កាលពីម្សិលមិញ ក្រុមអ្នកភូមិ និងអាជ្ញាធរមូលដ្ឋានបានបន្តខ្វែងគំនិតគ្នាជុំវិញដីទំហំបួនហិកតានៅក្នុងខណ្ឌឫស្សីកែវ រាជធានីភ្នំពេញ មួយថ្ងៃបន្ទាប់ពីមន្ត្រីទាំងនោះបានសន្យាវាស់វែងដីនេះ និងផ្តល់ប័ណ្ណកម្មសិទ្ធិកាន់កាប់។
កាលពីថ្ងៃអាទិត្យ លោក ប្រាក់ ចាន់ណា ប្រធានក្រុមប្រឹក្សាខណ្ឌនេះបានសន្យាផ្តល់ប័ណ្ណកម្មសិទ្ធិសម្រាប់វត្តខ្ទរ បន្ទាប់ពីអ្នកភូមិបានដុតអេស្កាវ៉ាទ័រមួយគ្រឿង កាលពីថ្ងៃសុក្រ ដែលពួកគាត់និយាយថា ក្រុមហ៊ុន អេងកាំង អភិវឌ្ឍន៍ នេះបានប្រើប្រាស់ដើម្បីឈូសកម្ទេចឈាបនដ្ឋាននៅវត្តនេះ។ ប៉ុន្តែកាលពីម្សិលមិញអ្នកភូមិបាននិយាយថា អាជ្ញាធរបានមកដល់កន្លែងនោះ ប៉ុន្តែ បានបដិសេធមិនព្រមធ្វើការវាស់វែងដីនេះទេ ផ្ទុយទៅវិញបែរជានិយាយថា ចាំបាច់ត្រូវធ្វើការពិភាក្សាគ្នាបន្ថែមទៀត។
លោក តុំ អុល អាយុ៦៣ឆ្នាំ បាននិយាយថា “ពួកគេនិយាយថា ពួកគេចង់ឲ្យយើងជ្រើសរើសតំណាងម្នាក់តំណាងភូមិទាំងបី [ដែលពាក់ព័ន្ធនឹងជម្លោះនេះ] ប៉ុន្តែ យើងមិនទទួលយកសំណើនេះទេ”។
លោក ជាតិ ទី អាយុ៤៩ឆ្នាំបាននិយាយថា មិនចាំបាច់ជ្រើសរើសតំណាងទេ ពីព្រោះអ្នកភូមិបានយល់ស្របថា ដីនេះគួរប្រគល់ទៅឲ្យវត្តវិញ តាមរយៈការផ្តល់ប័ណ្ណកម្មសិទិ្ធកាន់កាប់។ លោក ជាតិ ទី បាននិយាយថា “អ្នកភូមិទាំងអស់គ្នាអាចបានត្រឹមតែមកឈរមើល ខណៈដែលអាជ្ញាធរបានមកវាស់វែងដីនេះតែប៉ុណ្ណោះ”។
ប៉ុន្តែ លោក ចាន់ណា ដែលជាប្រធានក្រុមប្រឹក្សាខណ្ឌបានមានប្រសាសន៍ថា អ្នកភូមិមានការបែកបាក់គ្នា ហេតុដូច្នោះហើយ ពួកគាត់ចាំបាច់់ត្រូវជ្រើសរើសតំណាងរបស់ខ្លួន។ លោក ចាន់ណា បានមានប្រសាសន៍ថា “យើងកំពុងរង់ចាំពួកគាត់ ពីព្រោះមានភាគីច្រើននៅក្នុងក្រុមនេះ។ អាជ្ញាធរខណ្ឌនឹងវាស់វែងដីនេះ ហើយប្រគល់ទៅគណៈកម្មការវត្ត ប៉ុន្តែ ឥឡូវនេះពួកគេត្រូវការអ្នកតំណាង”។
កាលពីខែមេសា ឆ្នាំ២០១២ ទីស្តីការគណៈរដ្ឋមន្ត្រីបានប្រកាសថា ដីវត្ត និងឈាបនដ្ឋានត្រូវបានផ្ទេរទៅឲ្យក្រុមហ៊ុន អេងកាំង អភិវឌ្ឍន៍។ ប៉ុន្តែ បន្ទាប់ពីមានការតវ៉ាកាលពីចុងសប្តាហ៍ ស្ថាប័ននេះបានទុកជាមោឃៈនូវសេចក្តីជូនដំណឹងដំបូង។
លោក ប៉ា សុជាតិវង្ស អភិបាលរាជធានីភ្នំពេញ និងលោក ឃ្លាំង ហួត ជាអភិបាលខណ្ឌបានមានប្រសាសន៍ថា ការទុកជាមោឃៈនូវការផ្តល់ដីដំបូងរបស់ទីស្តីការគណៈរដ្ឋមន្ត្រីកាលពីថ្ងៃអាទិត្យនោះ បានធ្វើឡើងតាមការណែនាំដោយផ្ទាល់ពីលោកនាយករដ្ឋមន្ត្រី ហ៊ុន សែន។ កាលពីម្សិលមិញ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានបដិសេធមិនធ្វើអត្ថាធិប្បាយអំពីការសន្យាផ្តល់ប័ណ្ណកម្មសិទ្ធិដីរបស់អាជ្ញាធរមូលដ្ឋានទេ ដោយលើកឡើងថា លោកមិនដឹងពីជម្លោះដីធ្លីដ៏អូសបន្លាយនេះទេ៕ សារុន