30 C
Phnom Penh

នគរបាល​ធ្វើតេស្ត​គ្រាប់​កាំភ្លើង​ដែលបាញ់ទៅ​លើ​​​ក្រុមកម្មករ​​​អំឡុងការតវ៉ា

ដោយ ឌឹ ខេមបូឌា ដេលី

បទវិភាគ

លោក ជួន សុវណ្ណ ស្នង​ការ​នគរ​បាល​រាជ​​ធានី​ភ្នំពេញបាន​មាន​ប្រសាសន៍​កាលពី​ម្សិល​មិញ​ថា ​ផ្នែក​មួយ​នៃ​ការ​ស៊ើប​អង្កេត​ពី​ការ​បាញ់​បោះ​លើ​អ្នក​ឈរក្បែរ​​ និងអ្នក​​​តវ៉ា​​​ដែល​គ្មាន​អាវុធ​នៅ​ក្នុង​សង្កាត់​ស្ទឹង​មានជ័យ​កាល​ពីពីរ​សប្តាហ៍កន្លង​មក​នោះ អាវុធ​ដែល​មន្ត្រី​នគរ​បាល​បាន​ប្រើ​ទៅ​​លើការ​តវ៉ា​នោះ នឹង​ត្រូវ​ប្រមូល​ហើយ​យក​ទៅ​ប្រៀប​ធៀប​ជាមួយ​គ្រាប់​កាំភ្លើង​ដែល​វះ​យក​ចេញពី​ខ្លួន​របស់​ជន​រង​​គ្រោះ​។

លោក ជួន សុវណ្ណ បាន​មាន​ប្រសា​សន៍​ថា “យើង​បាន​សរសេរលិខិត​​មួយ​ច្បាប់​ជូន​​នគរ​​បាល​ជាតិ​ឲ្យ​ដក​ហូត​អាវុធ [ពី​នគរបាល] នៅ​ក្នុង​ខណ្ឌ​នីមួយៗ​ ដែល​ប្រើ​ [ទៅ​​​លើ​ការ​តវ៉ា] ដើម្បី​វិភាគ​ និង​ប្រៀប​ធៀប​ជាមួយ​គ្រាប់​កាំភ្លើង​ដែល​យើង​​ទទួល​បាន​ពី​មន្ទីរ​ពេទ្យ​”។ លោក​​ថ្លែងថា “ខ្ញុំ​នឹង​ចំណាយ​​ពេល​វេលា​ ដើម្បី​ធ្វើ​តេស្ត​ទៅ​លើ​គ្រាប់​កាំភ្លើង​ទាំង​នេះ…​ដើម្បី​ស្វែង​រក​យុត្តិ​ធម៌​ជូន​ប្រជា​ពល​រដ្ឋ និង​អាជ្ញាធរ និង​ដើម្បី​រក​ឲ្យ​ឃើញ​​ថា តើ​នគរ​បាល​របស់​​​យើង​ពិតជា​​បានធ្វើ​ឲ្យ​ប្រជា​ពល​រដ្ឋ​រង​​​របួស​​ដោយគ្មាន​បញ្ជាមែន ឬយ៉ាងណា​”។

លោក ជួន សុវណ្ណ បានដឹក​នាំ​ប្រតិ​បត្តិ​ការ​នគរ​បាល​កាល​ពី​ថ្ងៃ​ទី​១២ ខែ​វិច្ឆិកា​បង្ក្រាប​លើ​ក្រុម​កម្មករ​រោង​ចក្រ​កាត់​ដេរអំឡុងការតវ៉ា ដែល​​​​បានធ្វើ​ឲ្យ​អ្នក​ឈរ​ក្បែរនោះ​ម្នាក់​ស្លាប់ ​បុរស​​​​ម្នាក់​ទៀត​ពិការ និង​មនុស្ស​ជា​ច្រើន​ទៀត​រង​របួស​ដោយ​គ្រាប់​កាំ​ភ្លើង​របស់​នគរ​បាល។ រូប​ភាព​វីដេអូ ដែល​គេ​ថត​នៅ​កន្លែង​តវ៉ា​ ហើយ​បាន​បង្ហោះ​នៅលើ​គេហ​ទំព័រ​បណ្តាញ​​ទំនាក់​ទំនង​សង្គម​បង្ហាញ​យ៉ាង​ច្បាស់​ពី​នគរ​បាល​មួយ​ក្រុម​បាញ់​ទៅ​លើ​ក្រុម​អ្នក​តវ៉ា។

ទោះ​ជា​យ៉ាង​ណា លោក ជួន សុវណ្ណ បាន​មាន​ប្រសាសន៍​ថា បើ​ទោះ​ជាមាន​សាក្សីរូប​ថត និង​រូប​ភាព​វីដេអូ បង្ហាញ​យ៉ាង​ច្បាស់​ពី​មន្ត្រី​នគរ​បាល​បាញ់​ទៅ​លើ​ក្រុម​អ្នក​តវ៉ា​ក៏​ដោយ “ក៏​មិន​មាន​តម្រុយ​ណា​មួយ​ដែល​បង្ហាញ​ថា [ កាំភ្លើង ​ដែល​នគរ​បាល​បាន​បាញ់​នោះ] ត្រូវ​បាន​តម្រង់​ដាក់​បាតុករ​នោះ​ដែរ​”។
មាន​ការ​ដាក់​ពាក្យ​បណ្តឹង​ចោទ​ប្រកាន់​លោក ជួន​ សុវណ្ណ ឲ្យ​ទទួល​ខុស​ត្រូវ​ចំពោះ​ការ​បាញ់​បោះ​ និង​ការ​វាយ​ដំ​អ្នក​តវ៉ា និង​អ្នក​ឈរ​ក្បែរ​ពីសំណាក់​មន្ត្រី​នគរ​បាល​ស្ថិត​ក្រោម​ការ​បញ្ជា​របស់​លោក។​ ជន​រង​គ្រោះ​ដោយ​គ្រាប់​កាំភ្លើង​បាន​អះអាង​ថា មន្ត្រី​នគរ​បាលបានទៅ​មើល​ពួកគេ ដើម្បី​វះយក​គ្រាប់​កាំភ្លើង​ចេញ​ពី​ខ្លួន​របស់​ពួក​គេ។

លោក សុក សំអឿន នាយក​ប្រតិបត្តិ​ក្រុម​អ្នក​ច្បាប់​ការ​ពារ​សិទ្ធិ​កម្ពុជា ជា​អង្គការ​ជំនួយ​ផ្នែក​ច្បាប់​ដោយ​មិន​យក​ប្រាក់​កម្រៃ បាន​មាន​ប្រសាសន៍​ថា លោក​មាន​ការ​សង្ស័យ​អំពី​ការ​ស៊ើប​អង្កេតដែលមន្ត្រី​នគរ​បាល​ស៊ើប​​​អង្កេត​​​រឿង​​​ខ្លួន​​​ឯង។ លោក​បាន​មាន​ប្រសាសន៍​ថា ប្រសិ​ន​បើ​ការ​ស៊ើប​អង្កេត​នេះ​មិន​ឯក​រាជ្យ​ វា​ពិបាក​យល់​ថា តើវា​មាន​ប្រសិទ្ធភាព​ឬ​អត់”៕ សារុន

(រាយ​ការណ៍​បន្ថែម​ដោយ Lauren Crothers)

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស