យោងតាមរបាយការណ៍សិក្សាថ្មីមួយអំពីការប្រែប្រួលគម្របព្រៃឈើនៅលើពិភពលោក ដែលផ្ទុយគ្នាយ៉ាងខ្លាំងពីតួលេខរបស់រដ្ឋាភិបាល ដែលបានបង្ហាញថា ប្រទេសកម្ពុជាបានបាត់បង់គម្របព្រៃឈើរបស់ខ្លួនជាង៧ភាគរយក្នុងរយៈពេល១២ឆ្នាំមកនេះ គឺមានអត្រាលឿនជាងគេបំផុតទី៥ នៅក្នុងពិភពលោក។
ចុះផ្សាយកាលពីថ្ងៃសុក្រ នៅក្នុងទស្សនាវដ្ដីវិទ្យាសាស្ត្រ និងដឹកនាំធ្វើដោយអ្នកស្រាវជ្រាវនៅសាកលវិទ្យាល័យម៉ារីឡែន របាយការណ៍សិក្សានេះផ្អែកលើទិន្នន័យផ្កាយរណបរបស់អាមេរិក ដើម្បីតាមដានការផ្លាស់ប្ដូរគម្របព្រៃឈើនៅទូទាំងពិភពលោកចន្លោះពីឆ្នាំ២០០០ដល់ឆ្នាំ២០១២។ យោងតាមរបាយការណ៍សិក្សានេះបង្ហាញថា ប្រទេសកម្ពុជាបានបាត់បង់ព្រៃឈើចំនួនជិត១២.៦០០គីឡូម៉ែត្រក្រឡា នៅក្នុងរយៈពេល១២ឆ្នាំមកនេះ ហើយទទួលបានព្រៃថ្មីមកវិញតែ១.១០០គីឡូម៉ែត្រក្រឡាប៉ុណ្ណោះ គឺបាត់បង់អស់៧,១ភាគរយនៃព្រៃឈើទាំងអស់។
នៅទូទាំងពិភពលោក មានតែប្រទេសម៉ាឡេស៊ី ប្រទេសប៉ារ៉ាហ្គាយ ប្រទេសឥណ្ឌូណេស៊ី និងប្រទេសក្វាតេម៉ាឡា ប៉ុណ្ណោះមានអត្រាកាប់បំផ្លាញព្រៃឈើខ្ពស់ជាងគេក្នុងរយៈពេលដូចគ្នានេះ។ ក្រុមអ្នកស្រាវជ្រាវនេះនិយាយថា នេះគឺជាការសិក្សាលើកដំបូងរបស់ខ្លួនដើម្បីដាក់បញ្ចូលវិធានការដែលស្របគ្នានៃគម្របព្រៃឈើនៅទូទាំងពិភពលោកជាមួយនឹងព័ត៌មានច្បាស់លាស់បែបនេះ។
លោក ម៉ាត់ស៊ូ ហែនសេន សាស្ត្រាចារ្យនៅសាកលវិទ្យាល័យម៉ារីឡេន ដែលបានដឹកនាំក្រុមស្រាវជ្រាវនេះបានសរសេរតាមអ៊ីម៉េលកាលពីម្សិលមិញថា “យើងបង្ហាញទិន្នន័យទាំងនេះធ្វើជាមធ្យោបាយដើម្បីទទួលបានព័ត៌មានកាន់តែច្បាស់អំពីព្រៃឈើដែលបច្ចុប្បន្ននេះមិនសូវមានតម្លាភាព”។ លោកបានបន្ថែមថា “ ខ្ញុំសង្ឃឹមថា ទិន្នន័យនេះអាចជំរុញឲ្យមានការធ្វើសេចក្ដីសម្រេចកាន់តែច្បាស់លាស់អំពីការប្រើប្រាស់ព្រៃឈើកម្ពុជា”។
ទោះបីជាទិន្នន័យរបស់រដ្ឋាភិបាលនៅពេលថ្មីៗនេះស្ដីពីគម្របព្រៃឈើនៅកម្ពុជាមានមិនគ្រប់គ្រាន់ក៏ដោយ ក៏ការសិក្សាថ្មីនេះបានបង្ហាញពីទិដ្ឋភាពផ្សេងនៃប្រទេសកម្ពុជាបើប្រៀបធៀបទៅនឹងព័ត៌មានដែលមាននាពេលបច្ចុប្បន្ន។ នៅក្នុងរបាយការណ៍ឆ្នាំ២០១០របស់ខ្លួនមានចំណងជើងថា “ក្របខណ្ឌយុទ្ធសាស្ត្រ” រដ្ឋបាលព្រៃឈើរបស់រដ្ឋាភិបាលបានលើកឡើងថា កម្ពុជាបានបាត់បង់ព្រៃឈើរបស់ខ្លួនតែ០,៥ភាគរយប៉ុណ្ណោះចន្លោះពីឆ្នាំ២០០២ដល់ឆ្នាំ២០០៦។ ក្រោយមក បន្ទាប់ ពីរដ្ឋាភិបាលបានប៉ាន់ស្មានពីគម្របព្រៃឈើរបស់់ខ្លួនម្ដងទៀតនៅឆ្នាំដដែលនោះ រដ្ឋាភិបាលបានបង្កើនតួលេខនោះ និងបានលើកឡើងថា កម្ពុជាបានបាត់បង់ព្រៃឈើរបស់ខ្លួន២ភាគរយចាប់តាំងពីមានការវាយតម្លៃចុងក្រោយរបស់ខ្លួនក្នុងឆ្នាំ២០០៥ និង២០០៦។
លោក ធន់ សារ៉ាត់ អ្នកនាំពាក្យរដ្ឋបាលព្រៃឈើបាននិយាយថា លោកមិនបានដឹងថា តួលេខផ្លូវការចុងក្រោយស្ដីអំពីគម្របព្រៃឈើមានប៉ុន្មាននោះទេ ហើយលោកមិននិយាយអំពីតួលេខនៅក្នុងរបាយការណ៍សិក្សាថ្មីនេះទេ ពីព្រោះលោកមិនទាន់បានឃើញរបាយការណ៍ថ្មីនេះ។ លោក សារ៉ាត់ បាននិយាយថា រដ្ឋបាលព្រៃឈើកំពុងធ្វើការវាយតម្លៃម្ដងទៀត ប៉ុន្តែលោកមិនដឹងថា តួលេខថ្មីរួចរាល់នៅពេលណាទេ។លោកបាននិយាយអំពីទិន្នន័យនេះថា“ ឥឡូវនេះតួលេខនេះមិនទាន់បានបញ្ជាក់ច្បាស់នៅឡើយទេ។
លោក សារ៉ាត់ ក៏បាននិយាយផងដែរថា ព្រៃឈើរបស់កម្ពុជាត្រូវប្រកួតប្រជែងដើម្បីរស់នឹងតម្រូវការពង្រីកផលិតកម្មដំណាំ។លោកនិយាយថា “ក្រសួងកសិកម្មមានភារកិច្ចបង្កើនដំណាំ ហើយមានធនធានដីតិចតួច”។ លោក សារ៉ាត់ បន្ថែមថា រដ្ឋាភិបាលនៅតែចង់ឲ្យមានគម្របព្រៃឈើ៦០ភាគរយនៅទូទាំងប្រទេសត្រឹមឆ្នាំ២០១៥។ កាលពីឆ្នាំ២០១០ការប៉ាន់ប្រមាណជាផ្លូវការអំពីគម្របព្រៃឈើមានចំនួន៥៧ភាគរយ។ ការស្រាវជ្រាវរបស់សាកលវិទ្យាល័យម៉ារីឡែន មិនបានប៉ាន់ប្រមាណអំពីគម្របព្រៃឈើទេ ។
អង្គការក្រៅរដ្ឋាភិបាលនានា និងអង្គការបរិស្ថានដូចជា អង្គការក្លូបលវីតណេស បានជំទាស់ជាយូរមកហើយចំពោះការអះអាងរបស់រដ្ឋាភិបាលអំពីភាពសម្បូរនិងការកើនឡើងនៃព្រៃឈើ ដោយសារមានភ័ស្តុតាងយ៉ាងច្បាស់បង្ហាញពីការកាប់បំផ្លាញព្រៃឈើដ៏រាលដាលទាំងខុសច្បាស់ ឬស្ថិតនៅក្រោមការគ្រប់គ្រងពីច្បាប់ និងបទប្បញ្ញត្តិដែលមានភាពចន្លោះប្រហោងច្រើនក្នុងការគ្រប់គ្រងដីសម្បទានសេដ្ឋកិច្ច។
លោក ម៉ាស៊ូ ប៉េឡឺរិន អ្នកពិគ្រោះយោបល់អំពីបញ្ហាប្រើប្រាស់ដីធ្លីនៅអង្គការលីកាដូ បាននិយាយថា របាយការណ៍សិក្សាថ្មីរបស់សាកលវិទ្យាល័យ ម៉ារីឡែន នេះ បានបង្ហាញភ័ស្តុតាងរឹងមាំមួយចំនួនអំពីការបាត់បង់ព្រៃឈើនៅកម្ពុជា។ លោកបាននិយាយថា “ក្រៅពីផែនទីទាំងនេះ មិនមានវិធីល្អដើម្បីបង្ហាញពីបញ្ហាដែលព្រៃឈើរបស់កម្ពុជាបានជួបប្រទះ និងកំពុងជួបប្រទះនោះទេ។ វាមានស្ថានភាពធ្ងន់ធ្ងរណាស់” ។លោកបាននិយាយថា “រដ្ឋាភិបាលបានលើកឡើងពីហេតុផលជាច្រើនក្នុងរយៈពេលប៉ុន្មានឆ្នាំមកនេះ” ក្នុងការកាប់ព្រៃឈើ។“ការកាប់ព្រៃឈើនេះបង្ហាញពីហេតុផលផ្សេងទៅវិញ”។
ក្នុងរយៈពេលប៉ុន្មានឆ្នាំថ្មីៗនេះ ដីរាប់ម៉ឺនហិកតាដែលទុកសម្រាប់ធ្វើជាដីសម្បទានសេដ្ឋកិច្ចត្រូវបានប្រគល់ទៅឲ្យក្រុមហ៊ុនកសិពាណិជ្ជកម្មនៅខាងក្នុងព្រៃ និងដែនជម្រកសត្វព្រៃរបស់រដ្ឋ ដែលគួរតែមានការការពារពីច្បាប់។ មន្ត្រីតែងតែគេចវេះពីច្បាប់ ដោយការអះអាងថា ព្រៃឈើនៅក្នុងដីសម្បទាន គឺជាព្រៃរេចរឹលគ្មានតម្លៃ។ អង្គការក្រៅរដ្ឋាភិបាលនានា និងអង្គការផ្នែកបរិស្ថានលើកឡើងថា ព្រៃឈើជាច្រើនក្នុងចំណោមព្រៃឈើទាំងនេះមិនមែនជាព្រៃរេចរឹលនោះទេ ហើយរបាយការណ៍សិក្សាថ្មីនេះហាក់ដូចជាស្របគ្នានឹងការអះអាងនេះ។
អ្នកស្រាវជ្រាវនៅសាកលវិទ្យាល័យម៉ារីឡែន បែងចែកព្រៃឈើនៅក្នុងប្រទេសនីមួយៗជាបួនក្រុមផ្អែកតាមកម្រាស់នៃព្រៃឈើទាំងនោះ។ យោងតាមក្រុមអ្នកស្រាវជ្រាវនេះឲ្យដឹងថា នៅក្នុងប្រទេសកម្ពុជា ព្រៃឈើទំហំ១២.៦០០គីឡូម៉ែត្រក្រឡានេះ បានបាត់បង់ក្នុងរយៈពេល១២ឆ្នាំចុងក្រោយនេះ ដែលភាគច្រើនក្នុងចំណោមនេះគឺជិត៨.៩០០គីឡូម៉ែត្រក្រឡា ត្រូវបានបាត់បង់នៅក្នុងតំបន់ព្រៃក្រាស់បំផុត។
លោក ប៉េឡឺរិន បាននិយាយថា ការកាប់បំផ្លាញព្រៃឈើដែលត្រូវបានបង្ហាញនៅក្នុងផែនទីថ្មីនេះមិនខុសប៉ុន្មានពីតំបន់ដែលរដ្ឋាភិបាលទុកធ្វើជាដីសម្បទានសេដ្ឋកិច្ចទេ។ លោកបានបញ្ជាក់អំពីភាគកណ្ដាល និងភាគខាងជើងខេត្តក្រចេះថា តំបន់ដែលមានការកាប់បំផ្លាញព្រៃឈើទ្រង់ទ្រាយធំជាច្រើន [នៅក្នុងផែនទីនេះ] គឺជាតំបន់ល្អសម្រាប់ដីសម្បទានសេដ្ឋកិច្ច”។
ផែនទីនេះក៏បានបង្ហាញពីការកាប់បំផ្លាញព្រៃឈើធ្ងន់ធ្ងរបំផុតនៅភាគកណ្ដាល និងភាគខាងកើតខេត្តកំពង់ចាម ខេត្តកំពង់ធំ និងខេត្តស្ទឹងត្រែងផងដែរ។ លើសពីនេះទៀតនោះ ការកាប់បំផ្លាញព្រៃឈើនេះហាក់ដូចជាបានកើនឡើងខ្លាំងក្នុងរយៈពេល១២ឆ្នាំនេះ ដែលភាគច្រើនកើតឡើងនៅក្នុងរយៈពេលពីរបីឆ្នាំចុងក្រោយនេះ។
នៅទូទាំងពិភពលោក ការសិក្សាថ្មីនេះបានរកឃើញការបាត់បង់គម្របព្រៃឈើសរុបក្នុងរយៈពេល១២ឆ្នាំមកនេះ មានចំនួន១,៥លានគីឡូម៉ែត្រក្រឡា គឺជិតស្មើនឹងទំហំផ្ទៃដីនៃប្រទេសម៉ុងហ្គោលី។ ក្រុមអ្នកស្រាវជ្រាវនេះមានគម្រោងធ្វើបច្ចប្បន្នភាពផែនទីនេះជារៀងរាល់ឆ្នាំ៕គឹមហឿន