នគរបាលបានឲ្យដឹងកាលពីម្សិលមិញថា មនុស្សចំនួនប្រាំពីរនាក់បានស្លាប់ និង១៧នាក់ផ្សេងទៀតរងរបួសធ្ងន់កាលពីព្រឹកម្សិលមិញ នៅពេលដែលរថយន្តមួយគ្រឿងផ្ទុកពេញដោយដំឡូងមី និងកម្មករចំនួន២៧នាក់ដែលអង្គុយលើនោះបានវេរចង្កូត ហើយក្រឡាប់នៅក្នុងខេត្តក្រចេះ។
លោក សុង ងូយ អធិការរងនគរបាលស្រុកពញាក្រែក បានឲ្យដឹងថា រថយន្តដែលដឹកដំឡូងមីពីចម្ការមួយនៅក្បែរនោះក្នុងស្រុកស្នួល ត្រឡប់ទៅឃុំក្រែក ស្រុកពញាក្រែក ខេត្តកំពង់ចាមវិញ ដែលជាទីលំនៅរបស់កម្មករទាំង២៧នាក់នោះ នៅពេលនោះពោលគឺ នៅម៉ោងប្រហែល១០និង៣០នាទីព្រឹក រថយន្តនោះក៏មានបញ្ហាជើងក្រោម ហើយអ្នកបើកបរក៏បាត់បង់ម្ចាស់ការ។
លោកបានថ្លែងថា “ នៅពេលដែលជើងក្រោមរថយន្តនេះខូច អ្នកបើកបរមិនអាចម្ចាស់ការលើរថយន្តដឹកទំនិញធុនធ្ងន់នេះបាន ខណៈដែលរថយន្តនេះដល់ផ្លូវកោង ហើយ អ្នកបើកបរក៏លោតចេញពីរថយន្ត បណ្តាលឲ្យក្រឡាប់ចូលទៅក្នុងត្រពាំងរីងមួយ”។លោកបានបន្ថែមថា អ្នកបើកបរបានរត់គេចខ្លួនពីកន្លែងកើតហេតុ និងមិនត្រូវបានគេប្រទះឃើញនៅឡើយទេ។ លោកបានឲ្យដឹងថា “ មនុស្សប្រាំមួយនាក់បានស្លាប់ភ្លាមនៅពេលដែលរថយន្តបានក្រឡាប់ ហើយដំឡូងមីសង្កត់លើពួកគេ”។ លោកបានបន្ថែមថា អ្នកដំណើររងរបួសធ្ងន់១៧នាក់ទៀតត្រូវបានបញ្ជូនទៅមន្ទីរពេទ្យនៅក្បែរនោះ។
មនុស្សបួននាក់ក្នុងចំណោមប្រាំមួយនាក់ដែលស្លាប់នៅកន្លែងកើតហេតុ គឺជាស្ត្រី ឈ្មោះ អឿន សារី អាយុ១៩ឆ្នាំ គិន សូត្រា អាយុ៣០ឆ្នាំ គិន ចិន្តា អាយុ៣០ឆ្នាំ និងឈ្មោះ ឈឿន នួនស្រី អាយុ៣០ឆ្នាំ ចំណែកបុរសពីរនាក់ទៀតឈ្មោះ ជឹម កន អាយុ៣២ឆ្នាំ និងឈ្មោះ អឿត ទិត្យ អាយុ១៦ឆ្នាំ ។ មនុស្ស ទី៧ម្នាក់ទៀតត្រូវបានគេរាយការណ៍ថា បានស្លាប់កាលពីយប់មិញ ប៉ុន្តែ នគរបាលមិនបានបញ្ជាក់ឈ្មោះរបស់ជនរងគ្រោះទេ។
លោក ហាន ប៉ូច នាយរងនគរបាលចរាចរណ៍ខេត្តក្រចេះបានមានប្រសាសន៍ថា កម្មករចំនួន១១នាក់ក្នុងចំណោមកម្មករចំនួន២៧នាក់ គឺជាស្ត្រី ហើយថា អ្នកដំណើរចំនួនបួននាក់ទៀតរងរបួសស្រាល។ លោកបានឲ្យដឹងថា “ជនរងគ្រោះដែល ត្រូវបានជួយសង្គ្រោះ ត្រូវបានបញ្ជូនទៅមន្ទីរពេទ្យបង្អែកស្រុក មន្ទីរពេទ្យខេត្តឬគ្លីនិកឯកជន អាស្រ័យលើរបួសរបស់ពួកគេ”។ គួរបញ្ជាក់ថា គ្រោះថ្នាក់ចរាចរណ៍ដែលពាក់ព័ន្ធជាមួយកម្មករធ្វើដំណើរតាមរថយន្តគ្មានសុវត្ថិភាព កើតឡើងជាប្រក្រតីនៅតាមផ្លូវ ជាពិសេសគឺរថយន្តដឹកលើសចំណុះ ទាក់ ទងនឹងវិស័យឧស្សាហកម្មកាត់ដេរ និងផលិតកម្មកសិកម្ម៕ប៊ុននី