30 C
Phnom Penh

មន្ត្រី​យោធា​បដិសេធ​ថា​មិន​បាន​ទទួល​សំណើ​​​​​ពី​​​មន្ត្រី​​​រដ្ឋាភិបាល​​​ឲ្យ​ពិនិត្យមើល​អត្ថបទកាសែត​

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់​ខ្ពស់​នៅ​តុលាការ​យោធា និង​ក្រសួង​កា​រ​ពារ​ជាតិ​បាន​លើក​ឡើង​កាល​ពី​ម្សិល​មិញ​ថា ពួក​គេ​មិន​បាន​ទទួល​សំណើ​ពី​លោក ផៃ ស៊ីផាន​ រដ្ឋលេខាធិការ​​ទី​ស្តីការ​គណៈរដ្ឋ​មន្ត្រី​ឲ្យ​ស៊ើប​អង្កេត​អត្ថ​បទ​ដែល​ចុះ​ផ្សាយ​នៅក្នុង​កាសែត​ប្រឆាំង​ទេ។

កាល​ពី​ថ្ងៃ​ច័ន្ទ លោក ផៃ ស៊ី​ផាន បាន​មាន​ប្រសាសន៍​ថា លោក​បាន​ដាក់​ពាក្យ​បណ្តឹង​ទៅ​តុលា​ការ​យោ​ធា​ឲ្យ​ស៊ើប​អង្កេត​អត្ថ​បទ​មួយ​នៅក្នុង​កាសែត​មនសិការ​ខ្មែរ​ដែល​បាន​ចុះ​ផ្សាយ​អំពី​បទ​សម្ភាស​របស់​លោក កឹម សុខា ​​​អនុ​ប្រធាន​គណបក្ស​សង្គ្រោះ​​ជាត​ិ​អំឡុង​​​​ពេល​លោក​ធ្វើ​ដំណើរ​ទៅ​ជួប​ជាមួយ​ពល​​​រដ្ឋ​​​ខ្មែរ​រស់នៅ​ទីក្រុង​ម៉ែល​​ប៊ន ប្រទេស​អូស្ត្រាលី​​​កាល​ពី​ខែ​មុន​។

លោក កឹម សុខា បាន​លើក​ឡើង​នៅក្នុង​បទ​សម្ភាស​ថា យោធា​បាន​ធ្វើ​អន្ត​រា​គមន៍​នៅ​យប់​​​​នៃ​​​ថ្ងៃ​​​បោះ​ឆ្នោត​ជាតិ​កាលពី​ថ្ងៃទី​២៨​ ខែ​កក្កដា ​ដើម្បី​ “ប្លន់” ជ័យ​ជម្នះ “របស់គណ​បក្ស​សង្គ្រោះ​ជាតិ​ក្នុង​ការ​បោះ​ឆ្នោត​​​នេះ​​​​​”។ លោកឧត្ត​ម​សេនី​យ៍ទោ ប៉ោក ប៉ន អនុ​ប្រធាន​តុលាការ​យោ​ធាបាន​មាន​ប្រ​សា​​សន៍​ថា លោក​មិន​បាន​ទទួល​ពាក្យ​បណ្តឹង​ពី​លោក ផៃ​ ស៊ីផាន​ ទេ។ ដោយ​បដិសេធ​មិន​ឆ្លើយ​សំណួរ​បន្ថែ​ម លោកឧត្តម​សេនីយ៍ទោ ប៉ោក​ ប៉ន បាន​មាន​ប្រសាសន៍​ថា “ខ្ញុំ​មិន​បានទទួល​ពាក្យ​បណ្តឹង​ណាមួយ​ពាក់ព័ន្ធ​ករណី​នេះ​​ទេ”។

លោកឧត្តម​សេនីយ៍ឯក សំ វណ្ណថា អគ្គ​លេខាធិការ​នៃអគ្គលេខាធិការ​ដ្ឋាន​ក្រសួង​ការ​ពារ​ជាតិ​ និង​លោកឧត្តម​សេនីយ៍ទោ​​ ប៉ាង ធារ៉ូ ប្រធាន​នាយក​ដ្ឋាន​កិច្ច​ការ​រដ្ឋ​បាល​នៅ​ក្រសួង​នេះក៏បាន​មាន​ប្រសា​សន៍​ផង​ដែរ​ថា លោក​​ទាំងពីរ​​មិន​បាន​ទទួល​ពាក្យ​បណ្តឹង​ទេ។ លោកឧត្ត​ម​សេនីយ៍ទោ ម៉ម សុផាត​ ប្រធាន​​​​​នាយក​ដ្ឋាន​នីតិកម្មនៃក្រសួង​នេះ​បាន​​​មាន​ប្រសាសន៍ថា លោក​ទើ​បតែ​បាន​ឮ​ពាក្យ​បណ្តឹង​របស់​លោក​ ផៃ​ ស៊ីផាន​ តាមរយៈ​ ប្រព័ន្ធ​ផ្សព្វ​ផ្សាយ​​ព័ត៌មាន​ប៉ុណ្ណោះ​។ លោក​បាន​មាន​​ប្រសាសន៍ថា “ខ្ញុំ​មិន​បាន​ឃើញ​ឬ​ទទួលបាន​ឯកសារ​ណាមួយ​ឡើយ”​។

លោក ផៃ ស៊ីផាន បាន​បដិសេធ​មិន​ចេញ​​ឈ្មោះ​អ្នក​​​ដែល​​​លោក​​​​បាន​បញ្ជូន​ពាក្យ​បណ្តឹង​​​​របស់​លោក​​​ទៅ​​​ឲ្យ​​​ចំៗនោះ​​​​ទេ ហើយ​បាន​មាន​ប្រសា​សន៍ថា វាគ្មាន​អ្វី​ចម្លែក​ទេ​ដែល​គ្មាន​នរណា​ម្នាក់​នៅ​ក្រសួង​ការ​ពារ​​​ជាតិ​ដឹង​ពី​រឿង​នេះ​នោះ។ លោក​​​បាន​​​មានប្រសាសន៍ថា “ពួកគេ​​​មិន​​​ធ្វើ​​​ការ​​​នៅ​​​ក្នុង​​​ការិយាល័យ​​​របស់​​​ខ្ញុំទេ ពួក​​​គេ​​​មិន​​​មែន​​​ជា​​​បុគ្គលិក​​​ខ្ញុំទេ ដូច្នេះ​​​ពួក​​​គេ​​​មិន​​​ដឹង​​​ទេ​​​”។ លោក​​​បន្ថែមថា ព័ត៌មាន​​​នេះ​​​ជា​​​ព័ត៌​​​មាន​​​សម្ងាត់​​​។

លោក ផៃ​ ស៊ីផាន បាន​មាន​ប្រសា​សន៍​ថា “ខ្ញុំ​ជា​មន្ត្រី​​ក្នុង​ជួរ​រដ្ឋាភិបាល ហើយ​ព័ត៌​មាន​នេះ​ជា​របស់​រដ្ឋាភិបាល។ សូម​​អត​់ធ្មត​់​ តុលាការ​​​​នឹង​បកស្រាយ​បញ្ហានេះ”។ ពេល​​​សួរ​ថា ហេតុអ្វី​បាន​ជា​លោក ក្នុង​នា​ម​​​ជា​មន្ត្រី​ម្នាក់​នៅ​ទីស្តីការ​គណៈ​រដ្ឋ​មន្ត្រី​​បាន​ចាប់​អារម្ម​ណ៍​​​ដោយ​ផ្ទាល់​ក្នុង​ការ​​បញ្ជាក់​ពី​អត្ថ​ន័យ​នៃ​អត្ថបទ​កាសែត​​នោះ លោក ផៃ ស៊ីផាន បាន​មាន​ប្រសា​សន៍ថា លោក​ក៏មាន​តួនាទី​ជា​ប្រធា​ន​​ប្រតិបត្តិ​ការ​ “អង្គភាព​អន្តរ​ក្រសួង​ទទួល​បន្ទុក​ព័ត៌មាន​ពី​សមរភូមិ​ដែរ”។

លោក​បាន​មានប្រសាសន៍ថា “អង្គ​ភាព​នេះ​ស្ថិត​ក្រោម​ក្រសួង​មហាផ្ទៃ ហើយ​បង្កើត​ ឡើងដោយ​ សម្តេច​តេជោ ហ៊ុន​ សែន នាយក​​​​រដ្ឋ​មន្ត្រី ហើយ​មាន​ការិយា​ល័យ​ក្នុង​ទីស្តីការ​គណៈរដ្ឋ​ម​ន្ត្រី”។ លោក​បាន​មាន​ប្រសាសន៍ទៀត​ថា “ខ្ញុំជា​អនុប្រធាន​អចិន្ត្រៃយ៍នៃ​អង្គភាព​នេះ ហើយ​​ការ​ងារ​របស់​អង្គភាពនេះ​ច្បាស់​លាស់​​ណាស់ ​​​គឺត្រូវ​មើល​ព័ត៌មាន​ទាំង​អស់​ពាក់​ព័ន្ធ​យោធា និង​ការពារ​កង​កម្លាំង​សន្តិ​សុខ​​ជាតិ”។

លោក ផៃ ស៊ីផាន បាន​លើក​ឡើង​ពី​ការ​ប្រមូល​ព័ត៌មាន​យោធា “ក្នុង​ករណី​មាន​ជម្លោះ​ ប្រដាប់​អាវុធ​ជាមួយ​ប្រទេស​ថៃ” ជា​ផ្នែក​មួយ​នៃ​អំណាច​ដែល​លោ​កនាយក​រដ្ឋមន្ត្រី​បាន​ប្រគល់​ឲ្យ​អង្គភាព​របស់​លោក។ លោក​បាន​មាន​ប្រសាសន៍ថា “អង្គ​ភាព​នេះ​ត្រូវ​ធ្វើការ​ជាមួយ​កម្លាំង​យោធា ហើយ​មាន​មន្ត្រី​យោធា​ម្នាក់​ ពីរនាក់​ ឬ​បីនាក់​អង្គុយ​នៅក្នុង​ការិយាល័យ​របស់​ខ្ញុំ។​ទំនាក់​ទំនង​​​​ផ្នែក​​​​​​ប្រព័ន្ធ​ផ្សព្វផ្សាយ​រវាង​កម្លាំង​ប្រដាប់​អាវុធ​ និង​អង្គភាព​របស់​​ខ្ញុំ និង​​​អ្នក​​​​ឃ្លាំមើល​​​​ប្រព័ន្ធ​​​​​ផ្សព្វផ្សាយ​​​ទាក់​ទង​នឹង​សន្តិសុខ​ជាតិ”៕ ​​​សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស