អង្គភាពប្រឆាំងអំពើពុករលួយបានឲ្យដឹងកាលពីម្សិលមិញថា គ្រូបង្រៀនចូលនិវត្តដែលរស់នៅក្នុងស្រុកស្រីសន្ធរ ខេត្តកំពង់ចាមត្រូវបានគេកាត់យកប្រាក់សោធនរបស់ខ្លួនសម្រាប់ខែមីនាឆ្នាំមុន ដោយសារតែអំពើពុករលួយនៅក្នុងការិយាល័យសង្គមកិច្ចស្រុកនេះ។
សេចក្តីថ្លែងការណ៍បង្ហោះនៅលើគេហទំព័ររបស់អង្គភាពប្រឆាំងអំពើពុករលួយមានខ្លឹមសារថា “អង្គភាពប្រឆាំងអំពើពុករលួយបានរកឃើញថា ការិយាល័យសង្គមកិច្ចស្រុក…គឺជាស្ថាប័នតែមួយគត់ដែលមិនបើកប្រាក់សោធនឲ្យគ្រូបង្រៀនចូលនិវត្តទាំងនេះ [សម្រាប់ខែមីនាឆ្នាំ២០១២] និងបានក្លែងបន្លំស្នាមមេដៃរបស់ពួកគេផងដែរ”។
សេចក្តីថ្លែងការណ៍នេះមិនបានបញ្ជាក់ថា តើគ្រូបង្រៀនចំនួនប៉ុន្មាននាក់មិនបានទទួលប្រាក់សោធនរបស់ខ្លួនសម្រាប់ខែនោះទេ និងមិនបានបញ្ជាក់ថា តើប្រាក់ចំនួនប៉ុន្មានដែលមិនបានបើកឲ្យទេ។
សេចក្តីថ្លែងការណ៍នេះមានខ្លឹមសារថា “លើសពីនេះទៀត ការិយាល័យសង្គមកិច្ចស្រុកស្រីសន្ធរ មិនបានបើកប្រាក់ឧបត្ថម្តសម្រាប់ការរស់នៅចំនួន២០.០០០រៀល [ប្រហែលប្រាំដុល្លារ] ឲ្យគ្រូបង្រៀនចូលនិវត្ត សម្រាប់ពេញមួយឆ្នាំ២០១០ទេ”។ សេចក្តីថ្លែងការណ៍នេះបានបញ្ចប់ខ្លឹមសារ ដោយជំរុញឲ្យអ្នកដែលទទួលផលប៉ះពាល់ដោយសារតែការកាត់យកប្រាក់សោធន ឬប្រាក់ខែ “ រួមសហការជាមួយ និងធ្វើពាក្យបណ្តឹង” មកកាន់អង្គភាពប្រឆាំងអំពើពុករលួួយដោយប្រើប្រព័ន្ធទូរស័ព្ទទាន់ហេតុការណ៍របស់អង្គភាពប្រឆាំងអំពើពុករលួយនេះ។
ទាំងលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ទាំងលោក ស៊ាន បូរ៉ាត់ អនុប្រធានមិនអាចទាក់ទងបានទេកាលពីម្សិលមិញ។
លោក រ៉ុង ឈុន ប្រធានសមាគមគ្រូ បង្រៀន ឯករាជ្យកម្ពុជាបានលើកឡើងថា ការអនុវត្តការកាត់យកប្រាក់ពីគ្រូបង្រៀនចូលវិវត្ត គឺជាបញ្ហាទូទាំងប្រទេសមួយ ក៏ប៉ុន្តែ លោកមិនបានបញ្ជាក់ចំស្រុកស្រីសន្ធរទេ។
លោក រ៉ុង ឈុន ថ្លែងថា “មន្ត្រីសង្គមកិច្ចជាច្រើនទទួលបន្ទុកបើកប្រាក់សោធន និងប្រាក់ឧបត្ថម្ភផ្សេងទៀតបានប្រព្រឹត្តអំពើពុករលួយបែបនេះ”។
លោក រ៉ុង ឈុន បានមានប្រសាសន៍បន្ថែមទៀតថា “ នៅពេលដែលនិវត្តជនទៅ រកពួកគេ ពួកគេនិយាយដោះសាថា មិនទាន់មានប្រាក់បើកឲ្យពួកគេនៅឡើយទេ ឬវានឹងប្រើពេលយូរក្នុងការបើកប្រាក់ឲ្យពួកគេ”។ លោកបានបន្ថែមថា អង្គភាពប្រឆាំងអំពើពុករលួយមិនចាត់វិធានការប្រកបដោយប្រសិទ្ធភាព ដើម្បី ដាក់ទោសមន្ត្រីពុករលួយទាំងនោះទេ។ ប៊ុននី