27.1 C
Phnom Penh

ចោរ​​ម្នាក់បាន​ចាក់​អ្នក​បើក​តាក់​ស៊ី​​​ចំកញ្ចឹងក​ដើម្បី​ប្លន់​យក​រថយន្ត​

ដោយ ឌឹ ខេមបូឌា ដេលី

បទវិភាគ

នគរ​បាល​បាន​និយាយ​ថា អ្នក​បើក​បរ​​តាក់​ស៊ី​អាយុ​៤០​ឆ្នាំ​ម្នាក់​ បាន​រង​របួស​កាលពី​រំលង​​​អធ្រាត្រ​​ឈាន​ចូល​ថ្ងៃ​អង្គារ នៅ​ក្នុង​ខណ្ឌ​មាន​​​​​ជ័យ​ រាជធានីភ្នំពេញ​ នៅ​ពេល​ដែល​អ្នក​ដំណើរ​​ជា​បុរស​ម្នាក់​បាន​ចាក់​គាត់​ចំក​ពីរ​កាំបិត​ មុន​ពេល​បើក​រថយន្ត​តាក់​ស៊ី​របស់​គាត់​ចេញ​ទៅ​។

ជន​រង​គ្រោះ​ឈ្មោះ ទូច វុធ បាន​ប្រាប់​នគរ​​​បាល​ថា គាត់​បាន​ដឹ​ក​អ្នក​ដំណើរ​ម្នាក់​ដែល​មាន​អាយុ​ប្រហែល​៣០​ឆ្នាំ​នៅ​ម៉ោង​១​និង​​​៤០​នាទី​រំលង​អធ្រាត្រ​​​ចេញ​ពី​​ផ្សារ​រាត្រី​​​ក្នុង​ខណ្ឌ​ដូន​ពេញ​ ហើយ​បាន​ដឹក​ជន​​នោះ​ទៅ​​សង្កាត់​ទួល​សង្កែ​ ក្នុង​ខណ្ឌ​ឫស្សីកែវ ប៉ុន្តែ​នៅ​ពេល​ពួក​គេ​ទៅ​ដល់​គោល​ដៅ​ ជន​សង្ស័យ​​​​បាន​ប្ដូរ​ចិត្ត​វិញ ហើយ​បាន​ប្រាប់អ្នក​​បើក​បរ​ឲ្យ​​ទៅ​សង្កាត់​ព្រែក​ឯង​ នៅ​ក្នុង​ខណ្ឌ​មាន​ជ័យ​វិញ។

លោក ស្វាយ តារា នាយរង​ប៉ុស្តិ៍​នគរ​បាល​សង្កាត់​ព្រែក​ឯង​ ​​មាន​ប្រសាសន៍​ថា “នៅ​​​​ពេល​ពួកគេ​មក​ដល់​ភូមិ​ទួល​តាចាន់ ជន​សង្ស័យ​​​បាន​ប្រាប់​អ្នក​បើក​បរ​ឲ្យ​ឈប់​ ហើយ​បាន​ដក​កូន​កាំបិត​មួយ​ចាក់​គាត់​ត្រូវ​ចំក​ពីរ​កាំបិត​តែ​​ម្ដង​”។ លោក​ តារា បាន​មាន​ប្រសាសន៍​ថា ជន​រង​​​​គ្រោះ​ក៏បាន​​រង​របួស​ចំដៃ​ស្ដាំ​ដែរ​នៅ​ពេល​ដែល​គាត់​ព្យាយាម​ការ​ពារ​ខ្លួន​ ប៉ុន្តែ​គាត់​​បាន​​បើក​ទ្វា​រថយន្ត​រត់​ចេញ​​ទៅ​លើ​ផ្លូវ​ស្រែក​ឲ្យ​គេ​ជួយ​ ខណៈ​ពេល​ដែល​ជន​ល្មើស​បាន​​បើក​រថយន្ត​តាក់​ស៊ីនោះ​ចេញ​ទៅ​យ៉ា​ង​លឿន​។

អ្នក​ធ្វើ​ដំណើរ​ឆ្លង​កាត់​ទី​នោះ​​បាន​​ទៅ​ជួយ​​​ជន​រង​គ្រោះ​ ហើយ​អ្នក​បើក​បរ​តាក់​ស៊ី​ជាមួយ​គ្នា​បាន​នាំ​គាត់​ទៅ​កាន់​គ្លីនិក​មួយ​ដើម្បី​​​ពិនិត្យ​មើល​ស្នា​ម​របួស​ធ្ងន់​​របស់​គាត់​ ហើយ​បុគ្គ​លិក​គ្លីនិក​នោះ​បាន​ទូរស័ព្ទ​ហៅ​រថយន្ត​សង្គ្រោះ​​​បន្ទាន់​ដឹក​ជន​រង​គ្រោះ​ទៅ​កាន់​មន្ទីរ​ពេទ្យ​កាល់​ម៉ែត។​

លោក នៅ តារា នាយ​ប៉ុស្តិ៍​សង្កាត់​វាល​ស្បូវ​​​បាន​មាន​ប្រសាសន៍​ថា ក្រោយ​មក​មន្ត្រី​របស់​លោក​បាន​រក​ឃើញ​រថយន្ត​តាក់​ស៊ី​នោះ​​​ត្រូវ​បាន​គេ​ទុក​ចោល​នៅ​ចម្ងាយ​២០​ម៉ែត្រ​ពី​ផ្លូ​វ​ជាតិ​លេខ​១​ នៅ​ជិត​​សួន​ទឹក​សន្តិ​ភាព​ក្នុង​សង្កាត់​វាល​ស្បូវ​ ខណ្ឌ​មាន​ជ័យ​។ នគរ​​បាល​គិត​ថា ជន​សង្ស័យ​មាន​បំណង​សម្លាប់​អ្នក​បើក​បរ​ដើម្បី​ប្លន់​យក​រថយន្ត​ ​ប៉ុន្តែ​បាន​ប្ដូរ​ចិត្ត​វិញ​ បន្ទាប់​ពី​ជន​រង​គ្រោះ​បាន​គេច​​​ខ្លួន​រួច​​។

លោក ស្វាយ តារា បាន​មាន​ប្រសាសន៍​ថា “កាំបិត​នោះ​ត្រូវ​បាន​រក​ឃើញ​នៅ​ក្នុង​រថ​យន្ត​នោះ​ ហើយ​គេ​បាន​រក​ឃើញ​អាវ​ប្រឡាក់​​ឈាម​មួយ​បោះ​ចោល​នៅ​ចម្ងាយ​​ប្រហែល​៨០​ម៉ែត្រ​ពី​រថយន្ត​តាក់​ស៊ីនោះ”។ លោក​បាន​​​បន្ថែម​ថា នគរ​បាល​មិន​ទាន់​​​ស្គាល់​អត្តសញ្ញាណ​ជន​សង្ស័យ​នៅ​ឡើយ​ទេប៉ុន្តែ​កំពុង​ធ្វើ​ការ​ស៊ើប​​​អង្កេត​៕​គឹមហឿន​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស