នគរបាលបានឲ្យដឹងថា នគរបាលបានចាប់ខ្លួនជនជាតិវៀតណាមពីរនាក់ និងអ្នកបើកបរជនជាតិខ្មែរនៅប្រហែលពេលថ្ងៃត្រង់កាលពីម្សិលមិញ ក្នុងខេត្តបាត់ដំបង បន្ទាប់ពីបានឆែកឆេររថយន្តរបស់ពួកគេ ហើយរកឃើញថា ពួកគេបានដឹកជញ្ជូនកាំភ្លើងខ្យល់ដែលមានរូបរាងដូចកាំភ្លើងពិតចំនួន៣១ដើម។
លោក សា ថេត ស្នងការនគរបាលខេត្តបាត់ដំបងបានមានប្រសាសន៍ថា “អាវុធដែលផលិតនៅកោះតៃវ៉ាន់ចំនួន៣១ដើមរួមទាំងគ្រាប់ជ័ររាប់រយគ្រាប់ដែលដាក់នៅក្នុងប្រអប់ជាច្រើន ត្រូវបានមន្ត្រីគយចល័តរឹបអូសដោយមានការសហការគ្នាជាមួយនគរបាលស្រុកថ្មគោលតាមផ្លូវជាតិលេខ៥ក្នុងខេត្តបាត់ដំបង”។
លោក សា ថេត និយាយថា ក្នុងចំណោមកាំភ្លើងខ្យល់ដែលបានរឹបអូសទាំងនោះមាន១៨ដើមជាកំាភ្លើងវែង និង១៣ដើមជាកាំភ្លើងខ្លី។ លោកបានបន្ថែមថា នគរបាលក្នុងខេត្តបាត់ដំបងត្រូវបានផ្ដល់ដំណឹងដោយមន្ត្រីគយចល័តនៅតាមព្រំដែនថៃក្នុងក្រុងប៉ោយប៉ែត។
លោក សា ថេត បានមានប្រសាសន៍ “ឥឡូវនេះនគរបាលជំនាញរបស់យើងកំពុងតែដោះស្រាយបញ្ហាអាវុធទាំងនេះរួមទាំងគ្រាប់កំាភ្លើងជ័រផងដែរ ដើម្បីធ្វើរបាយការណ៍ផ្ញើទៅកាន់ក្រសួងមហាផ្ទៃ ឲ្យចេញបទបញ្ជាថា តើយើងគួរតែដោះស្រាយបញ្ហានេះយ៉ាងដូចម្ដេច”។
លោក ចិត្រ វណ្ណនី ស្នងការរងនគរបាលខេត្តបាត់ដំបង់បានលើកឡើងថា នគរបាលកំពុងធ្វើការដើម្បីកំណត់ថា តើកំាភ្លើងខ្យល់ដែលជនសង្ស័យសារភាពថា បានទិញនៅក្នុងប្រទេសថៃ និងត្រូវយកទៅប្រើក្នុងគោលបំណងអ្វី។ លោក ចិត្រ វណ្ណនី បានមានប្រសាសន៍ថា “យើងកំពុងតែសិក្សាអំពីសមត្ថភាពនិងកម្លាំងរបស់អាវុធទាំងនេះ”។ លោក វណ្ណនី បានលើកឡើងថា ជនសង្ស័យកំពុងត្រូវបានឃុំខ្លួននៅស្នងការដ្ឋាននគរបាលខេត្តបាត់ដំបង ដើម្បីរង់ចាំការសាកសួរ៕ ស៊ុយឈាង