កាន់​អំណាច​របស់​លោកនាយក​​រដ្ឋ​មន្ត្រី​ ហ៊ុន សែន ទទួល​បាន​តួនាទី​សមាជិក​ក្រុមប្រឹក្សា​ចំនួន​៥៧០ក្នុង​ចំណោម​​តួនាទីក្រុម​ប្រឹក្សា​រាជធានីទាំង​៨១០​ បន្ទាប់​ពីការ​បោះឆ្នោត​​ឃុំ សង្កាត់​ កាល​ពីឆ្នាំ ២០១២​។

លោក កែម ឡី អ្ន​កវិភាគ​នយោបា​យ​បាន​ច្រាន​ចោល​ការ​លើក​ឡើង​រប​ស់​រដ្ឋាភិបាល​ដែល​ថា ការ​កំណត់​ព្រំប្រទល់​ខណ្ឌ​ឡើង​វិញ​នៅ ក្នុង​រាជធានី​ភ្នំពេញ​ ដែល​បន្ថែម​ខណ្ឌ​ថ្មីចំនួន​ពីរ​នៅក្នុង​រយៈពេ​ល​ប៉ុន្មាន​ឆ្នាំ​ថ្មី​ៗ​នេះ ​ទៅ​លើ​​ខណ្ឌ​ដែល​​មាន​ពី​មុន​ចំនួន​ប្រាំ​ពីរ​នោះ គឺ​ដើម្បី​បង្កើន​ប្រសិទ្ធភាព​រដ្ឋបាល​។ លោក​បាន​ប​ន្ថែម​ថា “ ការរៀបចំ​នយោ​បាយ​” ថ្មី នេះ​នឹង​​ធ្វើ​ឲ្យ​គណបក្ស​ប្រជា​ជ​ន​កម្ពុជា​​ទទួល​បាន​​សំឡេង​ឆ្នោត​​កាន់​តែ​ច្រើន។

លោក កែម ឡី បាន​មាន​ប្រសាសន៍ថា “ពួកគេ​នឹង​រៀបចំសង្កាត​់​ដែល​​គណបក្ស​ប្រជាជន​កម្ពុជា​ឈ្នះ​ និង​សង្កាត់​ដែល​​គណ​​​បក្ស​សង្គ្រោះ​ជាតិ​ឈ្នះ​ ហើយ​​រៀប​ចំ​សង្កាត់​​​តាម​ខណ្ឌ​នីមួយ​ដើម្បី​​​​ឲ្យ​​​បោះ​ឆ្នោត​គាំទ្រ​សមា​ជិក​​ក្រុម​ប្រឹក្សា​ខណ្ឌ​បន្ថែម​ទៀត​សម្រាប់​​​​​​​គណ​បក្ស​ប្រជាជនក​ម្ពុជា​”។

លោក សក់ សេដ្ឋា រដ្ឋ​លេខាធិការ​ក្រសួង​​​​​​​មហាផ្ទៃ​ទទួល​បន្ទុក​វិមជ្ឈការ​បាន​បដិ​សេធ​ថា ការ​កំណត់​ព្រំប្រទល់​ឡើង​វិញ​នេះ​មិន​មែន​​​​​​​​​​ជាហេតុ​ផល​នយោបាយ​ទេ​ ដោយ​លោក​​​​​​​​​​មាន​ប្រសាសន៍ថា ការធ្វើ​ដូច្នេះ​ គឺ​ជា​រឿង​ធម្មតា​នៅ​មុន​ការ​បោះឆ្នោត​។ លោក​បាន​មាន​ប្រសាសន៍ថា “មុនការ​បោះ​ឆ្នោត​ម្តងៗ តាម​​ធម្មតា​យើង​ពិនិត្យ​មើល​ព្រំប្រទល់​ ហើយ​ប្រសិនបើ​អាច​ធ្វើ​​ទៅ​បាន​ យើង​ត្រូវ​កែ​​ប្រែ​ព្រំប្រទល់​​ យើង​បង្កើត​រដ្ឋបាល​ថ្មី​ ដើម្បី​ធ្វើ​ឲ្យការ​ផ្តល់​សេវា​កម្ម​សាធារណៈ​ប្រសើរ​ជាង​មុន​”។

លោក ទេព​ នីថា អគ្គលេខាធិការ​​គណៈ​កម្មា​​​​​​ធិការ​ជាតិ​រៀបចំការ​បោះឆ្នោត​ បដិ​សេធ​​​​​​​មិន​ធ្វើ​អត្ថាធិប្បាយ​អំពីការ​កំណត់​ព្រំ​ប្រទល់​ខណ្ឌ​ឡើង​វិញ​នេះ​ទេ​ លុះ​ណា​តែ​មាន​​​​ការ​ប្រកាស​ព័ត៌មាន​លម្អិត​ជាមុនសិន​៕ សារុន

(រាយការណ៍​បន្ថែម​ដោយ ផន បុប្ផា)

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស