នគរបាលបាននិយាយកាលពីម្សិលមិញថា បុរសម្នាក់បានបំផ្ទុះគ្រាប់បែកសម្លាប់ខ្លួននិងឪពុកមាខាងប្រពន្ធរបស់ខ្លួន ហើយក៏បានធ្វើឲ្យប្រពន្ធរបស់ខ្លួននិងម្តាយមីងខាងប្រពន្ធរងរបួសផងដែរ នៅពេលដែលបុរសរូបនេះបានបំផ្ទុះគ្រាប់បែកមួយគ្រាប់បន្ទាប់ពីមានជម្លោះក្នុងគ្រួសារស្ថិតក្នុងស្រុកអន្លង់វែង ខេត្តឧត្តរមានជ័យ កាលពីថ្ងៃច័ន្ទ។
បុរសឈ្មោះ ថៃ រាប អាយុ៣៧ឆ្នាំ មានជម្លោះជាមួយប្រពន្ធរបស់ខ្លួនឈ្មោះ ចាន់ ថេង អាយុ៣៥ឆ្នាំ កាលពីរំលងអធ្រាត្រយប់ថ្ងៃច័ន្ទ ហើយស្ត្រីជាប្រពន្ធបានមកស្នាក់នៅផ្ទះឪពុកមានាងឈ្មោះ ភួក ផា និងស្ត្រីជាម្តាយមីង ឈ្មោះ ណូយ មិញ ក្នុងភូមិ គោកសំពោ ឃុំលំទង។ ប៉ុន្តែប្តីរបស់គាត់បានតាមមកដល់ទីនោះ ហើយក៏មានជម្លោះកើតឡើង។
លោក កែ សំណាន នាយនគរបាលព្រហ្មទណ្ឌស្រុកបានមានប្រសាសន៍ថា “បុរសរូបនេះបានបំផ្ទុះគ្រាប់បែកសម្លាប់ខ្លួន និងឪពុកមាខាងប្រពន្ធរបស់ខ្លួនដោយប្រើគ្រាប់បែកផលិតនៅប្រទេសចិន”នៅម៉ោង១០យប់។ លោក សំណាន បានមានប្រសាសន៍ថា “ហេតុការណ៍នេះគឺដោយសារតែជម្លោះក្នុងគ្រួសារនេះឯង។ ឥឡូវនេះ យើងកំពុងស៊ើបអង្កេតដើម្បីរកឲ្យឃើញថា តើជននេះបានគ្រាប់់បែកនេះពីណាមក”។ លោកបានមានប្រសាសន៍បន្ថែមទៀតថា បុរសឈ្មោះ ថៃ រាប នេះធ្លាប់ធ្វើទាហាន។
លោក សំណាន បានមានប្រសាសន៍ថា អ្នកស្រី ចាន់ ថេង បានរងរបួសធ្ងន់ត្រង់ផ្ទៃមុខ ដងខ្លួន និងជើងស្តាំ ហើយឥឡូវនេះកំពុងសម្រាកព្យាបាលនៅមន្ទីរពេទ្យដោយមានស្ថានភាពធ្ងន់ធ្ងរ ចំណែកឯម្តាយមីងរបស់គាត់ឈ្មោះ ណូយ មិញ ក៏កំពុងសម្រាកព្យាបាលនៅមន្ទីរពេទ្យដែរ ដោយរងរបួសស្រាល។
នេះគឺជាករណីមួយក្នុងចំណោមករណីជាច្រើនដែលគ្រាប់បែកត្រូវគេប្រើជាអាវុធក្នុងពេលមានជម្លោះផងដែរ។
កាលពីខែឧសភា បុរសខកចិត្តម្នាក់ដែលជាអតីតមន្ត្រីនគរបាលដែរនោះ បានគប់គ្រាប់បែកចូលបង្អួចផ្ទះរបស់គ្រួសារមួយនៅខេត្តឧត្តរមានជ័យ បន្ទាប់ពីឪពុកខាងស្រីបានបដិសេធមិនឲ្យខ្លួនរៀបការជាមួយកូនស្រីរបស់គាត់។ ហើយនៅឯពិធីជប់លៀងបុណ្យចូលឆ្នាំចិនក្នុងខេត្តបាត់ដំបងកាលពីខែកុម្ភៈឯណោះវិញ មនុស្ស១៤នាក់បានរងរបួសនៅពេលដែលជនដៃដល់មិនស្គាល់ឈ្មោះម្នាក់បានគប់គ្រាប់បែកចូលក្នុងក្រុមមនុស្ស៕ សារុន