29 C
Phnom Penh

អឺរ៉ុប​ដាក់​បម្រាម​មិន​​​​ឲ្យនាំ​ចូល​គ្រឿង​សមុទ្រ​​​​ពី​​​កម្ពុជា​ដែល​នេសាទ​ខុស​ច្បាប់

ដោយ ឌឹ ខេមបូឌា ដេលី

បទវិភាគ

លោក ហ្សង់ហ្វ្រង់​ស័រ កូតាំង​ (Jean-Francois Cautain) ឯកអគ្គ​រដ្ឋទូត​សហភាព​អឺរ៉ុប​ប្រចាំ​ប្រទេស​កម្ពុជា​បាន​មាន​​ប្រសាសន៍​កាលពី​ម្សិលមិញ​ថា បម្រាម​លើការ​នាំចូល​អាហារ​សមុទ្រ​ពី​កម្ពុជា​​ ដែល​គណៈកម្មការ​អឺរ៉ុប​បាន​ស្នើ​ឡើង​ គឺ​ជា​ការ​ឆ្លើយ​តប​ដោយ​ផ្ទាល់​ទៅ​នឹង​នាវា​លើក​ទង់​ជាតិ​កម្ពុជា​​ដែល​ពាក់​ព័ន្ធ​ក្នុងកា​រ​នេសាទ​ខុស​ច្បាប់​នៅ​ក្នុង​ដែន​សមុទ្រ​អន្តរជាតិ​។

កាលពីថ្ងៃ​អង្គារ​ គណៈកម្មការ​អឺរ៉ុប​បាន​ប្រកាស​ថា  កម្ពុជា​ “មិន​បាន​ធ្វើ​សហ​​​ប្រតិបត្តិ​ការ​ឡើយ​នៅ​ក្នុ​ង​ការ​ប្រយុទ្ធ​ប្រឆាំង​​ការ​នេសាទ​ខុស​ច្បាប់​ដែល​គ្មានការ​ធ្វើ​​សេចក្ដី​រាយ​​ការណ៍ និង​​​​ដែល​​គ្មាន​ការ​គ្រប់​គ្រង​ត្រឹម​ត្រូវ​”។ ប្រទេស​កម្ពុជា​ ​ព្រម​ទាំង​ប្រទេស​បេលី និង​ប្រទេស​​​ហ្គីណេប៊ីស្សូ ដែល​បាន​រង​ការ​ដាក់បម្រាម​នាំចេញ​ត្រី​ពីទីផ្សារ​អឺរ៉ុប​ដែរនោះ​បាន​ទទួល​ការ​ព្រមាន​កាលពីមួយ​ឆ្នាំមុ​​ន​ថា ពួកគេ​ត្រូវ​តែ​ធ្វើ​​ការ​វិវឌ្ឍ​ទៅមុខ​នៅ​ក្នុង​ការ​ដោះ​ស្រាយ​បញ្ហា​នេសាទ​ខុស​ច្បាប់​ ប្រសិន​បើ​មិន​ដូច្នោះទេ ពួកគេ​នឹង​ក្លាយ​ជា​ប្រទេស​ដំបូង​ដែល​រង​ការ​ដាក់​ទណ្ឌកម្ម​ចំពោះ​ការ​មិន​​​អនុវត្ត​​​របស់​ខ្លួន​តាម​ការ​ទាម​ទារ​ឲ្យ​បញ្ចប់ការ​នេសាទ​គ្មាន​ការ​គ្រប់​គ្រង​ត្រឹម​ត្រូវ​។

លោក ហ្សង់ហ្វ្រង់​ស័រ កូតាំង បាន​មាន​ប្រសាសន៍​ថា បញ្ហាស​ម្រាប់​កម្ពុជា គឺ​នាវា​បរទេស​ដែល​លើក​ទង់​ជាតិ​របស់​កម្ពុ​ជា​។ លោក​បាន​លើក​ឡើង​ក្នុង​អុីម៉េល​មួយ​ថា “ ចំណុច​សំខាន់​នៃ​ក្ដី​បារម្ភ​​ដែល​បានឈាន​ដល់​ការ​សម្រេច​​នេះ​ គឺ​កង្វះ​ការ​ចុះ​ឈ្មោះ​ ​ត្រឹម​ត្រូវ ការ​គ្រប់​គ្រង​ ​ប្រព័ន្ធ​ឃ្លាំមើល​​ និង​ប្រព័ន្ធ​ដាក់​ទណ្ឌកម្ម​ដែល​នឹង​ធ្វើ​ឲ្យ​មាន​ការ​គ្រប់​គ្រង​ប្រកប​ដោយ​ប្រសិទ្ធភាព​លើនាវា​នេសាទ​លើក​ទង់​ជាតិ​កម្ពុជា​ និង​កា​រ​ធ្វើ​ប្រតិ​បត្តិការ​នៅ​ក្នុង​សមុទ្រ​អន្តរជាតិ​”។
លោក​បាន​មាន​ប្រសាសន៍​ថា ថ្វីបើ​គណៈ​កម្មការ​អឺរ៉ុប​បាន​ដាក់​បម្រាម​នេះក្ដី​ ក៏​មិន​ធ្វើ​ឲ្យ​ប៉ះពាល់​ដល់​​​ទំនាក់​ទំនង​ពាណិជ្ជកម្ម​រវាង​អឺរ៉ុប​ និង​ប្រទេស​កម្ពុជា​​ដែរ​ ព្រោះ​ប្រទេស​កម្ពុជា​មិន​នាំ​ចេញ​គ្រឿងសមុទ្រ​ទៅ​កាន់​សហ​​​​ភាព​​​​អឺរ៉ុប​នោះ​ឡើយ​។

លោក ណៅ ធួក អគ្គនាយក​រដ្ឋបាល​ជល​ផល​ បានមាន​ប្រសាសន៍​ថា បម្រាម​របស់​អឺរ៉ុប​​​គ្រាន់​តែ​ធ្វើ​ឲ្យ​ប៉ះពាល់​ដល់​កេរ្តិ៍​ឈ្មោះ​​របស់​កម្ពុជា​នៅ​លើ​ឆាក​អន្តរជាតិ​ប៉ុណ្ណោះ​។ លោក​​លើក​ឡើង​ទៀត​ថា ប្រទេស​កម្ពុជា​​​នាំ​ចេញ​​​គ្រឿងសមុទ្រ​ប្រមាណ​២០.០០០​តោន​ទៅ​កាន់​ប្រទេស​មួយ​ចំនួន​ ដូចជា​ វៀតណាម​ ថៃ​ ចិន និង​រុស្ស៊ីជាដើម​។

លោក ណៅ ធួក ក៏បាន​បន្ទោស​បម្រាម​របស់​គណៈកម្មការ​អឺរ៉ុបផង​ដែរ​ថា ​ដោយ​សារ​តែ​កម្ពុជា​ផ្ដល់​ “ទង់​ជាតិ​” ដល់​នាវា​មក​ពី​ប្រទេស​ផ្សេងៗ​។ លោក​បាន​មាន​ប្រសាសន៍​ថា “រឿង​នេះ​ពាក់​ព័ន្ធ​នឹង​ការ​នេសាទ​ខុស​ច្បាប់​​ក្នុង​សមុទ្រ​អន្តរ​ជាតិ។ គ្មាន​នាវា​កម្ពុជា​​ណាមួយ​ធ្វើ​បែ​ប​នេះទេ​​ ប៉ុន្តែ​​នាវា​ដែល​ធ្វើ​បែប​នេះ​គឺ​ជា​នាវា​​​ដែល​លើក​ទង់​ជាតិកម្ពុជា​។ ប៉ុន្តែ​នាវា​ទាំង​នោះ​មិន​ស្ថិត​ក្រោម​ការ​គ្រប់​គ្រង​របស់​យើង​​​ទេ” ដោយ​លោក​បញ្ជាក់​ថា ប្រទេស​កម្ពុជា​មិននាំចេញ​គ្រឿងសមុទ្រ​ទៅកាន់​សហ​ភាព​​​អឺរ៉ុប​នោះ​ឡើយ​។

លោក​ក៏​អះអាង​ដែរ​ថា រដ្ឋាភិបាល​មិន​ទទួល​ខុស​ត្រូវ​ចំពោះការ​លក់​ទង់​ជាតិ​កម្ពុជា​ឲ្យ​ទៅ​នាវា​បរទេស​ឡើយ​ ដោយ​អះ​អាង​ថា ក្រុម​ហ៊ុន​មួយ​របស់​កូរ៉េ​ខាង​ត្បូង​​គឺ​ជា​អ្នក​ទទួល​ខុស​ត្រូ​វ​ចំពោះការ​លក់​ទង់​ជាតិ​នេះ​។ ជាញឹក​ញាប់​ម្ចាស់​នាវា​ជ្រើស​រើស​ប្រើ​ទង់​​ជាតិ​បរទេស​ដើម្បី​ជៀស​វាង​ការ​បង់​ពន្ធ​ និង​កា​រ​អនុវត្ត​តាម​ច្បាប់​នាវាចរណ៍អន្តរជាតិ​។

លោក ណៅ ធួក បាន​មាន​ប្រសាសន៍​ថា លោក​មិន​ដឹ​ង​ថា ក្រសួង​ ឬ​ស្ថាប័ន​រដ្ឋ​ណា​មួយ​​​ជា​អ្នក​ទទួល​ខុស​ត្រូវ​ចំពោះ​ការ​​ចុះបញ្ជី​នាវា​​​របស់​ប្រទេស​កម្ពុជា​នោះទេ។ បន្ទាប់ពី​ប្រទេស​ហុង​ឌូរ៉ាស និង​ប្រទេស​ប៉ាណាម៉ា ប្រទេស​កម្ពុជា​កាលពី​ឆ្នាំ​២០០៩​​គឺ​ជា​អ្នក​លក់​ទង់​ជាតិ​នាវា​​ធំបំផុត​ទី​៣​​ក្នុង​ពិភព​លោក​ដោយ​នាវា​នេសាទ​ចំនួន​១៧៦​គ្រឿង​ ​និង​​​​​​នាវា​រោង​ចក្រ​ធំៗ​ចំនួន​២៤​គ្រឿង​​ត្រូវ​បាន​​​ចុះបញ្ជី​នៅ​ប្រទេស​​កម្ពុជា​​​ នេះ​បើ​យោង​​​តាម​របាយការណ៍​ឈ្មោះ​ “ទម្លាក់​ទង់​​ជាតិ​ចុះ​៖ បញ្ចប់​ការ​ប្រើ​ប្រាស់​ទង់​ជាតិ​បរទេស​ដោយ​នាវា​នេសាទ​ខុស​ច្បាប់​ ដែល​ចុះ​ផ្សាយ​ដោយ​អង្គការ​មូលនិធិ​យុត្តិធម៌បរិស្ថាន​ (Environ-mental Justice Foundation) ដែលមាន​មូល​ដ្ឋាន​ក្នុង​ប្រទេស​អង់​គ្លេស​។

យោង​តាម​របាយការណ៍​នេះ​ នាវា​នានា​ដែល​ចុះ​បញ្ជី​​នៅ​កម្ពុជា​​បាន​បំពាន​ច្បាប់​ព្រំ​ដែន​​សមុទ្រ និង​​ច្បាប់​នេសាទ​អន្តរជាតិ​ ហើយ​​កាលពីពេល​កន្លង​ទៅ​ត្រូវ​បាន​ស៊ើប​អង្កេត​ចំពោះការ​រត់​ពន្ធ​គ្រឿង​ញៀន​ អាវុធ និង​រត់​ពន្ធ​មនុស្ស​។ នៅទូទាំង​ពិភពលោក​នាវា​លើក​ទង់​ជាតិ​បរទេស​ភា​គ​ច្រើន​ជា​នាវា​នេសាទ​​ខុស​ច្បាប់​ ដែល​តាម​ការ​ប៉ាន់​ប្រមាណ​ថា រក​ចំណូល​បាន​​២៣​ពាន់​លាន​ដុល្លារ​ក្នុង​មួយ​ឆ្នាំ និ​ង​​ត្រូវ​បាន​ចោទ​ប្រកាន់​ថា មាន​ការ​កេង​ប្រវ័ញ្ច​​កម្លាំង​​​​ពល​ករ បំពាន​ច្បាប់​ជាតិ និង​អន្តរជាតិ​ ធ្វើ​ឲ្យ​បរិមាណ​ត្រី​ធ្លាក់ចុះ​ ធ្វើ​ប្រតិបត្តិការ​នេសា​ទ​ដោយ​គ្មាន​អាជ្ញាប័ណ្ណ និង​កា​រ​នេសាទ​ក្នុង​តំបន់​ការ​ពារ​។

របាយការណ៍នេះ​បន​្ត​ទៀត​ថា “ ប្រទេស​​​មួយ​ចំនួន​ដំណើរ​ការ ‘ ការ​ចុះបញ្ជី​ដោយ​បើក​​​​ចំហ’ ដែល​អនុញ្ញាត​ឲ្យ​នាវា​បរទេស​លើក​ទង់ជាតិ​របស់​ខ្លួន​ក្នុង​តម្លៃ​តិច​តួច​…។ ប្រទេស​ជា​ច្រើន​ក្នុងចំណោម​ប្រទេស​ទាំ​ង​នេះ​​​​ខ្វះ​ធន​ធាន​ ​ឬ​ឆន្ទៈ​ក្នុង​ការ​ឃ្លាំមើល​ និង​គ្រប់​​គ្រង​នាវា​ដែល​លើក​ទង់​ជាតិ​របស់​ខ្លួន​”។ រហូត​មក​ទល់​ឆ្នាំ​២០០២​ក្រុម​ហ៊ុន Cambo-dian Shipping Corp (CSC) ជា​ក្រុម​ហ៊ុន​ឯក​ជន​មាន​មូ​ល​ដ្ឋាន​នៅ​ក្នុ​ង​ប្រទេស​សិង្ហបុរី​ ជា​អ្នក​គ្រប់​គ្រង​ការ​ចុះ​បញ្ជី​ការ​លក់​ទង់​ជាតិកម្ពុជា ប៉ុន្តែ​ត្រូវ​បាន​រដ្ឋាភិបាល​ដក​ឯក​សិទ្ធិ​នេះវិញ​​​ក្រោយ​ពីមាន​ការ​លាត​ត្រដាង​ថា នាវា​លើក​ទង់​​​​ជាតិកម្ពុជា​មួយ​គ្រឿង​ដែល​ធ្វើ​​​ដំណើរ​​​ទៅកាន់​ប្រទេស​យេម៉ែន ដឹក​​បច្ចេកវិទ្យា​មី​ស៊ីល​​​​របស់​ប្រទេស​កូរ៉េ​ខាង​ជើ​ង​។ ក្នុង​ឆ្នាំដដែល​នោះ​​អាជ្ញាធរ​បារាំង​បាន​រឹប​អូស​ថ្នាំញៀន​កូកាអ៊ីន​នៅ​លើ​នាវា​លើក​ទង់​ជាតិ​កម្ពុជា​មួយ​គ្រឿង​ផ្សេង​ទៀត​។

ប្រតិបត្តិការ​របស់​ក្រុម​ហ៊ុន​ CSC មាន​ទំនាក់​ទំនង​ជាមួយ​នឹង​លោក ខែក រ៉ាវី រដ្ឋ​លេខាធិការ​ក្រសួង​ពាណិជ្ជកម្ម​នាពេល​នោះ ដែល​ទទួល​បាន​ប្រាក់​ប្រចាំខែ​ចំនួន​១៦.៤០០​ដុល្លារ​​ពីការ​ចុះ​បញ្ជី​នាវា​របស់​ក្រុមហ៊ុន​ CSC ជ្រក​ក្រោ​ម​ទង់​ជាតិកម្ពុជា​។ ប្រាក់​ដែល​លោក​ ខែក រ៉ាវី ទទួល​បាន​ មាន​ចំនួន​សរុប​ជិត​១,៥​លាន​ដុល្លារ​​ នៅពេល​រដ្ឋាភិបាល​​ដក​កិច្ច​សន្យា​​​ពីក្រុម​ហ៊ុន CSC វិញ នេះបើ​យោង​តាម​ឯ​ក​សារ​អាន​​ក្នុង​តុលាការ​កាលពី​ឆ្នាំ២០១០។

រដ្ឋាភិបាល​​បាន​ដ​ក​កិច្ច​សន្យា​ពីក្រុម​ហ៊ុន​ CSC​ ប្រគល់​ឲ្យ​ក្រុមហ៊ុនមួយ​ដែល​មាន​ឈ្មោះ​ថា International Ship Registry of Cambodia (ISROC) ដែល​មាន​មូល​ដ្ឋាន​នៅ​ក្នុង​ទីក្រុង​ប៊ូសាន​​ប្រទេស​កូរ៉េ​ខាង​​ត្បូង​ដែល​បាន​បន្ត​ការ​ចុះ​បញ្ជី​នាវា​ឡើង​វិញ​នៅ​ក្នុង​ឆ្នាំ​២០០៣។ ចាប់​តាំ​ងពី​ពេល​នោះ​មក​នាវា​លើក​ទង់​ជាតិ​កម្ពុជា​បាន​ជាប់ពាក់ព័ន្ធ​ជា​ថ្មី​ម្ដង​ទៀត​នៅ​ក្នុង​ឧបទ្ទវហេតុ​​នាវា​ចរ​ណ៍​ជា​ច្រើន​នៅ​ទូទាំ​ង​ពិភព​​លោក​។

ISROC ​មិន​បាន​​ឆ្លើយ​តប​នឹ​ង​សំណើ​​សុំ​​ការ​បំភ្លឺ​ទេ​កាលពី​ម្សិលមិញ​​ ប៉ុន្តែ​ក្រុមហ៊ុន​នេះ​បាន​អួត​នៅ​ក្នុង​គេហទំព័រ​របស់​​ខ្លួន​ថា ខ្លួន​ផ្ដល់​សេវា​ចុះបញ្ជី​ទង់ជាតិ​កម្ពុជា​​ក្នុង​តម្លៃ​ថោក​ និង​គ្មាន​កា​ររឹត​បន្ដឹង​​​។

គេហទំព័រ​របស់​ ISROC ​បាន​លើកឡើង​ថា “ដោយ​ទទួល​បាន​​អត្ថប្រយោជន៍​ដូច​ខាង​លើ​ពី​ទង់​ជាតិ​កម្ពុជា​ ដែល​ផ្ដល់​ជម្រើស​ងាយ​ស្រួល​​ដល់​ម្ចាស់​នាវា​ជាង​ទង់ជាតិ​ផ្សេង​ៗ​ទៀត​នៅ​ក្នុង​ពិភព​លោក​នោះ ISROC ​ធ្វើ​ប្រតិបត្តិការ​ប្រព័​ន្ធ​ចុះ​បញ្ជី​កម្ពុជា​ ដែល​គ្មាន​ការ​រឹ​ត​បន្ដឹង​​​លើ​សញ្ជាតិ​របស់​ម្ចាស់​​នាវា​និង​ទម្ងន់​ផ្ទុក​និង​នាវិក​របស់​នាវា​”។

គេហទំព័រ​នេះ​ក៏​លើក​ឡើង​ដែរ​ថា នាវា​នឹង​​បាត់​បង់​សិទ្ធិ​លើក​ទង់​ជាតិ​កម្ពុជា​ប្រសិន​បើ​ពួក​គេ​ពាក់ព័ន្ធ​នឹង​ការ​រត់​ពន្ធ​អាវុធ​ ថ្នាំ​ញៀន​​ ឬ​ការ​ជួញ​ដូរ​មនុស្ស​។ គេហទំព័រ​នេះ​​មិន​បាន​លើក​ឡើង​ពីការ​នេសាទ​ខុស​ច្បាប់​ទេ​។

កាល​ពី​ឆ្នាំ​២០១២ នៅ​ពេល​នាវា​លើក​ទង់ជាតិ​កម្ពុជា​មួយ​​គ្រឿង​បាន​លិច​នៅ​ឆ្នេរ​សមុទ្រ​ប្រទេស​តួកគី​ លោក ត្រាំ អ៊ីវតឹក រដ្ឋ​មន្ត្រី​ក្រសួង​សាធារណៈ​ការ​និង​ដឹក​ជញ្ជូន​របស់​កម្ពុជា​បាន​មាន​ប្រសាសន៍​ថា ក្រសួង​របស់​លោក​​លែង​​ទទួល​ខុស​ត្រូវ​ចំពោះ​ការ​​ចុះ​បញ្ជី​នាវា​​ដឹក​ទំនិញ​ទៀត​ហើយ​ ពីព្រោះ​ខ្លួន​បាន​ប្រគល់​កា​រ​ងារ​នេះ​ឲ្យ​ទៅ​គណៈ​កម្មា​ធិការ​មួយ​នៅ​ទីស្ដីការ​គណៈរដ្ឋ​មន្ត្រី​។

កាលពី​ម្សិលមិញ​​នៅ​ពេល​សាកសួ​រ​ថា តើ​នរណា​ជា​អ្នក​ទទួល​​ខុស​ត្រូវ​ចំពោះ​កា​រ​ចុះ​បញ្ជី​នាវា​របស់​ប្រទេស​កម្ពុជា​នោះ​ លោក​ ផៃ ស៊ីផាន​ អ្នក​នាំពាក្យ​ទីស្ដីការ​គណៈ​រដ្ឋ​មន្ត្រី​បាន​បង្វែរ​សំណួរ​ទៅ​លោក តាក់រ៉េត​​ សំរេច​ រដ្ឋ​លេខាធិការ​នៃ​ទីស្ដីការ​គណៈរដ្ឋមន្ត្រី​។ តែ​ទោះ​ជាយ៉ាង​ណា​  នៅ​ពេល​ទាក់ទង​​ទៅ​ លោក​ តាក់រ៉ែត សំរេច លោក​បាន​បញ្ជាក់​ថា លោក​​មិន​ដឹង​រឿង​អ្វីទេ​ពាក់ព័ន្ធ​នឹង​ការ​ចុះ​បញ្ជី​នាវា​ឬ​សកម្មភាព​របស់​​ ISROC ​នៅ​ក្នុង​ទីក្រុង​ប៊ូសាន។
លោកបាន​ថ្លែង​​ថា “ប្រហែល​ជា​ក្រសួង​សាធារណៈការ​និង​ដឹក​ជញ្ជូន​ដឹង​ពី​រឿង​នេះ​ មិន​មែន​​ខ្ញុំ​ទេ​។ ខ្ញុំ​មិន​ដឹង​ទេ​ ខ្ញុំ​មិន​ទទួល​ខុស​ត្រូវ​រឿង​នេះ​ទេ​។ នោះ​ជា​ព័ត៌​មាន​ខុស”។

អង្គការ​បរិស្ថាន​ ឈ្មោះ​ Greenpeace បាន​លើក​ឡើង​កាល​ពី​ម្សិលមិញ​ថា ប្រាក់​កម្រៃ​រក​បានពី​​ប្រតិបត្តិការ​​​លក់​ទង់​ជាតិមិន​ច្រើន​ប៉ុន្មាន​ទេ ប៉ុន្តែ​អាច​ជា​ឱកាស​ល្អ​មួយ​សម្រាប់​​ពាណិជ្ជក​រ​។ លោក​ស្រី​ សារី តូលវ៉ាណេន (Sari Tol-vanen) អ្នក​ធ្វើ​យុទ្ធនាការ​របស់​ Greenpeace Oceans បាន​លើកឡើង​នៅ​ក្នុង​អីុម៉េល​​មួយ​ថា “ការ​ចុះ​បញ្ជី​​ទង់​ជាតិ​កម្ពុជា​ត្រូវ​បង់​ប្រាក់​។ ក៏​អាច​​ទទួល​បាន​ប្រាក់​ចំណូល​ផង​ដែរ​ពី​ការ​យក​ពន្ធ​ពី​ផ​ល​នេសាទ​ពី​ការ​ចុះ​បញ្ជី​នេះ​”។
លោក​ស្រី​បាន​មាន​ប្រសាសន៍​ថា “ជា​ធម្មតា​ការ​​ដំណើរ​ការ​គ្រប់គ្រង​ ការ​ចុះ​បញ្ជី​ទង់​ជាតិ​មិន​អាច​រក​កម្រៃ​បាន​ច្រើន​​ប៉ុន្មាន​ទេ ប្រសិនបើ​វា​មាន​ទម្ងន់​ផ្ទុក​ច្រើន​ (រួម​ទាំង​ទំនិញ​) ប៉ុន្តែ​វា​បង្កើត​ឱកាស​ពាណិជ្ជ​កម្ម​សម្រាប់​បុគ្គល”៕សុខុម

(រាយការណ៍​បន្ថែម​ដោយ​ ឃួន ណារីម)

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស