កាលពីម្សិលមិញ ទីភ្នាក់ងារកិច្ចសហប្រតិបត្តិការអភិវឌ្ឍន៍ស្វីស (Swiss Agency for Development Cooperation)ហៅកាត់ថា SDC បានសន្យាផ្តល់មូលនិធិបីលានដុល្លារដល់ប្រទេសកម្ពុជា ដើម្បីជួយបង្កើនបេសកកម្មសម្អាតមីន ដែលនៅសល់ពីជម្លោះប្រដាប់អាវុធអស់រយៈពេលជាច្រើនទសវត្សរ៍។
មូលនិធិទាំងនេះនឹងជួយប្រតិបត្តិការងារ របស់អាជ្ញាធរសកម្មភាពកម្ចាត់មីនកម្ពុជា និងជំនួយសម្រាប់ជនរងគ្រោះ ដែលប្រព្រឹត្តទៅក្រោមកិច្ចសហប្រតិបត្តិការជាមួយគម្រោងអភិវឌ្ឍន៍អង្គការសហប្រជាជាតិ ហៅកាត់ថា CMAA។
លោកស្រី រ៉ាហេល បូអេស (Rahel Boesch) នាយកទីភ្នាក់ងារ SDC បានលើកឡើ់ងនៅក្នុងពិធីចុះហត្ថលេខា ប្រារព្ធនៅការិយាល័យអាជ្ញាធរ CMAA ថា “មូលនិធិនេះនឹងជួយកាត់បន្ថយចំនួនជនរងគ្រោះ និងផ្លាស់ប្តូរការរស់នៅរបស់ជនរងគ្រោះឲ្យមានភាពប្រសើរជាងមុន [និង] ចូលរួមចំណែកក្នុងការបញ្ចេញដីគ្មានគ្រាប់មីន ដែលមានទំហំ៧៥គីឡូម៉ែត្រក្រឡា”។
លោក ជុំប៊ុន រ៉ុង អគ្គលេខាធិការអាជ្ញាធរ CMAA បានឲ្យដឹងថា នៅមានការងារជាច្រើនទៀតដែលត្រូវធ្វើក្នុងការសម្អាតមីនអស់នៅក្នុងប្រទេសនេះ។ លោកមានប្រសាសន៍ ថា “មានដី១.៧០០គីឡូម៉ែត្រក្រឡាទៀត ដែលត្រូវដោះមីនចេញ…ឬក៏នៅសល់១២៤ស្រុកក្នុងចំណោម១៨៥ស្រុក នៅកម្ពុជាហើយកិច្ចការនេះត្រូវការមូលនិធិប្រហែល ៥០លានដុល្លារក្នុងមួយឆ្នាំ”។ គិតរហូតមកទល់ពេលនេះ ប្រទេសកម្ពុជាបានសម្អាតមីន និងយុទ្ធភ័ណ្ឌមិនទាន់ផ្ទុះប្រហែល៣,១លានគ្រាប់៕ សុធា