36 C
Phnom Penh

បុរស​ប្រាំ​បី​នាក់​រំលោភ​ស្ត្រី​ម្នាក់​នៅ​​​ក្នុង​​​ខេត្ត​​​បន្ទាយ​​​មាន​​​ជ័យ​​​ តែ​នគរ​បាល​ចាប់ខ្លួន​​បាន​តែ​បីនាក់​

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ​ នគរ​បាល​បាន​ចាប់​ខ្លួន​បុរស​បីនាក់​ដែល​ត្រូវ​បាន​ចោទ​ប្រកាន់​ពី​បទ​រំលោភ​បូក​ស្ត្រី​អាយុ​១៨​ឆ្នាំ​ម្នាក់​នៅ​ក្នុង​ខេត្ត​បន្ទាយ​មាន​ជ័យ​កាលពីយប់​ថ្ងៃ​សុក្រ ចំណែក​ឯជន​សង្ស័យ​ប្រាំនាក់​ទៀត ដែលជាប់​​ពាក់​ព័ន្ធ​នៅ​ក្នុង​ការ​រំលោភ​នេះ​ដែរ​កំពុង​រត់​គេច​ខ្លួន​នៅឡើយ​។

លោក ប៉េ ប៊ុនចុង មេបញ្ជាការ​រង​កង​រាជ​​​អាវុធ​ហត្ថ​ស្រុក​ម៉ាឡៃ បានមាន​ប្រសា​សន៍​ថា មន្ត្រី​របស់​លោក​បាន​ចាប់​ផ្ដើម​ស៊ើប​​​អង្កេត​​​​​​​បទ​ឧក្រិដ្ឋ​នេះ​​បន្ទាប់​ពី​ជន​រង​គ្រោះ​បាន​ដាក់​ពាក្យ​បណ្ដឹង​ទៅ​អង្គការ​សិទ្ធិ​មនុស្ស​អាដហុក កាលពីថ្ងៃ​ច័ន្ទ ហើយ​ពាក្យ​បណ្ដឹង​នេះ​ត្រូវ​បាន​បញ្ជូន​បន្ត​មក​កង​រាជ​អាវុធ​ហត្ថ​។ លោក ប៊ុន​ចុង ​មាន​ប្រសាសន៍​ថា “យើង​​​​​​​​​​​បាន​ចាប់​ខ្លួន​ជន​សង្ស័យ​បីនាក់ ប៉ុន្តែ​យើង​កំពុង​ស្វែង​រក​ជន​សង្ស័យ​ដទៃ​ទៀត​ដែល​ជាប់​ពាក់​ព័ន្ធ​ក្នុង​ករណីរំលោភ​បូក​ស្ត្រី​អាយុ​១៨​ឆ្នាំរូប​នេះ​”។

លោក​បាន​មានប្រសាសន៍​ថា កង​រាជ​អាវុធ​​​​​​​ហត្ថ​បាន​ចាប់​ខ្លួន​ជន​សង្ស័យ​ឈ្មោះ រិទ្ធ​ សុភាព អាយុ​១៨​ឆ្នាំ​កាលពីថ្ងៃច័ន្ទ ហើយ​​បន្ទាប់មក​​បាន​​ចាប់ខ្លួន​ឈ្មោះ ញឹម ធ្នូ និង​ ឃួន វុទ្ធីសែន ដែល​​មាន​អាយុ​១៩​ឆ្នាំដូច​គ្នា កាល​ពី​ថ្ងៃ​អង្គារ ប៉ុន្តែ​យើង​កំពុង​ស្វែង​រក​ជន​សង្ស័យ​ប្រាំ​នាក់​ទៀត​ដែល​តាម​ការ​អះ​អាង​ថា បាន​ជាប់​ពាក់​ព័ន្ធ​ក្នុង​ករណី​រំលោភ​បូក​​នេះ​ដែរ។

​លោក ប៊ុនចុង បាន​មាន​ប្រសាសន៍​ថា យើង​ចាប់​ខ្លួន​បាន​ជន​សង្ស័យ​បីនាក់​នៅ​ផ្ទះ​របស់​ពួកគេ​តែម្ដង​ ហើយ​យើង​កំពុង​ស្វែង​រក​ចាប់​ខ្លួន​ជន​សង្ស័យ​ដទៃ​ទៀត​ដែល​ជាប់​ពាក់​ព័ន្ធ​នៅ​ក្នុងករណី​រំលោភ​នេះ​។ លោក​បាន​មាន​ប្រសាសន៍​បន្ថែម​ទៀត​ថា ជន​សង្ស័យ​ទាំង​បីនាក់​នេះ​សារ​ភាព​ថា ពួកគេ​ពិត​​ជា​បាន​ប្រព្រឹត្ត​បទឧក្រិដ្ឋ​នេះ​មែន​។ លោក​បាន​មាន​ប្រសាសន៍​ថា ពួកគេ​នឹង​ត្រូវ​​បញ្ជូន​ទៅ​សាលា​ដំបូង​ខេត្ត​នៅ​ថ្ងៃ​នេះ ដើម្បី​​​​​​​ធ្វើការ​ចោទ​ប្រកាន់​។

ស្ត្រី​រង​គ្រោះ​បាន​ប្រាប់​នគរ​បាល​ថា នាង​បាន​ជិះ​ម៉ូតូ​ត្រឡប់មក​ផ្ទះវិញ​​ បន្ទាប់​ពី​បាន​ទៅចូល​រួម​ពិធីបុណ្យនៅ​វត្ត​មួយ​កាលពី​ថ្ងៃ​សុក្រ ស្រាប់​តែ​ម៉ូតូ​របស់​នាង​ខូច ហើយ​​នាង​បង្ខំចិត្ត​ចុះ​បណ្ដើរ​មក​ផ្ទះ​តែ​ម្នាក់​ឯង​នៅ​ម៉ោង​ប្រហែល​១០​និង​៣០​​នាទីយប់​។ បុរស​ឈ្មោះ សុភាព ដែល​នគរ​បាល​បាន​និយាយ​ថា ​ត្រូវ​ជា​មិត្ត​ប្រុស​​ជន​រង​គ្រោះ ​​​​​​​បាន​ដើរ​មក​ក្បែរ​នាង ហើយ​បាន​ចាប់​នាង​ដោយ​​​​​​​​​​​​​​​​យក​ដៃ​ខ្ទប់​មាត់​។ បុរស​រូប​នេះ​បាន​អូស​នាង​ចូ​ល​ទៅ​ក្នុង​បរិវេណសាលា​បឋម​សិក្សា​មួយ​ ហើយ​បាន​ចាប់​រំលោភ​នាង​តែ​​​ម្ដង​។ លោក ប៊ុនចុង បាន​មាន​ប្រសាសន៍​ថា បន្ទាប់​មក​ជន​នេះ​ “បាន​ហៅ​មិត្ត​ភក្ដិ​របស់​ខ្លួន និង​មនុស្ស​ប្រហែល​១០​នាក់ទៀត​មក​ចាប់​រំលោភ​នាង​ម្នាក់​ម្ដង​ៗ​”។

លោក សាយ គីម នាយ​រង​ប៉ុស្តិ៍​ឃុំ​ទួល​ពង្រ បាន​មាន​ប្រសាសន៍​ថា ជន​រង​គ្រោះ​​​​​​​​និយាយ​​​​​​​​​​ថា បុរសឈ្មោះ​ សុភាព នេះ​បាន​សន្យា​រៀប​ការ​ជាមួយ​នាង​ប្រសិន​បើ​នាង​ស្បថ​ថា​មិន​និយាយ​ពីការ​រំលោភ​នេះឲ្យ​គេដឹង​​ ឬ​ដាក់​ពាក្យ​បណ្ដឹង​ប្ដឹង​ខ្លួន​នោះ​ ជា​សំណើ​ដែល​ដំបូង​ឡើយ​នាង​បាន​ទទួល​យក​ដើម្បី​រក្សា​ភាព​ថ្លៃ​ថ្នូររបស់​នាង​។ លោក​មាន​ប្រសា​​​សន៍​​​​ថា “ពីដំបូង​ជន​រង​គ្រោះ​បាន​យល់​ព្រម​តាម​សំណើ​របស់​ជន​សង្ស័យ​សុំ​រៀប​ការ​​ជាមួយ​នាង​​ប្រសិន​បើ​នាង​មិន​ធ្វើការ​ចោទ​​ប្រកាន់​ដើម្បី​ចៀស​វាង​នូវ​ភាព​អាម៉ាស់​ដោយ​សារ​​គេ​ចាប់​រំលោភ​​”។ លោក​​មាន​ប្រសាសន៍​ថា ទោះ​ជា​យ៉ាង​​ណា នាង​បាន​ប្ដូរ​ចិត្ត​ ហើយ​បាន​​ដាក់​ពាក្យ​​​​​​​បណ្ដឹង​កាលពីថ្ងៃច័ន្ទ៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស