មន្ត្រីនគរបាលបានឲ្យដឹងកាលពីម្សិលមិញថា នគរបាលខេត្តកណ្ដាលមានគម្រោងបើកការស៊ើបអង្កេតលើករណីគ្រោះថ្នាក់ចរាចរណ៍បុកហើយរត់ ដែលបណ្ដាលឲ្យស្ត្រីម្នាក់ស្លាប់ក្នុងស្រុកកៀនស្វាយកាលពីថ្ងៃសុក្រ។ រថយន្តទំនើបមួយគ្រឿងដែលដឹកលោក ជាម យៀប សមាជិកសភាមកពីគណបក្សប្រជាជនកម្ពុជាបានបើករត់ បន្ទាប់ពីបុកជាមួយម៉ូតូរបស់ប្ដីប្រពន្ធវ័យក្មេង ដោយបណ្ដាលឲ្យស្ត្រីជាប្រពន្ធស្លាប់ និងបុរសជាប្ដីរងរបួសធ្ងន់។
លោក វ៉ែន សុវិន ស្នងការរងនគរបាលខេត្តកណ្ដាលបានឲ្យដឹងថា “យើងនឹងទៅនិយាយជាមួយបុរសរងរបួសនិងអ្នកដែលនៅក្នុងហេតុការណ៍នេះ ដើម្បីប្រមូលព័ត៌មានទាំងអស់ ដើម្បីឲ្យយើងអាចធ្វើកំណត់ហេតុពេញលេញមួយ ហើយបញ្ជូនកំណត់ហេតុនេះទៅតុលាការ”។
លោក សុវិន បានថ្លែងបន្តថា “យើងនឹងសួរនាំបុរស ដែលចេញមុខមកទទួលខុសត្រូវជំនួសម្ចាស់រថយន្ត”។ លោកបានមានប្រសាសន៍ដូច្នេះ ដោយសំដៅទៅលើលោក កា សាវុធ មេធាវីរបស់លោក ជាម យៀប ដែលបានទាក់ទងមកអាជ្ញាធរជំនួសមុខឲ្យសមាជិកសភារូបនេះ ហើយបានបង់ប្រាក់ចំនួន១.០០០ដុល្លារទៅឲ្យជនរងគ្រោះ បន្ទាប់ពីគ្រោះថ្នាក់ចរាចរណ៍បានកើតឡើង។
លោកបានបន្ថែមទៀតថា “កំណត់ហេតុនឹងត្រូវបញ្ជូនទៅកាន់តុលាការនៅប្រហែលពីរថ្ងៃក្រោយ។ វានឹងមិនយូរទេ។ នគរបាលខេត្តកណ្ដាលមិនដែលព្រងើយកន្តើយនឹងករណីគ្រោះថ្នាក់ចរាចរណ៍ ដែលបណ្ដាលឲ្យមានអ្នករបួស ឬស្លាប់ឡើយ”។
លោក ជាម យៀប ដែលកាលពីម្សិលមិញមិនអាចទាក់ទងសុំការធ្វើអត្ថាធិប្បាយបានទេ លោកបានបដិសេធថា លោកមិនបានធ្វើអ្វីខុសឡើយនៅក្នុងការបើករត់គេចចេញពីកន្លែងគ្រោះថ្នាក់ចរាចរណ៍ ដែលតាមច្បាប់ចរាចរណ៍តម្រូវឲ្យលោកត្រូវឈប់នោះ។ លោក ជាម យៀប បានលើកឡើងថា លោកអាចនឹងរងគ្រោះថ្នាក់ដោយការប្រើអំពើហិង្សា ប្រសិនបើលោកឈប់នៅកន្លែងគ្រោះថ្នាក់ចរាចរណ៍។
លោកក៏បានអះអាងដែរថា លោកមាន “អភ័យឯកសិទ្ធិ” រួចផុតពីច្បាប់ចរាចរណ៍នេះ ពីព្រោះលោកមិនមែនជាអ្នកបើករថយន្តនោះទេ ហើយលោកក៏បានទូរស័ព្ទហៅមេធាវីរបស់លោកភ្លាមៗឲ្យមកដោះស្រាយរឿងនេះដែរ។
លោក មឿន ថា និងប្រពន្ធរបស់គាត់ឈ្មោះ ពិន សុភា ដែលសុទ្ធតែមានអាយុ២៦ឆ្នាំ រថយន្តលុចស៊ិសរបស់លោក ជាម យៀប បានបើកទៅបុកចំពីមុខម៉ូតូរបស់ជនរងគ្រោះ នៅពេលព្យាយាមបើកជែងរថយន្តធុនធំមួយគ្រឿងតាមផ្លូវជាតិលេខ១ក្នុងឃុំសំរោងធំកាលពីព្រឹកថ្ងៃសុក្រ។ រថយន្តរបស់លោក ជាម យៀប ដែលសាក្សីបានឃើញបង្កើនល្បឿន មិនបានឈប់នោះទេ ទោះបីជាបានបុកម៉ូតូរបស់ប្ដីប្រពន្ធទាំងពីរនាក់រួចអូសប្រហែល៥០ម៉ែត្រពីកន្លែងកើតហេតុក៏ដោយ។
ជនរងគ្រោះជាប្រពន្ធឈ្មោះ ពិន សុភា បានស្លាប់ដោយសាររងរបួសធ្ងន់នៅរសៀលថ្ងៃនោះនៅក្នុងមន្ទីរពេទ្យកាល់ម៉ែតជាទីដែលប្ដីរបស់នាងកំពុងសម្រាកព្យាបាលរបួសបែកប្លោកនាម។ លោក ថា បាននិយាយថា លោកនឹងមិនប្ដឹងលោក ជាម យៀប ទេ ពីព្រោះសមាជិកសភារូបនេះបានបង់ថ្លៃព្យាបាលឲ្យគាត់។ លោកបាននិយាយថា “ខ្ញុំមិនប្ដឹងគាត់ឡើយ ខ្ញុំចង់ឲ្យគាត់ទិញម៉ូតូថ្មីឲ្យខ្ញុំ ពីព្រោះម៉ូតូរបស់ខ្ញុំត្រូវខូចខាតទាំងស្រុងពេលជួបគ្រោះថ្នាក់ចរាចរណ៍”។ លោក ថា បានលើកឡើងថា លោកមិនច្បាស់ទេថា នរណាជាអ្នកខុសនៅក្នុងគ្រោះថ្នាក់ចរាចរណ៍នេះ។ លោកបាននិយាយថា “ខ្ញុំមិនដឹងថា នរណាជាអ្នកត្រូវឬខុសនោះទេ។ ប្រពន្ធរបស់ខ្ញុំបានបាត់បង់ជីវិតទៅហើយ”៕ ស៊ុយឈាង