ទីភ្នាក់ងារព័ត៌មានផ្លូវការរបស់គណបក្សកុម្មុយនិស្តចិន កាលពីថ្ងៃពុធ បានចេញផ្សាយអត្ថបទមួយ ដែលមានខ្លឹមសាររិះគន់រដ្ឋាភិបាលរបស់លោកនាយករដ្ឋមន្ត្រី ហ៊ុន សែន ដោយសារតែលោកទទួលបរាជ័យ ក្នុងការដោះស្រាយបញ្ហាចលាចលនយោបាយក្នុងប្រទេសកម្ពុជា និងអំពាវនាវឲ្យមាន “ការ កែទម្រង់ច្បាស់លាស់ និងស៊ីជម្រៅ” ក្នុងប្រទេសនេះ សម្រាប់រយៈពេលប្រាំឆ្នាំខាងមុខ។
ទីភ្នាក់ងារព័ត៌មាន ស៊ីនហួរ (Xinhua News Agency) ដែលផលិតព័ត៌មានក្រោមការត្រួតពិនិត្យរបស់រដ្ឋាភិបាលនៃប្រទេសចិន បានរៀបរាប់អំពីភាពមិនចុះសម្រុងនឹងគ្នានៅក្នុងប្រទេសកម្ពុជា តាំងពីពេលដែល “ការបោះឆ្នោតជាតិពោរពេញដោយជម្លោះ” បានកន្លងផុតកាលពីថ្ងៃទី២៨ខែកក្កដា និងបានដក ស្រង់សម្តីរបស់អ្នកវិភាគនយោបាយជាច្រើន នាក់នៅក្នុងប្រទេសកម្ពុជាដែលបានអំពាវនាវឲ្យលោក ហ៊ុន សែន ធ្វើការផ្លាស់ប្តូរដើម្បី ស្តារប្រជាប្រិយភាពរបស់ខ្លួនឡើងវិញ។
សេចក្តីរាយការណ៍របស់ទីភ្នាក់ងារព័ត៌ មាននេះក៏បានដកស្រង់សម្តីរបស់លោក សុខ ទូច អ្នកវិភាគនយោបាយ ក្នុងសមាសភាពជានាយករងវិទ្យាស្ថានមួយនៅរាជបណ្ឌិតសភាកម្ពុជា ដោយលើកឡើងថា លោក ហ៊ុន សែន បាត់បង់ប្រជាប្រិយភាពយ៉ាងច្រើន ដោយសារ តែគណបក្សប្រជាជនមិនព្រមកែទម្រង់ ។
លោក សុខ ទូច បានសន្និដ្ឋានថា “ការធ្លាក់ ប្រជាប្រិយភាពរបស់លោក ហ៊ុន សែន និង គណបក្សរបស់លោក ដោយសារតែបញ្ហាបក្ខពួកនិយម អំពើពុករលួយចាក់ស្រេះ ការបណ្តេញចេញដោយបង្ខំ អន្តោប្រវេសន៍ខុស ច្បាប់ និងកង្វះរបាយការណ៍ប្រកបដោយឯករាជភាព”។
អត្ថបទរិះគន់នេះក៏បានផ្តោតសំខាន់ទៅលើឥទ្ធិពលនៃបញ្ហាទាំងនេះទៅលើយុវជនផងដែរ។ អត្ថបទនេះមានខ្លឹមសារថា “ប្រជាជនវ័យក្មេងភាគច្រើនគាំទ្រ [មេដឹកនាំគណបក្សប្រឆាំង] លោក សម រង្ស៊ី នឹងបោះ ឆ្នោតគាំទ្រគណបក្សសង្គ្រោះជាតិក្នុងប្រទេសកម្ពុជា ដែលមានប្រជាជនសរុបចំនួន១៤,៦៨លាននាក់ក្នុងនោះ៣០ភាគរយមានអាយុពី១៥ទៅ២៤ឆ្នាំ”។
អត្ថបទដដែលមានខ្លឹមសារបន្តទៀតថា “មូលហេតុមួយផ្សេងទៀតដែលធ្វើឲ្យគណបក្សប្រជាជនកម្ពុជាបាត់បង់អ្នកគាំទ្រយ៉ាងច្រើន អំឡុងរយៈពេលប្រាំឆ្នាំកន្លងមកនេះ គឺ ដោយសារតែប្រជាជនក្រីក្រជាច្រើនមិនបាន ទទួលផលប្រយោជន៍ពីកំណើនសេដ្ឋកិច្ចប្រកបដោយនិរន្តរភាពទេ ទោះបីជាប្រជាជន កម្ពុជាសម្រេចបានកំណើននេះក៏ដោយ” ។ បញ្ហាទាំងនេះបានកើតឡើងចេញពីការត្អូញត្អែររបស់យុវជននិងប្រជាជនក្រីក្រ ចំពោះលោក ហ៊ុន សែន។ មិនតែប៉ុណ្ណោះ ក៏មានមន្ទិលសង្ស័យយ៉ាងច្រើនអំពីលទ្ធផលនៃការបោះឆ្នោតកាលពីខែកក្កដា ជាហេតុបណ្តាល ឲ្យមានការព្រួយបារម្ភពីស្ថានភាពនៃស្ថិរភាពនៅក្នុងប្រទេសកម្ពុជា នេះបើយោងតាមសេចក្តីពន្យល់នៅក្នុងសេចក្តីរាយការណ៍របស់ទីភ្នាក់ងារព័ត៌មានរដ្ឋចិននេះ។
អត្ថបទដដែលក៏មានខ្លឹមសារបន្ថែមទៀតថា “រយៈពេលបួនខែក្រោយពេលបោះឆ្នោត កម្ពុជា នៅតែជាប់ក្នុងចលាចលនយោបាយ ដោយសារតែគណបក្សប្រឆាំងនៅតែបន្តធ្វើពហិការសភា ដើម្បីតវ៉ាលទ្ធផលបោះឆ្នោត”។ គណៈកម្មាធិការជាតិរៀបចំការបោះឆ្នោត បានប្រកាសថា គណៈបក្សសង្គ្រោះជាតិទទួល បាន៥៥អាសនៈក្នុងចំណោម១២៣អាសនៈនៅក្នុងរដ្ឋសភា កាលពីខែកញ្ញា ក៏ប៉ុន្តែគណបក្សប្រឆាំងបាននិងកំពុងធ្វើពហិការមិន ព្រមទទួលយកអាសនៈរបស់ខ្លួន និងបានធ្វើមហាបាតុកម្ម ដើម្បីទាមទារឲ្យមានការស៊ើបអង្កេតឯករាជ្យ។
គណបក្សសង្គ្រោះជាតិមានផែនការធ្វើបាតុកម្មប្រចាំសប្តាហ៍នៅក្នុងរាជធានីភ្នំពេញ ដើម្បីជំទាស់ភាពស្របច្បាប់របស់រដ្ឋាភិបាលរបស់គណបក្សប្រជាជនកម្ពុជា ដែលនឹងចាប់ផ្តើមដំណើរការនៅថ្ងៃទី១៥ ខែធ្នូ ។
សេចក្តីរាយការណ៍របស់ទីភ្នាក់ងារព័ត៌មាន ស៊ីនហួរ ដែលតំណាងឲ្យការវាយប្រហារ មួយដែលមិនធ្លាប់មានពីមុនមក និងជាការ វាយប្រហារពិសេសមួយទៅលើរដ្ឋាភិបាលរបស់លោក ហ៊ុន សែន ពីសំណាក់សារនាំពាក្យ រដ្ឋរបស់ប្រទេសចិន ដែលស្ថិតក្នុងចំណោមសម្ព័ន្ធមិត្រយ៉ាងជិតស្និទ្ធរបស់នាយករដ្ឋមន្ត្រីរូបនេះ បានបញ្ចប់ខ្លឹមសាររបស់ខ្លួន ដោយការដកស្រង់សម្តីរបស់មន្ត្រីរដ្ឋាភិបាលពីររូប ដែលថ្លែងការពារចំណាត់ការថ្មីៗរបស់ គណបក្សប្រជាជនកម្ពុជា ដើម្បីចាប់ផ្តើមកម្មវិធីកំណែទម្រង់ផ្សេងៗ។
អត្ថបទរាយការណ៍នេះ បានដកស្រង់សម្តីរបស់លោក រស់ ច័ន្ទត្រាបុត្រ ទីប្រឹក្សា លោកនាយករដ្ឋមន្ត្រី ហ៊ុន សែន និងលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី ដែលបានលើកឡើងថា កម្មវិធីកំណែទម្រង់នឹងត្រូវការពេលវេលាសម្រាប់អនុវត្ត។ លោក រស់ ច័ន្ទត្រាបុត្រ ត្រូវបានដកស្រង់ សម្តីដែលលើកឡើងថា “យើងត្រូវរង់ចាំយ៉ាងតិចពីរ ឬក៏បីឆ្នាំ ដើម្បីឃើញលទ្ធផល” ។
លោក កែម ឡី អ្នកវិភាគនយោបាយ ដែល ត្រូវបានដកស្រង់សម្តីនៅក្នុងសេចក្តីរាយការណ៍របស់ទីភ្នាក់ងារព័ត៌មានស៊ីនហួរដោយ លើកឡើងថា លោកមិនជឿថា លោក ហ៊ុន សែន អាចកែទម្រង់ទេ ផ្អែកលើឥរិយាបថ របស់លោកតាំងពីពេលបោះឆ្នោតក្នុងខែកក្កដាមកនោះ បានលើកឡើងកាលពីម្សិលមិញថា អត្ថបទនេះ គឺជាការព្រមានមួយពីប្រទេសចិន។
លោក កែម ឡី បានមានប្រសាសន៍ថា “ប្រទេសចិនរក្សាស្ថានភាពនៅទីនេះ ពួកគេត្រូវការដៃរបស់ប្រទេសកម្ពុជានៅក្នុងអាស៊ាន និងសម្រាប់ជម្លោះសមុទ្រចិនខាងត្បូង ពោល គឺពួកគេត្រូវការស្ថិរភាពនៅទីនេះ”។
លោក សុខ ទូច បានលើកឡើងផងដែរថា អត្ថបទរិះគន់ខ្លាំងជាសាធារណៈទៅលើលោក ហ៊ុន សែន គឺជាសារមួយចេញពីមេដឹកនាំច្បាមឥទ្ធិពលរបស់ប្រទេសចិន ហើយថា ការកែទម្រង់លែងអាចត្រូវបានចាត់ទុកជាល្បែងមួយលេងដោយមេដឹកនាំគណបក្សប្រជាជនទៀតហើយ។ លោកបានមានប្រសាសន៍ថា “ប្រទេសចិនខ្លាចកម្ពុជាធ្លាក់ចូលក្នុងស្ថានភាពប្រហាក់ប្រហែលនឹងប្រទេសថៃ ដូច្នេះចិនចង់ឲ្យរដ្ឋា ភិបាលអនុវត្តកម្មវិធីកែទម្រង់បែបនេះ”។
លោក ផៃ ស៊ីផាន បានលើកឡើងថា អត្ថបទដែលទីភ្នាក់ងារព័ត៌មានរដ្ឋចិន ស៊ីនហួរ បាន ចេញផ្សាយ មិនមែនជាការវាយប្រហារទៅលើលោក ហ៊ុន សែន ឬក៏គណបក្សប្រជាជនទេ ក៏ប៉ុន្តែវាជាការវាយតម្លៃសមហេតុសមផលទៅលើស្ថានភាពនយោបាយនៅក្នុងប្រទេសកម្ពុជា។
លោក ផៃ ស៊ីផាន បានមានប្រសាសន៍ថា “ក្នុងនាមជារដ្ឋឯករាជ្យ យើងមិនត្រូវការការ បញ្ជារបស់នរណាម្នាក់ឲ្យធ្វើអ្វីមួយទេ។ យើងខ្លួនឯងប្តេជ្ញាធ្វើឲ្យស្ថានភាពមានភាពល្អប្រសើរឡើង”។ លោកបានលើកឡើងបន្ថែមទៀតថា កម្មវិធីកំណែទម្រង់កំពុងតែដំណើរការ៕ សុធា