28 C
Phnom Penh

អ្នកភូមិ​ចោទ​ប្រកាន់​ក្រុម​ហ៊ុន​រុក​រករ៉ែ​ថា បាន​យក​ដី​របស់​ពួកគាត់នៅក្នុង​ខេត្ត​ព្រះវិហារ

ដោយ ឌឹ ខេមបូឌា ដេលី

បទវិភាគ

អ្នក​ភូមិ​ប្រហែល​៣០០​នាក់​បាន​ធ្វើ​ការ​តវ៉ា​សម្រាប់​ថ្ងៃ​ទី​២នៅ​ឯសាលា​ឃំុ​ក្នុង​មូល​ដ្ឋាន​ស្ថិត​ក្នុង​ខេត្ត​ព្រះ​វិហារ​កាលពី​ម្សិល​​មិញ ប្រឆាំង​នឹង​ក្រុម​ហ៊ុន​រុក​រក​រ៉ែ​មួយ​ដែល​ពួក​គាត់​ចោទ​ប្រកាន់​ថា បាន​គំរាម​ចាប់​យក​ដី​ធ្លី​របស់​ពួក​គាត់​ ប្រសិនបើ​ពួក​គាត់មិន​ព្រម​​ទទួល​យក​សំណើផ្ត​ល់​ប្រាក់​សំណង​ដើម្បី​ទៅ​តាំង​ទី​លំនៅ​ថ្មីទេ​នោះ​​។

ក្រសួង​ឧស្សាហកម្ម រ៉ែ និង​ថាម​ពល​បាន​ផ្តល់​អាជ្ញា​ប័ណ្ណ​រុក​រក​ថ្ម​ម៉ាប​ដល់ក្រុម​ហ៊ុន​ TPBTV Development នៅ​ក្នុង​ឃុំ​រំដោះ ស្រុក​រវៀង កាល​ពីថ្ងៃទី២០ ខែ​វិច្ឆិកា នេះ​បើ​យោង​​​​តាម​ច្បាប់​ចម្លង​នៃ​អាជ្ញា​ប័ណ្ណ​នោះ​។ ជម្លោះ​នេះ​បាន​កើត​ឡើង​បន្ទាប់ពី​ក្រុម​ហ៊ុន​នេះបាន​ព្យា​យាម​ចាប់​យក​ដី​បន្ថែម​ទៀត​​​​នៅ​ក្រៅ​​ព្រំ​ប្រទល់​តំបន់​ដែល​ក្រុម​ហ៊ុន​នេះ​​​ទទួល​បាន​អាជ្ញាប័ណ្ណនោះ។

លោក គួន សុគន្ធ អ្នក​តវ៉ា​ម្នាក់​ក្នុង​ចំណោម​​​​អ្នក​តវ៉ា​ទាំងនោះ​បាន​និយាយ​ថា អ្នក​ភូមិ​ដែល​​​​រង​ផល​ប៉ះ​ពាល់​ចំនួន​២៧៨​គ្រួសារ​បាន​បដិ​​​សេធ​មិន​ទទួល​យក​សំណើ​របស់​ក្រុម​ហ៊ុន​នេះ ដែល​សុំ​ផ្តល់​ប្រាក់​ចំនួន​​១.០០០​ដុល្លារ​ក្នុង​ដី​ទំហំ​មួយ​ហិកតា​ដើម្បី​ឲ្យ​ពួកគា​ត់​​ចាក​​ចេញពី​ដី​របស់​ខ្លួន ហើយ​ថា តំណាង​ក្រុម​ហ៊ុន​បានចាប់ផ្តើម​​ធ្វើ​ការ​គំរាម​ចាប់​យក​ដី​របស់​ពួក​គាត់តែម្ត​ង​​។

លោក សុគន្ធ ដែល​បានធ្វើ​ស្រែ​ចម្ការ​នៅ​លើ​ដី​របស់​លោក​ចាប់​តាំង​ពី​ឆ្នាំ​២០០៥​មក​នោះ បាន​និយាយ​ថា “យើង​បាន​ធ្វើ​ការ​តវ៉ា​នៅ​ថ្ងៃ​នេះ គឺដើម្បី​ទាម​ទារ​ឲ្យ​ក្រុម​ហ៊ុន​​ចាក​ចេញពី​តំបន់​នេះ​ ពីព្រោះ​គម្រោង​រុក​រក​ថ្ម​ម៉ាប​នេះ​នឹង​ធ្វើ​ឲ្យ​ប៉ះ​ពាល់​​ដល់​ការ​ធ្វើ​ស្រែ​ចម្ការ​របស់យើង”។ លោក​បាន​និយាយ​ទៀត​ថា “យើង​ជំទាស់​ដាច់​អហង្ការនឹង​ក្រុម​ហ៊ុន​រុក​រក​ថ្ម​ម៉ាប​នេះ ពីព្រោះ​ការ​ប្រកប​របរ​ចិញ្ចឹម​ជីវិ​ត​​របស់​ប្រជា​ជនគឺ​​ពឹង​ផ្អែក​លើ​ការ​ធ្វើ​ស្រែ​ចម្ការ​របស់​ខ្លួន​​​នេះឯង​”។

លោក សំ ភារៈ ជា​មេឃុំ​នេះ​បាន​មាន​ប្រសា​សន៍​អំពី​ការ​តវ៉ា​កាល​ពី​ម្សិល​មិញ​នៅ​មុខ​សាលា​ឃំុ​របស់លោកថា ជា​ថ្ងៃ​ទី២​ហើយ ចាប់​តាំង​ពី​ថ្ងៃ​អាទិត្យ​មក។
លោក​បាន​មាន​ប្រសាសន៍​ថា “ ខ្ញុំ​គិត​ថា ក្រុម​ហ៊ុន​នេះ​នឹង​ធ្វើ​ឲ្យ​ប៉ះ​ពាល់​ដល់​គ្រួ សារ​ទាំងនោះ​​ដែល​មាន​ដី​សម្រាប់​ធ្វើ​ស្ រែ​ចម្ការ ​ប្រសិន​បើ​ថ្នាក់​លើមិន​រក​ដំណោះ​ស្រាយ​ជូន​ពួក​គាត់​ទេ​នោះ​”។

អ្នក​ស្រី កឹម សុភិន នាយិកា​ក្រុម​​ហ៊ុន​ TPBTV បាន​អះ​អាង​ថា អ្នក​ស្រី​ទទួល​បាន​អាជ្ញា​ប័ណ្ណ​រុក​រក​ថ្ម​ម៉ាប​នេះ កាល​​ពី​ពេល​ថ្មីៗ​នេះ ប៉ុន្តែ អ្នក​ស្រី​បាន​មាន​ប្រសាសន៍​ថា វិវាទ​ដី​ធ្លី​នេះ​មិនពាក់​ព័ន្ធ​នឹង​អ្នក​ស្រី​ទេ។ មុនពេល​បដិសេធ​មិន​ធ្វើ​អត្ថា​ធិប្បាយ​​បន្ថែម​ អ្នក​ស្រី​បាន​មាន​ប្រសាសន៍​ថា “ខ្ញុំ​មិន​ដឹង​ថា តើ​ត្រូវ​ស្វែង​រក​ដំណោះ​ស្រាយ​ជូន​អ្នកភូមិទាំង​នេះ​ដូច​ម្តេច​ទេ ពីព្រោះ​ក្រសួង​បាន​ផ្តល់​ដី​នេះ​ដល់​ក្រុម​ហ៊ុន​របស់​ខ្ញុំ” ហើយ​អ្នក​ស្រី​បាន​បង្វែ​រសំណួរ​ទៅ លោក ស៊ិន ញ៉ ជា​ប្រធាន​​គ្រប់​គ្រង។

លោក ស៊ិន ញ៉ បាន​អះ​អាង​ថា ក្រុម​ហ៊ុន​បាន​ផ្តល់​ប្រាក់​ចំនួន​១.០០០ដុល្លារ​ក្នុង​ដី​ទំហំ​មួយ​ហិកតា ដើម្បីទទួល​បាន​ដី​នេះ​ដែល​ស្ថិត​នៅ​ក្រៅ​តំបន់​ដែលទទួល​បាន​អាជ្ញា​ប័ណ្ណ​ទំហំ​៩.០០០​ហិកតានោះ ប៉ុន្តែ​លោក​បាន​បដិសេធ​ថា អ្នក​ភូមិ​ដែលជា​ម្ចាស់​ដី​មិន​ត្រូវ​បាន​បង្ខិត​បង្ខំ​ឲ្យ​ទទួល​ប្រាក់​ទាំង​នេះ​ទេ។
លោក​បាន​មាន​ប្រសាសន៍​ថា “យើង​មិន​ប្រើ​ពាក្យ​ថា ‘ទិញ​’ ទេ ប៉ុន្តែ យើង​មាន​គម្រោង​​​​ផ្តល់​ប្រាក់​សំណង​ចំនួន​១.០០០​ដុល្លារ​។ ប៉ុន្តែ​​​​យើង​អាច​ផ្តល់​ប្រាក់ក្នុង​​ចំនួន​១.៥០០​ដុល្លារ​​​បាន​​បន្ទាប់​ពី​ការ​ចរចា​ជាមួយ​អ្នក​ភូមិនោះ​”។

លោក គង់ មករា ដែល​ជា​ប្រធាន​មន្ទីរ​ឧស្សាហកម្ម​ រ៉ែ និង​ថាម​ពល​នៅ​ខេត្ត​នេះ​បាន​មាន​ប្រសាសន៍​ថា លោក​នឹង​ស្នើ​ទៅ​រដ្ឋា​ភិបាល​ឲ្យ​ធ្វើ​អន្តរា​គមន៍ដើម្បី​​ដោះ​ស្រាយ​ជម្លោះ​នេះ៕ សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស