26 C
Phnom Penh

ពល​​​រដ្ឋ​​​ខ្មែរ​​​​​​​​​បីនាក់​​​ត្រូវ​​​បាន​​​សម្លាប់​​​ ខណៈ​​​ពេល​​​​​​ឆ្លង​​​កាត់​​​ព្រំដែន​​​​​​ទៅ​​​កាប់​​​ឈើ​​​នៅក្នុង​​​ទឹក​​​ដី​​​ថៃ​​​

ដោយ ឌឹ ខេមបូឌា ដេលី

បទវិភាគ

មន្ត្រី​​​ការពារ​​​ព្រំដែន​​​មួយ​​​រូប​​​បាន​​​ឲ្យ​​​ដឹង​​​កាល​​​​​​ពី​​​ម្សិលមិញ​​​ថា មន្ត្រី​​​ការពារ​​​ព្រៃ​​​ឈើ​​​ថៃ​​​​​​បាន​​​សម្លាប់​​​ពល​​​រដ្ឋ​​​ខ្មែរ​​​ចំនួន​​​បី​​​នាក់​​​ ដែល​​​ត្រូវ​​​បាន​​​ចោទ​​​ប្រកាន់​​​ថា បាន​​​ចូល​​​ទៅ​​​កាប់​​​ឈើ​​​​​​ដោយ​​​ខុស​​​ច្បាប់​​​ក្នុង​​​ទឹក​​​ដី​​​ថៃ​​​​​​នៅ​​​​​​ក្នុង​​​ខេត្ត​​​ស៊ីសាកេត​​​ កាល​​​ពី​​​ថ្ងៃ​​​អង្គារ​​​។

យោង​​​តាម​​​​​​អង្គការ​​​​​​សិទ្ធិមនុស្ស​​​អាដហុក​​​ បាន​​​ឲ្យ​​​ដឹង​​​ថា ការ​​​ស្លាប់​​​​​​ចុង​​​ក្រោយ​​​នេះ​​​​​​បាន​​​ធ្វើ​​​ឲ្យចំនួន​​​ពល​​​រដ្ឋ​​​ខ្មែរ​​​​​​​​​ដែល​​​ត្រូវ​​​បាន​​​សម្លាប់​​​អំឡុងពេល​​​​​​​​​ឆ្លង​​​កាត់​​​​​​ព្រំដែន​​​ទៅ​​​កាប់​​​ឈើ​​​​​​នៅ​​​ក្នុង​​​ប្រទេស​​​ថៃ​​​​​​ក្នុង​​​ឆ្នាំ​​​នេះ ​​​កើន​​​ឡើង​​​​​​ដល់​​​៣៣​​​នាក់​​​។

លោក​​​ ទូច រ៉ា ប្រធាននគរបាល​​​​​​ការពារ​​​ព្រំដែន​​​​​​ជាំ​​​ស្រងាំ​​​​​​នៅ​​​ក្នុង​​​ខេត្ត​​​ឧត្តរ​​​មានជ័យ​​​បាន​​​លើក​​​ឡើង​​​ថា នគរបាល​​​​​​ការពារ​​​ព្រំដែន​​​កម្ពុជា​​​ទទួល​​​បាន​​​សេចក្ដី​​​រាយការណ៍​​​ពី​​​ហេតុ​​​ការណ៍​​​បាញ់​​​សម្លាប់​​​នេះ​​​​​​កាល​​​ពី​​​ព្រឹក​​​ម្សិល​​​មិញ​​​ ហើយ​​​កំពុង​​​តែ​​​មាន​​​បំណង​​​កំណត់​​​អត្ត​​​សញ្ញាណ​​​នៃ​​​ពល​​​រដ្ឋ​​​ខ្មែរ​​​​​​ដែល​​​ត្រូវ​​​គេ​​​បាញ់​​​សម្លាប់​​​ទាំង​​​នេះ​​​។

លោក​​​ ទូច រ៉ា បាន​​​ឲ្យ​​​ដឹង​​​ថា អាជ្ញាធរ​​​ថៃ​​​បាន​​​លើក​​​ឡើង​​​ថា ពួក​​​គេ​​​បាន​​​ប្រទះ​​​ឃើញ​​​អ្នក​​​កាប់​​​ឈើ​​​ទាំង​​​នេះ​​​នៅ​​​ម៉ោង​​​៣​​​ទៀប​​​ភ្លឺ​​​អំឡុង​​​ពេល​​​ល្បាត​​​ជា​​​ប្រចាំ​​​។
លោក​​​ ទូច រ៉ា មាន​​​ប្រសាសន៍​​​ថា “មន្ត្រី​​​ការពារព្រៃ​​​ឈើ​​​​​​ថៃ​​​​​​តែង​​​តែ​​​ល្បាត​​​​​​នៅ​​​ក្នុង​​​ព្រៃ​​​របស់​​​ខ្លួន​​​ គឺ​​មិន​​​ដូច​​​មន្ត្រី​​​ការពារ​​​ព្រៃ​​​ឈើ​​​កម្ពុជា​​​ ដែល​​​​​​តែង​​​តែ​​​ឈរ​​​ជើង​​​នៅ​​​​​​តាម​​​ផ្លូវ​​​ ឬ​​​ក៏​​​ក្រុង​​​ឡើយ​​​”។

មន្ត្រី​​​ថៃ​​​បាន​​​លើក​​​ឡើង​​​កាល​​​ពី​​​​​​លើក​​​មុន​​​ៗ​​​ថា ទាហាន​​​របស់​​​ខ្លួន​​​គ្រាន់​​​តែ​​​បាញ់​​​អ្នក​​​កាប់​​​ឈើ​​​កម្ពុជា​​​​​​ នៅ​​​ពេល​​​ពួក​​​គេ​​​បាញ់​​​មក​​​លើ​​​ខ្លួន​​​មុន​​​តែ​​​ប៉ុណ្ណោះ។ យោង​​​តាម​​​លោក​​​ កែវ​​​ តាន់​​​ អធិការ​​​​​​នគរ​​​បាល​​​ស្រុក​​​ត្រពាំង​​​ប្រាសាទ​​​​​​បាន​​​ឲ្យ​​​ដឹង​​​ថា នគរបាល​​​​​​ឥឡូវ​​​នេះ​​​កំពុង​​​តែ​​​​​​តាម​​​រក​​​​​​សមា​​​ជិក​​​គ្រួសារ​​​ជន​​​រងគ្រោះ​​​​​​ ដែលគេ​​​​​​ជឿជាក់​​​ថា រស់​​​នៅ​​​ក្នុង​​​ស្រុក​​​ត្រពាំង​​​ប្រាសាទ​​​​​​ខេត្ត​​​ឧត្តរ​​​មានជ័យ​​​ ដែល​​​​​​នៅ​​​ជាប់​​​ព្រំដែន​​​ខេត្ត​​​ស៊ីសា​​​កេត​​​ ប្រទេស​​​ថៃ​​​។

កាសែត​​​បាងកក​​​ប៉ុស្ដិ៍​​​បាន​​​រាយការណ៍​​​កាល​​​ពី​​​ម្សិលមិញ​​​ថា ឈើគ្រញូង​​​ចំនួន​​​១៨​​​ដុំ​​​​ត្រូវ​​​បាន​​​គេ​​​ប្រទះ​​​ឃើញ​​​នៅ​​​​ក្បែរ​​​ព្រំដែន​​​ ជាមួយ​​​នឹង​​​​​​រណារដៃ​​​ និង​​​ពូថៅ​​​​​​មួយ​​​ចំនួន​​​។ សេចក្ដី​​​រាយការណ៍​​​នេះ​​​មិន​​​បាន​​​លើក​​​ឡើង​​​ថា  តើ​​​មាន​​​កំាភ្លើង​​​ណាមួយ​​​ត្រូវ​​​បាន​​​រក​​​ឃើញ​​​ ជាមួយ​​​សាកសព​​​ឡើយ​​​ ប៉ុន្តែ​​​សេចក្ដី​​​រាយ ការណ៍​​​នេះ​​​បាន​​​លើក​​​ឡើង​​​ថា អ្នក​​​កាប់​​​ឈើ​​​កម្ពុជា​​​​​​​​​​​​ដែល​​​ត្រូវ​​​គេ​​​បាញ់​​​សម្លាប់​​​នឹង​​​ត្រូវ​​​បញ្ជូន​​​មក​​​ប្រទេស​​​កម្ពុជា​​​វិញ​​​បន្ទាប់​​​ពី​​​សាក​​​សព​​​​​​ត្រូវ​​​បាន​​​ធ្វើ​​​​​​កោសល្យវិច័យ​​​​រួច​​​។

អត្ថបទ​​​មួយ​​​របស់​​​កាសែត​​​បាងកក​​​ប៉ុស្ដិ៍​​​បាន​​​លើក​​​ឡើង​​​ថា អាជ្ញាធរ​​​​​​ថៃ​​​​​​បាន​​​ប៉ាន់​​​ប្រមាណ​​​​​​ថា ឈើ​​​ដែល​​​រឹប​​​អូស​​​បាន​​​អាច​​​លក់​​​បាន​​​ក្នុង​​​តម្លៃ​​​១០​​​លាន​​​បាត​​​ ឬ​​​ក៏​​​ប្រហែល​​​៣១៥​​​.០០០​​​ដុល្លារ​​​ ប្រសិន​​​បើ​​​ត្រូវ​​​បាន​​​គេ​​​​​​រត់​​​ពន្ធ​​​ចេញ​​​ពី​​​ប្រទេស​​​ថៃ​​​នោះ​​​។ កាលពី​​​ខែ​​​មីនា ឈើគ្រញូង​​​ត្រូវ​​​បាន​​​​​​ចាត់​​​ទុក​​​ជា​​​​​​ប្រភេទ​​​ឈើ​​​ការពារ​​​​​​នៅ​​​ក្នុង​​​​​​អនុ​​​សញ្ញា​​អន្តរជាតិ​​​​ស្ដី​​​ពី​​​ការ​​​​​​ជួញ​​​ដូរ​​​​​​ប្រភេទ​​​ឈើ​​​ជិត​​​ផុត​​​ពូជ​​​របស់​​​អង្គការ​​​ Wild Fauna and Flora ។

កាល​​​ពី​​​ដើម​​​ឆ្នាំ​​​នេះ​​​ លោក​​​នាយករដ្ឋមន្ត្រី​​​ហ៊ុន​​​ សែន​​​ បាន​​​ចេញ​​​សារាចរ​​​ណែ​​​នាំ​​​មួយ​​​​​​ឲ្យ​​​​​​អាជ្ញាធរ​​​ខេត្ត​​​​​​ទប់​​​ស្កាត​​​ពលរដ្ឋ​​​ខ្មែរ​​​​​​កុំឲ្យ​​​ឆ្លង​​​កាត់​​​​​​ព្រំដែន​​​ទៅ​​​កាប់​​​ឈើ​​​គ្រញូង​​​នៅ​​​ក្នុង​​​ទឹក​​​ដី​​​ថៃ​​​។ យោង​​​តាម​​​តួលេខ​​​​​​របស់​​​រដ្ឋាភិបាល​​​បាន​​ឲ្យ​​​ដឹង​​​ថា កាល​​​ពី​​​ឆ្នាំ​​​២០១២ ពល​​​រដ្ឋ​​​ខ្មែរ​​​ចំនួន​​​៤៥​​​នាក់​​​ត្រូវ​​​ទាហាន​​​ការពារ​​​ព្រំដែន​​​ថៃ​​​​​​បាញ់​​​សម្លាប់​​​​​​អំឡុង​​​ឆ្លង​​​កាត់​​​ព្រំដែន​​​ទៅ​​​​​​កាប់​​​ឈើ​​​ខុស​​​ច្បាប់​​​ក្នុង​​​ទឹក​​​ដី​​​ថៃ​​​។ រីឯ​​​តួលេខ​​​​​​នៃ​​​អ្នក​​​ស្លាប់​​​​​​កាល​​​ពីឆ្នាំ២០១១ មាន​​​ចំនួន​​​១៥​​​នាក់​​​នេះ​​​បើ​​​យោង​​​តាម​​​​​​តួលេខ​​​ដែល​​​បាន​​​មក​​​ពី​​​​​​អង្គការ​​​សិទ្ធិមនុស្ស​​​អាដហុក​​​៕ ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស