ប្រជាពលរដ្ឋបីគ្រួសារដែលពាក់ព័ន្ធក្នុងវិវាទដីធ្លី ជាមួយក្រុមហ៊ុនឯកជនមួយ បានជួបពិភាក្សាជាមួយអភិបាលរងខណ្ឌទួលគោក ក្នុងរាជធានីភ្នំពេញកាលពីម្សិលមិញ ក្នុងគោលបំណងបញ្ឈប់អ្វីដែលប្រជាពលរដ្ឋទាំងនេះបានលើកឡើងថា ជាយុទ្ធនាការបំភិតបំភ័យពីសំណាក់អ្នកជំនួញម្នាក់នាពេលបច្ចុប្បន្ន គឺលោក ឃុន ស៊ា ដើម្បីបង្ខំឲ្យពួកគាត់ចាកចេញពីលំនៅដ្ឋានរបស់ពួកគាត់។
ជំនួបរយៈពេលពីរម៉ោងបានបញ្ចប់នៅវេលាម៉ោង៤រសៀល ក៏ប៉ុន្តែ លោក ធឹម សំអាន អភិបាលរងខណ្ឌបានឲ្យដឹងថា បញ្ហានេះនៅតែមិនទាន់ត្រូវបានដោះស្រាយ ហើយថា ទាំងប្រជាពលរដ្ឋ ទាំងលោក ឃុន សៀ នឹងត្រូវធ្វើសម្បទានចំពោះគ្នា។ លោកបានមានប្រសាសន៍ថា “យើងកំពុងតែព្យាយាមសម្របសម្រួល និងសហការជាមួយប្រជាពលរដ្ឋទាំងនេះ និងក្រុមហ៊ុន ដើម្បីស្វែងរកដំណោះស្រាយមួយ ប៉ុន្តែ ពួកគេនៅតែប្រកាន់ជំហរដដែលដូចពីមុន។ ប្រសិនបើពួកគេបន្ទន់ជំហររបស់ខ្លួន បញ្ហានឹងត្រូវបានដោះស្រាយ”។
ជំនួបនេះកើតឡើងបន្ទាប់ពីប្រជាពលរដ្ឋទាំងនេះដាក់ពាក្យបណ្តឹងទៅសាលាខណ្ឌ និងសាលាដំបូងរាជធានីភ្នំពេញកាលពីខែមុន ដោយចោទនិយោជិតក្រុមហ៊ុន ឃុន ស៊ា អាហរ័ណ នីហរ័ណ ថាបានប៉ុនប៉ង់ធ្វើមនុស្សឃាត បន្ទាប់ពីថង់ពស់វែកមួយត្រូវបានបោះចូលតាមបង្អួចផ្ទះមួយ ក្នុងចំណោមផ្ទះរបស់ប្រជាពលរដ្ឋទាំងនេះ ក្នុងសង្កាត់បឹងកក់១។
ពស់វែកទាំងនេះ គឺជាសកម្មភាពចុងក្រោយនៃការវាយប្រហារច្រើនលើកទៅលើក្រុមគ្រួសារទាំងនេះ។ ពួកគេនិយាយថា សកម្មភាពទាំងនេះគឺក្រុមហ៊ុន ឃុន ស៊ា ជាអ្នកប្រព្រឹត្ត ហើយក្រុមហ៊ុននេះបានផ្តល់ប្រាក់១៥.០០០ដុល្លារឲ្យគ្រួសារនីមួយៗដើម្បីឲ្យគ្រួសារទាំងនេះចាកចេញពីលំនៅដ្ឋានដែលក្រុមហ៊ុននេះបានទិញ ក្នុងកិច្ចព្រមព្រៀងដោះដូរជាមួយរដ្ឋាភិបាលកាលពីខែមុន ក៏ប៉ុន្តែ គ្រួសារទាំងនេះលើកឡើងថា កិច្ចព្រមព្រៀងនេះផ្តល់ប្រាក់តិចពេក។
លោក ឃុន ស៊ា បានលើកឡើងតាមទូរស័ព្ទកាលពីម្សិលមិញថា ការបដិសេធរបស់គ្រួសារទាំងនេះក្នុងការរើចេញ គឺជាការទប់ស្កាត់ក្រុមហ៊ុនលោកមិនឲ្យអភិវឌ្ឍន៍ដី ដើម្បីកសាងអគារផ្ទះល្វែងដែលប៉ះពាល់ដល់អាជីវកម្មរបស់លោក។ លោកបានមានប្រសាសន៍ថា “យើងបានប្រឹងប្រែងអស់ពីសមត្ថភាពដើម្បីចរចាជាមួយពួកគាត់ ពីព្រោះពួកគាត់ក្រីក្រ ក៏ប៉ុន្តែ ពួកគាត់បដិសេធមិនទទួលការផ្តល់ឲ្យរបស់យើងនូវប្រាក់ចំនួន១៥.០០០ដុល្លារ ហើយពួកគាត់កំពុងតែទាមទារប្រាក់៣០.០០០ដុល្លារ ក្នុងមួយគ្រួសារ ដែលនេះជាទឹកប្រាក់ច្រើនពេក”។
លោកលើកឡើងបន្ថែមទៀតថា ទាំងលោក និងបុគ្គលិករបស់លោកមិនបានបោះសត្វពស់ចូលទៅក្នុងផ្ទះរបស់ប្រជាជនទាំងនោះទេ។ លោកបានបន្តថា “យើងមិនបានចោលសត្វពស់ដូចដែលពួកគាត់ចោទនោះទេ ក៏ប៉ុន្តែ ខ្ញុំសួរថា តើពួកគាត់ឆាប់ដឹងយ៉ាងឆាប់លឿន ដោយរបៀបណាថា មានសត្វពស់នៅក្នុងផ្ទះពួកគាត់ ហើយថា ម៉េចបានជាពួកគាត់ចាប់ពស់បានងាយស្រួលអីម្លេះ?”។
បន្ទាប់ពីជំនួបបានបញ្ចប់នេះ កញ្ញា លីវ ស៊ីមីង អាយុ២១ឆ្នាំ ដែលមានឪពុកអាយុ៧០ឈ្មោះ លី សៀងហេង ជាជនរងគ្រោះដោយ សារការវាយប្រហារដោយអំពើហិង្សាច្រើនលើកបានឲ្យដឹងថា ទាំងគ្រួសាររបស់នាង និងអ្នកជិតខាងរបស់នាងនឹងមិនទទួលយកការផ្តល់ឲ្យរបស់លោក ឃុន ស៊ា ទេ។
កញ្ញាបានលើកឡើងថា “ វាមិនប្រហែល នឹងតម្លៃទីផ្សារទេ ដូច្នេះយើងមិនអាចទិញផ្ទះថ្មីមួយខ្នងនៅក្នុងតំបន់នេះ ដោយចំណាយ ប្រាក់ដ៏តិចតួចនេះបានទេ ហើយយើងក៏មិនចង់រើចេញឡើយ”៕ប៊ុននី