28 C
Phnom Penh

ដំឡើង​​​តួនាទី​​​កូន​​​ស្រី​​​របស់​​​លោកទេសាភិបាល ជា ចាន់តូ ជា​​​អគ្គនាយក​​​ធនាគារ​​​ជាតិ​​​នៃ​​​កម្ពុជា​​​

ដោយ ឌឹ ខេមបូឌា ដេលី

បទវិភាគ

លោក​ស្រី ជា សិរី កូន​ស្រី​របស់​លោក ជា ចាន់តូ ទេសា​ភិបាល​ធនាគារ​ជាតិ​នៃ​កម្ពុជា​ ត្រូវ​បាន​ដំឡើង​តួនាទី​ទៅ​ជា​អគ្គ​នាយក​ធនាគារ​​​កណ្តាល​នេះ នេះ​បើ​តាម​លោក​ស្រី​បាន​អះ​អាង​នៅ​សប្តាហ៍​នេះ។

លោក​ស្រី ជា សិរី នឹង​ជំនួស​តំណែង​ លោក​​ស្រី ងួន សុខា ដែល​បាន​មាន​ប្រសា​សន៍​​ថា លោក​ស្រី​បាន​លាលែង​តំណែង​ពី​ធនា​គារ​​ជាតិ​រយៈ​ពេល​ប្រហែល​មួយ​ខែ​មក​ហើយ​ បន្ទាប់​ពី​លោក​ស្រី​ត្រូវ​បាន​តែង​តាំង​ជា​រដ្ឋ​លេខា​ធិការ​ក្រសួង​សេដ្ឋ​កិច្ច និង​ហិរញ្ញ​វត្ថុ។ មុនពេល​​ត្រូវ​បាន​ដំឡើង​តួនាទី លោក​ស្រី ជា សិរី គឺ​ជា​អគ្គ​នាយក​រង​នៅធនាគារ​ជាតិ​នៃ​កម្ពុជា​។

បន្ទាប់​ពី​អះ​អាង​អំពី​ការ​ដំឡើង​តួនា​ទី​លោក​ស្រី​កាល​ពី​ថ្ងៃ​អង្គារ លោក​ស្រី​ ជា សិរី បាន​បដិសេធ​មិន​ធ្វើ​អត្ថា​ធិប្បាយ​បន្ថែម​អំពី​តួនាទី​ថ្មី​របស់​លោក​ស្រីនៅ​ធនា​គារ​កណ្តាល​នេះ ដែល​គ្រប់​គ្រង​ដោយ​ឪពុក​របស់​លោក​ស្រី​រយៈពេល​យូរ​មក​ហើយ​​នោះទេ​។ យោង​តាម​ព័ត៌​មាន​នៅ​ក្នុង​គេហ​ទំព័រ​បណ្តាញ​ទំនាក់​​​ទំនងអាជីព​ឈ្មោះ Linkedln របស់​លោក​ស្រី​បាន​ឲ្យ​ដឹង​ថា លោក​ស្រី ជា សិរី បាន​បញ្ចប់​ថ្នាក់​បរិញ្ញា​បត្រផ្នែក​គណ​​​នេយ្យ​​​​កាល​ពី​ឆ្នាំ​២០០២ នៅ​សាកល​វិទ្យា​ល័យ Victoria University of Wellington នៅ​ប្រទេស នូវែលសេឡង់ ហើយ​ថា លោក​ស្រី​បាន​បម្រើ​​​​ការ​នៅ​ធនាគារ​​ជាតិ​នេះ​ចាប់​តាំង​ពី​ឆ្នាំ​១៩៩៩​មក​ម៉េ្លះ។

ដោយ​និយាយ​អំពី​អ្នក​ជំនួស​លោក​ស្រី​ជា​អគ្គ​នាយក​ធនាគារ​កណ្តាល​នេះ លោក​ស្រី ងួន សុខា បាន​មាន​ប្រសាសន៍​ថា ទំនាក់​ទំនង​​ឪពុក​និង​កូន​រវាង​លោក​ស្រី ជា សិរី និង​លោក ជា​ ចាន់តូ មិន​សំខាន់​ទេ​ ពីព្រោះ​លោក​ស្រី ជា សិរី គឺ​ជា​អ្នក​ដែល​មាន​ជំនាញ​ក្នុង​ការ​គ្រប់​គ្រង​ធនាគារ​កណ្តាល​​នេះ​។ ខណៈ​ដែល​​សមាជិកជាន់​ខ្ពស់​គណ​បក្ស​ប្រជា​ជន​កម្ពុជា​ជាច្រើន​រូប​ បាន​ចាប់​ផ្តើម​កាត់​បន្ថយ​តួនាទី​របស់​ខ្លួន​ក្នុង​រដ្ឋា​ភិបាល​នោះ​ មាន​​​​លោក ជា ចាន់តូ គឺ​ជា​សមា​ជិក​នៃ​គណៈ​កម្មា​​​ធិការ​កណ្តាល​របស់​គណ​បក្ស​ប្រជា​ជន​កម្ពុជា​​​ជាយូរ​មក​ហើយជា​​​ដើម​នោះ​​ ជា​រឿយៗ​កូនៗ​របស់​ពួូកគេ​​ត្រូវ​បាន​ដំឡើង​តួនាទី​ឲ្យ​កាន់​តំណែង​​ជាន់​ខ្ពស់​នៅ​ក្នុង​រដ្ឋាភិបាល។

លោក ហ៊ុន ម៉ានី ជា​កូន​ប្រុស​របស់​លោក​នាយក​រដ្ឋ​មន្ត្រី​ ហ៊ុន សែន បាន​ក្លាយ​ជា​សមា​ជិក​សភា​មួយ​រូប​ក្នុង​ចំណោម​សមា​ជិក​សភា​ទាំង​៦៨​រូប​របស់​គណ​បក្ស​ប្រជា​ជន​កម្ពុជា បន្ទាប់​ពី​ការ​បោះឆ្នោត​កាល​ពីខែ​កក្កដា។ លោក សាយ​ សំអាល់ ជា​កូន​ប្រុស​របស់​លោក សាយ ឈុំ អគ្គ​លេខា​ធិការ​គណ​បក្ស​ប្រជា​ជនកម្ពុជា​ ត្រូវ​បាន​​តែង​តាំង​ជា​រដ្ឋ​មន្ត្រី​ក្រសួង​បរិស្ថាន​ថ្មី កាល​ពីខែ​កញ្ញា​។ កាលពី​ដើម​ឆ្នាំនេះ លោក សុខ ខាវណ្ណ ក្មួយ​ប្រុស​របស់​លោកឧបនាយក​រដ្ឋ​មន្ត្រី​ សុខ អាន ត្រូវ​បាន​តែង​តាំង​ជា​អគ្គ​លេខា​ធិការ​អាជ្ញាធរ​ប្រេង​កាត​ជាតិ​ផង​ដែរ។

លោក​ស្រី ជូឡុង សូមួរ៉ា សមាជិក​សភា​គណ​បក្ស​ប្រឆាំង​ជា​យូរ​មក​ហើយ ដែល​ធ្លាប់​បាន​បម្រើ​ការ​ជា​ទេសា​ភិបាល​រង​នៃ​ធនាគារ​ជាតិ​នៃ​កម្ពុជា​ក្នុង​ទសវត្សរ៍​ឆ្នាំ​១៩៩០​នោះ បាន​​មាន​ប្រសាសន៍​ថា ដោយហេតុថា លោក​ស្រី ជា សិរី ជា​កូន​ស្រី​របស់​ទេសា​​ភិបាល​ធនាគារ​កណ្តាល​នោះ ដូច្នេះ​មិនគួរ​ផ្តល់​តួនាទី​​នេះ​ដល់​លោក​ស្រី​ឡើយ។

លោក​ស្រី សូមួរ៉ា បាន​លើក​ឡើង​តាម​អ៊ីម៉េល​ថា “បើ​ទោះ​ណា​ជា​លោក​ស្រី ជា​ សិរី មានជំនាញ​ផ្ទាល់​ខ្លួន​ដែល​ខ្ញុំ​មិន​បាន​ដឹង​ក៏​ដោយ ក៏​ដោយហេតុថា លោក​ស្រី​ជា​កូន​ស្រី​​របស់​លោក​ទេសា​ភិបាល​ធនាគារ​កណ្តាល​ដែរ​ ដូច្នេះ​មិន​គួរ​ផ្តល់​តួនាទីនេះ​ដល់​លោក​ស្រីឡើយ” ដោយ​លោកស្រី សូមួរ៉ា​ លើក​ឡើង​​សំដៅ​ដល់​ការ​ប្រកាន់​បក្ស​ពួក​និយម​នៅក្នុង​ការ​តែង​តាំងនេះ ព្រម​ទាំង​បញ្ហា​ទាក់​ទង​ទៅ​នឹង​ជម្លោះ​ផល​ប្រយោជន៍។

លោក​ស្រី​បាន​បន្ថែម​ថា “លោក​ស្រី ជា សិរី គួរ​ធ្វើ​ជា​ប្រធាន​អង្គភាព​រដ្ឋា​ភិបាល​ផ្សេង​វិញ ប្រសិន​បើ​ជំនាញ​របស់​លោក​ស្រី​ស័ក្តិ​សម​នឹង​តួនាទីនោះ។ ករណី​នេះ​បង្ហាញ​ឲ្យ​ឃើញ​ពី​ការ​ចាំបាច់ត្រូវ​អនុម័ត​​ច្បាប់ឲ្យ​បាន​​តឹង​រ៉ឹង​ ដែល​ហាម​ឃាត់​អ្នក​ដែល​មាន​ទំនាក់​ទំនង​គ្រួសារ​ជិត​ស្និទ្ធ​មិន​ឲ្យ​បម្រើ​ការ​ក្នុង​អង្គ​ភាព​រដ្ឋា​ភិបាល​តែ​មួយ​”។ ថ្នាក់​ដឹក​នាំ​គណ​បក្ស​សង្គ្រោះ​ជាតិ​មួយ​ចំនួន​បាន​ចាប់​ផ្តើម​ដំឡើង​តួនាទី​កូន​ៗ​របស់​ខ្លួន​នៅ​ក្នុង​គណ​បក្ស​ប្រឆាំង​ផង​ដែរ​។

លោកស្រី កឹម មុនីវិទ្យា អាយុ​៣៣​ឆ្នាំ ជា​កូន​ស្រី​របស់​លោក កឹម សុខា អនុ​ប្រធាន​គណ​​បក្ស​សង្គ្រោះជាតិ ជា​សមា​ជិក​គណៈ​កម្មា​ធិការ​​អចិន្ត្រៃយ៍​ដែល​មាន​សមាជិក​២៦​រូប​របស់​​បក្ស​សង្គ្រោះជាតិ​ ជា​ស្ថា​ប័ន​កំពូល​ដែល​​មាន​សិទ្ធិ​សម្រេច​​នៅ​ក្នុង​គណ​បក្ស​នេះ​ផង​ដែរ។

លោក សុន ឆ័យ សមាជិក​សភា​ជាន់​ខ្ពស់​គណ​បក្ស​សង្គ្រោះជាតិ​បាន​មាន​ប្រសា​សន៍​ថា “គណ​បក្ស​សង្គ្រោះជាតិ​ត្រូវ​តែ​ទទួល​ស្គាល់​​ថា ប្រសិន​បើ​យើង​រិះ​គន់​គណ​បក្ស​ប្រជាជន​កម្ពុជា យើង​ត្រូវ​ធ្វើ​​ខ្លួន​យើង​ឲ្យ​ស្អាត​ស្អំ​សិន”។ លោក​ សុន ឆ័យ បានមាន​ប្រសាសន៍​​បន្ថែម​ថា “បើ​និយាយ​ពី​កូន​ស្រី​របស់​លោក កឹម សុខា មនុស្ស​មួយ​ចំនួន​បាន​រិះ​គន់ [តួ​នាទី​របស់​លោក​ស្រី] ហើយ​យើង​ចាំ​បាច់​ត្រូវ​ពិនិត្យ​​មើល​បញ្ហា​នោះ​”៕ សារុន​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស