កាលពីថ្ងៃពុធ សហគមន៍ជនជាតិភាគតិចព្នងដែលស្ថិតនៅក្នុងស្រុក កែវសីមា ខេត្តមណ្ឌលគីរីបានដាក់ពាក្យបណ្តឹងមួយដោយអះអាងថាអាជ្ញាធរបានបំផ្លិចបំផ្លាញផ្ទះសំបែងរបស់ពួកគាត់ ប៉ុន្តែអាជ្ញាធរបានចោទថា អ្នកភូមិជនជាតិភាគតិចព្នងទាំងនេះកំពុង តែរស់នៅលើដី ដែលជាកម្មសិទ្ធិរបស់ក្រុមហ៊ុនឯកជន។
អ្នកភូមិអះអាងថា ចាប់តាំងពីខែវិច្ឆិកា មក ផ្ទះចំនួន៣៧ខ្នងនៅក្នុងឃុំស្រែឈូក ត្រូវបានកម្ទេច ដោយផ្ទះខ្លះត្រូវបានដុតឲ្យក្លាយទៅជាផេះក្រោមស្នាដៃអាជ្ញាធរនិងតំណាងរដ្ឋបាលព្រៃឈើ ព្រមទាំងកងរាជអាវុធហត្ថផងដែរ។ ប៉ុន្តែ លោក ស៊ុន វណ្ណវុធ អភិបាលស្រុកកែវសីមា បានអះអាងថា អាជ្ញាធរបានជូនដំណឹងជាច្រើនលើកច្រើនសាឲ្យអ្នកភូមិចាកចេញមុនពេលអាជ្ញាធរចាត់វិធានការ។
លោក ស៊ុន វណ្ណវុធ មានប្រសាសន៍ដោយបដិសេធមិនបញ្ចេញឈ្មោះក្រុមហ៊ុនថា “ប្រជាពលរដ្ឋកំពុងរស់នៅដោយខុសច្បាប់ និងគ្មានសណ្តាប់ធ្នាប់នៅក្នុងតំបន់ដីសម្បទានសេដ្ឋកិច្ចពិសេសរបស់ក្រុមហ៊ុនឯកជនដែលរដ្ឋាភិបាលផ្តល់សិទ្ធិឲ្យកាន់កាប់”។ លោកបានបន្ថែមថា “ អាជ្ញាធរបានប្រាប់ប្រជាពលរដ្ឋទាំងនេះឲ្យចាកចេញជាច្រើនលើកច្រើនសាពីតំបន់ដីសម្បទានសេដ្ឋកិច្ចនេះ។ ផ្ទះរបស់ពួកគាត់តូចៗ និងងាយស្រួលប្តូរទីតាំង ប៉ុន្តែ ពួកគាត់បានធ្វើព្រងើយកន្តើយចំពោះ [បទបញ្ជានេះ] “។ លោកបានបដិសេធថា អាជ្ញាធរពុំបានដុតផ្ទះណាមួយរបស់អ្នកភូមិឡើយ។
លោក កុល ហៀល តំណាងអ្នកភូមិចំនួន២៥០គ្រួសារ ដែលរស់នៅក្នុងតំបន់នេះចាប់តាំងពីឆ្នាំ២០១០មក បានឲ្យដឹងថា ពាក្យបណ្តឹង ដែលប្តឹងទៅកាន់សាលាដំបូងខេត្តមណ្ឌលគិរីត្រូវបានគេច្រានចោល ហើយលោកបានអះអាងថា អាជ្ញាធរបានប្រើធម៌ក្តៅនៅពេលដេញប្រជាពលរដ្ឋចេញពីផ្ទះសំបែងរបស់ពួកគាត់។
លោកបាននិយាយថា “យើងបានដាក់ពាក្យបណ្តឹងទៅតុលាការដែរ តែពួកគេបានច្រានចោល ព្រោះវាមិនច្បាស់ថា តើនរណាជាជនបង្កហេតុ។ ប៉ុន្តែ អាជ្ញាធរខេត្តបានទទួលពាក្យបណ្តឹងនេះហើយ”។ បណ្តឹងរបស់ពួកគាត់មានខ្លឹមសារថា “ផ្ទះសំបែងរបស់អ្នកភូមិត្រូវអាជ្ញាធរដុត និងកម្ទេច។ អាជ្ញាធរចោទថា យើងរស់នៅក្នុងតំបន់នេះដោយខុសច្បាប់”។
យើងចង់ឲ្យអាជ្ញាធរពាក់ព័ន្ធផ្សេងៗផ្តល់ប្រាក់សំណងមកឲ្យយើងចំពោះការខូចខាត ដែលកើតមាននៅក្នុងភូមិចំនួនបី ហើយយើងសូមស្នើឲ្យអាជ្ញាធរផ្តល់ដីសម្បទានសង្គមដល់គ្រួសារនីមួយៗ ហើយយើងនឹងមិនរើផ្ទះទៅណាឡើយ រហូតទាល់តែពួកគេដោះស្រាយបញ្ហានេះរួច។
នៅពេលទាក់ទងបានកាលពីយប់មិញ លោក ឯម សុភក្តិជាអ្នកសម្របសម្រួលនៅមជ្ឈមណ្ឌលអប់រំច្បាប់សម្រាប់សហគមន៍ប្រចាំខេត្តមណ្ឌលគិរី បានឲ្យដឹងថា អ្នកភូមិត្រូវបានបណ្តេញចេញដោយសារពួកគាត់រស់នៅលើដីដែលត្រូវបានលក់ឲ្យក្រុមហ៊ុនចម្ការកៅស៊ូវៀតណាមមួយ និងក្រុមហ៊ុនម្ចាស់ចម្ការដំឡូងមីមួយ។
លោក សុភក្តិ បាននិយាយថា “តំបន់នេះបានក្លាយទៅជាតំបន់ដីសម្បទានសេដ្ឋកិច្ចរបស់ក្រុមហ៊ុនវៀតណាម Binh Phuoc និងក្រុមហ៊ុន សុវណ្ណរាជសី។ អាជ្ញាធរបានរក្សាទុកដីទាំងនេះឲ្យក្រុមហ៊ុនទាំងពីរនេះ”៕ស៊ុយឈាង