អ្នកគ្រប់គ្រងផ្នែកទីផ្សារអាយុ២៣ឆ្នាំម្នាក់របស់ទូរស័ព្ទចល័តសែលខាតត្រូវបានឃាត់ខ្លួនមួយរយៈខ្លីកាលពីម្សិលមិញ ក្នុងខេត្តស្ទឹងត្រែង បន្ទាប់ពីគាត់បានបង្ហោរូបថតមេបញ្ជាការកងរាជអាវុធហត្ថខេត្តមួយសន្លឹកនៅលើបណ្តាញទំនាក់ទំនងសង្គមហ្វេសប៊ុករបស់ខ្លួនជាមួយនឹងការអត្ថាធិប្បាយថា មន្ត្រីរូបនេះជាអ្នកគំរាមកំហែងគួរឲ្យស្អប់។
លោកវរសេនីយ៍ឯក អៀង វណ្ណឌី មេបញ្ជាការកងរាជអាវុធហត្ថខេត្តបានលើកឡើងថា លោក ជេត សូវិចិត្រ ដែលបង្ហោះការអត្ថាធិប្បាយរិះគន់អំពីរូបគាត់នៅតាមសង្គមហ្វេសប៊ុកមិនត្រូវបានសាលាដំបូងខេត្តចោទប្រកាន់ទេ ពីព្រោះគាត់បានសន្យាសូមអភ័យទោសជាសាធារណៈចំពោះការអត្ថាធិប្បាយនេះ។
លោកវរសេនីយ៍ឯក វណ្ណឌី បានលើកឡើងថា “វាជាការបង្ខូចឈ្មោះនិងព័ត៌មានមិនពិតដែលប៉ះពាល់ដល់កិត្តិយសរបស់ខ្ញុំ ពីព្រោះខ្ញុំមិនធ្វើអ្វីខុសទេ ហើយខ្ញុំមកនេះដើម្បីបម្រើប្រជាជន”។
លោកបានបន្ថែមថា “តាមពិត យើងត្រូវបញ្ជូនគាត់ទៅតុលាការ ក៏ប៉ុន្តែ គាត់បានសារភាពកំហុសរបស់គាត់ ដូច្នេះយើងដោះលែងគាត់នៅថ្ងៃនេះ”។
ជាមួយនឹងរូបថតរបស់លោកវរសេនីយ៍ឯក វណ្ណឌី ដែលស្លៀកពាក់ឈុតខ្មៅ លោក សូវិចិត្រ បានសរសេរនៅក្នុងបណ្តាញទំនាក់ទំនងសង្គមហ្វេសប៊ុកថា មេបញ្ជាការកងរាជអាវុធហត្ថរូបនេះ “ មកប្រមូលប្រាក់ និងប្រើពាក្យសម្តីដូចក្មេងបាតផ្សារ” ដែលជា ភាសាខ្មែរសំដៅដល់អ្នកប្រើភាសាឈ្លើយ។
លោក សូវិចិត្រ បានបន្តថា វរសេនីយ៍ឯក វណ្ឌឌី “ មិនត្រូវមានតំណែងជាន់ខ្ពស់នោះទេ។ ពាក្យសម្តីរបស់គាត់អន់ជាងសំរាមទៅទៀត។ សូមចេញពីខេត្តនេះទៅ។ ខ្ញុំឮថា [កងរាជអាវុធហត្ថ] ក្នុងខេត្តស្ទឹងត្រែងរឹបអូសបានម៉ូតូគ្មានស្លាកលេខ និងបានប្រគល់ឲ្យម្ចាស់ជាថ្នូរនឹងប្រាក់២០០ដុល្លារ”។ រូបថតរបស់លោក សូវិចិត្រ ត្រូវបានថតបន្ទាប់ពីលោកត្រូវបានឃាត់ខ្លួន និងបង្ហោះតាមគេហទំព័រកាសែតក្នុងស្រុកបង្ហាញគាត់កំពុងតែអង្គុយដោយមានពាក់បូណ៌ ខណៈដែលគាត់ត្រូវបានរៀបរាប់ដោយមន្ត្រីនៅបញ្ជាការដ្ឋានកងរាជអាវុធហត្ថខេត្ត។
គិតត្រឹមរសៀលម្សិលមិញ ការអត្ថាធិប្បាយរិះគន់របស់លោក សូវិចិត្រ ចេញពីបណ្តាញទំនាក់ទំនងសង្គមហ្វេសប៊ុករបស់គាត់ និងការបង្ហោះសូមអភ័យទោស។ លោក សូវិចិត្រ បានសរសេរថា “ ជាមួយនឹងស្ថានការណ៍នេះ ខ្ញុំសូមអភ័យទោសចំពោះលោកវរសេនីយ៍ឯក អៀង វណ្ណឌី មេបញ្ជាការកងរាជអាវុធហត្ថក្នុងខេត្តស្ទឹងត្រែងថា ខ្ញុំមានកំហុសចំពោះលោកដែលប្រើពាក្យសម្តីមិនល្អអំពីលោក”។ គេហទំព័រនេះ បានលើកឡើងថា “ខ្ញុំសូម សន្យាថា ខ្ញុំនឹងមិនធ្វើអ្វីប៉ះពាល់ដល់រូបលោក ឬអ្នកឯទៀតចាប់ពីពេលនេះទៅ”៕ប៊ុននី