អ្នកនាំពាក្យគណបក្សប្រជាជនកម្ពុជាបានឲ្យដឹងកាលពីម្សិលមិញថា អង្គភាពប្រឆាំងអំពើពុករលួយរបស់រដ្ឋាភិបាលនឹងបើកការស៊ើបអង្កេតភស្តុតាងដែលបញ្ជាក់ថា មានអំពើពុករលួយទ្រង់ទ្រាយធំ នៅក្នុងបណ្តាញក្រសួងសុខាភិបាល ដែលត្រូវបានលាតត្រដាង នៅក្នុងរបាយការណ៍សវនកម្មរយៈពេលពីរឆ្នាំរបស់អង្គការមូលនិធិពិភពលោក ដើម្បីប្រយុទ្ធប្រឆាំងជំងឺអេដស៍ របេង និងជំងឺគ្រុនចាញ់ ហើយអ្នកដែលត្រូវបានរកឃើញថា បានប្រព្រឹត្តអំពើខុសឆ្គងនេះ នឹងត្រូវបានផ្តន្ទាទោស។
លោក ជាម យៀប សមាជិកសភា និងជាអ្នកនាំពាក្យគណបក្សប្រជាជនកម្ពុជាបានមានប្រសាសន៍ថា “ការបើកការស៊ើបអង្កេត និងបញ្ជូនសំណុំរឿងនេះទៅតុលាការគឺជារឿងចាំបាច់ណាស់”។ លោកបានឲ្យដឹងបន្ថែម ទៀតថា អង្គភាពប្រឆាំងអំពើពុករលួយ នឹងចាត់វិធានការលើករណីនេះដោយយោងតាមរបកគំហើញ នៅក្នុងរបាយការណ៍របស់អង្គការមូលនិធិពិភពលោក ដែលត្រូវបានចេញផ្សាយកាលពីថ្ងៃសុក្រសប្តាហ៍មុន។
លោក ជាម យៀប បានមានប្រសាសន៍ថា “ទោះបីជាមន្ត្រីដែលត្រូវបានចោទប្រកាន់ ថា បានប្រព្រឹត្តអំពើពុករលួយកំពុងធ្វើការក្នុងមុខតំណែង ឬក៏បានលាឈប់ពីការងារក៏ដោយ… ពួកគេត្រូវតែប្រឈមនឹងការផ្តន្ទាទោស ពីបទប្រព្រឹត្តអំពើពុករលួយ”។ របាយការណ៍នេះបានបង្ហាញបុគ្គលបីរូបពាក់ព័ន្ធក្នុងអំពើពុករលួយនេះ រួមទាំងលោក ដួង សុជាតិ អតីតនាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ើតសាស្ត្រ និងបាណកសាស្ត្រ (CNM) នៃក្រសួងសុខាភិបាល ដែលបានចូលនិវត្តកាលពីឆ្នាំ២០១១ និងនាយករងរបស់លោកមួយរូបផងដែរ។
បូកសរុបរួមគ្នាមន្ត្រីទាំងពីររូបនេះ ត្រូវបានចោទប្រកាន់ថា បានទទួលប្រាក់សូកប៉ាន់ចំនួន៤១០.០០០ដុល្លារនិងអំណោយគិតជាប្រាក់ប្រហែល២០.០០០ដុល្លារ ពីក្រុមហ៊ុនដែលសង្ឃឹមថា នឹងទទួលបានកិច្ចសន្យាដែលមានចំនួនទឹកប្រាក់ដ៏ច្រើនសម្រាប់ផ្គត់ផ្គង់មុង។ បុរសមួយរូប ដែលគេស្គាល់ថា ជាមន្ត្រីលទ្ធកម្មជាន់ខ្ពស់នៅក្នុងមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ (NCHADS) ក៏ត្រូវបានចោទប្រកាន់ថា បានសម្របសម្រួលដំណើរការដេញថ្លៃនោះផងដែរ។
កាលពីថ្ងៃអាទិត្យ លោក ទៀ ផល្លា នាយករងមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ បានចាត់ទុកថា របកគំហើញរបស់អង្គការមូលនិធិពិភពលោក “ជារឿងមិនសូវធំដុំ” ខណៈដែលក្រសួងសុខាភិបាលបានចេញសេចក្តីថ្លែងការណ៍មួយ ដើម្បីច្រានចោលការទទួលខុសត្រូវចំពោះករណីអំពើពុករលួយក្នុងទីភ្នាក់ងាររងរបស់ខ្លួន។
មន្ត្រីអង្គភាពប្រឆាំងអំពើពុករលួយមិនអាចទំនាក់ទំនងធ្វើសេចក្តីអត្ថាធិប្បាយបានទេ កាលពីម្សិលមិញ ក៏ប៉ុន្តែ អង្គការតម្លាភាពអន្តរជាតិ (Transparency International) បានលើកឡើងថា ភាគីពាក់ព័ន្ធទាំងអស់ រួមទាំងក្រសួងសុខាភិបាលផងដែរនោះ គួរតែទទួលខុសត្រូវ។
លោក ព្រាប កុល នាយកប្រតិបត្តិអង្គការតម្លាភាពអន្តរជាតិនៅប្រទេសកម្ពុជា បានមានប្រសាសន៍ថា “ករណីនេះអាចកើតឡើង បានតែជាលក្ខណៈប្រព័ន្ធប៉ុណ្ណោះ វាមិនអាចកើតឡើងដោយសារតែបុគ្គលម្នាក់ ឬក៏ស្ថាប័នតែមួយបានទេ។ ច្បាស់ណាស់ថា ក្រសួង[សុខាភិបាល]ត្រូវទទួលខុសត្រូវក្នុងការត្រួតពិនិត្យមូលនិធិទាំងនេះ និងអ្វីដែលមន្ទីរពាក់ព័ន្ធកំពុងធ្វើ និងមិនមែនគ្រាន់តែផ្តល់ប្រាក់ឲ្យមន្ទីរទាំងអស់នោះ ហើយឈប់ធ្វើអ្វីបន្តទៀតទេ”។
លោក ស៊ិន សុំមុនី នាយកប្រតិបត្តិអង្គការ មេឌីកាំ (Medicam) ដែលជាបណ្តាញអង្គការក្រៅរដ្ឋាភិបាលធ្វើការក្នុងវិស័យសុខាភិបាល និងដែលត្រូវបានរបាយការណ៍របស់អង្គការ មូលនិធិពិភពលោក បង្ហាញថា បានគិតប្រាក់ថ្លៃមុខតំណែងបុគ្គលិកតែមួយចំពោះអង្គការម្ចាស់ជំនួយបី និងគិតប្រាក់អង្គការមូលនិធិពិភពលោក ថ្លៃមុខតំណែងមួយដែលមិនត្រូវ បានគ្រប់គ្រងនោះ បានអះអាងកាលពីម្សិលមិញថា ការចោទប្រកាន់អង្គការរបស់លោកថា បានប្រព្រឹត្តខុសឆ្គងនោះ គឺជារឿងផ្អែកលើ “ ការយល់ច្រឡំ”។
ដោយសារតែការទទួលបានសេចក្តីអនុញ្ញាតផ្លាស់ប្តូរមូលនិធិត្រូវចំណាយពេលយូរពេកនោះ លោក សំមុនី បានលើកឡើងថា លោកបានសម្រេចចិត្តបង្កើតតំណែងមួយ និងគិតប្រាក់មួយផ្នែកនៃប្រាក់ខែសម្រាប់មុខតំណែងនោះ ពីអង្គការមូលនិធិពិភពលោក និងមួយផ្នែកទៀតពីអង្គការ អូសអេដ(AusAid) ជាទីភ្នាក់ងារផ្តល់ជំនួយអូស្ត្រាលី។ លោកបានមានប្រសាសន៍ថា “យើងគួរតែបានប្រាប់ពួកគេ [អង្គការមូលនិធិពិភពលោក]។ នោះគឺជាកំហុសរបស់យើង”។ ទោះជាយ៉ាងណា លោកអះអាងថា របៀបដោះស្រាយស្ថានការណ៍របស់លោកមិនបង្កឲ្យមានបញ្ហាទេ ពីព្រោះមិនមានការបាត់បង់មូលនិធិទេ។
ទោះបីជារបាយការណ៍របស់អង្គការមូលនិធិពិភពលោកបានបង្ហាញថា អង្គការនេះត្រូវបានគេគិតប្រាក់១៤.៤០០ដុល្លារ ថ្លៃតំណែងទីប្រឹក្សាផ្នែកតស៊ូមតិ កាលពីឆ្នាំ២០០៩ក៏ដោយ ក៏លោក សំមុនី បានអះអាងថា លោកមិនបានស្នើ ឬក៏ទទួលបានមូលនិធិទាំងនេះទេ។ អង្គការមូលនិធិពិភពលោក បានចំណាយប្រាក់ចំនួនប្រហែល៣៣លានដុល្លារក្នុងមួយឆ្នាំៗនៅក្នុងប្រទេសកម្ពុជាតាំងពីឆ្នាំ ២០០៣មក។ ក្រសួងសុខាភិបាលបានគ្រប់គ្រងមូលនិធិទាំងនេះដោយផ្ទាល់រហូតដល់ឆ្នាំ២០០៩ ហើយក្រោយមកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណក សាស្ត្រ និងមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគបានក្លាយជាអ្នកទទួលមូលនិធិទាំងនេះសំខាន់ជាងគេ៕ សុធា