បុរសម្នាក់ដែលត្រូវបានកាត់ឲ្យជាប់ទោសកំបាំងមុខ និងត្រូវបានចាប់ខ្លួនកាលពីដើមឆ្នាំនេះ ពីបទសម្លាប់ប្រធានសហជីពរោងចក្រកាត់ដេរមួយកាលពីឆ្នាំ២០០៧នោះ បានបង្ហាញខ្លួននៅតុលាការលើកដំបូងកាលពីម្សិលមិញ ដើម្បីបញ្ជាក់ពីភាពគ្មានទោសរបស់ខ្លួន។
លោក ចាន់ សុផុន អាយុ៣៥ឆ្នាំ ព្រមទាំងលោក ឡុង វណ្ណៈ អាយុ៣៥ឆ្នាំដែរ បានរត់គេចខ្លួនពេលដែលលោកត្រូវបានតុលាការផ្តន្ទាទោសឲ្យជាប់ពន្ធនាគាររយៈពេល១៨ឆ្នាំ កាលពីខែមីនា ឆ្នាំ២០១២ ពីបទសម្លាប់លោក ហ៊ី វុទ្ធី ប្រធានសហជីពសេរីកម្មករ នៅរោងចក្រសាន់តិចក្នុងរាជធានីភ្នំពេញ ដែលត្រូវបានបាញ់សម្លាប់កាលពីខែកុម្ភៈ ឆ្នាំ២០០៧។
នគរបាលបានចាប់ខ្លួន លោក សុផុន បន្ទាប់ពីលោកត្រូវបានកំណត់អត្តសញ្ញាណខណៈដែលធ្វើដំណើរមកកាន់រាជធានីភ្នំពេញដើម្បីមកសួរសុខទុក្ខម្តាយរបស់លោកកាលពីខែកុម្ភៈ។ លោក វណ្ណៈ កំពុងរត់គេចខ្លួននៅឡើយ។ លោក សុផុន បានបង្ហាញខ្លួននៅសាលាដំបូងរាជធានីភ្នំពេញកាលពីម្សិលមិញបន្ទាប់ពីលោកបានប្តឹងទៅតុលាការនេះជំទាស់នឹងសាលក្រមផ្តន្ទាទោសលោក។នេះគឺជាលើកទី១ហើយដែលលោកអាចមកបញ្ជាក់ដោយផ្ទាល់ពីភាពគ្មានទោសរបស់ខ្លួន។
លោក សួស សំអាត ចៅក្រមប្រធានក្រុមប្រឹក្សាជំនំុជម្រះបានប្រាប់លោក សុផុន ថា “យើងចង់ឲ្យលោកបញ្ជាក់អំពីរឿងនេះ ពីព្រោះសាក្សីបានប្រាប់តុលាការថា លោកបានជាប់ពាក់ព័ន្ធនឹងអំពើមនុស្សឃាតនេះ”។
លោក សុផុន បាននិយាយថា លោកបានស្គាល់ លោក ហ៊ីវុទ្ធី ជាសកម្មជនសហជីពដ៏ឆ្នើមនៅរោងចក្រកាត់ដេរសាន់តិច ជាកន្លែងដែលលោក សុផុន ធ្វើការ ប៉ុន្តែ បានបដិសេធថា លោកមិនពាក់ព័ន្ធនឹងអំពើមនុស្សឃាតនេះទេ។ លោក សុផុន បានប្រាប់តុលាការថា “ខ្ញុំមិនបានសម្លាប់លោក ហ៊ី វុទ្ធី ទេ ហើយខ្ញុំមិនដឹងថានរណាបានសម្លាប់គាត់ឡើយ”។ លោកបានបន្ថែមថា “ខ្ញុំទើបតែដឹងថា គាត់ត្រូវគេសម្លាប់នៅពេលដែលនគរបាលចាប់ខ្លួនខ្ញុំប៉ុណ្ណោះ”។
លោកចៅក្រម សំអាត បានអានចម្លើយរបស់សាក្សីដែលនិយាយថា លោក សុផន និងលោក ហ៊ី វុទ្ធី មានជម្លោះពាក្យសម្តីមុនពេលមានការសម្លាប់នេះបន្តិច ព្រមទាំងចម្លើយពីសាក្សីម្នាក់ដែលបានអះអាងថា បានឃើញលោក សុផុន មានកាំភ្លើងខ្លីម៉ាក K-59 មួយដើម ហើយអាវុធនោះត្រូវប្រើដើម្បីបាញ់សម្លាប់លោក ហ៊ី វុទ្ធី នៅព្រឹកនៃថ្ងៃធ្វើឃាតនោះឯង។ លោកចៅក្រម សំអាត បានមានប្រសាសន៍ថា លោកនឹងកោះហៅសាក្សី និងនគរបាលដែលពាក់ព័ន្ធនៅក្នុងការស៊ើបអង្កេតបឋម និងការបើកសវនាការកាត់ក្តីដើម្បីសាកសួរបន្ថែមពាក់ព័ន្ធករណីនេះ។
បុរសពីរនាក់ជិះម៉ូតូមួយគ្រឿងបានបាញ់សម្លាប់លោក ហ៊ី វុទ្ធី នៅវេលាព្រឹកព្រលឹម ខណៈដែលលោក ហ៊ី វុទ្ធី កំពុងធ្វើដំណើរត្រឡប់មកផ្ទះរបស់លោកវិញបន្ទាប់ពីចេញពីធ្វើការវេនយប់។ ឃាតកម្មនេះបានកើតឡើងក្នុងរយៈពេលបួនឆ្នាំ បន្ទាប់ពីការសម្លាប់លោក ជា វិជ្ជា ប្រធានសហជីពសេរីកម្មករកាលពីខែមករា ឆ្នាំ២០០៤ និងលោក រស់ សុវណ្ណារ៉េត សកម្មជនសហជីពសេរីកម្មករក្នុងរយៈពេលប៉ុន្មានខែក្រោយមក។
ការសម្លាប់នេះត្រូវគេជឿថា ដោយសារហេតុផលនយោបាយ។ ប៊ន សំណាង និង សុខ សំអឿន ដែលត្រូវបានផ្តន្ទាទោសឲ្យជាប់ពន្ធនាគារក្នុងម្នាក់ៗរយៈពេល២០ឆ្នាំ កាលពីឆ្នាំ២០០៥ ពីបទសម្លាប់លោក ជា វិជ្ជា នោះ ត្រូវតុលាការកំពូលសម្រេចដោះលែងកាលពីខែកញ្ញា។
លោក ថាច់ សាវ៉េត បុរសម្នាក់ដែលត្រូវបានចាប់ខ្លួនពីបទសម្លាប់លោក រស់ សុវណ្ណារ៉េត នោះត្រូវបានតុលាការកំពូលសម្រេចដោះលែងឲ្យនៅក្រៅឃំុបណ្តោះអាសន្ន កាលពីខែមីនា ឆ្នាំ២០១១ ដោយរង់ចាំការស៊ើបអង្កេតរឿងក្តីនេះឡើងវិញ។
លោក ជា មុនី ដែលជំនួសតំណែងបងប្រុស របស់លោកជាប្រធានសហជីពសេរីកម្មករនោះ បានមានប្រសាសន៍កាលពីម្សិលមិញថា លោកមិនជឿថា លោក សុផុន បានសម្លាប់ លោក ហ៊ី វុទ្ធី ទេ ហើយលោកមិនជឿថា រដ្ឋាភិបាលបានប្រឹងប្រែងស្វែងរកជន ដៃដល់ឡើយ។លោក ជា មុនី មានប្រសាសន៍ ថា “ខ្ញុំមិនជឿតុលាការទេ ហើយខ្ញុំក៏មិនជឿថា លោក សុផុន ជាឃាតករពិតដែរ។ ខ្ញុំដឹងថារដ្ឋាភិបាលមិនបានចាប់ខ្លួនឃាតករពិត ដូចករណីបងប្រុសរបស់ខ្ញុំអ៊ីចឹង”៕ សារុន