38 C
Phnom Penh

ការ​ធ្វើ​​កូដ​កម្ម​​​​នៅ​រោង​ចក្រ​ អេស​​​អិល​ ​​គឺ​ដោយ​សារ មាស សុថា

ដោយ ឌឹ ខេមបូឌា ដេលី

បទវិភាគ

លោក​ មាស សុថា នឹង​មិន​ចាក​ចេញ​​ពី​រោង​ចក្រ​អេស​អិល​ ដែរឬទេ។

នៅ​ពេល​ដែល​មាន​ភាព​តាន​តឹង​កាន់​តែ​ខ្លាំង​ឡើង​រវាង​អ្នក​គ្រប់​គ្រង​នៅ​​រោង​ចក្រ​​នេះ​ ​និង​កម្មករ​ អស់​​រយៈ​ពេល​ជាង​​ប្រាំ​ខែ​មក​នេះ​ លោក មាស​ សុថា និង​តួនាទី​របស់​គាត់​នៅ​រោង​ចក្រ​ ដែល​សម្បូរ​ដោយ​កូដ​កម្ម​នេះ​​បាន​ក្លាយ​ជា​​ចំណុច​សំខាន់​។

លោក មាស សុថា ម្ចាស់​ភា​គហ៊ុន​ និង​អ្នក​គ្រប់​គ្រង​ស្ដីទី​នៅ​​​រោង​ចក្រ​អេស​អិល ឈរ​នៅ​ខាង​ក្នុង​បរិវេណ​រោង​ចក្រ​។ Colin Meyn/The Cambodia Daily
លោក មាស សុថា ម្ចាស់​ភា​គហ៊ុន​ និង​អ្នក​គ្រប់​គ្រង​ស្ដីទី​នៅ​​​រោង​ចក្រ​អេស​អិល ឈរ​នៅ​ខាង​ក្នុង​បរិវេណ​រោង​ចក្រ​។ Colin Meyn/The Cambodia Daily

កម្មករ​អះអាង​ថា ចាប់​តាំង​ពី​លោក សុថា បាន​ចូល​កាន់​តំណែង​បន្ត​ពី​ប្រធាន​រដ្ឋបាល​រោង​ចក្រ​អេសអិលមុន ​កាលពី​ខែ​មិថុនា គាត់​​​មាន​តួនាទី​ដ៏​សកម្ម​នៅ​​ក្នុង​ការ​គ្រប់​គ្រង​បុគ្គលិក​ ហើយ​ពួកគេ​អះ​អាង​ថា គាត់​ជា​អ្នក​រារាំង​​ការ​ងារ​សហជីព​។ ពួកគេ​ចោទ​គាត់​ថា បាន​ចូល​រួម​នៅ​ក្នុង​ការ​ដក​មេដឹកនាំ​សហជីព​
របស់​ខ្លួន​ចំនួន​១៩​នាក់​។ ឥឡូវ​នេះ​លោក មាស​ សុថា ត្រូវ​តែ​ចាក​ចេញ​។

សម្ព័ន្ធ​សហជីព​​ប្រជា​ធិបតេយ្យ​កម្មករ​កាត់​ដេរ​កម្ពុជា​​ (ស៊ីខាវឌូ) ​បាន​ទាម​ទារ​ឲ្យ​ដក​លោក មាស សុថា ចេញ​ពី​តួនាទី​របស់​គាត់​នៅ​ក្នុង​ការ​ចរចា​ដើម្បី​បញ្ចប់​កូដ​កម្ម​ជា​ច្រើន​ខែ​ ដែល​​បាន​ក្លាយ​ជា​ហិង្សា​ចំនួន​ពីរ​ដង​នេះ​។ ប៉ុន្តែ​លោក សុថា ជា​ភាគ​ហ៊ុន​ម្នាក់​នៅ​រោង​ចក្រ​នេះ ដែល​មាន​ងា​រ​ជា​ឧកញ៉ា​ ហើយ​ ​​​សហការី​ និង​​មនុស្ស​​ផ្សេង​ៗ​ទៀត​ហៅ​ថា ឯក​ឧត្តម​នោះ នឹង​មិន​ចាក​ចេញ​ទេ​។ ជម្លោះ​នេះប្រហែល​ជា​កើត​ឡើង​ដោយ​​​សារ​រឿង​ប្រាក់​ខែ​ និង​ពេល​ឈប់​សម្រាក​អាហារ​ថ្ងៃ​​ត្រង់​ ប៉ុន្តែ​ឥឡូវ​នេះ​ជម្លោះ​នេះ​បាន​ក្លាយ​ជាការ​ប្រឆាំង​គ្នា​យ៉ាង​ខ្លាំង​រវាង​​ភាគី​​ពីរ​ គឺ​លោក សុថា និង​សហជីព​ ស៊ីខាវឌូ។

លោក សុថា បាន​និយាយ​ពេល​សម្ភាស​​នៅ​​​សប្ដាហ៍នេះនៅឯ​រោង​ចក្រ​នេះ​ថា “ប្រសិន​បើ​ពួកគេ​ចង់​ទិញ​យក​ភាគ​ហ៊ុន​របស់​ខ្ញុំ​​ ពួកគេ​អាច​ធ្វើ​បាន​”។ គាត់​បាន​សួរ​ថា “តើ​កម្មករ​ទាំង​នោះ​ជា​ថៅកែ​ឬ?” នៅ​ឯរោងចក្រ​នេះកាលពីថ្ងៃ​ពុធ លោក​ សុថា ឈរ​នៅ​ច្រក​ចូល​រោង​ចក្រ​នៅ​ពេល​ដែល​កម្មករ​ឈប់​សម្រាក​សម្រាប់​អាហារ​ថ្ងៃ​ត្រង់​។ គាត់បាន​ចាប់​ទាញ​សរសៃ​អំបោះ​ចេញ​​ពី​អាវ​កម្មការិនី​ម្នាក់​នៅ​ពេល​នាង​ដើរ​កាត់​នោះ​ ហើយ​បាន​លេង​សើច​ធ្វើ​ជា​ឆែក​កាបូប​​​កម្ម​ករ​​​ម្នាក់​ទៀត​​ខ្លាច​ក្រែង​​កម្មករ​នោះ​យក​អ្វី​មួយ​ចេញពី​រោង​ចក្រ​​។

ទោះ​បី​ជា​សព្វ​ថ្ងៃ​នេះ​ គាត់​បាន​ចំណាយ​ពេល​​ភាគ​ច្រើន​នៅ​រោងចក្រ​អេស​អិល និយាយ​ជាមួយ​បុគ្គលិក​នៅក្នុង​ការិយាល័យ​របស់​គាត់ និង​ឃ្លាំ​មើល​ប្រតិបត្តិការ​ក៏ដោយ ក៏​គាត់​អះអាង​ថា គាត់​មិន​មែន​ជា​អ្នក​គ្រប់​គ្រង​ទេ ប៉ុន្តែ​ជា​​ម្ចាស់​ភាគ​ហ៊ុន​សម្រាប់​​ដោះ​ស្រាយ​បញ្ហា​​។ គាត់​បាន​និយាយ​ថា “នៅ​ពេល​កម្មករ​មាន​បញ្ហា ​ពួកគេ​ទៅ​រក​ប្រធាន​រដ្ឋបាល​។ ​ប្រសិន​បើ​ពួកគេ​មិន​អាច​ដោះ​ស្រាយ​បញ្ហា​បាន​ទេ កម្មករ​ទៅ​រក​ថៅកែ​។ នៅពេល​ពួកគេ​ទៅ​រក​ថៅកែ​ ខ្ញុំអប់​រំពួកគេ​អំពី​ច្បាប់​កម្ពុជា​”។

ជា​បុរស​ទាប​មាន​ពុក​មាត់​​ស្អាត​ និង​មាន​សក់​ស្ដើង​​សិត​រាប​ទៅ​ក្រោយ​​ លោក​ សុថា បាន​បដិសេធ​មិន​ប្រាប់​អាយុ​របស់គាត់​ទេ ប៉ុន្តែ​គាត់ហាក់​ដូច​ជា​មាន​អាយុ​ខ្ទង់​៥០​ឆ្នាំ​។ គាត់​បាន​និយាយ​ថា រោងចក្រ​អេស​អិល ស្ថិត​ក្នុង​ចំណោម​ការ​​​បណ្តាក់​ទុក​រក​សីុ​​មួយ​ចំនួន​ដែល​​​​គាត់​មាន​ភាគ​ហ៊ុន​ បន្ទាប់ពី​បាន​​បណ្តាក់​ទុកលើក​​​ដំបូង​ទៅ​​ក្នុង​ការ​​រក​ស៊ីលក់​​ថ្នាំ​លាប​ដែល​ទទួល​បាន​ជោគ​ជ័យ​ខ្លាំង​​ ហើយ​ឥឡូវ​នេះ​គាត់​បាន​ពង្រីក​ទៅ​ដល់​ប្រទេស​វៀត​ណាម​ហើយ។

រួម​ទាំង​រោង​ចក្រ​អេស​អិល​ផង លោក សុថា បាន​និយាយ​ថា គាត់​មាន​ភាគ​ហ៊ុន​នៅ​ក្នុង​រោង​ចក្រ​កាត់​ដេរ​ចំនួន​បី និង​រោងចក្រ​អ៊ុត​សម្លៀក​បំពាក់ពីរ​។ គាត់​ក៏បាន​និយាយ​ផង​ដែរ​ថា គាត់​នាំ​ដីខ្សាច់​ពី​ខេត្ត​កោះកុង​ទៅ​ប្រទេស​សិង្ហបុរី។ រួម​ជាមួយ​ដៃ​គូ​ជន​ជាតិ​ចិន​គាត់​ក៏​មាន​ចម្ការ​ដំឡូង​មី​​ក្នុង​ខេត្ត​បាត់​ដំបង កំពង់​ស្ពឺ កំពត និង​ពោធិ៍សាត់ ដែលទទួល​បាន​​ផល​ចំនួន​១០០.០០០​តោន​ក្នុង​មួយ​ឆ្នាំ​។ នៅពេល​សួរ​អំពី​តួនាទី​របស់​គាត់​នៅ​រោង​​​ចក្រ​នេះ លោក សុថា បាន​​និយាយ​ថា គាត់​គ្មាន​តួនាទី​នៅ​រោងចក្រ​នេះ​ទេ​។

លោក សុថា បាន​សួរ​ថា “តើ​អំណា​​ច​អ្វី​? តើ​តួនាទី​អ្វី​​ដែល​ខ្ញុំ​ធ្វើ​? តើខ្ញុំ​មាន​តួនាទី​​ប្រភេទ​ណា​។ តើ​រោងចក្រ​អេស​អិល​ឲ្យ​ប្រាក់​ខែ​ខ្ញុំ​ប៉ុន្មាន​?។ ខ្ញុំ​មិន​ដែល​ទៅ​បញ្ជា​កម្មករ​ឲ្យ​ធ្វើការ​ងារ​ទេ។ កម្មករ​ក៏​មិនដែល​ស្គាល់​ខ្ញុំដែរ​”។

នៅ​ឯ​ការិយាល័​យ​របស់គាត់​មិន​ឆ្ងាយ​​ប៉ុន្មាន​​ពី​រោង​ចក្រ​អេស​អិល លោក អាត់ ធន់ ប្រធាន​សហជីព​ ស៊ីខាវឌូ បាន​ត្អូញ​ត្អែរ​អំពី​លោក សុថា ហើយ​វត្តមាន​របស់​គាត់​នៅ​រោង​ចក្រ​នេះ​តាំងពីខែកក្កដា​ បាន​ធ្វើ​ឲ្យ​រាំង​ស្ទះ​ដល់​ការ​ងារ​របស់​សហជីព​នៅ​រោង​ចក្រ​នេះ​។ លោក អាត់ ធន់ បាន​មាន​ប្រសាសន៍​ថា “យើង​ដឹង​ថា គាត់​គឺ​ជា​មនុស្ស​ម្នាក់​ដែល​ធ្វើ​ឲ្យ​សហជីព​របស់​យើង​ចុះ​ខ្សោយ​ និង​រារាំង​មិន​ឲ្យ​មាន​ការ​បង្កើត​សហជីព​”។

លោក អាត់ ធន់ ​មាន​ប្រសាសន៍​ថា សហ​​​​​ជីព​​ស៊ីខាវឌូ ដែល​ជា​សហជីព​ឯករាជ្យ​តែ​មួយ​​​គត់​នៅ​កម្ពុជា​បាន​ចាប់​ផ្ដើម​បង្កើត​ឡើង​នៅ​រោងចក្រ​នេះកាលពី​ខែ​មិថុនា​ឆ្នាំ​២០១២ និង​មាន​សមាជិក​៣.៨០០​នាក់​ក្នុង​រយៈ​ពេល​​មួយ​ឆ្នាំ។ លោក​បាន​បន្ថែម​ថា នេះ​គឺ​ជា​សហ​ជីព​ទី១ នៅ​រោងចក្រ​អេស​អិល ដែល​ហ៊ាន​ក្រោក​ឈរ​ប្រឆាំងនឹង​​​អ្នក​គ្រប់​គ្រង​។

លោក​ អាត់ ធន់ មាន​ប្រសាសន៍​ថា “ចន្លោះ​ពីឆ្នាំ​១៩៩៨​ដល់​ឆ្នាំ​២០១២ រោង​ចក្រ​នេះ​បាន​ប្រើកិច្ច​សន្យា​រយៈ​ពេល​ខ្លី ហើយ​ជា​រឿយៗ​តម្រូវ​ឲ្យ​កម្មករ​ធ្វើការ​រយៈ​ពេល​១២​ម៉ោង​ក្នុង​មួយ​ថ្ងៃ​។ ពួកគេ​មិន​ផ្ដល់​សិទ្ធិ​ឲ្យ​សហជីព​ធ្វើ​អ្វីឡើយ។ ហេតុ​ដូច្នេះ​ហើយ​បាន​ជា​ឥឡូវ​​​នេះ​​ម្ចាស់​រោងចក្រ​នេះ​មិន​សប្បាយ​ចិត្ត​។ពី​មុន​ពួកគេ​​ធ្វើ​មក​លើកម្មករ​ដូច​សត្វ​។ ឥឡូវ​នេះ​ពួកគេ​ត្រូវ​​ធ្វើ​ឲ្យ​បាន​ត្រឹម​ត្រូវ។ រឿង​នេះ​ហើយ​​ដែល​ធ្វើ​ឲ្យ​ មាស សុថា ចូល​មក​។ ពួកគេ​ចង់​ឲ្យ​ស្ថាន​ភាព​នេះ​ដូច​ស្ថាន​ភាព​កាលពី​១០​ឆ្នាំ​មុន​”។

លោក អាត់ ធន់ មិនមែន​ជា​មនុស្ស​ម្នាក់​ដែល​មិន​ចូល​ចិត្ត​លោក សុថា នោះទេ។​ អំឡុង​ពេល​ធ្វើ​សម្ភាស​កាលពីថ្ងៃ​ច័ន្ទនៅ​កន្លែង​ស្នាក់​នៅ​របស់​អ្នក​គ្រប់​គ្រង​ជន​ជាតិ​ចិន​នៅ​ក្នុង​រោងចក្រ​នេះ លោក ចូសេហ្វ គី​ឡឹង​ លី អាយុ​៦៤​ឆ្នាំ ជា​ប្រធាន​រោងចក្រ​នេះ​​បានមាន​ប្រសាសន៍​ថា គាត់​មិន​បាន​ដឹង​ថា លោក សុថា ជា​នរណាទេ មុន​ពេល​គាត់​ត្រឡប់​មក​ពី​ប្រទេស​កាណាដា កាលពី​ខែ​សីហា​ ហើយ​បាន​ឃើញ​​លោក សុថា ស្ថិត​នៅ​ក្នុង​ការិយា​ល័យ​របស់​គាត់​តែ​ម្ដង​។

លោក សុថា បាននិយាយ​ថា គាត់​មក​ធ្វើ​ការ​​​នៅ​ក្នុង​ការិយាល័យ​របស់​លោក លី “ព្រោះ​​​​ខ្ញុំ​មិន​មាន​ការិយាល័យ​ធ្វើការ​ទេ។ ខ្ញុំ​បាន​ឃើញ​កន្លែង​ទំនេរ​ខ្ញុំ​ក៏​យក​វា​តែម្ដង​ទៅ​” ។ លោក​​បន្ថែម​ថា លោក លី មាន​វ័យ​ចំណាស់​​ ហើយ​ដឹង​ថា ខ្ញុំត្រូវ​អប់​រំ​កម្មករ​ ដូច្នេះ​ គាត់​បានរក​កន្លែង​ថ្មី”។

លោក លី បាននិយាយ​ថា “លោក​គ្មាន​អំណាច​តាំង​ពីដំបូង​” ។ លោក​បាន​បញ្ជាក់​ថា ក្នុង​រយៈ​ពេល​ប៉ុន្មាន​ខែ​ថ្មីៗ​នេះ ពេល​មាន​បញ្ហា​ច្រើន​នៅ​រោងចក្រ​នេះ​ លោក សុថា ​មាន​ការ​ចាប់​អារម្មណ៍​ខ្លាំង​ក្នុងការ​គ្រប់​គ្រង​បុគ្គលិក​​ឲ្យ​មាន​សណ្ដាប់​ធ្នាប់​។ លោក លី បាននិយាយ​ថា “លោក សុថា អប់​រំ​បុគ្គលិក​ គាត់ដូចជា​មនុស្ស​ចាស់​ជាង​យើង​ ហើយ​ប្រាប់​យើង​​​អ្វីដែល​ត្រូវ​និង​អ្វី​ដែល​ខុស”។ លោក​បាន​បន្ថែមថា លោក សុថា គ្មាន​តំណែង​ផ្លូវ​ការ​នៅ​ក្នុង​ឋានានុ​ក្រម​​គ្រ​ប់​គ្រង​ទេ​។

លោក លី បាន​និយាយ​ថា លោក សុថា ក៏​មាន​ទំនាក់​ទំនង​ជិត​ស្និទ្ធ​​ជាមួយ​កង​រាជ​អាវុធ​ហត្ថ​ដែល​ត្រូវ​បាន​ដាក់​ពង្រាយ​នៅ​ក្នុង​រោង​ចក្រ​នេះ​ចាប់​តាំង​ពី​​កម្ម​ករ​មួយ​ក្រុម​មាន​គ្នា​​ប្រហែល​ពីរ​បី​រយ​នាក់​បាន​បំផ្លាញ​ផ្នែក​ខ្លះ​នៃ​រោងចក្រ​នេះ​កាល​ពីថ្ងៃ​ទី​២០ ខែកញ្ញា។ លោក លី បាន​​និយាយ​ថា “លោក សុថា ជិត​ស្និទ្ធ​នឹង​កង​រាជអាវុធ​ហត្ថ​។ ពួកគេ​រាក់​ទាក់​ជាមួយ​​គាត់​ណាស់​។ ខ្ញុំ​បាន​សួរ​គាត់​ថា តើ​គាត់​​​ជា​ឧត្តម​សេនីយ៍​ឬ។ គាត់​គ្រាន់​ញញឹម​”។

លោក រ៉េម៉ុង វ៉ុង​ ជា​ពាណិជ្ជករ​នៅ​ទីក្រុង​ហុង​កុង ដែល​បាន​បង្កើត​រោងចក្រ​អេស​អិល កាលពី​ឆ្នាំ​១៩៩៨​ក៏​បាន​បញ្ជាក់​ដែរ​ថា លោក សុថា គ្មាន​តំណែង​ផ្លូវ​ការ​នៅ​ក្នុង​ការ​គ្រប់​គ្រង​​​រោង​ចក្រ​នេះ​ទេ។ ពេល​សួរ​អំពី​លោក សុថា ពេល​សម្ភាស​នៅ​រោងចក្រ​នេះ​កាលពី​ថ្ងៃ​ពុធ​ លោក វ៉ុង អាយុ​៥៧​ឆ្នាំ បាន​ស្ទុះ​ចេញទៅ​ក្រៅ​បន្ទប់​ ហើយ​បាន​ត្រឡប់​មក​វិញ​ជាមួយក្រដាស​មួយ​សន្លឹក​ ដែល​នៅ​លើ​​ក្រដាស​នោះ​មាន​រូប​ភាព​ពីផ្កាយ​រណប​​អំពី​ខណ្ឌ​មានជ័យ។

ពេល​ចង្អុរ​ទៅកាន់​ក្រដាស​នោះ លោក វ៉ុង ​បាន​ពន្យល់​ថា កាលពី​ឆ្នាំ​២០១០​បឹង​មួយ​នៅ​ជិត​នោះ ដែល​រោងចក្រ​នេះ​ប្រើដើម្បី​យក​ទឹក​​មក​ប្រើ​ប្រាស់​នោះ ត្រូវ​បាន​ចាក់​ដីបំពេញ​។ ដូច្នេះ​រោងចក្រ​នេះ​​មាន​​ផែន​ការ​មួយ​ គឺ​បង្កើត​រោងកច្រ​ប្រព្រឹត្តិកម្ម​ទឹក​កាក​សំណល់​នៅ​​លូ​ទឹក​ស្អុយ​ស្ទឹង​មាន​ជ័យ​ ​ហើយ​បញ្ជូន​ទឹក​ស្អាត​ទៅ​ប្រើ​ប្រាស់​នៅ​រោង​ចក្រ​នេះ។ លោក វ៉ុង បាន​និយាយ​ដោយ​សំឡេង​​ធ្ងន់ៗ​​ថា “លោក សុថា គឺ​ជា​អ្នក​វិនិយោគ​​ទៅ​លើ​​រោង​ចក្រ​ប្រព្រឹត្តិកម្ម​ទឹក​កាក​​សំណល់​នេះ​”។

ដូច្នេះ​ហើយ ហេតុ​អ្វី​បាន​ជាគាត់​ជាប់​ពាក់​​ព័ន្ធ​​នឹង​អ្នក​​គ្រប់​គ្រង​​ថ្នាក់​ក្រោម​នៅ​រោង​ចក្រ​នេះ​ទៅ​វិញ​? សហជីព​ និង​សមាជិក​របស់​ខ្លួន​មិន​ចូល​ចិត្ត​​ការ​គ្រប់​គ្រងបែប​នេះ​សោះ?

លោក វ៉ុង និយាយ​ជា​ភាសាចិន​កាតាំង ដែល​​ត្រូវ​បាន​បុគ្គលិក​របស់​គាត់​​បក​ប្រែ​ជា​ភាសា​ខ្មែរ​ ហើយ​បន្ទាប់មក​ត្រូវ​បាន​បក​ប្រែ​ជា​ភាសា​អង់​គ្លេស​ថា “តាម​ពិត​លោក មាស សុថា មាន​ភាគ​ហ៊ុន​តូច​មួយ​នៅ​ក្នុង​រោងចក្រ​អេស​អិល។ ដូច្នេះ​ ប្រសិន​បើ​រោងចក្រ​នេះ​មាន​បញ្ហា គាត់​ត្រូវ​ដោះស្រាយ​បញ្ហា​នោះ គឺ​គ្រាន់​តែ​មក​ពិនិត្យ​មើល​ថា តើ​មាន​អ្វី​កើត​ឡើង​ប៉ុណ្ណោះ”។

លោក សុថា មិន​មែន​ជា​មនុស្ស​ថ្មី​ដែល​ជាប់​ពាក់​ព័ន្ធ​នឹង​ជម្លោះ​ការ​ងារ​នោះ​ទេ។ ក្នុង​នាម​ជា​នាយក​ និង​ជា​ម្ចាស់​ភាគ​ហ៊ុន​មួយ​ផ្នែក​នៅ​រោង​ចក្រ​​ Flying Dragon កាលពី​ដើម​ឆ្នាំ​២០០០​ លោក​ សុថា តែង​តែ​តំណាង​ឲ្យ​រោងចក្រ​នេះ​ពេល​និយាយ​ជាមួយ​​​ប្រព័ន្ធ​ផ្សព្វផ្សាយ​។

កាលពី​ខែ​មករា ឆ្នាំ​២០០៣ លោក សុថា ប្រជែង​គ្នា​នៅ​ក្នុង​ប្រព័ន្ធ​ផ្សព្វ​ផ្សាយ​ជាមួយ​លោក ជា វិជ្ជា ដែល​នៅ​ពេល​នោះ​ជា​ប្រធាន​​សហជីព​សេរីកម្មករ ហើយ​ត្រូវ​បាន​គេ​ធ្វើ​ឃាត​មួយ​ឆ្នាំ​ក្រោយ​មក​​ ចំពេល​មាន​ជម្លោះ​ការ​ងារ​នៅ​រោងចក្រ​ Flying Dragon ។ សមា​ជិក​ប្រហែល​៣០០​នាក់ របស់​សហជីព​លោក ជា វិជ្ជា នៅ​រោងចក្រ​ Flying Dragon បាន​ធ្វើ​កូដ​កម្ម​ចំពោះ​ការ​បណ្ដេញ​មេដឹកនាំ​សហជីព​ម្នាក់ និង​កម្មករ​១១​នាក់​ចេញពីការ​ងារ​។

នៅពេល​នោះ​លោក សុថា បាន​និយាយ​ថា កម្មករ​ដែល​ត្រូវ​បណ្ដេញ​ចេញ​ទាំង​១​២​នាក់​ធ្វើ​ឲ្យ​កម្មករ​ផ្សេងទៀត​មាន​ការ​ភ័យ​ខ្លាច​ និង​ធ្វើ​ឲ្យ​​ប៉ះពាល់​ដល់​ផលិត​កម្ម​។ លោក ជា វិជ្ជា បាននិយាយ​ថា លោក សុថា ​បាន​ព្យាយាម​រារាំង​មិន​ឲ្យ​លោកបង្កើត​សហ​ជីព​របស់​លោក​៕ គឹមហឿន
(រាយការណ៍​បន្ថែមដោយ អូន ភាព ផន បុប្ផា និង Dene Hern-Chen)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស