29 C
Phnom Penh

សាលាដំបូងរាជ​ធានី​ភ្នំពេញ​បើក​សវនា​ការ​កាត់​ក្តី​ជន​ជាតិ​បារាំង​​​ម្នាក់​ដែល​​រួមភេទ​ជាមួយ​កុមារ

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ សាលា​ដំបូង​រាជ​ធានី​ភ្នំពេញ​បាន​បើក​សវនាការ​កាត់​ក្តី​​ជន​ជាតិ​បារាំង​ម្នាក់​ឈ្មោះ ម៉ាសែល ម៉ូរីន អាយុ​៥៨​ឆ្នាំ​ ​ជា​ជន​រួម​ភេទ​ជាមួយ​កុមារ​ដែល​បាន​​ទាម​ទារ​ឲ្យ​តុលាការបើក​សវនាការ​កាត់​ក្តី​ឡើង​វិញ បន្ទាប់ពី​ត្រូវ​បានផ្ត​ន្ទា​ទោស​កំបាំង​មុខ​ឲ្យ​ជាប់​ពន្ធនាគារ​​រយៈ​ពេល​១៨ខែ​កាលពី​ខែ​កុម្ភៈ​ពី​បទ​ឲ្យ​លុយ​​ក្មេង​ប្រុស​បីនាក់​​ដើម្បី​រួម​ភេទ​ កាល​ពី​ឆ្នាំ​២០០៧។

លោក ជា សុខឃាង ចៅ​ក្រម​ប្រ​ធាន​ក្រុម ​ប្រឹក្សា​ជំនុំ​ជម្រះ​បាន​មាន​ប្រសា​សន៍​ថា​ កាល​ពី​ខែ​មករា សាលា​ដំបូង​រាជ​ធានី​ភ្នំពេញ​​​បាន​ចោទ​ប្រកាន់​ ម៉ូរីន កំបាំង​មុខ​ពី​បទ​​ឲ្យ​លុយ​​ក្មេង​ប្រុស​​ទាំង​នេះ​ដែល​មាន​​អាយុ​​ចន្លោះ​ពី​១៤ឆ្នាំ​ដល់​១៥ឆ្នាំ​ក្នុង​ម្នាក់​​១០​ដុល្លារ ដើម្បី​​រួម​ភេទ​ជាមួយ​ខ្លួន​នៅ​ផ្ទះ​សំណាក់​មួយ​ក្នុង​ខណ្ឌ​ទួល​គោកកាល​ពី​ឆ្នាំ​២០០៧។

លោក​ចៅ​ក្រម សុខឃាង បាន​​មាន​ប្រសា​សន៍​ថា “តុលាការ​បាន​រក​ឃើញ​ថា គាត់​មាន​ពិរុទ្ធ​ភាព​កាល​ពី​ខែ​កុម្ភៈ ហើយ​បាន​ផ្តន្ទា​ទោស​ឲ្យ​ជាប់​ពន្ធនាគារ​រយៈ​ពេល​១៨​ខែ ប៉ុន្តែ បុរស​រូប​នេះ​បាន​ច្រាន​ចោល​សាល​ក្រម​នោះ”។ លោក​បាន​បន្ថែម​ថា ម៉ូរីន មិនបាន​ចូល​​រួម​សវនាការ​កាត់​ក្តី​ទេ ពី​ព្រោះ​​នៅ​ពេល​នោះ គាត់​បានបញ្ចប់ការ​​អនុវត្ត​ទោស​ជាប់​ពន្ធនា​គារ​រយៈពេល​មួយ​ឆ្នាំ​នៅក្នុង​ខេត្ត​សៀម​រាប​ ពីបទ​​​បំពាន​​ផ្លូវ​ភេទ​​ក្មេង​ប្រុស​ប្រាំ​នាក់​នៅទីនោះ​កាល​ពី​ឆ្នាំ​មុន។

លោកស្រី សំ សូនី មេធាវី​តំណាងជន​រង​គ្រោះ​បាន​ប្រាប់​តុលាការ​កាល​ពី​ម្សិល​មិញ​ថា ដោយ​សារ​ ម៉ូរីន បានឲ្យ​​លុយក្មេង​ប្រុស​ទាំង​នេះ​ដើម្បី​រួម​ភេទនោះ​ គាត់​គួរ​ត្រូវ​បាន​ចោទ​ប្រកាន់​ពីបទ​ទិញ​ពេស្យា​ចារ​កុមារ​វិញ។ លោកស្រី សំ សូនី បាន​មាន​ប្រសា​សន៍​ថា “ខ្ញុំ​ស្នើ​ឲ្យ​តុលាការ​ប្តូរ​បទ​ចោទ​ប្រកាន់​ពី​បទ​រំលោភបំពាន​​ផ្លូវ​ភេទ​ទៅ​ជា​ការ​ទិញ​ពេស្យា​ចារ​កុមារ​វិញ ហើយ​និរទេស​បុរស​រូប​នេះ​ចេញ​ពី​ប្រទេស​កម្ពុជា​ [បន្ទាប់​ពី​​បុរសរូប​នេះ​បញ្ចប់ការ​​អនុវត្ត​ទោស​ជាប់​ពន្ធនាគារ​រួច​​]”។

លោក ឌុន វិបុល មេធាវី​តំណាងជន​ជាតិ​បារាំង​រូប​នេះ​បាន​លើក​ឡើង​ថា មិន​មាន​ភ័ស្តុ តាង​គ្រប់​គ្រាន់​ដើម្បី​គាំទ្រ​​​ការ​​ចោទ​ប្រកាន់​ពី​បទ​ទិញ​ពេស្យា​ចារ​កុមារ​ទេ។​​ ការ​ចោទ ​ប្រកាន់​ពីបទ​ទិញ​ពេស្យា​ចារ​កុមារ​មាន​ទោស​​ធ្ងន់ជាង គឺ​​ត្រូវ​មាន​ទោស​ជាប់​ពន្ធនាគារ​រហូត​ដល់​១៥​ឆ្នាំ។ តុលាការ​នឹង​ប្រកាស​សាល​ក្រម​នៅ​ថ្ងៃទី​១២​ ខែ​ធ្នូ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស