របាយការណ៍ថ្មីមួយអះអាងថា ទំនាក់ទំនងរវាងអង្គការមិនមែនរដ្ឋាភិបាលជាច្រើននៅក្នុងប្រទេសកម្ពុជានិងរដ្ឋាភិបាលកំពុងតែមានបញ្ហាដោយសារការរារាំងមួយចំនួនរបស់រដ្ឋាភិបាល ដូចជា ការសូកប៉ាន់ នៅពេលដែលចុះបញ្ជីអង្គការក្រៅរដ្ឋាភិបាល ហើយការពិតគឺថា មន្ត្រីទាំងនោះតែងតែមិនអើពើនឹងការផ្តល់អនុសាសន៍របស់អង្គការសង្គមស៊ីវិលឡើយ។
របាយការណ៍ដែលចេញផ្សាយនៅថ្ងៃនេះមានចំណងជើងថា “ ការវាយតម្លៃបរិស្ថានរបស់អង្គការសង្គមស៊ីវិល(Assessment of the Enablinig Environment for Civil Society)” ហើយត្រូវបានចងក្រងដោយគណៈកម្មាធិការសហប្រតិបត្តិការកម្ពុជា ដែលព្យាយាមពង្រឹងទំនាក់ទំនងរវាងវិស័យទាំងពីរនេះ។
គណៈកម្មាធិការសហប្រតិបត្តិការកម្ពុជាបានលើកឡើងនៅក្នុងសេចក្តីថ្លែងការណ៍បន្ថែមពីលើរបាយការណ៍នោះថា រដ្ឋាភិបាលទំនងជា “តាំងចិត្ត” មិនចាត់ទុកអង្គការក្រៅរដ្ឋាភិបាលជាដៃគូទេ បើទោះណាជាអង្គការក្រៅរដ្ឋាភិបាលនាំមកនូវ “ជំនួយ និងសេវាកម្មគិតជាទឹកប្រាក់រាប់រយលានដុល្លារក្នុងមួយឆ្នាំៗក៏ដោយ”។
សេចក្តីថ្លែងការណ៍នេះបានលើកឡើងទៀតថា “ [របាយការណ៍នេះ] លើកឡើងពីឧបសគ្គមួយចំនួនចំពោះប្រតិបត្តិការប្រកបដោយប្រសិទ្ធភាពរបស់ [អង្គការសង្គមស៊ីវិល] មានចាប់ពីបុគ្គលិកក្រសួងដែលស្វែងរកប្រាក់សំណូកនៅក្នុងការចុះបញ្ជីអង្គការក្រៅរដ្ឋាភិបាល រហូតដល់ការយាយីរបស់សមត្ថកិច្ចនគរបាលទៅលើអ្នករៀបចំ និងអ្នកចូលរួមនៅក្នុងការជួបជុំនិងការធ្វើបាតុកម្មតាមផ្លូវច្បាប់”។ សេចក្តីថ្លែងការណ៍នេះបន្តទៀតថា “ការរិះគន់ជាបន្តបន្ទាប់ គឺការចោទប្រកាន់ថា រដ្ឋាភិបាលមិនអើពើនឹងការព្រួយបារម្ភ និងអនុសាសន៍ដែលសង្គមស៊ីវិលបានលើកឡើងពីថ្នាក់មូលដ្ឋាន”។
សេចក្តីថ្លែងការណ៍ដដែលនេះ ក៏បានដកស្រង់សម្តីអ្នកផ្តល់បទសម្ភាសមិនចេញឈ្មោះម្នាក់ដែលនិយាយថា “ វាជាការកម្រណាស់ដែលរដ្ឋាភិបាលគ្មានការប្តេជ្ញាចិត្តធ្វើជាដៃគូជាមួយអង្គការសង្គមស៊ីវិល ដូចជាក្នុងករណីប្រទេសកម្ពុជាជាដើមនេះ”។ បញ្ហាមួយក្នុងចំណោមបញ្ហាដែលបានលើកឡើងនៅក្នុងរបាយការណ៍នេះ គឺសេចក្តីព្រាងច្បាប់របស់អង្គការក្រៅរដ្ឋាភិបាលស្នើឡើង ដែលអង្គការក្រៅរដ្ឋាភិបាល និងអង្គការសិទ្ធិមនុស្សលើកឡើងថា អាចដាក់កម្រិតលើសកម្មភាពរបស់ខ្លួន។ សេចក្តីថ្លែងការណ៍នេះក៏បានបង្ហាញអំពីតម្រូវការឲ្យបង់ “ ថ្លៃសម្របសម្រួល” ឬប្រាក់សំណូកដល់មន្ត្រីរដ្ឋាភិបាល ដើម្បីទទួលបានការចុះបញ្ជីអង្គការទាំងនោះ៕ សារុន