លោក សម រង្ស៊ី និងលោក កឹម សុខា មេដឹកនាំគណបក្សសង្គ្រោះជាតិបានលើកឡើងកាលពីម្សិលមិញថា គណបក្សប្រឆាំងនឹងលែងចរចាជុំវិញការជាប់គាំងផ្នែកនយោបាយជាមួយគណបក្សប្រជាជនកម្ពុជាទៀតហើយ រហូតដល់គណបក្សគ្រប់គ្រងអំណាចយល់ព្រមឲ្យមានការស៊ើបអង្កេតការបោះឆ្នោតប្រកបដោយតម្លាភាពមួយ។
សមាជិកសភាជាប់ឆ្នោតចំនួន៥៥រូបរបស់គណបក្សសង្គ្រោះជាតិបាននិងកំពុងតែធ្វើពហិការមិនចូលសភា ចាប់តាំងពីសភានេះបានកោះប្រជុំជាមួយនឹងតំណាងរាស្ត្រចំនួនតែ៦៨រូបរបស់គណបក្សប្រជាជនកម្ពុជា កាលពីថ្ងៃទី ២៣ ខែកញ្ញា ដោយគណបក្សប្រឆាំងលើកឡើងអំពីភាពមិនប្រក្រតីកើតមានជាទូទៅអំឡុងការបោះឆ្នោតជ្រើសតាំង តំណាងរាស្ត្រកាលពីថ្ងៃទី២៨ខែកក្កដា។
លោក កឹម សុខា ដែលជាអនុប្រធានរបស់គណបក្សសង្គ្រោះជាតិបានមានប្រសាសន៍ថា មេដឹកនាំគណបក្សប្រឆាំងបានសម្រេចថា ខ្លួនគ្មានឆន្ទៈបន្តការចរចាជាមួយគណបក្ស ប្រជាជនកម្ពុជាទេ មុនពេលគណបក្សនេះចាត់វិធានការជាក់ស្តែងក្នុងការស៊ើបអង្កេតការបោះឆ្នោត។ លោកបានលើកឡើងថា “ ប្រសិនបើគណបក្សប្រជាជនកម្ពុជានៅតែមិនលាតត្រដាងការពិតអំពីការបោះឆ្នោតកន្លងទៅ នេះទេនោះ យើងមិនអាចចរចាជាមួយពួកគេបានឡើយ” ដោយលោកពន្យល់ថា គណបក្សប្រជាជនកម្ពុជា មិនគួរឲ្យទុកចិត្តឡើយ។
លោក កឹម សុខា បានថ្លែងថា ការប្រើអំពើហិង្សារបស់រដ្ឋាភិបាលទៅលើការតវ៉ារបស់កម្មករកាត់ដេរកាលពីសប្តាហ៍មុនបានរំលោភកិច្ចព្រមព្រៀងដែលខ្លួនបានធ្វើឡើងក្នុងការចរចាជុំចុងក្រោយនេះ។ លោក កឹម សុខា បានមានប្រសាសន៍បន្តទៀតថា “យើងមានកិច្ចព្រមព្រៀងមួយថា ពួកគេនឹងឈប់ប្រើអំពើហិង្សា ក៏ប៉ុន្តែ កាលពីថ្ងៃទី១២ ខែវិច្ឆិកា ពួកគេបានបាញ់កម្មករ ហើយពួកគេបានសម្លាប់ស្ត្រីស្លូតត្រង់ម្នាក់ និងវាយព្រះសង្ឃ”។
ដើម្បីសម្របសម្រួលការចរចាជុំចុងក្រោយ កាលពីថ្ងៃទី៥ ខែវិច្ឆិកា លោក សម រង្ស៊ី ប្រធានគណបក្សសង្គ្រោះជាតិបានលុបចោលបញ្ជីលក្ខខណ្ឌដែលលោកបានធ្វើ សម្រាប់ការចរចាជាមួយគណបក្សគ្រប់គ្រងអំណាច។លោកបានបដិសេធកាលពីម្សិលមិញថា ជំហរថ្មីរបស់គណបក្សសង្គ្រោះជាតិ គឺមិនបង្កើតលក្ខខណ្ឌលើការចរចាទេ។
លោក សម រង្ស៊ី បានថ្លែងថា “នេះមិនមែនជាលក្ខខណ្ឌមួយទេ វាជាតម្រូវការជាចាំបាច់មួយ។ យើងមិនអាចបន្តទៅមុខដោយ គ្មានការបញ្ជាក់ការពិតជាមុន ដើម្បីឲ្យឃើញថា តើប្រជាជនកម្ពុជាពិតជាបោះឆ្នោតឲ្យនរណា”។ លោក សម រង្ស៊ី បានពន្យល់ថា ការផ្លាស់ប្តូរជំហរនេះបានកើតឡើងបន្ទាប់ពីការពិភាក្សារបស់គណបក្សអំពីជំហររបស់គណបក្សប្រជាជនកម្ពុជាថា ការចរចាអាចកើតឡើងតែលើមូលដ្ឋាននៃលទ្ធផលការបោះឆ្នោតផ្លូវការប៉ុណ្ណោះ។
លោក ជាម យៀប សមាជិកសភា និងជាអ្នកនាំពាក្យរបស់គណបក្សប្រជាជនកម្ពុជាបានលើកឡើងថា ការស៊ើបអង្កេតបន្ថែមទៀតក្នុងការបោះឆ្នោតនោះ មិនអាចធ្វើបានឡើយ។
លោក ជាម យៀប បានថ្លែងថា “គណៈកម្មាធិការជាតិរៀបចំការបោះឆ្នោត (គ.ជ.ប.) បានដោះស្រាយវិវាទជុំវិញភាពមិនប្រក្រតីនៃការបោះឆ្នោត និងពាក្យបណ្តឹងផ្សេងទៀតអំឡុងការបោះឆ្នោតរួចរាល់ហើយ។ គ្មានច្បាប់សម្រាប់គណៈកម្មាធិការដោយឡែកមួយដើម្បីស្វែងរកយុត្តិធម៌ទេ”។ លោកបានថ្លែងថា “គណបក្សប្រជាជនកម្ពុជានៅតែបើកចំហចំពោះសំណើណាមួយពីគណបក្សសង្គ្រោះជាតិ សម្រាប់ការចរចាបន្ថែមទៀត”។
លោក សម រង្ស៊ី បានលើកឡើងដោយឡែកកាលពីម្សិលមិញថា មេដឹកនាំគណបក្សសង្គ្រោះជាតិនៅមិនទាន់ជួបពិភាក្សាគ្នាអំពីសេចក្តីលម្អិតនៃផែនការរបស់គណបក្សធ្វើមហាបាតុកម្មមួយនៅថ្ងៃទី១០ ខែធ្នូទេ។ លោកបានថ្លែងថា ទាំងលោក និងលោក កឹម សុខា បានធ្វើដំណើរទូទាំងប្រទេសទាំងអស់គ្នា ហើយនៅតែមានបំណងធ្វើបាតុកម្មទូទាំងប្រទេស។ លោក សម រង្ស៊ី បានបន្តទៀតថា “ មានការទាមទារយ៉ាងច្រើនសុំឲ្យមានការធ្វើបាតុកម្មនៅទូទាំងប្រទេស”៕ ប៊ុននី