តំណាងបណ្តាញសហគមន៍ប្រជាជនព្រៃឡង់ (Prey Long People’s Networ k) បានឲ្យដឹងថា ពួកគេបានចាប់ផ្តើមយុទ្ធនាការល្បាតរបស់ខ្លួននៅព្រៃឡង់ ក្នុងខេត្តព្រះវិហារកាលពីម្សិលមិញ ដើម្បីបញ្ឈប់សកម្មភាពកាប់ព្រៃឈើខុសច្បាប់។
លោក ស្វាយ ភឿន តំណាងបណ្តាញសហគមន៍ប្រជាជនព្រៃឡង់បានឲ្យដឹងថា ប្រជាជន៤០០នាក់មកពីខេត្តស្ទឹងត្រែង កំពង់ធំ និងខេត្តក្រចេះ នឹងធ្វើដំណើរទៅកាន់ស្រុកជ័យសែន ដើម្បីចូលរួមសកម្មភាពល្បាត ដែលគ្រោងនឹងបញ្ចប់នៅថ្ងៃទី១ខែធ្នូ។ លោក ស្វាយ ភឿន បានមានប្រសាសន៍ថា “យើងកំពុងតែអនុវត្តយុទ្ធនាការទ្រង់ទ្រាយធំលើកទី២ ដើម្បីដើរល្បាតនៅទីនេះ ក្នុងគោលបំណងទប់ស្កាត់សកម្មភាពកាប់ព្រៃឈើខុសច្បាប់ ពីព្រោះយើងសម្គាល់ឃើញថា សកម្មភាពកាប់ឈើខុសច្បាប់ បានកើនឡើងទ្វេដង បន្ទាប់ពីរដ្ឋាភិបាលថ្មីត្រូវបានបង្កើតឡើង។
លោកបាន ភឿន មានប្រសាសន៍បន្ថែមថា អ្នកធ្វើយុទ្ធនាការនេះនឹងចាប់ផ្តើមសកម្មភាពល្បាតព្រៃក្នុងថ្ងៃនេះ។ លោកបានមានប្រសាសន៍បន្តថា “យើងបានឃើញរថយន្តបីបួនគ្រឿងដឹកឈើប្រណិតជារៀងរាល់ថ្ងៃ នៅពេលយប់”។
ព្រៃឈើនៅព្រៃឡង់ គ្របដណ្តប់ខេត្តបួន និងស្ថិតក្នុងចំណោមព្រៃរុក្ខជាតិធំបំផុតនៅក្នុងពិភពលោក។ តាំងពីឆ្នាំ២០១១មក សហគមន៍មូលដ្ឋាន ដែលបានបាត់បង់ជំនឿលើអាជ្ញាធរ ក្នុងការទប់ស្កាត់សកម្មភាពកាប់ឈើខុសច្បាប់ បាននិងកំពុងល្បាត នៅតំបន់ផ្សេងៗគ្នា ក្នុងព្រៃដែលមានទំហំ៦៥០.០០០ហិកតា ដោយបានរឹបអូសគ្រឿងសម្រាប់កាប់ឈើ និងបានប្រឈមមុខនឹងក្រុមអ្នកកាប់ឈើ៕ សុធា