យោងតាមនគរបាលបានឲ្យដឹងថា បុរសជនជាតិអាល្លឺម៉ង់ម្នាក់បានស្លាប់នៅក្នុងហេតុការណ៍គ្រោះថ្នាក់ចរាចរណ៍មួយនៅក្នុងខេត្តព្រះសីហនុ កាលពីយប់ថ្ងៃអាទិត្យសប្តាហ៍មុន នៅពេលដែលបុរសរូបនោះបានបើកបរម៉ូតូជ្រុលទៅបុករថយន្តមួយគ្រឿង។
នគរបាលបានឲ្យដឹងថា ស្ត្រីជនជាតិអាល្លឺម៉ង់ម្នាក់ ដែលជិះពីក្រោយបុរសរូបនោះ និងស្ត្រីខ្មែរម្នាក់នៅក្នុងរថយន្តដឹកអ្នកដំណើរនោះ បានរងរបួសដោយសារហេតុការណ៍ម៉ូតូបុករថយន្តនេះ ហើយស្ត្រីទាំងពីរនាក់បានសន្លប់រហូតដល់មន្ទីរពេទ្យ គិតត្រឹមល្ងាចម្សិលមិញ។ អ្នកបើកបររថយន្តឈ្មោះ មាស វណ្ណស័ក្តិ អាយុ២៨ឆ្នាំបានរងរបួសក្នុងហេតុការណ៍នោះ។ លោក ព្រំ ពៅ ស្នងការនគរបាលខេត្តព្រះសីហនុ បានឲ្យដឹងថា ស្ត្រីខ្មែរដែលរងរបួសនោះមានឈ្មោះថា ខាត់ រីយ៉ា អាយុ២៧ឆ្នាំ។ យោងតាមលោក ព្រំ ពៅ បានឲ្យដឹងថា រថយន្តដែលដឹកអ្នកស្រី ខាត់ រីយ៉ា បានបត់ឆ្វេងនៅម៉ោងប្រហែល១០យប់ នៅពេលនោះបុរសជនជាតិអាល្លឺម៉ង់ដែលបើកម៉ូតូបានបុកចំផ្នែកចំហៀងនៃរថយន្តដឹកអ្នកដំណើរ។
លោកបានមានប្រសាសន៍ថា បុរសរូបនេះបានបើកម៉ូតូជ្រុលទៅបុកចំហៀងនៃរថយន្តនោះ ហើយស្ត្រីដែលធ្វើដំណើរជាមួយគាត់នោះបានខ្ទាតចេញពីម៉ូតូ។
លោក ព្រំ ពៅ បានឲ្យដឹងថា “ស្ត្រីរូបនេះបានខ្ទាតរំលងរថយន្ត ហើយបានធ្លាក់ទៅលើថ្នល់ និងសន្លប់លែងដឹងខ្លួន។ បច្ចុប្បន្ន អ្នកស្ត្រីកំពុងតែសម្រាកព្យាបាលនៅក្នុងមន្ទីរពេទ្យបង្អែកខេត្តព្រះសីហនុ”។ លោកបានបន្ថែមថា សាកសពបុរសនជនជាតិអាល្លឺម៉ង់កំពុងរក្សាទុកនៅក្នុងគ្លីនិកក្នុងមូលដ្ឋានមួយ ហើយនឹងត្រូវសាច់ញាតិយកទៅធ្វើបុណ្យនៅថ្ងៃនេះ។
អ្នកស្រី ខាត់ រីយ៉ា ត្រូវបាននាំមកកាន់រាជធានីភ្នំពេញ ដើម្បីព្យាបាលរបួស។ ស្ថានទូតអាល្លឺម៉ង់មិនអាចទាក់ទង ដើម្បីធ្វើសេចក្តីអត្ថាធិប្បាយបានទេ៕ ប៊ុននី