29 C
Phnom Penh

អ្នក​ភូមិ​នៅស្រុក គូលែន ក្នុង​​​ខេត្ត​ព្រះ​វិហា​រ​ត​វ៉ា​នឹង​ការ​បណ្តេញ​ចេញ​ពី​ដី​ធ្លី​

ដោយ ឌឹ ខេមបូឌា ដេលី

បទវិភាគ

អង្គការ​សិទ្ធិ​មនុស្ស​ និង​ក្រុម​មន្ត្រី​បាន​និយាយ​​កាលពីម្សិលមិញ​ថា អ្នកភូមិ​៥៣​គ្រួសារ នៅ​ក្នុង​ស្រុក​គូលែន​ ខេត្ត​ព្រះ​វិហារ កាលពី​ថ្ងៃអាទិត្យ​ បាន​ធ្វើការ​តវ៉ា​នៅ​ខាង​ក្រៅ​​​​ទីស្នាក់​ការ​ក្រុម​ហ៊ុន​ម៉ាឡេស៊ី មួយ ដែលបាន​​គំរាម​រាន​ដីស្រែចម្ការ​​របស់​អ្នក​ភូមិ​ ដើម្បី​យក​​​ធ្វើ​ចម្ការ​កៅស៊ូ។

អ្នក​ភូមិ​ជា​ច្រើន​គ្រួសារ​ដែល​រស់​នៅ​ក្នុង​ភូមិ​ស្រយង់ខាង​ជើង ឃុំ​ស្រយង់ បាន​ជួប​ជុំ​​​គ្នា​នៅ​ទីស្នាក់​ការ​ក្រុម​ហ៊ុន​ម៉ាឡេស៊ី FP ដោយ​​​​​​​អះអាង​ថា តំណាង​ក្រុម​ហ៊ុន​បាន​ប្រាប់​ពួក​គាត់​កាលពី​សប្ដាហ៍​មុន​ឲ្យ​ឈប់​ធ្វើ​ស្រែ​ចម្ការ​របស់ខ្លួនទៀត​​ ព្រោះ​ដីនេះ​ជា​កម្មសិទ្ធិ​របស់​ក្រុម​ហ៊ុន។

លោក ឡោ ចាន់ អ្នក​សម្រប​សម្រួល​អង្គ​​​ការ​សិទ្ធិមនុស្ស​អាដ​ហុក​ ប្រចាំ​ខេត្ត​នេះ​បាន​មាន​ប្រសាសន៍​ថា“ អ្នក​ភូមិ​បាន​ធ្វើការ​តវ៉ា​ដោយសារពួកគាត់បារម្ភ​ពីការ​បាត់​បង់​ដីស្រែ​ និង​ដីចម្ការ​របស់​ខ្លួន​ ពីព្រោះ​ក្រុម​ហ៊ុន​នេះ​បាន​គំរាម​ និង​ហាម​ឃាត់​អ្នក​ភូមិ​មិន​ឲ្យ​ធ្វើ​ស្រែ​ចម្ការ និង​ដាំ​ដំណាំ​ផ្សេងៗឡើយ”។

លោក ជុំ ពុយ អភិបាល​ស្រុកគូលែន​បាន​មាន​ប្រសាសន៍​ថា កាលពី​ឆ្នាំមុន​រដ្ឋាភិ​បាល​បាន​ផ្ដល់​សម្បទាន​ដី​សេដ្ឋកិច្ច​ទំហំ​៨.២​០០​ហិក​តា ទៅ​ឲ្យ​ក្រុម​ហ៊ុន​ម៉ាឡេស៊ី FP នេះ​ដើម្បី​វិនិយោគ​កសិឧស្សាហកម្ម​ ប៉ុន្តែ​លោក​បាន​បន្ថែម​ថា មាន​អ្នក​ភូមិ​តែ​១២​គ្រួសារ​ប៉ុណ្ណោះ​បាន​ដាក់​ពាក្យ​បណ្ដឹង​​ប្ដឹង​ក្រុម​ហ៊ុន​នេះ ពីព្រោះ​អ្នក​ភូមិ​៤១​គ្រួសារ​ទៀត បាន​កាន់​កាប់​ដី​នេះ​ដោយ​ខុស​ច្បាប់​។

លោក​បាន​មាន​ប្រសាសន៍​ថា “យើង​បាន​ដោះ​ស្រាយ​វិវាទ​ដីធ្លី​ជូន​អ្នក​ភូមិ​១២​គ្រួសារ​រួច​ហើយ ប៉ុន្តែ​យើង​មិន​ទទួល​ខុស​ត្រូវ​ចំពោះ​​​​​​​អ្នកភូមិ​៤១​គ្រួសារ​ទៀត​ឡើយ ពីព្រោះ​ពួក​​​គាត់ទើបតែ​បាន​មក​កាន់​កាប់​ដីនេះ​កាល​ពី​ពេល​ថ្មីៗ​ប៉ុណ្ណោះ”​។ លោក​បាន​បន្ថែម​ទៀត​ថា “ ក្រុម​ហ៊ុន​នេះ​បាន​រាន​ដី​​ទំហំជាង​២០០​ហិកតា​…​ហើយ​បន្ទាប់​​មក​អ្នក​ភូមិ​ទាំង​នោះ​បាន​មក​សង់​ខ្ទម​របស់​ខ្លួន​នៅ​លើ​ដី​ដែល​រាន​រួច​នេះ​។ យើង​មិន​រក​ដំណោះ​ស្រាយ​ជូន​ពួកគាត់​ទេ ពីព្រោះ​ពួក​គាត់​បាន​សង់​ខ្ទមទាំង​​នេះ​ដោយ​ខុស​ច្បាប់”។

ប៉ុន្តែ​លោក ប៉ែន ឡាំ ជា​មេឃុំ​នេះ​បាន​មាន​​​​​​​ប្រសាសន៍​ថា អ្នក​ភូមិ​ភាគ​ច្រើន​បាន​កាន់​​​កាប់​ដីនេះគឺ​បាន​មក​រស់​នៅ​ទីនេះ​ចាប់​តាំង​ពី​ឆ្នាំ​២០០២​មក​ម៉្លេះ។
លោក​បានមាន​ប្រសាសន៍​ថា “ ខ្ញុំ​គិត​ថា អ្នក​​​​​​ភូមិ​ភាគ​ច្រើន​បាន​រស់​នៅ​ទីនេះ​ដោយ​ស្រប​ច្បាប់​ ប៉ុន្តែ​មាន​អ្នក​ភូមិ​តែ​ពីរ​បី​គ្រួសារ​ប៉ុណ្ណោះទើប​តែ​បាន​មក​រស់​នៅ​ទី​នេះ​កាល​​​ពី​​​​ឆ្នាំ​២០១២ និង​នៅ​ឆ្នាំនេះ​ផង​ដែរ”។

លោក​ កុយ ពៅ ជា​គ្រួសារ​មួយ​​ក្នុង​ចំណោម​​​​​​​​​​​​​​អ្នក​ភូម​​ិទាំង​​៥៣​គ្រួសារ​ ដែល​បាន​ធ្វើ​ការ​តវ៉ា​កាល​​​​​​​​​​​​​​​ពី​ថ្ងៃ​អាទិត្យ​នោះ បាន​និយាយ​កាលពី​ម្សិល​​​មិញ​ថា គាត់​បាន​កាន់​កាប់​ដី​មួយ​ក្បាល​ទំហំ​១០០​ម៉ែត្រ​ គុណនឹង​៥០០​ម៉ែត្រ​ នៅ​ក្នុង​​​តំបន់​សម្ប​ទាន​នេះ​ចាប់​តាំង​ពី​ឆ្នាំ​២០០២​មកម៉្លេះ។ លោក​មាន​ប្រសាសន៍​ថា “យើង​មិន​អនុញ្ញាត​ឲ្យ​ក្រុម​ហ៊ុន​នេះ​រាន​ដី​ស្រែ​ចម្ការ​នេះ​​​​​​​​​​ឡើយ​ បើ​មិន​ដូច្នោះ​ទេ យើង​នឹង​ធ្វើ​បាតុ​ កម្ម​តវ៉ា​ប្រឆាំង​នឹង​ការ​រាន​ដីនេះ”។

កាលពី​ថ្ងៃ​ទី​៣០ ខែ​កញ្ញា លោក កុយ ពៅ និង​អ្នក​ភូមិ​មួយ​ចំនួន​ទៀត​​ដែល​រង​ផល​ប៉ះ​​​ពាល់​ដូច​គ្នានេះ បាន​ធ្វើ​ដំណើរ​មក​រាជ​​​ធានី​​​ភ្នំពេញ ហើយ​បាន​ដាក់​ពាក្យ​បណ្ដឹង​ជាមួយ​លោកនាយក​រដ្ឋមន្ត្រី​ ហ៊ុន សែន និង​លោក ហេង សំរិន ប្រធាន​រដ្ឋសភា​ ដោយ​ស្នើ​សុំ​ឲ្យ​លោក​ទាំង​ពីរ​ជួយ​ដោះស្រាយ​វិវាទដីធ្លី​នេះ​។
គួរ​បញ្ជាក់​ថា កាលពីថ្ងៃ​ទី២៤ ខែតុលា លោក ហេង សំរិន បាន​សរសេរ​លិខិត​មួយ​ច្បាប់​ផ្ញើជូន​មន្ត្រី​ខេត្ត​ និង​ស្រុក​ដោយ​បញ្ជា​ឲ្យ​ពួកគេ​ស្វែង​រក​ដំណោះ​ស្រាយ​ចំពោះ​វិវាទ​​​ដីធ្លី​​​នេះ​៕ សារុន​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស